ما كان في الحسبان يقوى الهجر أعز انسان//للكاتبة:بنت بلادي

30 End

البارت الثلاثين والاخير :

&
:
&
بسم الله..استغفرالله.. لاحول ولاقوة الا بالله..سبحان الله
_____

مابغيتك من فراغ ولا تمنيتك عبث
ولا أبي لك نهاية ولا أدور لك بديل

.....
مر ٦ شهور واسبوعين
تغير وقتها كثير امور بعد مانتشر خبر وفاة قمر
والي كان فاجعة للكل..تعبت ام عادل عليهم وصابها
شلل بالحركه والنطق واصحبت عاجزه عن الكلام والحركه
فترت العزا كانت ثقيله على الجميع..بين تعب ام عادل
و وفاة بنتها..وبين ثامر وامر سجنه والغرامه
جالسه نوره وبيدها كوب الشاهي تناظر من شباك غرفتها
بسرحات تفكر بامور كثيره....
كل شي انقلب على بعضه كانت دعوة يتيمه وصابت
" عسى الله ينتقم منكم " مانساها ابد قالتها مقهوره
ودعوة المظلوم دايم مستجابه.."تنهدت تنزل كوبها"
ريم صار لها اسبوعين من دخلت شهرها ويمكن تولد
في اي لحظه.."ناظرت لغرفتها لثواني تتأملها
ثم ابتسمت براحه بال" صار لي شهر من وقت
حفلتي والي كانت محفوفه عشان وفاة قمر بنت اختي
بنهايه مايرضا قلبي احتفل باكبر القاعات و وفاتها
ما مر عليه وقت ..والحمدالله مرتاحه ماتوقعت
انه تعامله بيكون كذا طيب وحنون..عوضني عن
الحنان والاحترام الي فقدته بين اهلي..بناته بالبدايه
كان في رسميه وحذر من جهتهم حاولت اكسره مثل
مانصحتني ريم وكيف انه تعاملي معها باول لقاء
اثر وكثير فيها..وصحيح قدرت اتقرب منهم ماهو
بشكل الكبير لكن احسن بكثير من اول اسبوع..
فرحتنيي كثير جيت بنات اخو سلطان بوقت حفلتي
كنت متوتره وخاصه انه بدون اغاني صاخبه
مجرد زفه..وبين اهلي ومايحتاج اشرح وش كثر
نفسياتهم مره حلوه هه..لكن بعد مادخلت ريم
وبنات اخوان سلطان..فرحوني بضحكهم
ورقصهم وزفتهم لي..حسيت اني صدق عروس
خاصه دانه والي مره شخصيتها تعجبني تكسر
الرسميه بسرعه .. الله يعين الي ملكت عليه عليها لسان
رفعت جوالها بعد ماوصلت لها رساله
"سلمان: انا انتظركم تحت"
"سلمان: جاهزين ياقلبي..؟"
زادت ابتسامتها وهي تكتب له
"ايوا جاهزين"
سكرت جوالها ورفعت الكوب توجهة
للمطبخ غسلت كوبها ثم حطته على جنب
طلعت متجهه لغرفة البنات وقبل تدخل ضربت الباب
ضربتين عالخفيف ثم فتحته وهي تطل براسها ببتسامه:بنات
ابوكم تحت جاهزين صح..؟
رفعت منار راسها لها:اي خلصنا بس بلبس ريوف جزمتها
دخلت نوره وجلست بجنب منار واخذت الجزمه من ايدها
تلبس ريوف: روحي لابوك بلبسها وانزل معها
سحبت منار الجزمه بمعارضه: لا خاله ماودي ازعج..
رفعت نوره راسها بعتب:منار وبعدين انا وش قلت
حنا اهل وعايله ومابينا ازعاج ابد ولازم نتعاون
وبعدين انتي مانمتي عدل وين لك خلق تلبسين
روحي عند ابوك وماعليك يالله اشوف قدامي
ولا ترى بزعل عليك هاه..؟
تنهدت منار بستجابه: طيب..
طلعت لابوها تاركه نوره وريوف الصغيره
تسولف وتضحك معها وهي تلبسها

.......
في بيت ابو صالح
واقفه قدام المرايه تناظر لفستانها الاصفر والناعم
وبطنها البارز بوضوح ..لابسه ربطه على شعرها
.....:على وين..؟
لفت بانتباه لسلطان والي كان توه صاحي:البنات
بيجون بعد شوي تحت نتقهوه ونسولف قلت اتجهز
وش عندك صاحي الحين وانت عندك اجازه
قرب لها وحضنها من ورا بخمول وباسها
من خدها ببحه: شبعت نوم والبركه فيك
ضحكت ريم وهي تتصنع البرائه: وانا وش دخلني
ناظر لها من المرايه وهو رافع حاجبه:والي من دخلت
شهرها كل مانمت قامت تصيح بولد منهو..؟
نومي صار خفيف والسبب انتي وكرشتك
ناظرت له ريم بصدمه من المرايه: كرشتي..؟
تحمحم سلطان :ورعنا اقصد وش بك يافديته
وفديت الكرشه الي بتجيبه لي..مدحه لاتزعلين
بعدت ريم يده عنها بضيق:ابعد ولعاد تكلمني
اخذت جلالها للاحتياط اذا كان في احد
ببرود وبدون لاتناظر لسلطان نزلت تاركته
يحرك شعره بضيق: وش قلت انا
دخل يده بجيبه وبيده الثانيه رفع جواله
دخل على محادثتهم وكتب
"على فكره لبسك حلو.."
عض على شفته كاتم ضحكته على ردها
ريم :
" بعد وش..بعد ماحطمتني "
كتب لها وهو داخل للمطبخ يسخن له مويه
"افا..تكذبيني والله اني صادق "
طلع يده من جيبه وسحب ظرف القهوه
على وصول رسالتها
" اي مره ماشاءالله "
"وصلو البنات اكلمك بعدين "
اخذ قهوته الحار وطلع وهو يكتب لها
بضيق من بنات اخوانه والي زياراتهم
كثييره مره هالفتره لريم..
" اذا ولدتي لعاد اشوفهم هذا انا اقول لك "
جلس وشغل له على فلم اكشن لكن
ماكان منتبه كثير عليه سرح بالشهور الي فاتت
بدايتها كانت ريم هاديه بعد موت قريبتها
ماتوقع انها بتحزن عليها على الي سمعه
وشافه من معاملتهم لها..ابتسم على جنب لثواني
بعد ماتذكر ريم ووقت دخولها لشهرها الخامس
راحت تشوف جنس الجنين ورفضت تعلمه
ولحد الان رافضه وبباله متاكد على ذا الرفض
انه الي ببطنها مو بنت..واضح ماتبي تتفشل
بعد ماكان يصر عليها بالولد..ولا وش السبب
في انها ترفض تعلمه غير كذا..؟
وبخصوص بطنها وانتفاخها باخر شهور حملها
الود وده يخليها كل سنه تحمل اذا بتكون كذا
مستلطف شكلها بالحمل ..
قاطع سرحانه صوت الاتصال من جواله
رفع الجوال يناظر بلاسم الي بشاشه
" النسيب سعود "
ضحك بسخريه وهو يرد :الوو
سعود : هلاا ابو عبدالله
سلطان: اقول وش عندك ماخذ جوالي
وكاتب النسيب سعود..؟
سعود: افا لازم تعتز فيني خلاص
انا نسيبكم..
سلطان : نسيب اخوي انا وش دخلني
المهم وش عندك متصل..؟
سعود : اييه..وينك انت ماتنشاف
سلطان: طلعاتكم كلها للبر.. وانا رجال
حرمتي بتولد في اي لحظه وين اخليها
سعود: اكشخخ بتصير ابو وتثقل علينا يعني
وبعدين وش بك مستعجل بدري على الثقل وسحبات
تعال انا تحت عند مجلسكم سالم اصر اروح معه
وصل له صوت صراخ سالم: يا الكذوب انت الي ساحبنيي
سعود:ماتخلي الواحد يفلم شوي انت..الووو سلطان معي ولا..
سلطان بانزعاج: معك معك يالمزعج وين بروح يعني
يالله ابدل وانزل لكم..ولا بعد على كيفكم جايين بدون عزيمه
سعود:هههههههههههههههه نحبك وش نسوي
سلطان ضحك بستسلام منه : سكر بس والعقل..