حطات تيليفون مخلوعة من بعد ما قطعات مع رشيد وهزات سوارتها نزلات كتجري للطموبيل .. طلعات كتفتف مخلوعة وحيدات الطموبيل من حدا العمارة بعداتها على الحومة وحطاتها فباركينك بعيد ونزلات سدات الباب وقالت مخاطبة العساس
- رد ليها الباب الله يعطيك الستر ... عنداك تشرط ولا توقع ليها شي حاجة
العساس: غا تهناي خليها هما مكاينش اللي يقيسها
جبدات خمسين درهم من البزطام مداتها ليه وقالت
- هادي قهوتك ... تهلا ليا فطموبيل الله يرحم ليك الواليدين
حلات الكوفر جبدات الباش الكحل ديالها وطلقوه عليها غطاوها ومشات بحالها حاطة يدها على قلبها كتنهج بالخلعة حتى قربات لباب العمارة بغات دخل وهي تلاقا فاطمة خارجة
فاطمة كضحك : جميلة !! مالكي صفرا
ردت جميلة كتنهد وشافت فيها : واش انا نرتاح كي الناس اختي فاطمة ... بغيت غا نخرج شوية ونبدل الجو .. بغيت غا نسافر نعيش وندوق تا انا من رزقي ... (دورات راسها مهمومة ) شكون خلااااك اختي شكون
ردت فاطمة ويدها على جنبها : سافري خيتي مالهم المشاكل غادي يشدوك ... كاع عدنا مشاكيل ولاكن كنعيشو شوية هوكا شوية هوكايا ... شكون خاطينو المشاكيل تا نتي
ردت جميلة كتنهد : بغيت نرد اختي رزقي ... هانتي شفتي وعرفتي كولشي ... شندير اختي فاطمة باش نرد رزقي راه غنموت ... راه فيرما يجري فيها الخيل ... ارض الزعفران قد السخط كتولد الذهب اختي فاطمة ... الخيرات دالله والخير مزلع .. الليمون تشمي ريحتو تهبلي ... تشهاي غا تشوفي فيها ... لكترات اختي مينة ناشفين .. كنشوف فرزقي كيتكال وكيتنهش وقبلي كيتقطع ... كن غا عرفو ليها بيها وزرعو ديك الارض الناشفة مايخليوهاش هاكاك ... فيرمة ياختي فاطمة ديال الفريع ودياااالي (كضرب صدرها ) ديالي وملكي بغاو يديوها ليا ... (تنهدات كتشوف فالجنب ) بلااا منهضر على الدار 3 طاج فيها 100 ميترو كل طاج يحنتك فلاخر ... بنيتها بالشهوة وكنت كنشوف فيها كطلع قدام عيني وانا فرحاااانة زعما (تنهدات) اما ديك الطموبيل اللي ماعرفتها واش بصح دارت كسيدة ولا تاهيا دارو ليها مادارو للفيرمة والدار وذهبي اللي شريتو بالشهوة ولبستو بالفرحة غا هاداك فاش كنتفكرو راه كيشدني القلب
تنهدات فاطمة بأسى : واختي ماتسمحيش فرزقك ... جري على رزقك تا ترديه
حركات راسها بالايجاب ساهية : تلفت اختي ماعرفت فين نرد بالراس ... اش اش ندير .. اش كيديرو الناس نديرو ... يدي تقالو عليا وراسي صافي حبس (شافت فيها بابتسامة ) شي نهار نديك للفيرمة تشوفيها ... ندوزو تما النهار غيعجبك الحال
ردت فاطمة بابتسامة : نشاء الله علاش لا ... فين جات ؟
جميلة : جات حدا الفيرمات فين كاينة الفيرما دمولاي رشيد لتااااحت حدا الباراج ... (بسعادة) نصيدو الحوت من البراج ونديرو الشواية تما فالطبيعة ... غيعجبك المنضر عالم اااخر
أنت تقرأ
جــمــيــلــة
Contoقصة من قلب الواقع بعيدا على المثالية كالعادة، قصة قصيرة مثيرة للجذل للمتعة والعبرة احداثها سمعتهم بودني والحبكة دائما وابدا من ابداعي قصة شعبية بامتياز من الطبقة المتوسطة طاحت فبالي فجأة قلت بما انه القنط فغدي نستغل الفرصة ندردشو بيها شوية مع العلم...
