ٱسيرة الصمت

جزء23؛24؛25؛26

#جزء23
كي تشوطت وليت نعيط لربي لي خلقني من الماء المغلي وليت نبكي ونقولو ياسالم على وجه ربي اذا عندك رحمة مومن في قلبك خرجني راك كويتني نهدر فاااابل خلاص ولا جبدني غير مسني عيطت لحمي تسلخت كااااامل وحمرة هزيت الفوطة لفيتها خفافي برك خاطر جسمي يحرقني بزاااف درت ليه قتلو وكلت عليك ربي انا مقدرتلكش بصح هو يقدرلك متخممش ودموعي دموع ولية تخلصهم غاليين رحت للبيت جبدت بوماد تاع الحريق وبديت نحط في جسمي لقيتو دخل عليا نحاهالي وبدا يحطلي هو ستحليتها كي عادت باردة شوية بردت لحمي نضت لبست روب صيفي وقعدت نبكي ياربي واش ندير لمن نروح لماليا محال يقبلوني للشارع اكيد مش راح يرحمني بصح باش نقعد هنا محااال يالوكان نروح للجدارمية ونبقا تحت حمايتهم المهم الوحش هادا منزيدش معاه دقيقة جا قالي راني خارج ومنرجعش حتى للعشية ردي بالك كاش ماديري تخنزرت فيه راح خرج هادي هيا فرصتي مكانش منها زوج طليت لقيت لعجوز في شمبرتها سيير راهي مقيلة اذا العياط هذاك كامل و مجاتش معندهاش رحمة في قلبها والو لجيران وسمعوني جريت لبست عباية حطيت الخمار وخرجت بالبليغة هكاك مصدقت خرجت رحت نجري ونبكي الناس اكل تشوف فيا ومستغربة رحت وين يحكموا طاكسيات خفت نركب من بعد شفت راجل كبير يبان مربي رحت ركبت معاه فجأة لقيت لقيت روحي قلتلوا على لدراس تاع دارنا ترددت في الاول من بعد تشجعت وقلت لمن نروح انا كيما حتمولي هذ الزواج يتحملوا مسؤليتي وسور سالم فالق بلي مكانشني بقيت نرجف ونبكي حتى شاف فيا شوفور قالي كاش مانعاونك قلتلوا لالا صحة 10دقايق لقيت روحي قدام دارنا ويا شحال فرحت خرجت من طاكسي جيت رايحة تفكرت مخلصتوش قلتلوا دوك نجيبلك حقك ولا قالي روحي بنتي متخميش وبلاكي على روحك شكرتوا ورحت للباب بديت نضرب فيها بكل قوتي....
#جزء24
بديت نخبط فالباب على قد ماعندي تفتح لقيتها ماما طحت عند رجليها مهلوكة ونبكي ياماما بنتك عيات ياماما راح نموت ياماما علاه حتى واحد مايحس بيا علاه انا هك منبوذة علاه معندي حتى واحد نورمالموا انتو لي توقفوا معايا رحتوا وخليتوني للذيابة حقروني وكلاوني _نوضي وشبيك فلرض ولات غلقت الباب شدتني اداتني للبيت حسيت بلي غضتها راحت جابتلي كاس ما بديت نشوف فدار شحال توحشت اليمات لي كنت فيهم هانية توحشت ريحة الدار وصغري لي فوتوا هنا ذل خويا ولا ضرب سالم ومعايرات لعجوز جات ماما قعدت حدايا وقاتلي وشبي حالتك هك وليت حكيتلها دمعة طاحتلها قاتلي متخافيش اكي هنا معايا والله مايزيد يدنالك بدات تشوف فالكور تاعي نحاتلي حوايجي تخلعت يايما الله لاتربحوا ان شاء الله يدو تتقطع اخااه شيبة النار هذيك تخلصها غالية الله لايسامحني سمحيلي بنتي سمحيلي حضنتني وبقات بوس فيا سمعت الباب تحل وليت ارميت هذاك الحجاب عليا هك دخل بابا للبيت كي شافني تشوكا تلحت ليه نبكي ونعنق واش توحشتهم رغم كامل واش داروا فيا بصح يقعدوا والديا واش اكي ديري هنا جابك راجلك واش هذ الحالة لي راكي فيها كنتي في حرب واش بيه جسمك هكا حمر وطايب جا يمس يدي زهقت قتلو تووووجع قالي وشبيك وشكون دارلك هكا وراجلك وينو معامن جيتي قاتلو ماما هربت لراجلهاا _وشنوووو _كيما سمعت طفلة تمرمدت مكانش ذل ما نذلتوش عندو وفي اللخر يحرقها _نوضي ترجعي ليه يسمعوا الجيران نتبهدلوا تان وزيد الكلب مزال غي يدور هنا ولي لدار وتحملي نتيجة تهورك واخطائك وليت نبكي بصوت والله منوليلوا ونعرف نموت كون ترجعني ليه نذبح روحي تلحت لرجليه بقيت نبكي ونعيط يابابا تعييييش ارحمني ذلني نتا تبقا بابا بصح متردنيش عندو والله متردني عندو ولا سكت بارسوكوا حالتي كانت تشف لحجر حكمني وقفني ولات ماما خرجاتوا راحوا للبيت وغلقوها نضت قابلتني لمراية اخااه نبان متشردة حالتي حالة لحمتي محروقة كامل لازم نتعالج عليها ويا ربي وليت نضت فتحت لخزانة لقيت جباتي شحاال توحشتهم جبت وحدة صيافي خاطر لحمي منقدر نحط عليها وااالو رحت صبيت ما بارد نحس فيه غير يزيد يحرق وليت زربت لبست وخرجت بقيت فوق السرير مقابلة المراية ونخمم زعما سالم كون يفيقلي بلي هربت واش راح يديرلي انا هكاك ونسمع الباب تاع برا يخبط راح يطير تخطفت قلت سير هو خرجت للكولوار لقيت بابا رايح يفتح كي سمعت صوت سالم يقول حلو متت وليت نعيط درك يقتلني درك دارلي بابا بيدو اسكتي ولاراح حل دز الباب وصدم وين راهي الكلبة وييين شافني واقفة حكمني من شعري جبدو بابا عليا ودارني ورا ظهرو عيط عليه رد بااااالك تخمم تضربها وانا واقف قدامك ردددد باااااالك هاذي مراهيش مرمية في كتافها رجال يكسرولك يدك سمعت شفت مع بابا اول مرة يوقف في ظهري حسيت احساس تاع الصح لاح سالم يدو باش يجبدني اطلقها معلبالكش بلي هربت قالو ايه علبالي وهربت لعند باباها وبنتي من اليوم راهي تحت جناحي ولي يخمم ياذيها نقتلو ونسيق بدمو .....
#جزء25
بقا بابا حاكمني وراه وسالم يتخنزر فيا ويشوف معاه ولا بابا قالو راك تشوف الباب لي دخلت منو قولو يعاود يرجعك والدار هاذي انساها وانسا بلي زوجناك طفلة شاف معاه قالو كيفاااااه_ايه كيما سمعت انا بنتي معطيتهالكش باش تضربها وتحقرها وفي اللخر خلاص تحرقها لحمها متقدرش ترقد عليه كي قال بابا هكا بديت نبكي ونشهق حضني بابا وباسني على شعري هو بقا غير يشوف قالو عمي معليش نحكيو وحدنا _نجية بنتي روحي لبيتك ومتخميش باباك معاك شفت معاه ورحت دخلو للصالون وغلقو الباب جابو قريب ساعتين وهوما مع بعضاهم في اللخر سمعت سالم يعيط ويتهدد مرتي نديها برايكم ولا بلا بيه عندكم سمانة في يدكم مترجعش ندبر راسي
جبت سمانة في دارنا لا انا لا بابا موافقين على الرجوع هو صح كان ضددي وكي سمعني هربت زاد هبل بصح غضتو وكيما يقولو القلب لحمة،سالم من هذاك النهار يعيطلي ومنردش عليه وليت كسرت لبيس وخليتها اصلا كان لازم نكسرها من نهار عيطلي الكلب هذاك بصح كي وليت منستعملوش بزاف نسيت عليها الحكاية خلاص
كي فاتت سمانة وعدات ولقا بلي مكانش امل جاب جماعة من خوالو وعمومو ورجال كبار وجا هدر مع بابا وطلب السماح ووعدو بلي ميزيدش يحط يدو عليا وبلي يماه متوصلنيش خلاص دخل عليا بابا _هاه نجية واش قلتي ترجعي_ لي تحبو بابا_شوفي بنتي انا باباك ونعرف مصلحتك ارجعي ومتخربيش دارك واذا كاش ما دارلك باباك هنا معدتيش باردة لكتاف فهمتي هزيتلو راسي رحت لبست وخرج معاه طريق كومبلي وهو ساكت ويتكيف وصلني للدار دخلنا جاو سلمو عليا من فوق القلب بصح مهدروش دخلت للبيت جا هو بدل قشو حط الريحة تفحفح مليح عدل روحو بقا يشوف مع روحو في المراية ويدندن بقيت مستغربة مهدرش كامل معاي لبس ساعتو هز تيليفونو ومفاتحو وخرج
#جزء26
نضت انا بدلت سيقت الشمبرة هويتها بدلت الفراشات حطيتهم للغسيل ومسحت الغبر لقيتهم ديجا دارو العشا هناوني وليت رحت للبيت معينيش خلاص في الماكلة حرت في سالم ملي خرج مرجعش حتى تيليفون معيطليش اووووف واش بيا ياك كسرت البيس وبلاك عيط ومحكمنيش اواه كون راهو عيط عند امو ستنيتو حتى غفيت ورقدت صباح نضت دورت ورايا ملقيتوش وبلاصتو معدولة السرير غير كيما رقدت انا وخلاص زعما رجع للخدمة ؟؟؟؟؟
نضت رحت غسلت وجهي مشطت شعري دخلت للكوزينة صبحت عليهم نص رجعلي ونص لالا كنت راح نسقسي امو من بعد قلت اخطيني خلصنا نضت هزيت ماعن لفطور غسلتهم وسيقت صونا تيليفون لعجوز سمعتها قالت سالم فرحت رميت من يدي ورحت قعدت حداها حكات معاه حتى نلقاها قاتلي هاكي تيليفون يهدر معاك سالم حكمتو عليها _وي نجية لباس _الحمد لله_اسمعي لعشية وجدي شوية قش ليا وليك نروحو نعقبو يامات في كونجي يمات واش بيه هذا واش صرالو زعما ماشي كاش ما قاسو في راسو _ايه ان شاء الله كوبيت رحت نجري للبيت مت بالفرحة ان شاء الله تتسقم حياتي لميت شوية حوايج رحت دوشت ليه ليه خرجت جبدت شعري لقيتو دخل هاه واجدة _ايه نلبس حجابي برك_اوكي لبست خرج سلم على امو حرت كي مسقساتوش وين رايحين من لي ركبنا وحنا ساكتين غير كي هبطنا نتغداو سقساني واش تاكلي وخلاص وصلنا لوحد الدار صغيرة وباهية بصح دخلنا لقيت كوزينة شغل محلولة يعني جاية في وسط الدار معندهاش باب ولا وزوج شنابر وصالون وصالدوبان دخلت للشمبرة نحيت قشي و بقيت نشوف معاها الدار تالمون صغيرة جاية ظريفة وباهية جا قعد قابلني حكملي شعري بقا يلعب بيه قدم باسني من خدي وهمسلي رتحي درك ولعشية ان شاء الله نخرجو ندورو شوية ونحبك لعشية توجديلي روحك ياك خليني نصلح واش فسدت كلامو كان سطل ما تصب عليا خربطلي لحسابات كااامل وليت نرجف ونشوف معاه بخوف وخجل وهيام مفهمتش الخالوطة لي راني عايشتها.....