كازابلانكا || Moroccan

²

علقو بين البارتات باش نعرفكم مندامجين♡

____

-أنس تينا عاوني فمطاربات وتينا العايل مشي تساخار جيب صابون وجافيل وديكشي باش نقيو دونيا

شاف ف ماماه وهو ما عاجبو حال وهز كتافو قبل ما يجمع يدو حدا صدرو..

-ما ماشيشي بقالي غا نخرج بواحدي فهاد الحومة د زبل

سامي بقا واقف بلاصتو قبل ما يشوف فيه أنس ويحط الصاك لي كان هازو..وهضر بصوت عالي وكان واضح بلي تا هو على سبة وماعاجبو حال..

-شعندك العايل ، كتنتر على يماك..مشي عندي نجي نعريلك طهرك..

-أوووف، شعندك كتهضر معايا هيدا ..ما عارفشي فاينو البقال..

حط سامي يدو على خصرو ويد لاخر كيرجع بيه شعرو مور اذنه..شاف فيه انس مخنزر وهو كينفض يدو من الغبرة..

-قلب عليه ومتبقاشي تلوا فحال العايلة باش ميشبروكشي بارا يعريولكشي...

خنزر فيه سامي وضرب رجله مع الأرض ، خدا الفلوس من صاك د ماماه وخرج..

وقف حدا الباب كيشوف اليمن واليسار، في محاولة انه يجبر الحانوت بلا ميسول شي حد..

جات عينو على الرباعة د دراري لي نقصو على قبل وبقاو غا شي خمسة ، كلهم دارو يشوفو فيه، كلهم واقفين ولا جالسين فالأرض الا واحد فيهم جالس على كرسي بشموخ، لابس كلشي كحل..محسن شعره كامل تقريبا وملامحه جامدة ونضاضر كحلين مغطيين عينيه..

-يع كلى كمامر..

نطق سامي بهمس وهو كيشوف فيهم قلب عينيه وبدا غادي جيهتهم كيقلب على الحانوت...

-اجي لهنا ابابا

وقفه صوته الغليظ لي خلا كل ذرة فجسمه كترعد لثانية، ومعرفش علاش كان متأكد بلي الهضرة موجه ليه...

وقف وشاف جيهتو لثواني بصمت مقادر يدير والو، هز عصام يديه وبصبعو اشار ليه باش يجي لعنده، بقا سامي مصدوم وهو كيشوف يديه كلها موشومة ومن هاد القرب كان شكله كيخوف بالنسبة لييه...

-أ...أنا

حطه صبعه لي كان طويل ونحيف واطرافه وردية على صدره بإستفهام ، وبلع ريقه في محاولة باش يعتق حلقه لي نشف من الخوف..

ملي شافو عصام كيفاش خايف، ومقادرش يتحرك ، ناض وقرب ليه بخطوات بطيئة، رجع سامي اللور ، الأصوات لي فالدرب كاملين مبقاوش كيدخلو الوذنيه، حس بالخطر ، خطواته كترجع اللول وعصام كيزيد يقرب ليه..