جــمــيــلــة

البارت 2️⃣2️⃣

انتهت الزيارة ومنين بدات وهوا شاد صوفيا فيديه كيلعب معاها ... عطاها لمينة كيتحسر عليها كاره يرجع باللور .. الدقايق اللي جلس معاهم نساوه كاع واش راه فالحبس لاكن بعد نهاية الزيارة بدا الاشتياق قبل ميودعهم للزيارة المقبلة وكيأكد على مينة تجيب ليه ولدو بأي طريقة .. بقاو واقف كيشوف فيها وهي غادية ويدير باي باي لصوفيا اللي مهزوزو فيدها على كتفها وكتشوف فيه .. غادية وكضحك وديك اللثة حمرا كتبان ولعوينات كوحل مجبدين فرحانة ... بدا كيضحك بوخدو ويشير ليها حتى خرجو وخرج موراهم تنهيدة عمييقة... مساخيش ومساخيش ومساخيش وباغي يخرج باغي يبقا غير يشوف فوجه ديك البنية الغزالة بغواتها وبكاها وضحكتها والوانها .. لاكن مع الاسف ماشي ديما كتمشي الحياة كما كنبغيو .. وكنكون سبب فتعاستنا فغالب الاحيان دخلات مينة للدار لقاتها خاوية حطات صوفيا فوق الناموسية ناعسة وحيدات جلابتها وبدات تجبد تبدل ليها لاكن دخلات وراها جميلة فديك الاثناء على غفلة هازة صفوان ناعس مشات بيه نيشان لبيت النعاس ولقات صوفيا ناعسة بديك اللبسة .. تلفتات باسغراب عند مينة وقالت

- خرجتو؟؟؟

ردت مينة بارتباك: غير صورتها وصافي وخليتها نعسات فحوايجها

سكتات جميلة واخا دخلها الشك ... ربما مشاو لشي بلاصة ومابغاتش تقول .. حطات صفوان وبدات تقاد لصوفيا نعاسها .. شافت يديها مزيرة على شي حاجة وهي ناعسة والسكاتة فمها وحلات ليها يديها بشوية لقات سنسلة دالنقرا ... استغربات منين جاتها السنسلة وشداتها فيدها بتشكيك كتشوف فيها مقطعة ... هبطات بتشكيك على صوفيا كتشم ومع الشمة ضرب قلبها بقوة وحلات عينيها تذكرات الريحة وتأكد شكها فالسنسلة وبقات مخرجة عينيها ... عاودات هبطات كتشم فيها كأنه هوا اللي ناعس تما بديك الريحة .. هزات راسها كترمش وناضت بسرعة خرجات لقات مينة فلكوزينة ووقفات عليها بغيض

- ديتيها عندو ؟؟؟

مينة بنكران مدورة وجهها: فيين ديتها واقيلا خرج ليك العقل

جميلة: بغضب) ديتيها عند باها للحبس انا عارفاك ديتيها

مينة ببرودة كتحرك السكر فالقهوى: هانتي قلتيها .. باها .... ياك ماديتهاش عند البراني

ردت جميلة بغضب: وعلااااش تديهاااا؟؟؟ ماتخرجيهاش من الدار بقاااي فالدار ماتديهاش للحبس

شافت فيها مينة هازة حاجبها: راه باها ومن حقهم يعرفوه ... وغنبقا نديهم ليه بغيتي ولا كرهتي حيت باااااهم ... باااهم وهما ولادو

ردت بغيض: كن بعا يشوفهم يدير بحسابهم ... هوا بغا الحبس يمشي ليه بوحدو ميوصلش ولادي ليه .. من الاول يدير حساب لولادو ... عاااجبو الحبس ... ايوا خليه يدوز الحبس على حقو وطريقو باش يعرف الحبس كي داير ... خليه يتحبس من ولادو باش ميبقاش يشنت بيه ... خليه ... اااااخر مرة تدي ليا شي واحد فيهم لتماااا