ما كان في الحسبان يقوى الهجر أعز انسان//للكاتبة:بنت بلادي

10

البارت العاشر:

&
:
&
بسم الله..استغفرالله.. لاحول ولاقوة الا بالله..سبحان الله
_____

يا كثر ماجيت لك والحظ يمنعني
اجيك دايم لحالي وارجع لحالي

الي ابعرفه شي واحد اشغل تفكيري
أنا اجي ببالك مثل م أنت تجي ببالي

...
اليوم الثاني
الصباح

دخل سلطان بلأمس للمستشفى بوقت متاخر بالليل
بعد ماتكلم مع ابو سعد بخصوص موضوع الملكه
بينما ريم نايمه بعد ماعطوها مهدي بسبب انهيارها وبكيها
طمنه الدكتور انه حالتها متوجهه للاحسن
بعد ماصارت تطلع الي فيها وماتحبسه
اما نوره طلعت للبيت تحت توصيات سلطان لها
انها ماكلمته ولا لها دخل بالموضوع كله وانه وجوده كان مجرد صدفه
احسن لها عشان تبعد عن اي مشكله ممكن تواجها من جهة اخوانها
جلس سلطان الليل كله عند الكراسي المقابله لغرفتها
ماهو متطمن يخليها بروحها بعد الي سواه بولدهم
غفى له شوي اللين اشرقت الشمس
وبدا يوم جديد
صحى فيه سلطان يتطمن على ريم من خلال الممرضات
ثم بعدها اتصل واكد على ابو سعد انه يجي للمستشفى
عشان موضوع التحاليل لزواجه من ريم
وحاليا جالس وينتظر ابو سعد وبيده قهوته
وقف بس لمح زوله من بعيد
تقدم ابو سعد بضيق :هذا انا جيت
رد سلطان بستهزاء:ترى السلام واجب
ناظر له ابو سعد بضيق :اخلص علي
رد عليه سلطان بكره:اصبر اول باخذ راي ريم وبعدها يصير خير
تعدى سلطان ابو سعد بعدم اهتمام
متوجهه لغرفة ريم الي كانت الممرضه عندها
تقدم بهدوء وسحب له اقرب كرسي:صباح الخير
ناظرت له ريم بهدوء ماهي مصدقه انه سلطان وبعد هالسنين هاذي قدامها همست بهدوء وبحه:صباح النور
ناظر سلطان لساعة يده لثواني ثم شبك يدينه يفكر كيف يفتح الموضوع لها ناظر لها :اسمعي يا ريم عشان اقدر اطلعك من هنا ومن بيت اهلك بكبره احتاج موافقتك
ناظرت له ريم لثواني بستغراب ثم همست:موافقتي ب وش؟
رد سلطان وعينه بعينها وبجديه:زواجك مني
توسعت عيون ريم بصدمه من الي سمعته زواجها؟ هي وسلطان؟
ناظر سلطان لردة فعلها وبباله انها خايفه: انا عارف انه يمكن ماودك ولا عاجبك ابد بعد التجربه الي مريتي فيها لكن خليني اساعدك يا ريم
واطلعك من هنا
وانتي عارفه اني ماحل لك وعشان اقدر اطلعك لازم يكون الي بيننا حلال
وش قولك؟ عمك برا وبيكمل اجرائات التحاليل ومو ناقص الا رايك(وبجديه) وتأكدي مابي الا رضاك بذا الموضوع
صدت عنه باحراج وش ترد موافقه كذا؟ ماتقدر
ناظر لها سلطان كيف
صدت عنه باحراج:احمم يعني اعتبر الصد علامة رضا ولا وش؟
انتظر دقيقه بدون رد
وقف بعد ماتلقى صمت من ريم الي صدت اكثر وصدمته:هههه طيب ترى باخذها على انها موافقه كذا ...؟ ترى بطلع؟
ولحد الان مستمره ريم بصد
انتظر ثواني ثم
تحرك طالع لبرا باحراج من طريقة رد ريم:يحليلها صايره تستحي
طلع سلطان جواله مغير ملامح وجهه للجديه وهو يناظر لابو سعد الي جالس بعيد
ينتظر الرد :الوو
وصل له صوت قريب لقلبه:ياهلا والله
ابتسم بحب:حي هالصوت اخبارك يا ام صالح
ام صالح:ماني بخير يالقاطع ماتقول عندي ام اجيها واسأل عنها
سلطان بدهشه:اوف كل ذا بقلبك يام صالح
ام صالح:واكثر بس انت تعال
تكلم سلطان بجديه:طيب يا يمه ابيك بموضوع
ام صالح بستغراب:اللهم اجعله خير وشو؟
سلطان:تذكرين ريم فهد؟
ام صالح بستغراب:ايوا
سلطان :ترى بملك عليها هلاسبوع وسعود شاهد
ام صالح بصدمه:تقوله صادق؟
سلطان وهو يناظر لباب غرفة ريم من بعيد:هالله هالله
ام صالح:وش الطاري وكيف
سلطان:يالغاليه انا ماحبيت املك ولا اعلمك
واذا على اخواني قولي كل شي صار بسرعه
ام صالح:يعني نويت تعرس من بعدها
تنهد سلطان بضيق:يمه تدرين ماحب ذا الطاري
المهم انا مشغول الحين ابوي تعرفين له مايحتاج اعلمك
ام صالح:طيب خله علي بس بتملك واهلك ماهو بمعك فشله ياولدي
ناظر سلطان لابو سعد بكرهه: ايي عندهم حالة وفاة ماله داعي اللويه ذي كلها انا بملك عليها والزواج انتي بتزينين له حلو؟
ضحكت ام صالح:اي كذا حلو
سلطان:اهم شي رضاك يالغاليه..
ام صالح: عسى ربي يبارك لك ويوفقك واشوف عيالك حولك يركضون
ضحك سلطان بصدمه:عيالي مره وحده اصبري املك اول
ام صالح تنهدت :متشفقه عليهم وانا امك
ابتسم سلطان:بتشوفينهم ان شاءالله
المهم اخليك الحين وانتظري علي الليله بتصل عليك
واسولف لك انا داري في راسك اسأله كثير
ام صالح:ان شاءالله..يالله مع السلامه
سلطان:فمان الله