الخداع

الفــصــل 1

♧ الخِداع ♧

وقفات أمام غرفة مكتبه باضطراب .. بطولها المميز وقدها الرشيق .. شعرها العسلي متناثر حول ظهرها ...
تنفسها متشنج وفؤادها كل مرة كتحسه غايوقف بالخلعة ..
يديها لي كيرجفو .. خباتهم ف جيب معطفها الأنيق باش تثبت راسها أكثر .. وتكمل مظهرها القوي شكلياً على الأقل ..

أربع أيام وهي كتوجد لمقابلتها معه .. الأمر ماتوقعاتوش بهاد الصعوبة كلها ..
شنو غاتقول له ..؟
أو بالأحرى كيفاش غاتحاول تقنعه بعد هاد السنوات وهاد الغياب كامل .. ؟
ضجيج مهول ف عقلها وفروحها بأكمالها .. واخا غاتصّر على شنو بغات .. هو فالمقابل ماشي ساهل .. وغاتدخل لعرينه بعيون مغمضين ..

غمضات عينيها بقوة .. وحاولت تعصر دماغها ألف مرة .. !
تتذكر غير شي نقطة ضعف دياله .. أو بقايا ذكريات ميتة بين عقلها ..ولكن والو ..
كتبحث فذاكرتها على مجرد أوراق فارغة .. ! وماضي تدفن ف مقبرة النسيان ... !

أسبلت أهدابها وكلام صديقتها كينساب فآذنيها بإصرار :~
" واجهيه بكل قوة .. واجهيه .. ماشي أول مرة ديريها .. مايخلعكش بمظهره ونفوذه ... كيبقى عندكم نفس الدم .. إذا أصّر هو .. نتي ابتزيه فالمقابل .. ! "

كل ماقربات أكثر ... فحال إذا كتقرب من فوهة البركان ..
قلبها كيزيد يخفق بين ضلوعها بعنف ..
حسات بغصة فحلقها كتخنقها .. حتى قالت غاتتراجع وتمشي فحالها .. فنهاية المطاف قبل ماتدخل لعنده ..

لكن صوت السكريتيرة خرجها من شرودها ..

السكريتيرة :~ آنسة تقدري تدخلي .. السيد صلاح كيستناك ..

قدميها استجبو تلقائيا ونفذو القرار .. !

مع أول الخطوات ... رائحة مألوفة داعبت حاسة الشم عندها .. مزيج رجولي مخلط بشيء مجهول .. ماقدراتش تفسره .. وصل لعقلها على شكل سيالة عصبية سريعة ، حرَّاقة ..
وانتفاضة عنيفة زلزلات ضلوعها ..
فنفس اللحظة لي رفع عينيه .. التقاو بعينيها على غفلة .. ف عاصفة قلبية قاسية .. خلات كيانها بأكمله يرتعش .. والنفس تضيق بين قفصها الصدري ..
كهرباء انتقل من عنده وصعق كيانها كله دقة وحدة ..  عرق بعرق ...  !

مسند بجذعه الضخم على كرسيه .. ببذلته الأنيقة السوداء .. ووجهه الغامض .. حاجبيه منعقدين فوق مقلتيه بطريقة باردة وجافة ..
ملامحه بدون تعبير .. غير اللهيب الأسود فعينيه .. ونظراته المتوحشة بالخصوص .. خلاو الأرض تولي فحال الرغوة من تحتها ..
نظرة صياد محترف ... بلا مايقول كلمة واحدة .. كيقيمها بالسواد الذائب لي تحت جفونه ..

قوي .. هادئ .. مسيطر ومتوحش ... !

غمضات عينيها بتوتر .. مدات له يديها ... وهمسات بتهذيب مُبالغ فيه ..
:~ أنا مينة جابر ..
ضغط على يديها طويلاً .. حتى تحرجات عاد .. حيديها بجمود ..
وتحرك حلقه بقسوة ..
:~ صلاح جابر .. 
أسبلت أهدابها .. وجلسات بدون إذن منه ..
بينما هو أضاف بتهكم فنفس الوقت :
صلاح :~ غريب الأمر ... كنتعارفو فحال اذا أول مرة بصح ؟ 
غمضات عينيها وردات عليه بهدوء :
مينة:~ الأمر فالمجلات والجرائد ماشي هو الواقع ..
رفع حاجبيه باستنكار .. ورد راسه اللور ..
صلاح:~ شي تمثلية جديدة هادي ؟
رمقات مجددا تحركات وجهه بعيون مذهولة ..
تفاحة آدم لي كتطلع وتنزل بعنف بين حلقه .. لكن ملامحه الرجولية باردة وبلا تعبير ..
عضات على شفتها السفلى بتوتر ..
مينة:~ نتا عارف علاش جيت ... بلا مانطول الأمر أكثر .. وندخل لك ف تفاصيل حياتي ..
تجاهل كلامها .. وقال بسخرية لاذعة ..
صلاح :~ توقعتك تجي قبل من هاد الوقت .. امم بيناتنا سنوات بعدا .. شحال عاماين ولا خمس سنين يمكن ؟
حسات بالمكان كيضيق حولها.. وكل نفس كيطلع مع قصبتها الهوائية بزز ..
ضيقات عينيها الفضيتين ..
مينة :~ يمكن أكثر .. ولا يمكن مابيناتنا حتى سنوات فالأصل ..
رماد عينيها كيتحارب مع جمر عينيه المحترق بحرب مهولة لكن صامتة  ..