اسكربتات منار الجمل♥️⁩⁦

رسالة لقلبك يا جميل💌 ♥️

ركز يا قلبى فى اللى جاى
والف شكر للى باع
ماصانش حتى بوء شاى
سلام يا 300 وداع
واللى لُقانا مايساعوش
فخامه الوداع تساع
مشاعرنا مش لعبه
ما تتشغلش بااللى فات
خليك يا قلبى فى المفيد
كبَّر لاى ذكريات
ركز وبس فى الجديد
لازم نقسم الخانات
فى مين قريب ومن بعيد
الحسبه مش صعبه

الذكريات جميله جدا لكن لو كانت بعيده
مش لازم ذكريات حياتنا اللى فاتت توقف تقدمنا لقدام
ومش لازم تكون وفى لشئ ملوش وجود
عمرو حسن لما قال "واخدت قرار انى انساها "
كان لازم يوقف على هنا بس مش يكمل ويقول
"من يومها وانا بدونها معاها براقبها بعين عيل محروم "
هما إللى يراقبو مش احنا
هما اللى خسرونا احنا مبنخسرش
احنا كلمه حلوة فى وسط خنقه
ميتقالش عشانهم يتقال عشانى
عشانى انا يتعمل المستحيل
انا مش هامش مؤقت ...انا الأساس
ومن جديد اتمنى ابدأ
واتمنى انى اتحب وافرح
استاهل ..ايوا استاهل انى يتحارب عشانى
انا ..
صعبة زي اللى بيتمنى حاجات مش مضمونه
رايقه فى روقان نسمه خفيفه بتعدى العصر
عالية يا ملكه بتبص على الشعب من القصر
وعادية كأني اي صبيه جميلة فى مصر

انا مش هامش فمتفكرنيش هقف عليك العمر كامل
انا حلم كتير كان بيتمناه
زى ما انت فاكر نفسك حاجه انا كمان شايفه انى كل حاجه
هحلم بحياتى من غيرك زى ما كتير حلمت بيك
وبنيت احلامى كلها عليك
سهل جدا دلوقتى الغيك
كأنك مكانش ليك وجود
ايوا مكانش بينا قصه
ايوا انت زى اي شاب عادى مش قصه
وانا بنت اتمنى اعيش الفرحه
مع حد يكون شايفنى أقصى طموحاته

متفكرش يعنى عشان عيشت سنين بحبك
انى مش هقدر اعيش على بعدك
ولا هتعايش مع نسيانك
لا يا جميل انا همحيك من كل احلامى
وايامى وافكارى
كأنى فى يوم معرفتكش
البنت لما تحب بتحب من قلبها بجد
وبتكون انت محور الكون بالنسبالها
إنما بقا لما بتنساك
يا ويلك يا شقاك
هتخليك تحس كأنها متعرفكش
انت مين ؟
ايوا انت مين
ومفكر نفسك يعنى ايه
حبيبى افهم انا اه كنت بحبك
بس حقيقى بحب نفسي اكتر منك

حياتى كانت صعبه بجد
يمكن محدش فاهم يعنى ايه تحارب الكل
الكل دول من ضمنهم نفسك
بحارب انى انسى
وانى اقسى
كان نفسي بجد اكون جاحده
عشان اقدر اعيش فى جـُحر الاسود
انا عرفت ناس بتاكل معايا فى نفس الطبق
وفى نفس الوقت بتحكى عليا حكاوي عجب
مسمين نفسهم اهلنا
فاكرين أنهم اهم من نفسنا عندنا

من آثار الصدمات النفسيه فى الأهل
انك تحاول تكون دايما مثالى
تساعد كل اللى حواليك
وتلعب دور المنقذ حتى لو كان التمن انت !
انت ممكن تشوف دا تصرف نبيل من شخص رائع
لكن فى الحقيقه
دى رسالة استغاثه من عقلى الباطن
بيقول انقذونى فأنا  فعلا فى طوفان

ولما اقول الأهل اكيد مقصدش امى 
لان امى الاُنس فى وقت تعبى
اكيد مش والدي اللى بيتمنى ليا الرضى ارضى
ولا حتى خواتى اللى هما بالنسبه ليا دِرعي

بس انا اقصد ناس كتير اوى عايشين معانا
وبيضحكو فى وشنا
واول ما نلف ليهم ضهرنا
بيطعنونا بالغدر
انا مش هلوم عليكم
عارفين ليه لان المرض دا شئ مش بإيديكم
دا شئ طبيعى فى دمكم
ذمكم ليا مش هيأثر ...عشان مبقتش اتوقع حاجه منكم
يا اللى بتسمو نفسكم اهلى

وفى النهاية احب اشكر نفسي جدا
عشان قدرت تتعايش للنهارده
واحب اقول ان الدنيا فى يوم هتضحكلى

املى فى ربنا كبير ومش هيخيب
هو دايما جمبي وبيسترنى
احب اقول لنفسي تانى
انا بحبك وجمبك وبجد انتى تقدرى
تتعايشى فى وسط التعب دا
المرض مش عيب يا جميل
دا ابتلاء وربك قادر يخفف عنك ويشيل
متخليش حد يحبطك
انا جمبك ومش هفلتك ♥️💌