كازابلانكا || Moroccan

⁹

باقيين عاقلين على الرواية؟؟

منوصيكمش على تفاعلكم عليها!!

_______

-غنهضر معاك راجل لراجل...اذا كونتي غتفهمني بعد من سامي غتجورو معاك لطريق ماشي ديالو..

حط أنس يده على كتف عصام  لي شاف فيه بنص عين وعقد حواجبه، وقرب لوجه أنس..

-سامي...الا ما بعدش  هو مني ،مكين تا شي ولد المرا غيبعدو عليا....ونتا الا خايف على خوك تعامل معاه مزيان

دفع عصام يد أنس وخرج من دارهم بعد ما وصلهم وحط سامي فبيته..

خرج عصام من أفكاره فلي وقع قبل أيام، وهو واقف متكي على طموبيلته قدام مدرسة سامي..

كيشوف فدراري لي كيخرجو مجموعين، وصداعهم وضحكهم على اتفه الأسباب مستمتعين بأيام الدراسة..

بقا كيدور عينيه بينهم باش يلقى سامي، ولي ما بان تا خرج كلشي بيد واحد فيه(عكاز) وبيد الثانية شاد فدري اخر متكي عليه..

قرب عندهم عصام وغي شافه سامي ترسمات ابتسامة واسعة على وجهه وقف يتسناه .

-شكون هذا؟

حاول عصام ينطق بهدوء وميبانش مهتم بالجواب ولكن هضرته خرجات بلكنه قاصحة خلات الجوج لي كيسمعوه يشوفو فبعضياتهم ويعاودو يشوفو فيه مستغربين..

-سهيل..كيقرى معايا ..

شاف فيه عصام من الفوق لتحت كان بنفس حجم سامي تقريبا، حرك راسه ب 'اه'

-سامي غنمشي نشوفك غدا

قاليه سهيل ومشا كيجري بلا ميتسنا شي واحد فيهم يجاوبه..قرب عصام وشد فسامي..

-عذبتي راسك وجيتي تا لهنايا..

سامي هضر وهو كيحاول يرجع شعره اللور بتحريك راسه حيت يديه بجوج مشغولين، هز عصام يديه ورجع ليه شعره مورا وذنيه بلا ميهضر معاه..

-بغيتي تمشي طريق كلها كتنقز ولا ما سخيتيش بهداك سهيل..

شاف فيه سامي كيفاش عاقد حجبانه، وكيشوف قدامه مخنزر، ورغم هكاك مكانش أقل جاذبية بالعكس كلشي كان كيشوف فيه، وقدر سامي يشوف نظرات الإعجاب من البنات...

زير على يد عصام كثر وقرب عنده..

-شعندك ليوما خصك هيتدابز معايا؟ شكون عصبك