وردة هارون

5

ضربتني أشعة الشمس وجهي مع كانت ديك الساعة شي الربعة ديال العشية فقت كان عنقي كيضرني نعست معنكشة لقيت ماما كتجمع مع السيد تحلات ليها واقيلة غادي تلوحني و تجيبو بلاصتي هو مرة حاضي طريق مرة حاضيني من المراية بقيت كنشوف فيه سهيت فعينيه حتى فيقني من سهوتو فاش رجع كيشوف فطريق بقيت كنقاد شعري و عاودت قاديت الماكياج هو مبقاش شاف فيا صافي وصلنا الدخلة ديال كازا هود دار شاف ف الوليدة.

..... : الحاجة فين جات داركم نعتي ليا نوصلكم حيت جاني شي شغل ضروري.

عيشة(بحالا صرفقتيها) :والله يا وليدي حتى مشات ليا هاد القضية من بالي انا محافضاشي دار الحاج الله يرحمو جابني لهنا غير شي ربعة ديال المرات و هادشي داز عليه سينين حتى باش نعيط لولدي ديك لبلاصة مفيهاش ريزو.

..... (بصوت رجولي اححح على كاريزما عندو البنات عمري شفت شي تيتيز بحالو) : قلتي ليا غادية عند عدوزتك صوني عليها.

عيشة: عدوزتي عندها تمانين عام بقات ليها حرقة وتموت اش غادي دير بشي مشقوف.

انا تفرگعت بالضحك كنت عارفة عيشة مغادي تمشي حتى تزبلها هههه وها هي دارتها مي معندهاش لفرانات و مكتحشم من حد ضرت شفت فيهم لقيتهم حاضيني بجوج صافي ضربتها بصقلة حتى رجع تكلم.

.... : اوا فين غادي نديكم اخالتي انا راه عندي واحد دار ولكن كندير فيها إصلاحات راه مرونة واحد دار خارجة على كازا جاية من جيها لوخرا غادي نتعطلو بزاف حيت كازا كبيرة منقدرش نخليكم كضورو هنايا حتى باش نديكم لوطيل غادي نتعطل يعني قصر لعائلة هو لي قريب.

عيشة: صافي لي بان ليك اوليدي هارون شكرا بزاف حيت عاونتينا الله يكتر خيرك.

هاي هاي هاي زين لعزارة سميتو هارون احح قلبي بقيت غير كنشوف فيه وهو حس بشوفاتي هادشي علاش مرگت ونزلت عيني بقينا غاديين مسافة ديال الطريق قليلة مع دارهم ولا لقصر كفما قال راه جاي غير فدخلة ديال كازا بعيد على صداع لمدينة صافي وصلنا بقيت غير مبهوطة كان واحد الحي عامر غير بالفيلات بقينا دخلين وحدة تنسيك فلوخرا حتى وقفنا قدام وحدة لي عيني خرجو من بلاصتهم هادي مختالفة عليهم كاملين هادي راه قصر كيفما قال بشاخخخخ هادو هوما الناس لي عايشين واقفين واحد لمگلدمين فالباب غير شافو لوطو ديال لموسيو ديالي حنا ليه راس وحلو لباب كانت واحد لباب حديدية كبيرة غير تحلات شوية و نسخف كانت واحد االطريق طويلة من الجوانب ديالها عشب عامر بالورود و الحراس مشتتين فاش دزنا ديك الطوالة بانت لينا واحد النافورة كبيرة و قدامها لباب الرئيسية ديال القصر و انا حالة فمي كي البهلةدرنا على ديك النافورة صافي هو حل لباب نزل و نزلات ماما صافي نزلت حتى انا هو عطا سوارت ديال لوطو لواحد لغارد و جاو شي وحدين عطاهم البليزات دخلوهم حلات لينا واحد الخدامة لابسة زي رسمي حنات راسها و نطقات.