لعنة فرعون

الفصل الثامن (الهاكر الأخلاقي)

لما دخلت الكافية ولقيت (رقية) قاعدة لوحدها كنت متوتر جداً لما بنبقى حاسبين حاجة وتلاقي حاجة تانية بنحس إن الأرض الصلبة اللي تحتنا بتتهز وانا مكنتش حاسس إن الأرض الصلبة بس هى اللي بتتهز لا انا كنت حاسس إن العالم كله بيتهز ، منكرش إني كنت مبسوط وقلبي بيدق جامد علشان شفتها بس كنت متوتر جداً.
طبعا مكانش ينفع ارجع لكن قلت لنفسي لازم اسيطر على إحساس التوتر ده ولو دي كانت أول مرة نخرج انا وهى لوحدنا فلازم اخليها ذكرى حلوة وقربت من التربيزا اللي كانت قاعدة عليها ورسمت على وشي ابتسامه في محاولة اني اخبي اللي جوايا وسلمت عليها وقعدت في الكرسي اللي قدامها .
- (لميس) اعتذرت في آخر لحظة قبل ما اجي ، بس انا مرضتش أجل الخروجة علشان متزعلش .
- نفس اللي حصل معايا بالظبط (علي) بردو مقدرش يجي علشان بيجيب باباه من المطار .
- دول متفقين بقى . وضحكت وضحكت انا كمان معاها 
طلبت لينا حاجة نشربها ، طلبت اتنين عصير فراولة لأن (رقية) بتحبها اوي كانت في مرة قالتلي انها بتحبها واحنا في كافيتريا الجامعة .
بعدها حكينا لبعض كل حاجة حصلت معانا الفترة اللي فاتت وطبعاً حكيتلها اللي حصل من جهة (سيف) عن زيارتي لمكتبة الإسكندرية واني كنت مبسوط بزيارتي ليها وطلعت تليفوني وبدأت اوريلها الصور .
- بحب اوي طريقتك وانت بتتكلم عن الاماكن اللي بتزورها يا (سيف) وحكيك للتفاصيل وتصويرك ليها بتحسسني إني زورت المكان ده بس شيفاه بعيونك انت .
- وايه رأيك فيها لما شوفتيها بعيوني .
- وكأنها مكان من ارض مقدسة .
- للدرجة دي؟  .
- انت مش حاسس انت بتتكلم عنها بشغف وحب ازاي .
كنت مبسوط اوي من كلام (رقية) وحاسس إني طاير من الفرحة اتمنيت ساعتها لو اعترفلها بمشاعري واعرف اقولها كلام حلو زي اللي بتقوله بس نفسي اتأكد اكتر من مشاعرها تجاهي علشان متخذلش لأن اهون عليا اني افضل احبها من طرف واحد ولا إنها تخذلني .
بدأت هى كمان تحكيلي عن يومها وعن رواية كانت بتقرأها اليومين اللي فاتوا شداها اوي ومسابتهاش إلا لما خلصتها .
- احكيلي عنها عايز اسمعك .
ضحكت وضحكت على ضحكتها مقدرش اشوفها ومكونش مبسوط .
- بص يا سيدي الرواية بتتكلم عن اتنين اتقابلوا وحبوا بعض وبعدين راحوا يعيشوا مع بعض علشان هما في مجتمع غربي زي ما انت فاهم وفي يوم حبيبة الراجل القديمة اقتحمت بيتهم وضربت حبيبتة بالنار .
- بس ده كده الرواية اتحرقت بدري اوي !
- لا طبعا اكيد الكاتب مش هيموت البطلة في أول الرواية ، اكيد لحقوها بس بعد ما تعافت من الحادثة دي بدأت تتصرف تصرفات غريبة .
- بحب شغفك وانتي بتتكلمي عن الكتب واختياراتك بتشدني اوي .
ابتسمت وكملت كلام عن الرواية وبعدين طلبت منها اني اخد الرواية منها بكره في الكلية علشان اقرأها على الرغم من إني وبصراحة مش بحب القراءة بس (رقية) كانت بتتكلم عنها بشكل مشوق وكمان انا عايز أشاركها حاجة من اهتماماتها .
اتكلمنا في مواضيع تانية كتير وهزرنا وقضينا وقت حلو لدرجة أننا محسيناش أن الساعة بقت ١٢ والموضوع مكانش بالصعوبة اللي انا متخيلها وفكرت أننا نعيد الخروجة دي تاني لوحدنا بعد كده ، فعلا انت لما بتقضي الوقت مع حد انت بتحبه ومرتاح معاه بتحس انك منسجم والكلام بيبقى طالع منك بأريحيه ومش خايف من حاجة بتتمنى ساعتها إن الوقت ده ميعديش .