ٱسيرة الصمت

#جزء13

#جزء13
هنا قلت خلي نستسلم للواقع تاعي وننساه ونبدا صحة جديدة وحدي لانو سالم صح محبيتوش وزيد بعد الشي لي دارو فيا زدت كرهت كره اعمى بصح يمكن مع مرور الوقت نحبوا ويمكن نزيد نكرهوا لكن الان معندي غير مشاعر الكره والحقد من جيهتو حتى كي يهدر معاي نفذ ديراكت شخصيتي الغيت تماما وليت ندير رايو غير باش ميضربنيش نخاف كاش مايديرلي وانا وحدي لا ام تحن عليا لا اب يحطني تحت جناحو
انا هك تايهة حتى نسمع الباب تاع الدوش راح يفتحوا خرجت نجري رحت للبيت وقعدت جا عندي قالي هيا نصلوا رحنا صلينا بقيت غير ندعي ربي يحسن احوالي وبزااف ادعية صوتوا في القرٱءة تاع القران بزااف شباب كي كمل وسلم قالي ربي يتقبل خزرت فيه قلتلوا امين
اعطاني يدوا حكمتها نوضني وقفني ماشي موالفة بهذه الحنية تبسم معاي مفهمتش واش ندير بقا يشوف معاي من بعد تبدلو حوالو خبط الباب وخرج
جبنا سمانة واحنا في دار صاحبو مفهمتش علاه مخليني هنا مداني لدارهم موالو حسيتو مهربني مام امو ديما كي يعيطلها يتقابدو ويكوبي مفهمتش واش المشكل تاعهم خممت نسقسيه بصح علبالي ينشعني هذا اذا معطانيش طريحة،علاقتنا انا وياه هذه الفترة كااامل برووود قاتل ميشوف في وجهي ميهدر معاي الا يسقسيني اذا بريت ولا نو حاجة اخرى والو
اليوم نضت الصباح على صوتو _نجية نوضي نضت تقعدت غير لخير_نوضي وجدي الحوايج ليوم نرجعو لدارنا _ليووووم_ايه ليوم علاه ياك صاي بريتي ولسيكاتريس راحو مبقا والو وزيد الدار مولاها يحتاجها اني رايح نتقهوا برا كي نولي نلقاك لميتي كلش راح خرج نضت درت قهوة شربتها غسلت لماعن ولميت لحوايج في الفاليزى عقبت نشافة خفيفة على الدار باش تبقا الحالة نقية مالغري مدرنا والو باش تتوسخ بصح المهم جاست سمعتو حل الباب جا قالي كملتي قتلو ايه لحت الحجاب والخمار وهو هز الفاليزات وخرجنا تلاقينا بواحد في الطريق راح وقف معاه بقيت انا موراه مفهمتش اسكو نروح للطوموبيل ولا نبقا هنا منعرف واش بقاو يحكيو كي خلص وراح الراجل دار ليا قالي نتي متحشميش انا واقف ونتي واقفة معاه وتوريلو في روحك وجهك غاسلتو نتي بقا يعيط صرعني واقيل الجيران سمعوه لي يفوت يبقا يشوف معانا حسيت بالاهانة الدمعة حصلتلي مقدرت نبلعها مقدرت نهبطها تغصيت ركبت في الطوموبيل وهو حط الفاليزات في لامال وطلع بقا ياكل في روحو كي قالي بصح واش نستنا من رخيسة كيفك شبعو معاك دوران بالحرام شفت معاه قتلو حسبي الله ونعم الوكيل فيك شاف معاي وفرينا ضربة وحدة زاد ناض توكلي في ربي عليا ومتحشميش كون لقا كيفاه راه قتلني شوية ومشا بقيت مدورة للكارو ونبكي حتى غفيت حسيت بيه هبطلي الكوسانة كي وصلنا هبط حلي لباب حسيت بالهوا في وجهي حليت عينيا لقيت وجهو في وجهي كي شافني حليا عينيا بعد قالي اهبطي وصلنا هبطت لقيت روحي في القاراج هبط الفاليزات وقفل الباب تاع القاراج البراني شفت دروج بلاك يدخلو للدار قالي اطلعي منا طلع وانا وراه حل الباب مشينا في وحد الكولوار وزدنا طلعنا في الدروج حل الباب تاع الحديد ناض يعيط يمااا _خرجت طلت عليه من الكوزينة تسلم وتحضن مشافتنيش كي كنت واقفة وراه قاتلو الحمد لله ياولدي كي حطيت عقلك في راسك ورجعت والله الكلبة هاذيك متستاهلك خرجت من وراه شفت معاها قالها ماااا واش الهدرة هادي ياك قتلك قصي علينا الحكاية هادي وبيني بين مرتي واحد مايدخل روحو حتا نتي شافت معاي قاتلي وجه الشر ان شاء الله متربحيش بنت الزنق كي عيط مااااا الحيوط تهزو الارض تحركت قالها تزيدي كلمة نهزها ونروح والله متزيدي تشوفي وجهي خرجو خوتو ونساهم يطلو جاو يسلمو ويباركو وخوه يقولو وشبيك تعيط _بقا غير يخزر مع امو ولات راحت سمعت خوه كي بقا يهدر معاه قالو خليها برك تعرفها كي دايرة درك يامات ويبردلها الغش وتقبلها نورمال دار ليا قالي هيا نجية مشيت معاه وصلنا لوحد البيت دخلنا كانت شومبرة كبييرة ومصبوغة باج كلاغ فيها السرير والخزانة تاع القس جاية تاع الراية والكوافاز ودوطابل دونوي حط الفاليزات