#مسلسل_العروسة_الهاربة
#من_سلسلة
#مسلسلات_العنف
#الكاتبة_زينب_عبدالقدوس
ــــــــــــــــ(حلقة4)ــــــــــــــــــ
عبد الله بعد لاحظ صدمتهم قال بهدوء. القرار في يدك و كان فيه شيء خبرنا
خميس بتوتر. لا لا مفيش شيء
عبد الله. حسيت انصدمت من كلامي
خميس. لا لا بلعكس فرحني كلامك ويشرفني للمرة التانية نعطيكم بنت من بناتي. بس عندي شروط
عبدالله. اي تفضل شن هما شروطك
عبد الله . منبيش عرس ومنبيش يطول خمس ايام وطول يجي يرفعها من عندي هذم شروطي
هنا كان الصدمة التانية
عبد الله يبحت لصدقي . موافقين علي شروطك ولا عندك اعطراد يا صدقي
صدقي . يلي تشوفه مناسب يعمي
خميس ناض. معناها مبروك
عبدالله ناض هو التاني وسلم علي خميس بي الاحضان واتفقو علي موعد الفاتحة بكرة بعد العصر
ومشيوا
فوزي بعصبية. باهي توا شن عرفنا البنت شريفة ولا لا ولا تدفوه لي الراجل هك وخلاص
صدام. نفس الكلام يدور في راسي
خميس. ارفعوها للمستشفى ديرو كشف
طلعوا موسى وجهاد عشان يرفعوها للمستشفى بس وقفهم صوت جلال
جلال. كيف ترفعوها للمستشفى وهي علي الوضع هضا؟؟
صدام. كيف شن في يعني
جهاد يزر علي سنونه بغضب . صح نسيت يفتحو محضر علينا وكان الكلبة هدي شكت علينا نمشو في داهية تانية
خميس طلع نقال ورن علي اخته وطلب منها اتجي بسرعة "
ريهام نتصل علي بويا ومبش يرد عليا
وقعدت نفكر حيصدقوني يا ترا لو قلتلهم يتعاطا مخدرات
هند. معايا اووي في شنو تفكري
انفجعت بعد فطنتها تحكي معايا وانا مش فاطنة. نعم شن قلتي معليش سارحت شوية
هند شربت كاس امياة بسرعة وناضت. هيا تصبح علي خير سيارتي برا
لااا خليك علاش ماشية بكري كان قعدتي وتعشيتي معانا
هند. لا حبيبتي صغاري سيبتهم عند امي
اها
ناضن ال3 البقية
وكل وحدة قالت لو ماشية الحوش نمشي معاكي كل وحدة لوحت عذر تافه وطلعن جر بعضهن
قعدت مع كناين العيلة نهدرزو خش مصطفى قال سلام عليكم ورقا للدروج
مش عارفه من وين جاني الفضول بس حسيته ماشي ياخد مخدراته
نضت لحقته لدور التاني
فتح الدار بلمفتاح وخش وانا مشيت بسرعة اتكيت ع حافة الباب وقلت نبحت بس هو رجع طلع وكبشني معش عرفت ننطق او نتكلم
مصطفى . جايا تقززي عليا يا بنت الكل. ب
وخرت بشوية مفجوعة بس بحركة سريعة مسك رقبتي. احكي ليششش لحقتيني
انا نحاول نفك يده من ع رقبتي. سيبنييي يا مررريضضض يا متاع المخدرات
عطاني كف بقوة مقدرتش نوقف وجيت طحت بطولي
وبعد طبس يبي يشدني لداخل الدار كانت ناهية مرت خويا جهاد جايا تقولي ماشية بس فهمت غلط من اللقطة يلي شافتنا فيه ومشت تجري متحشمة نزلت وكلمت باقي الصبايا علي اساس عرسان جدد و يخلونا علي راحتنا والكل اقتنع بكلامها ومشن بصغارهن 😒😒
مصطفى جرني من شعري داخل الدار وقفله
فجاة قعد يرعش وعيونه حمر فتح واحد من الدروج طلع منه فازة معبي حبوب من كثر ماهو يرعش مقدرش يفتح الفازة وطاح منه والحبوب اتطرطشن ع الارض قعمز زي المجنون يلم فيهم حط قريب كم حبة في فمه وفقد توازنه وطاح علي ع الارض ومال راسه بجيهتي ويبحت وعيونه حمر مزال يرعش كأنه في سكرات موته او صارله تشنج انا اول ما شفته علي الوضع هضا شديت روحي نصرخ بعدت عنه و خشيت في تركينة نصرخ اول مرة نشوف حد ايموت قدامي
قعد تواني علي وضعه وبعدها وقف عن الحركة كليا قطرة دمعة كانت عالقة في عينة وطاحت لوطة وفمه مسكر شبه مفتوح ينزل منه مخاض ابيض
انا تيبست كليا يعني خلاااص مات
أنت تقرأ
عروسة_الهاربة
De Todoانا بنت يلي جبروها تتزوج عريس اختها " انا بنت يلي حطوني في موقف محرج وتحت امر الواقع " انا يلي تزوجت غصب عني في عرس اختي انا ضحية يلي ضحو بيها عشان سمعة العيلة ومسألوش عن مصيرها ومستقبلها انا بنت يلي ضاع كل احلامها وامالها في ليلة وحدة بكيت وصرخت...
