عروسة_الهاربة

مقدمتي"

#مسلسل_العروسة_الهاربة
#من سلسلة
مسلسلات_العنف
#الكاتبة_زينب_عبدالقدوس
ـــــــــــــــــــ
ــــــــــــــــــ

كارثة ياربي كارررثة وسمعتنا طاح تحت الوطاء من الشيء يلي دارتها اختي معقولة هربت في يوم عرسها كان كل شيء تمام وماشي باكمل الوجه
.
.
.
نحنا 3 بنات متربيات في العز والدلع معمرنا دورنا او شكينا من حاجة
يعني حمدلله بابا عنده فلوس ومعيشنا في قصر القصور ومش مقصر علينا بحاجة يلي نبوه يجي لعندنا وسمعتنا معروفة عيت خميس بوجواري "
و عندي 5 خوت شباب وكلهم مشاءالله رزقهم زي التراب ويدهم ممدودة وسمعتهم طيبة كلهم متزوجين بصغارهم اكبر واحد عنده 35 سنة واصغر واحد 25سنة
واختي الكبيرة مسعودة 33 متخرجة دكتورة اطفال متزوجة وعندها 5 صغار
انا ريهام عندي 19 سنة طالبة جامعية نقرا قانون
واختي هيام تؤامتي متخرجة من الكلية ممرضة في شبه كبير بينا والاغلبية يلخبطوا بينا هيام مخطوبة من ولد صاحب باتي وبينهم معرفة كبيرة وخاشين في مشاريع مع بعض ويجينا مرة مرة زيارة وعلاقته مع بابا كويس جدا
وبابا فرح واجد بعد طلبو يد اختي ووافق بدون ما يفكر ولا يسأل لانه واثق ثقة عمية في صاحبه بس اختي  في يوم عرسها دارت العار دارت لي ما يندارش وسيبتني ننحرق في نارها ونتحمل غلطتها ونستر فضيحتها

ــــــــــــــــــــــــــــــــــــــــ

دارو عزومة الرجالة في النهار ف الاستراحة والمعازيم واجد بكل
بابا من فرحته مسيبش حد من معارفه وما عزمه وجاب خدم طاقم كامل يبي كل شيء يمشي بألف خير ويتم العرس بدون نقص ولا تقصير
لوقتها كان كل شيء تمام وماشي كويس وفي اليل ماجرين افخم صالة والتقديمات وكل شيء فاخر
وحتي هدايا يلي جابولها فخمة

بعد العصر خدوا العروسة لي الكوفيرة مع اختي مسعودة وزوز عماتي وبنسبة لينا نحنا البنات مكيجتنا مرت خويا شاطرة في المكياج
لبست فستان قصير فوق الركبة علي لون الموف الفاتح وشعري الطويل  خليته نازل علي كتافي بالاستشوار ومكياجي خفيف مش ثقيل بس
طلعت نهبل علي قولتهم وخصوصا انا من نوعية لي متحبش المكياج واجد وهدي اول مرة يشوفوني بي المكياج كامل مكمل لدرجة خالتي مقدرتش تعرفني إلا من نبرة صوتي "
انا الحق معجبتنيش لاني تعودت علي ملامحي الطبيعية والمكياج غيرتني واجد والعدسات حسيتها خدت نور وجي بس الكل يقولي سمحة وتهبلي واي ولية تشوفني تقولي بسم آلَلَهّ  مشاءالله ربي يحفظك من العين
بعد المغرب خشت عليا امي قالتلي ولد سيدك برا كلمته يوصلكم علي الصالة بكري انتي ووصال نبيكم تبرمو علي الصالة قبل لا يخشوا المعازيمو وشوفو كان في حاجة ناقصة كلمي خوك صدام
قلتلها تمام ومشيت بسرعة لبست عبايتي وحطيت وشاحي باهمال وشعري من خلف كله باينة
ولبست كعبي وطلعت شادة يد وصال خايفة نطيح لاني مش متعودة علي الكعب
طبعا برا الحوش كان زحمة وسيارات خفت وتوترت
وصال. تعالي من هنا مش هضاك هو سيارته
انا. سيارته اسود مش دمي
توحلنا معش عرفنا من الزحمة السيارات وين سيارته
سمعنا صوته جاي لجيهتنا ويقول اركبن سيارة البيضة لي غادي
مشينا ركبنا وقلبي يخبط بقوة قد ما حاولت نخبي حبي واعجابيه بيه نفشل هضا ولد عمي محمد اسمه معتز بالله هو من مواليد الثمانينات وكان متزوج ومراته توفت وعنده بنت زي القمر وانا الحق اول ما نشوفه معش نقدر نمسك بعضي واعجابي بيه نابع من قلبي بس اختلاف العمر يقهر فيا وهو يعامل فيا معاملة الاخت الصغيرة !
كان ريحه عطره مالي السيارة وبديت نبحت فيه لين وصلنا لصالة تمنيت مزال الطريق طويل لاني مشبعتش منه
نزلنا وخشينا خدينا برمة في الصالة وكان كل شيء تمام خدينا عرم صور والوقت عدا بدون ما نحس عليه

عند الكوفيرة حطت لمسات الاخيرة علي العروسة وبدت تمكيج في عمتي دلال وقتها اختي مسعودة امقعمزة تركب الاظافر لعمتي ثريا
ناضت اختي هيام بعد جتها رسالة( اطلعي بدون ما يشوفك حد)  ناضت شادة نقالها علي اساس تبي الحمام لوقتها مش لابسة الفيلو بس المكياج وتسريحة الشعر مكملتها المراة المزينة ورتها باب قالتلها خشي من الباب هضا وخشي علي يسار طول اول باب بعد الممر
هيام خشت ومعش بينت "
مر الوقت وتاخرت واجد داخل الحمام لحقتها  اختي مسعودة وملقتهاش انفجعت ومشت تجري كلمت المراة المزينة خشن وفتشن الحوش ما لقوهاش اختي بدت تخبط علي صدرها وتعيط وين مشت البنت ياربيييي
وعمتي ثريا طول طلعت نقالها وكلمت بويا بويا كان صدمته اكبر من الكل طلع من الزحمة الناس بسرعة وعيط علي عمتي بصوت متعصب كييييفففف يعني البنت مهناش دورتوهااااا كويسسسسس وين تمشيييي يعني شوفوها كويسسسس
وسكر الخط معصب و كلم خوتي جلال وموسي ومشيو يجرو لي الكوفيرة مفزوعين
عمتي واختي حكولهم الموضوع كلها كيف صار وكيف خشت ومعش بينت خويا موسى قلب المزين من هزايبه علي عماتي واختي مسعودة
بابا كان حاس بخيبة امل كبيرة وتفكيره كله علي الفضيحة وكيف يواجه العرب وشنو ايدير وموقفه كان منحرجججج جدا؟
وخصوصا انه عزومة الرجالة داروها وكان كل شيء تمام

جاء الوقت يلي يخشوا المعازيم داخل الصالة عمتي هناء وزوز خالاتي واقفات في الاستقبال انا ووصال وورد واقفات معاهن استقبلنا المعازيم وخشن كلهن
وولعوا الديجي علي الاخر واجوا خيال رقص وزغاريط
وبنات العيلة كلهم ناضن يرقصن كل وحدة توري في مهارتها لغيريها ويتحدو بعض في الرقص
بنسبة ليا انا قعمزت نبحت فيهم الكعب تعبني وكرعيا خلاص مش قادرة نوقف عليهن
وانا وامقعمزة جتني اختي مسعودة بسرعة وكان من طريقة مشيتها واضحة انها متوثرة هاذا غير ملامحها المرعوبة شدتني من يدي وقالتلي تعالي فيسع
انا انفجعت. شن في بسم آلَلَهّ خودي نفس خيرك
مسعودة تشد فيني. بسررررعةةةة
خششنني بسرعة لدار يلي يحطو فيها العروسة اول ما خشيت وانفجعت بي خوتي جلال وموسى وصدام واقفين وبابا امقعمز علي الكرسي وشكله تعبان وجه احمر ومتعصب ماسك شيشة اميه في يده
حسيت انه فيه شيء وقلبي بدا يخبط بقوة قبل لا نتكلم وخويا قال بصوت معصب. منبيشششش اي غللللططط مفهووووممممم متردوش علي اي حد ومش مجبورين تبررو لحد خلو فمكم امسكر مفهوم
مسعودة + دلال. حاضر
انا مش فاهمة شيء. شن في بابا خير ان شاءالله
بابا فجاة ناض معصب. من وين يجي الخير كان ربي رزقكك ببنات من وين يجي الخير
انا انفجعت من رد باتي بس يلي استغربت اكثر اختي هيام وينها؟؟؟
ولفت نظري الفيلو يلي ملوح علي الصالون باهمال
هنا السؤال!! علاش مش لابستها والوقت خلاص وهي اصلا وين؟؟؟وعلاش بابا معصب وخوتي قالبين خلوقهم مضايقين والغضب مرسوم علي وجوهم؟؟؟
ملقيتش السؤال!

#العروسة_الهاربة
#زينب_عبدالقدوس