جــمــيــلــة

البارت 1️⃣8️⃣

الصمت فالطموبيل بعد سماع خبر الحمل. حتى واحد مهضر وحتى واحد منطق .. كل واحد بقا ساكت كيشوف قدامو فصمت وودنيه مصمكين والحركة واقفة قدامو .
جميلة من الصدمة بقات غير مربعة يديها وكتشوف قدامها ... كتشوف خططها وطريقها اللي رسمات بيديها ... كتشوف نتيجة افعالها وغبائها .. كتشوف المستقبل تبدل قدامها وكلشي تردم فرمشت عين وكأنه جاك سفر مفاجأة معارفش لفين ومنين وشنو غتاخد .. تماما كما وقع ليها .. مكانتش مخططة او كضن غادي طيح فهاد النقطة بالدات اللي تقلب ليها كلشي رأسا على على عقب .. مابقاتش كاع قادرة تفكر .. او تخطط اوترسم لشنو غيوقع وشنوير . توقفات كتحاول تستوعب في حين جالس مهدي حداه يدو حدا فمو ساهي من النافدة وكيدخل صبعو بين سنانو احيانا فصمت بحال شي واحد تالف فالدنيا وكيتحاور معاها بسياسة باش يفهم طريقة لعبتها والستراتيجيا باش غادية. شعل كارو فمو وبقا قالب وجهو كيكمي ويرمش بتتاقل واحيانا كيسد عينيه كأنه كيتمزك لنغمات الحياة . طفا الكارو لاحو من ودور وجهه قدامو كيتنهد وقال فهدوء تام بدون ميشوف فيه

- هضري مع عائلتك ولا شي واحد كبير كتحتارميه نجيو نخطبوك

الصمت ... تلفت شاف فيها لقاها كتشوف فالجهة الاخرى ساكتة مربعة يدها والدموع فعينيها وحاطة واحد اليد حدا فمها .. سكت مللي ماجاوباتش وديمارا السيارة غادي ومعارفش فين يوقف .. بقا غير كيدور بالطموبيل من شارع لشارع لمدة ساعة حتى لقا راسو واقف فنفس البلاصة ديالهم على جرف البحر وسكت السيارة وطلق تنهدية عميقة وقلب وجهه ساكت ... عاود تلفت جهتها لقاها مزالة على نفس الوضعية كتبكي مقادراش تتقبل التغير وماقدراتش تتقبل انهيار طموحاتها وخطط مستقبلها قدامها وتدخل فحياة جديدة عمرها رسماتها او تخيلاتها فحياتها .. طول الشوفة فيها وقال

- صافي ...اللي عطاه الله عطاه دابا البكا ورا الميت خسارة

حركات راسها بالايجاب وهي على نفس الوضعية وغمضات عينيها عصراتهم من الدموع وبقات هاكاك كتبكي .. اش غيقول اشنو عما الكلمات اصلا اللي كيتقالو فبحال هاد المواقف ! اللسان مابقا عارف يتحرك .. والعقل مابقاش عارف يخدم خصوصا من بعد ماشاف ردة فعلها اللي سكتات ليها الحس كأنه كلمات وصراخ وبكاء العالم ميوصفش احساسها واكتفت بالصمت

مهدي: صافي هادشي مكتاب ماعندنا منديرو

هبطات راسها بشهقة وتنهيدة عميقة وقالت بخفوت شادة جبهتها

- انا شداني نجي ... (تنهدات) شداااني شدااااني نجي لهاد البلاد

تنهد : والبلاد راه غا بلاد .. اش دارت ليك ... (بهدوء) صافي شوفي شي واحد قريب ليك قولي ليه بغيت نتزوج وغنجيو... نديرو كلشي فدقة اصلا ماعندنا مانتسناو ماكاينش الوقت

قالت كتمسح نيفها : انا راه مابغيييتش امهدي نتزوج ... راه كنشوف الناس فين واصلين .. شنو دايرين فحياتهم .. باغا ندير شحال من حاجة