الكاتبة سُرى صَدام
ايان كوه متحمل ومايريد يسوي مشكلة وامي برودها كتلنا كلنا كعدت يم الصوبة وكالت
:طيبة جيبيلي جاي ادفي اعضامي بي وانتو شبيكم فوك راسي ماتكعدون ؟
كلهم واكفين ينتظروها تحجي كعدوا ومنتظرين تكول اي كلمة وانا اخاف اروح اسوي جاي وتسردلهم شصار بدوني شو هي فوراً عاطت بية
:لج مو احجي وياااج سوي سم جاي خلي اشرب رحت على السريع حطيت الجاي على النار ورجعت كلتلها
:اي يمه احجي سولفي كولي اي شي خلي نفهم شصار
:بعدين خلي ارتاح وانت ابو ايان اتفضل خذ زوجتك ورتاحوا ببيتكم اعتقد تأخر الوقت
ام يزن : شو حسيت تطردين بينا
: لا ياعيني ماطردت ولا شي كاعدة اكللكم روحوا ارتاحوا والصباح رباح ونحجي بعدين لو سمحتي ام يزن البنيه نايمة مااريد تعلى أصواتنا
أبويه كال لخاله أم يزن
: يلا امشي وكعدي البنات يلا كوم يزن انت هم
يزن كام يعدل بملابسه ويضرب كف بكف مسوي روحه ضايج
:هسة ياأخي دعوفوا يزن بحاله مشتاق لميمي اريد اعرف وين هجت بهل ساعات
ام يزن :لا كوم لو تريد جان كالت وين جانت كدامنا ومنو هل مصيبة الي جايبتها
رحت طفيت الجاي وانا داصب اسمع امي ترد على خالة ام يزن
: مالج غرض يمي أم يزن وبلا مشاكل بتالي الليل اعتقد هاي أمور عائلية ماتخصج تخصني الي ولعائلتي وهل مصيبة الي تحجين عنها عدها اسم وهي مامصيبة هي رزق بالنسبة إلي وتصبحين على خير ان شاء الله
ابويةوخالة ماعجبهم كلام امي كلهم طلعوا وانا فتت انطيها الجاي واطلع وراهم هي فوراً صاحت بأسم يزن
: يزن وليدي انت ابقى أهنا
كالت الجمله لو فجرت البيت منه خلصت امي ألجمله منه طبت خالة ركض على امي ووكفت يم الدرج وتحجي وتلوح بأديها
:ليش عيني يبقى شعنده أهنا ينام ببيتا شكو ينام عند الغربه هستوج تكولين أمور عائلية شكو لعد تريدين ابني يبقى عندج وبعدين عندج بنات شنو ماتخافين عليهن ولو سمحتي مرام لا تكولين ليزن وليدي شجابة وليدج غير أنا حبلت بي وربيته شنو تريدين تأخذين تعبي
رجعوا طبوا كلهم على صوتها العالي
يزن :حييييل لج يمه شسويتيها قصة وشنو هل حجي منين تخاف عليهن مني مثلاً ؟هذولة خواتي لج يمه شوكت تقتنعين أن الي تكولي حرام واي نعم أنا ابنها ماالا جابتني حتى تصيحلي ابني هسة من ايان يصيحلج يمه ولو هو مايصيحلج يمه الشهادة لله بس يعني المعنى بقلب الشاعر ماعلينا المهم يرحم اهلج لا تدخليني بزعلكم هسة ابوي هو الي سواكم ضراير صخام يزن شعليه اشر على بابا وحط أيده على رأسه
:طبعاً أبويه على راسي بس شنسوي الصراحة مايصير تتزوج على ميمي وتجيب المصايب للروحك ووكعنا بيها احنا الاطفال هو ديحجي شقه وأمه خزرته وتحجي بحركه حسيتها تتعارك ماتحجي
:اي اي غيروك عليه مااكدر بعد احجي مع ابني ابقى عيني ابقى دنشوف تاليتها وياكم يومين وأشوف بناتي بحضنج ولازم هم انجب واسكت
مرام :ام يزن عيب تحجين هل حجي طيبة وايان هم جهالج اعتبريهم
:اي سكتيني دادا يلا عيني مع السلامه
الظاهر مايفيد ويا خاله الحجي كوه سوتها عركة .. بس طلعوا رحت يم امي ركض كعدت يمها أنا ويزن وايان كعد على الدرج ايان :يمه بقيت ساكت حتى لا اسحي البنيه واسحيج اعتقد هسة فاضي البيت بقينا بس احنا ومثل ماتكولين أمور عائلية واحنا هسة عائلة اتفضلي احجي منو هل بنيه ليش وجها مليان كدمات كومه اسئلة براسي اتمنى تحجيهن بدون ماتخبين شي هزت راسها بأيجابية
:ثلاثتكم ركزوا بكلامي ويزن عفتك لأن اعتبرك من العائلة لأن انت ابني وقبل ماتحشش انجب خلي نحجي شوية بجدية هل بنية بنت تغريد صديقتي من ايام الطفولة الي ماتخليت عنها ولا تخلت عني ابد يعني بنتها هي بنتي واساور اذا واحد بيكم داسلها على طرف ابتر رجله مفهوم ؟
ايان فرك وجهه بنفاذ الصبر وكال
:اي يمه افتهمنا مادنكلج هددينا هسة احنا ليش شفناها حتى راح ندوسلها على طرف افتهمنا هاي بنت صديقتج واذكر خالة تغريد بس بنتها ماجنت افرق بينها وبين الولد شكد مامسترجلة السؤال ليش هيج خلقتها غير نفهم امي وايان صاروا اعصاب اثنينهم وانا ويزن دنسمع حتى نعرف شون نحشش بعدين اقصد نتناقش امي خزرت ايان
:شبيك هيج متعصب لك لا تحسب راح اخاف منك واكعد ابرر ترا داحجي حتى ماتخافون أو شي ووجع بكلب العدو البنية راح تبقى أهنا لحد ماتصفه الأمور الخاصة بينها وبين أهلها كام ايان وصفق ايد بأيد وعمل وضعية الاستسلام
: أهنااا الحجي مسوية مصيبة ويا أهلها وجايتنا يمه يرحم والديج لا تدخلينا بأمور احنا في غنه عنها بأجر عكبه أهلها يشتكون أني طلعيني برا السالفة تعال ادخل سجون علمود وحدة مانعرف أصلها من فصلها وخالة تغريد على عيني وراسي بس بنتها أني مااعرفها لذلك بالمختصر لا تدخل بينا ولا ندخل بيها أو ادخلوا بيها انتو بس اني طلعوني من سوالفكم
:وانت منو أجا صوبك لك انت دير امورك وبعدين تعال احجي
هز رأسه وهو ديطلع البايات كال
:خوش عاشت ايدج هاهية كلمن يدير باله على حياته تصبحون على خير طلع ايان وامي تنرفزت وكامت ترزل بصوت ناصي حتى لا تكعد البنيه
:لج هذا شبي اخوج من ايمتى وهو هيج قليل ادب
:ميخالف يمه غير خايف عليج
:لا يخاف هيج خوف هم ماينراد وجذب ماخايف
بي شي اكيد شمصخمين بغيابي وديروا بالكم تجذبون ادبسزيه يزن :هسة يمه شو هو تعصب عليج واجيتي رزلتينا النا حتى مافكينا حلكنا
:نجب واحجي شصار
طبعاً أني خزرته حتى مايكول شكالت أمه بس هو مايكدر يخبي شي على امي سولفلها كلشي وهي صارت اعصاب وبقت تغلط على أبويه وتدعي عليه لأن مادافعلها شالت الاستكان مال جاي وحطته بالمطبخ وراحت على غرفتها حتى ماكلتلنا شي بس صرخت علينا بنتر هي وبالغرفة شكلها نست حتى نايمه البنيه
:كوموا انطمرواا انت وهي
:هاي شنو ولج هي أهنا تحجي بهمس راحت يمها كامت تصرخ غير سالفة هاي والله ياالله ايان يحجي واحنا نبتلي كومي طبطب سويلي جاي
:لك ماتعوفني اروح انطمر احسن كلت الجملة وكمت اطب لغرفتي ضربني على رجلي
:ها ها والله اصيحلها تسحلك هسة كام سحبني من شعري وخربطه ازيد شي اتنرفز منه من أحد يلعب بشعري وهو دائما يسويها نوب أني هم مسكت شعره الا امي طلعت رزلتنا
:ولكم شوكت تكبرون والله دمرتوني والله لج طيبة اذا ماعفتي اخوج مااخلي شعراية براسج
:ترا هو بدأ
اجت ضربتني على راسي ودفعت يزن على الدرج
:يلا انتي على غرفتج وانت يم اخوك روح نام يلااا كدامي هو يطلع ويحلك بوسات بالهوى يضحك امي وهي تبتسم
وتكله : فدوه اروحلك وين اكدرلك اني
رجعت باوعتلي صفح ماعاجبها وكالت طفي الصوبة وروحي نامي فاتت غرفتها وسدت الباب هزيت ايدي وكلت :عزا بعين العدو شبيهم ذوله رحت على غرفتي لفيت راسي ونمت..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
أنت تقرأ
وماذا بعد
Fiksi Umumاخويه الي طوله يسد عين الشمس اشوفه بنص ديرته ودمه بطوله ومحد كادر يشيله .. صرخت بعله صوتي حسيت حتى درابين بغداد سمعتني الا هو :يمه مااات ابنج ماات ...
