♧ الخِداع ♧
تشدو أبواب المصعد عليهم .. وردة فعله الموالية كانت سريعة ملي ورك على واحد الزر بسهولة .. عرفاته بلوكاه ..
وسعات عينيها بتعجب ..
مينة:~ علاش شديتيه ؟ شنو بغيتي مازال ؟
اقترب اكثر بهدوء .. لأول مرة كتشوفه شحال طويل عليها .. جسده الرياضي الضخم .. محصور ف بذلته السوداء .. بدون ربطة عنق ...
الأزرار اللولين من الشوميز مفتوحين .. كيبان غير عنقه الأسمر ..
بان لها غامض.. كيثير فيها مشاعر مضطربة ..
نطق بتساؤل :
صلاح:~ مالك خايفة ؟
بغات تتجاوزه باش تخرج .. تكلمات بنفاذ صبر :
مينة:~ ماعندي علاش نخاف منك ..
بلا مايمسكها .. وقف شاد عليها الطريق ..
أفرجت على كلام متوتر ..
مينة:~ فتح هادشي .. أنا كنتخنق هنا ..
قرب بخطوات ثقال أكثر .. وهي كتراجع اللور ..
عاود نطق اسمها ببرود ..
صلاح :~ مينة ..
ضغطات على حلقها .. وخرجو حروفها متلعثمين .. ماقدراتش تخفي توترها هاد المرة ..
مينة :~ ش ..ش نو .. شنو بغيتي مازال ؟
هاد المرة حسات به قريب .. قريب لدرجة أن الهوا لي كيزفره كيوصل عندها حار .. ويلفح شعرها ..
ريحته مخلطة مع محلول الحلاقة ..
خليط عجيب .. فكرها فشيء ما ..
عصرات دماغها .. ولكن والو غير البياض ..
غمضات عينيها بقوة :
مينة:~ نتا... كتفكرني فشي حاجة ...
رد عليها بغموض ..
صلاح:~ شنو هي هاد الحاجة ؟
فتحات مقلتيها والتقاو مع محيط أسود غامض .. ونطقات بدون تفكير
مينة:~ ماعرفتش .. علاش كتكرهني لهاد الدرجة ؟ كاين شي سبب قوي يخليك تعاملني هكا...
صلاح:~ كنكرهك ؟؟
بلعات ريقها بتأكيد بغات تشتت إنتباهه ..
عاد ردات البال ل يديه لي وراها ... وهي مسجونة بين ذراعيه الصلبتين ...
فتحات فمها بغضب ..
مينة :~ شنو بغيتي مني ؟ (بغات تبعد) خليني نخرج ..
بلا مايعيطها الفرصة فين تهرب .. همس بخفوت ..
صلاح:~ كتثيري إعجابي شي مرات ..
عقدات بين حاجبيها .. وأطرافها بردو وجمدو بزز منها ...
أضاف بصوته الهادئ ..
صلاح:~ شنو زعما كتحاولي تصنعي ؟ ماعرفتش حتى كيفاش قبلو بك عارضة أزياء بعدا ..
تغرغرو عينيها بالدموع .. حبساتهم بصعوبة ..
مينة:~ ماكنسمحش لك تهيني .. وزايدون ماشي شغلك ..
هبط يديه حتى شد خصرها .. معتصرها لعنده بقسوة .. متحكم فكل حركة من جسدها ...
صلاح:~ سمحي ليا ولا لا .. غانتسوق ليك مثلا ؟
حاولت تنثر منه راسها ...
مينة :~ طلققق مني .. شنو كادير ؟؟
صوتها ولا لاهث وجنوني ..
مينة :~ طلق الزمر .. بعدددد علييييا ...
زاد من الشدة دياله .. ويديه الاخرى كتحيد الشعر لي على جبينها باش يشوف ف عينيها بتلذذ .. لداك النظرة د الوجع لي فيهم ..
ضحك ب استهزاء ...
صلاح:~ دايرا كاميرا باش تسجلي هادشي لي كيوقع هنا ... زعما ماغانعيقش بك
بعدها عليه بعنف ... ماطلقها حتى وقفو أنفاسها .. وتشللات حركتها تماما ..
يديه عاود تحركو ونزعو السلسلة لي فعنقها بحدة ..
حتى بانت كاميرا صغيرة وسطها ..
زطم عليها بحذائه بعدم اهتمام ..
صلاح :~نتيجة مجهودك .. ضاعت مسكينة ..
مسحات فمها بارتجاف .. وابتسمات بتشفي :
مينة:~ لا لا غالط .. الفيديو غايكون تسجل قبل دقائق .. ( تبسمات بتفكير) وداكشي لي وقع هنا والفلوس لي خديت ووجهك لي بان غايكونو تسجلو قبل مانخرج من عندك ...
زمت شفتيها ودارت إشارة خساة بيديها ..
مينة:~ كيسحاب ليك غانبيع راسي بهاد السهولة .. راحت عليك يا ابن عمي .. كان خصك توقف هادشي من الأول .. قبل مايتسجل .. ودابا نتا غاتعطيني بزز منك بنتي وبخاطرك .. وإلا الفيديو فيدي .. ( حركات أصابعها بتهديد) وغدا ولا بعد غدا كلشي غاتولي سيرتك كل لسان .. ومانظنش نتا تبغي هاد الشوهة ل راسك ... ولا انا غالطة ؟
دار يديه ف جيبه ..
صلاح:~ الشوهة كتخدم مصالحي .. واذا بغيتي نوصي لك مع شي صحافي باش يروج ليك الخبر .. غايكون الأمر أحسن ياك ؟
مسحات على وجهها لي احمرر من الغيظ ... وحطات يديها على قلبها كتهدي أنفاسها ..
مينة:~ عارفني غانديرها ا صلاح وانا ماكنضحكش فهادشي ؟
رد بلامبالاة :
صلاح:~ ديري لي غايوقف ف مصلاحتك .. ولي كتشوفيه مناسب ليك .. واذا بغيتي نعاونك ماشي مشكل ..
قرب أكثر هاد المرة .. ماتوتراش من قربه ..
كانت كتشوف فيه بعيون عامرة كره ..
صلاح:~ اذا كنتي كتظني أنك بهاد الطريقة غاتاخذي جمانة نتي باقي غالطة ...
قالت بصوت باهت .. ضعيف .. قدر يخرج من حلقها بصعوبة ..
مينة:~ سميتها جمانة ؟
مد يديه بجرأة مقصودة .. كيحيد الشعر لي على وجهها .. كيردو ورا وذنيها ببطئ .. حتى ارتعش قلبها ..
صلاح:~ ااه بنتك سميتها جمانة .. وفعمرها تقريبا عاماين .. وماعارفاكش شكون نتي ف حياتها ..
اذا كانت محاولة منه أنه يألمها .. نجح فالأمر بسهولة .. بان الجرح ف مقلتيها .. لي عمرو بالدموع .. والتنفس تحجر فحلقها ..
شدات الشيك لي عطاها ومزقاته .. وصوتها خرج مخنوق ..
مينة:~ بنتي غاناخذها .. واخا تحاول كل مرة توقف فوجهي ماغانخليهاش معك ..
_
أنت تقرأ
الخداع
Romantikسلام حبيباتي ❤ رجعت عاوتاني بقصة من قصص تيمائي .. نتمنى تعجبكم ان شاء الله ... بعنوان:~ ♧ #الخداع ♧ تأليف :~ #فاطمة_اليوسفي القصة طابعها درامي رومانسي.. وكيف كانقول ديما القصة مجموعة من الاحاسيس والمشاعر المعقدة لي كانتمنى توصلكم كيفما غادي نوص...
