💙 𝓗𝔂𝓭𝓻𝓪𝓷𝓰𝓮𝓪 💙 සිංහල කෙටි කතා

ජැකරැන්ඩා

" Hey, it's boiling , turn it off" ( වතුර නටනවා නේද? ඕෆ් කරන්න ලිප)
ඇය එකවරම පියවි සිහියට ආවේ ඇගේ අසලින්ම නැගුණ ඔහුගේ සුවඳ විලවුන් සුගන්ධයත්, ගෑස් කුකර් එකේ නොබ් එක අල්ලාගන්නට ඔහු සිය සුරත මෙහෙයවද්දී ඇගේ අතෙහි දැවටුණ සියුම් ස්පර්ශයත් නිසා.

" Hey "

" sorry, මම කෝපි හදාගෙන එන්නම්, ඔයා යන්න" සුසුමක් මුදාහැර ඔහු දෙස අතීතයේ පෑ සිනහවෙන්ම නොවෙනස්ව සංග්‍රහ කර, ඒ දුඹුරු සමුද්‍ර දෑස් මගහැර උණුසුම්ව තිබූ කේතලය ඇය අතට ගත්තා.

ඇගේ දෑස් රැඳී තිබුණේ උඩුමහලේ කිචන් කවුළුවෙන් පෙනුන ජැකරැන්ඩා මල් කිනිති දෙක මත. ඒ ඉපැරැණි අපාට්මන්ට් එකේ වාසයට ඇවිත් ඒ වෙද්දි දෙවසරකට ආසන්න කාලයක් ගෙවී ගොස් තිබුණත්, උඩුමහලට දිස්වූ මුහු බිමෙහි කේඩෑරී වී ගිය , පත් එකක් දෙකක් තිබුණ ගස ජැකරැන්ඩා බව ඇය දැනගත්තෙත් ඊට දින කිහිපයකට පෙර හිමිදිරියේ කවුළු පියන් විවර කර උදෑසන මීදුම් සළු සමග මනසින් සංවාදයේ යෙදෙද්දියි.

▫️️▫️️▫️️▫️️▫️️
එදින උදෑසන

ඒ තවත් සාමාන්‍යය දිනයක්, එහෙම වුණත් ගෙවී යන ඒ සති දෙක ඇතුළත  යම් මොහොතක ඒ දුඹුරු සමුද්‍ර ඇස් තමන්ව සොයාගන්නට ඉහළ සම්භාවිතාවක් ඇති බව ඇය අනුමාන කළා.

අනුමානය සනාථ කරමින් පළමු සතියේ අවසාන සිකුරාදාවේ උදෑසන, ළා හිරු කිරණ කෙමෙන් උණුසුම් වෙන වෙලාවක, ඇය සිය සගයන් හා සාකච්ඡාවක් සඳහා යන්නට තෝරාගත් මගත්, ඔහු සිය සගයන් හා නිරීක්ෂණ කටයුතු සඳහා තෝරාගත් මගත් සමපාත වුණා.

අන් අය අතරින් කැපී පෙණුන , ඒ පළල් උරහිස්, ගමන් විලාසය සහ සුපුරුදු වර්ණ සංකලනයෙන් හැඳ සිටි ඇඳුම් දුටුවිට, තම හදවත ශාස්ත්‍රීය සංගීතයෙන් රැප් සංගීතයට අපගමනය වූ බවක් ඇයට දැනුනා. මග හැර නොදැක්කා සේ යන්නට නොහැකි පමණට ඔවුන් වටා පිරිසක් සිටින බවත්, අනිවාර්යයෙන් ඔහුගේ වත්මන් ශාඛාවෙන් ආ පිරිස වදනක් හෝ කතාකරන්නට නවතින බවත් ඇය දැන සිටියා.

" හායි නෞමදී " අනුමානය නිවැරැදි බව සටහන් කරමින් කතාබහේ යෙදෙන සගයන් අතරින් ඔහු, ඇයව සිය කෝපි පැහැ සමුද්‍ර ඇස්වල මායාවට යළිත් වරක් වසර කිහිපයකට පසු නතු කරගත්තා.