وماذا بعد

بارت 6

ونفسه ابو التكسي وصلنا لبغداد بس غير سيارته لأن يكول هاي مال محافظات والتكسي فقط موصل جان خوش ولد وبقى ويانا لآخر لحظة بعد ساعات طويلة اخيراً وصلنا الساعة جانت ب ١١:٣٠ بالضبط البيت كبير ما شاء الله طابقين صح مانتبهت عليه زين بس شكله فخم مليان اضويه فتحت الباب بنت ما شاء الله جمالها ماطبيعي شعرها اسود ويلمع تحسون كاعدة تتنافس بلون شعرها ويا سواد الليل ونجومه بس واضح الخوف من ملامحها صرختها كعدت الميت من كبره
: هايي وينج من الصبح يمههه
وراها طلعوا شباب اثنين  ورجال ومره بقت تخوزر بيه  حسيت صار انقلاب بالطارمة كلهم طلعوا خالة مرام دفعت البنية الحلوة ومسكت ايدي وشالت جنطتي من الكاع وفاتت وسدت الباب
:وجع حتى وجع العالم منه شتكول شكو تصرخين
انطت جنطتي للبنت وكلتلها : طيبه حطي هاي الجنطة بغرفتي وساعدي سارونه بالمشي خلي ترتاح بغرفتي  البنت الحلوة طلع اسمها طيبه أنا عايفة كلشي ومركزه بوجها ما شاء الله على البرائة

طيبه : تمام يمه بس منو هل بنيه ؟

:لج خلي نطب واخذلي نفس شكو موكفتنا بالبرد

: اي اي صح خلي نطب مسكتني وكامت تمشيني طبيت للغرفة بس فتت

فوراً ذبيت روحي على السرير حتى ماحجيت ويا طيبه من التعب احس بس اريد انام وماافكر بشي خطيه غطتني زين وحطت الصوبة قريب  مني وكالت

: باوعي حبيبي انتي لو ينكلب البيت بالعياط لا تخافين نامي ورتاحي
هزيت راسي بأيجابية طلعت هي وانا ماكو قايق ونمت ....

......

طيبه :؛ من امي راحت وانا اتصل عليها وهي ماكو للعصر اجا اخويه كلتله السالفة وهو كل شوية متصل على أحد من كرايبنا ويكلوله ماكو تالي اتصل على أبويه هم اجا هو ومرته وخواتي واخويه الثاني كلهم تجمعوا بالبيت وحجيتلهم القصة من اول ماكعدت لحد ما امي طلعت من البيت للخمسه العصر كتبت
: كافي تتصلين ولا تخافين وتخوفين اخوج ساعات وانا يمكم لا يضل بالكم طلبنا اكل وكعدنا ناكل ويزن كل شوية يحشش وايان يعيط بي ويسكته الساعات مرت مثل السم وصايرين نار بس واحد يتنفس تصير عركة بس ارجع واكللكم لازم يزن يحشش ويضحكنا

يزن : اكللكم والله يمكن ميمي هجت منكم
ايان : لك يزن انت اليوم ماتسكت لو شون وياك وحق رب الكعبة اذا ماسكتت راح اطردك
:لا لا وانشر بالأخبار واكول عاجل اخ يطرد أخاه الصغير واضيف بهارات من كيفي
طبعاً أهنا أني ماتحملت انفجرت بالضحك أني ويزن كلش تافهين على كلشي نحشش كعدت بنص يزن وايان واضحك واضرب على رجل يزن انتفض ايان وأشر على باب المطبخ يلا اطلعوا اثنينكم يلااا
:لج طيبه ذولة شبيهم مايتحملونا امشي اختي امشي حضني من كتفي وطلعنا
:اكلج شو جعت مرة الخ تجين نطلب لفات فلافل
:لك لا والله ايان يكتلنا هسة يكول بلا غيرة
:هم صدك بس والله ياعمي اريد اعرف امج وين شاردة كليلي اخذت عباتها ؟
:لعد شون ياعيني تطلع بالدشداشة
:هاهية لعد سوتها وهجت وصارت مقولة الأمهات أخيراً (البس عباتي واهج من البيت وماتلكولي درب )
: اي والله حقها غير ابوك دمرها
: اي والله ابوج نسونجي وتزوج عليها امي فتح الباب ايان بقوة وخزرنا أخذ ماي وطب شوية وكبت العيطه كمنا نتضارب اني ويزن منو يفتح الباب اول وكفنا نريد نفهم شكو أبوية ماسك ايد ايان يهدي وخالة ام يزن دتضحك بستهزاء
ام يزن : هسة ياعيني شكلنا شكو تعصبت هيج هو مجرد احتمال ايان
ركض للمزهرية شالها وركعها بالكاع ومابقى تحفيه اذا ماكسرها
ايان :لك يزن تعال سكت امك بعد مااتحمل لا اسويلي جريمة ابوك البارد المحترم مايكدر يسكت مرته
يزن راح كعد بالكاع مقابيل أمه وهي كاعدة على التخم ومسك ركبها
: شكو يمه شكو شسويتي وجننتي علينا اقصد عصبتي
أهنا كوه لزمت ضحكتي مدري شنو احساسي خايفة على امي ومتوترة من الوضع بس داضحك على تحشيش يزن .. ايان حط اديه على خصره ورفع رأسه وكام يتنفس بقوه وحجه
: لك كاعدة وتكول الله يعلم وين راحت يجوز شردت ويا صاحبها واني ساكت واكول ميخالف مره جبيرة خلي انجب واسكت تالي تكول شو صيحولي يزن لأن مااحب كعداته ويا هل طيبه خاف يسوون شي حرام
ضرب الميز الي صاير بنص الصالة ويضرب بقوه ويكول
: ياعالم ياناس يابشر يالكائنات كلها اخ واخته شنو الشي الحرام الي راح يسووه لج الله اكبر على تفكيرج الوسخ راح تجلطوني راح اموت وماخلص منكم انتفض يزن بعصبية اول مرة اشوفه يتعصب لهل درجة
:شنوووو لج يمه شدتحجين اختي اختي طيبه شنو هل كلام يمه ترا مصختيها  وشون تحجين على خالة مرام وتكسرين بشرفها يمه يرحم اهلج ارجعي انتي وخواتي للبيت وخلي الزلم تحل السالفة
مدري شون نزلوا دموعها بهل سرعة ضربت على صدرها وخدودها : اي اي بعد طرد امك من بيتها بعد كون اموت حتى ترتاحون مني لك يمه شحجيت هسة اعتبروا الشيطان حجاني أستغفر الله مدري شون طلعت مني ياوليدي ايان تدري بمعزتك عندي وتعرف مااقصد شي هز رأسه ايان وكعد على الدرج وحط رأسه بين اديه وخذله صفنة ويزن كل شوية يكول لامه روحي للبيت وهي معانده الا تبقى كام لم وياي الكزاز المكسر وكعدنا ماتناقشنا على كلام خاله حتى ماتصير مشكلة اكبر احنا بياحال هسة ..صار الساعة تسعة وامي ماكو مابقت فكرة سلبية اذا مااجت براسي سويت عشه وغسلت المواعين وسويتلهم جاي وكلمن اخذله زواية وكعد بيها ليليان وليان ناموا وخالة وبابا كعدوا يسولفون ايان كل شوية يسحب جكارة ويطلع لطارمة يرجع يفوت علمود بابا كاعد ويزن يكلب بالموبايل صارت الساعة ١١:٣٠ اندك الباب احس أهنا كلبي مشه قبل رجليه كلنا ركضنا فتحت الباب وشفت ماما وياها بنيه حلوة كلش بس وجهها مليان كدمات وشفتها مشكوكه وينزل منها دم من خوفي صرخت بوجه ماما
:هاي وينج من الصبح يمه
دفعتني  ورزلتني نوب كالت طببي لبنيه جوه طببتها واشوف وجوه اهلي مليانة علامات استفهام عدلتلها الغرفه وهي فوراً نامت حتى مانطتني مجال اسئلها انتي منو عفتها ترتاح وطلعت اسمع من أمي احسن شي