كازابلانكا || Moroccan

³

احبائي علقو بين الفقرات ♡

ملي حل عينيه  الصباح وهو كيعاون ماماه فدار وكيدور من قنت القنت، وختار بيت فالطابق الثاني هو لي غيكون بيتو...حط فيه حوايجو ورتبهم فحال العادة، تصاوره وهو صغير..وذكرياته لي جابها من مدينته...

تنهد وهو كيشوف حوله ، خوته بجوج كيلعبو فوسط الدار وهو جالس حداهم كيلعب بتلفونه بملل، بعدما خرج أنس نهار كامل للخدمة ، ونسى ما يقاد ليهم تلفازة...

ندى ختو صغيرة فعمرها 12  عام وهي أعز وحدة عنده بين خوتو وموراها خوهم الصغير علاء فعمره 9  سنين...واكثر واحد مكيتفاهمش معاه هو خوه أنس ولي أكبر واحد فيهم، فعمره 25 عام...

-علاء ، دوق خاك الكبير...هيدا!!

قرب سامي من علاء وخرج شفته السفلية وتحدث بطفولية باش زعما علاء يبقا فيه ويدوقه من الحلوى لي كياكل، ولكن علاء هز الحلوى ديالو وناض بدل البلاصة لي كيلعب فيها...

-لاااء

-خايب عقل فيها...

تحلف عليه ورجع جلس بلاصتو، وهو كيتنهد كل ساعة بملل خرجات ماماه من الكوزينة وشافت كيفاش تمدد على الأرض وما لاقي ما يدار...

-قوم ابني شوف شي حد من الحومة ، يعدلنا ديك بارابول فسطح...

فتح سامي عينو وتقلب ينعس على كرشو وبقاو رجليه كيتحركو فالهوا..

-اوعدي!!..شعندي حمق ندخل شي حد مكنعرفوشي!!

-عادي هنايا كلوم ولاد الحومة تا حد ما يآذيك ، غا مشي شوف شي حد بعقلو..

-لاءء ما ماشيشي ، تا يجي أنس ويعدلا..

شافت فيه ودورات عينيها من بعد خلاتو ومشات، ولدقائق طغى الصمت، وغير صوت خوتو صغار لي كاين ، غمض عينيه وحط راسو بين ذراعه ورجليه باقين كيتحركو فالهوا...

ملي بدا كيدخل معاه نعاس، صوت خشن وصل لمسامعه، وحرك راسو اليمن واليسار في محاولة باش ينسى داك الصوت، كيحسب راسه كيحلم...

-زيد زيد أبني ، الله يرحم والديك ...سامي...سامي..

-الله يحفظك أخالتي...

رفع راسه ملي تخلط صوت ماماه مع داك الصوت لي مستحيل ينساه، حيت مكينش منو جوج...وعينيه قربو يخرجو من بلاصتهوم ،وجهو ولا حمر وعض على شفايفه بقسوة..ملي شاف نفس الرجل لي وقفو البارح واقف فوسط دارهم بنفس الهيبة وضحكة خفيفة على وجهو وهو مركز عليه...