لعنة فرعون

الفصل الأول ( ظهور القوة)

النهاردة 14 نوفمبر الجو خريفي جميل الصبح بيكون معتدل وبليل بتبدأ درجات الحرارة تقل شوية ، وبمناسبة الجو ده صحيت الساعة 8 الصبح بدري على غير عادتي من ساعة ما خدت الاجازة بعد أمتحانات الميد تيرم في الكلية وكنت متحمس اوي النهاردة علشان الرحلة اللي هروحها مع صاحبي (علي) . بحب أطلع رحلات للأماكن الأثرية علشان أتعرف على تاريخ بلدي وأثارها وكل حاجة تخص أجدادي الفراعنة .

بصيت على السرير اللي جنبي واللي كان فاضي ، السرير ده بتاع أخويا (أحمد) واللي بالمناسبة هو طالب في كلية الشرطة لكن لسه موعد أجازته الأسبوعية مجاش، كنت مفتقده أوي لكن هانت كل يومين ويجي وأصحى من النوم ألاقيه ونفطر سوا وللصدفة الحلوة موعد أجازته هيوافق موعد أجازة بابا هو كمان مش موجود بحكم شغله في الجمارك علشان كده بيسافر الغردقة ومش بيجي غير في الاجازات كل فترة .

قبل ما أكملكم باقي حكايتي خلوني الأول أعرفكم على نفسي . أنا (سيف) طالب في كلية الأثار جامعة القاهرة في الفرقة الأولى ، ساكن في مكرم عبيد في مدينة نصر ولحظي الحلو إنها مش بعيدة اوى عن الكلية .

قُمت من سريري وجهزت نفسي علشان أروح المطبخ وأول ما دخلت لقيت أختي (سارة) قاعدة فاتحة كتابها بتراجع دروسها قبل ما تروح المدرسة كالعادة و أمي الدكتورة (مريم) بتحضر باقي الفطار .

- مش عايزة مساعدة مني يا أمي .

- شكرا يا (سيف) مش عايزة كركبه هنا .

قالتلي كده وهى بتضحك .

- كنت عارف ، بس لو أحتاجتي حاجة أنا موجود يعني .

- مش ناوي تعدي عليا في النادي النهاردة بعد ما أخلص شغل ؟

- انتي عارفة أن أنا مش حابب الرياضة وكمان أنا عندي رحلة النهاردة على فكرة .

- علشان كده هيفضل جسمك ضعيف كده يا سيف علشان خاطري فكر ، وبعدين رايح في المرة دي ؟

- حاضر هفكر ، رايح المعبد الجنائزي قريب من هرم خوفو .

- أهم حاجة متتأخرش .

قولتلها تمام وقعدنا نفطر سوا وبعد ما خلصنا فطار روحت اوضتي علشان أجهز أغراضي اللي هحتاجها معايا حطيت في شنطتي دفتر صغير وقلم والكاميرا علشان انا بحب أخد صور كتير للأماكن اللي بزورها وكمان الصور دي بتساعدني كتير في الدراسة .

أتصلت على (علي) ، لما رد قالي أنه أتحرك من بيته وجاي بعربية اوبر وهيعدي عليا واني أنزل دلوقتي تحت البيت ،ولما نزلت معداش عشر دقايق وكان (علي) وصل ركبت العربية وبعدين بدأنا رحلتنا للمعبد الجنائزي .

أتعرفت على (علي) في الكلية واللي بالمناسبة هو مش شبهي في حاجة خالص هو كان شخصيته انطوائية وانا شخصيتي اجتماعية هو دخل الكلية دي بس علشان المجموع على الرغم أنه هو كان شاطر فيها وانا كنت بساعده ، لكن انا دخلت الكلية دي علشان بحبها وعندي فضول أعرف كل حاجة عن مجال دراستي علشان كده كنت بطلع الرحلات اللي زي دي علشان أعرف كل حاجة على أرض الواقع . كنت في الأول بطلعها لوحدي قبل ما أعرف (علي) لكن بعد ما بقينا صحاب خليته يجي معايا ويشاركني المتعة دي .