ٱسيرة الصمت

جزء6

بقيت قاعدة في وسطهم كي المسكينة نسمع وتااايهة قاتلي بنتي اذا كتب ربي بيناتكم راح تسكني معايا خاطر يخدم عسكري وتعرفي العسكر نهار في الدار وعشرة في الكازيرنة ومتقدريش تبقاي وحدك حاى هو مشكيتش يقبل شفت مع ماما قاتلها ايه وينو المشكل احنا معندناش بنات يتشرطو للحظة غاضتني روحي حسيت نفسي كي اليتيمة يقولك الوالدين نعمة ويوقفو في كتفا ولادهم الا انا نحسهم واقفين صح بصح في طريقي ماشي في كتافي قاتلها لا يا الحاجة الطفلة من واجبنا نخبروها بكلش وهي من حقها تقبل من حقها ترفض لقيت ماما تخنزرت فيا تاع عندك تقولي لالا هبطت راسي والدموع في عيني هزيتلها راسي وقتلها مكانش مشكل جا بابا وقف في باب الصالون عيط على ماما جات قاتلي روحي للبيت حاب يشوفك رحت دخلت قعدت حتى سمعت الباب تحل قلبي تزير زيرت بيديا على بعضاهم بتوتر مقدرتش حتى نطلع راسي لاح السلام صوتو خشين ورجولي مقدرتش نرد عليه حتى سمعتو قالي هزي راسك بقيت كيما راني كي حط يدو على لحيتي وطلعهالي شفت معاه زينو عادي بصح جذاب عينيه بني ولحيتو مطراسية وكحلة وسمر شوية جسمو مخدوم شاف معاي وتبسم قالي الله يبارك كان علبالي شابة بصح متصورتكش هكا للحظة تفكرت كريم هو لي اول لقاء بيناتنا قالي هذي الكلمة هبطت راسي قالي انا اسمي سالم عمري 34سنة ونخدم عسكري قتلو وانا اسمي نجيةو..قاطعني قالي علبالب علبالي بكلش هزيت راسي ليه مشوكية قالب متنخلعيش هكا بصح انا منجيبش وحدة منعرف عليها والو قالي ياك علبالك بلي اذا كتب ربي راح تسكني مع يما قتلو ايه قالي شروطي ساهلين اول حاجة الحجاب لازم وسيرتو قدام خوتي اما برا منحكوش عليه لازم جلباب والحاجة الثانية انك تحترميني ومتناقشينيش كي نهدر معاك ولا تكسريلي كلمتي خاطر ران منحبش كان يهدر وصوتو عالي للحظة حسبتو يتقابد قالي ونتي معندكش شروط قتلو لالا قالي متاكدة هزيتلو راسي ناض قالي ربي يجيب الخير وحطلي دراهم وراح قعدت نبكي ونندب هذا كيفاه نعيش معاه ياربي باين معقد كبير ومتسلط