جــمــيــلــة

البارت 2️⃣4️⃣

برد ليها القلب من بعد المكالمة اللي سمعات وعاد قدرات تنعس مرتاحة اخيرا ... لاكن رجلها تقطعات على الزيارة وحتى نمرتها بدلاتها وركزات على فضيحة الصالحة وفضيحتها والفيديوهات اللي كتصور وتحط ... تشغلات اكثر مع الفضيحة ورجعات كل مرة تحط فيديو جديد وداكشي اللي مقابلة.. اما مينة صدمها ياسين بطلاقو من مراتو وخباه عليها حتى طلق وسالا وتم جاي ليها بولدو حطو ليهم فالدار عند جميلة وجمعهم بجوج صدمهم اكبر صدمة والاطفال كيلعبو فالارض وجاو متقاربين ولاد عام واحد

ياسين: مغتربيش ومصالحاش تربي اصلا ومالقاتش اللي يربيها هي براسها ... درت معاها ديك العشية تجيب ليا دري نجيبو ليك تشوفيه وخرجات مع مها ماتسوقاتش ... كنعيط ليها كتقطع وجاوباتني مها قالت ليا حنا فالشارع مشغولين وبالصعرة مشيت كنقلب عليها نشوهها ولا نعطيها قتلة تا كيبان ليا وسيم تالف عقلتو غا بسروالو الاصفر محني حدا واحد الفراشة ديال اللوعاب فالارض وهزيتو وبديت نقلب عليها بانت ليا حالة فمها معارفاش كاع فين وصل .. صافي ديتو غبرتو عليها وكدا ودابا طلقنا القاضي حيد ليها الحضانة ..

مينة : ويلي !!!!! وكيفاش حتى رديتيه ماعرفوكش نتا!!!!

ياسين: لا صاحبي راه وصيتو قلت ليه فاش نعيط ليه اجي نعطيك الدري وقول راه كان عندك وكنتي كتقلب على واليديه وكدا .. مهم من هنا ومن هنا ... وتخااايلو كن ماشتوش انا ولا هزو شي واحد اخر داه!!!! ... جالسة حالة فمها فلحانوت كضحك والدري برا كيلعب وبعيد عليها

جميلة: ناااااري هادشي كامل واقع ومافخبارناش!

مينة : وعلاش ماجبتيش ليا انا نشدو فييين خليتيه؟؟؟

ياسين: كان معايا فالدار

مينة : ااااربي السلامة !!! (هزاتو من الارض كتعنقو) ااالحبييييب ياااا لعمر مضيعينك وسامحين فيك ... خلاوك بوحدك اولدي مداها فيك حد

ياسين: مهم انا غادي للقهوى مشغول .... صافي هي راه مغتعاودش تشدو خليه معاك الواليدى

عنقاتو: وانا نفرط فيه .. نفرط فالكبدة ديالي .. ولا نعيطه ليها ! يبقاا معايا وليدي حبيبي ... يلعب مع صوفيا وصفوان وميخصو خير ... الحبيب ديالي

باسو ياسين وخرج خلاها وعلى مزويناتو وليد البرائة ولعوينات والشعر زعر شبيه ياسين اللي شبه لمينة وابيض البشرة كان ممكن فعلا يهزو شي واحد ويخليه .
بقات مينة جالسة شاداه وجميلة كتشوف فيه بأسى وحب ... دزرات مينة راسها كتشوف فلحوايج مسخين والشورفيت الكحلة اللي لابس مسخة من الصدر ودفارو فيه لوسخ من لداخل وطوال .. تنهدات مينة وقالت

- شو شووو.. شوووفي الدفار .. شوفي على حالة والوسخ ... الدري مكرفسين عليه المعفونات الله ياخد فيهم الحق

جميلة: دخليه دوشي ليه انا نجيب ليه شي حاجة من حوايج صفوان

دخلات مينة حيدات ليه لحوايج يدوش وبدات تغوت وتعيط لجميلة خلعاتها وجات كتجري عندها طلات لقاتها كضرب فخادها وتوريها صدرو وفخادو