بنت إبليس

الجزء ١

الناس انواع وأصناف فيه إللى على نياته وفيه الخبيث فيه الأصيل وفيه الخسيس وفيه الطيب وفيه إبليس.
وإبليس مش بقرون وديل زى مانتوا متخيلين ده راجل عادى وآه من قلوب الناس لما تسود بيبقوا ألعن من الشياطين.
اسمه إيه ؟؟؟؟؟؟ تصدقوا نسيت يمكن خالد....لأ أظن على ...آه إفتكرت اسمه سيد بس الناس خلاص اتعودت تقول إبليس إبليس لحد ما كل الناس نسيت سيد وافتكرت بس إبليس ولما سألنا مين سماه بالإسم ده قالوا إن زمان من أكتر من عشرين سنه جه راجل غريب سأل عنه وبعدها سمع الناس الراجل بيبكى ويصرخ بأعلى صوته (( منك لله ربنا ينتقملى منك إلاهى تشوفها من أعز عيالك.ده إنت مش بنى أدم ده إنت إبليس أعوذ بالله منك يا إبليس ربنا ينتقم لى منك يا إبليس))
//.أما هو فى الحقيقة ألعن من إبليس أصله (( مُرابى))يعنى بيتاجر بالربا.ويسلف الناس بالربا. حتى شوفوا معايا.(( الاحدث سنه ٢٠٠٢))
سيد (إبليس): شوف يا عبدالله إنت عارف إن العيشه صعبه وأنا تاجر وتجارتى واخده كل فلوسى ومبلغ عشرة ألاف جنيه مبلغ كبير.
يتنحنح عبدالله بتوتر::عارف يا معلم بس أنا أملى فيك كبير إنت عارف البت هتخش الشهر الجاى ومحتاج أخلص جهازها وأسترها
سيد (( إبليس)): وماله يا حبيبي ربنا يستر على ولايانا..بص أنا المبلغ ده مش متوفر معايا دلوقتي
عبدالله بخوف: لا يا معلم ابوس إيدك. ده أنا معنديش غيرك أروح له.
لمعت عيون ابليس وقال: وأنا ميرضنيش أرجعك مكسور الخاطر بص أنا هديك عشرة تلفزيونات جداد لانج بكرتونتهم ماشى تمن الواحد بسعر المصنع ألف جنيه يبقوا العشره بكام .
عبدالله: يبقوا العشره بعشرة ألاف جنيه.بس أنا هعمل ايه بالتلفزيونات أنا عايز فلوس
إبليس: ماهو إنت هتبيعهم وتاخد الفلوس
عبدالله: وأبيعهم لمين.دول عشرة بحالهم.
إبليس: بعهم لقرايبك لجيرانك لزمايلك في الشغل يعنى مش هتغلب والناس مهتصدق تلاقى تلفزيون رخيص إحنا قلنا الواحد بكام؟
عبدالله: بألف جنيه
إبليس ( سيد): لأ ده سعر المصنع لكن الناس هتشتري بسعر تانى خالص يعنى هنفترض إنك بعت الواحد بسعر ١٥٠٠جنيه يبقوا العشره بكام ؟
عبدالله: ب....استنه أحسب.
إبليس: مش محتاجه حساب يبقوا بخمستاشر ألف جنيه.فهنقسم المكسب بالعدل إنت التلت وأنا التلتين..يعنى يعنى هترد ليا العشر ألاف ١٣ألف جنيه
عبدالله: وهو ينفع أبيع الواحد بألف ونص.
إبليس: ده على الأقل ده إنت ممكن تبيع الواحد ب١٨٠٠ولو هتقسط ممكن تبيع الواحد ب٢٠٠٠أو٢٢٠٠ كمان.بس أنا هحاسبك على ألف ونص والزياده حلال عليك يعنى ممكن تكسب فوق العشر ألاف عشره كمان يعني ترد ليا فلوسى من المكسب.وتجوز بنتك من غير ما تتداين.(( لمعت عيون عبدالله بسذاجة وهو بيحلم بالمكسب الكبير إللى هيجي من بيع التلفزيونات أما ابليس فلمعت عنيه بمكر لأنه وقع الزبون الساذج بسهوله.))
إبليس: وعلى العموم تبيعهم بخمستاشر بعشرين إن شالله بخمسين أنا هاخد ال١٣ ألف بتوعى والباقي حلال عليك.قولت إيه؟
عبدالله: موافق يا معلم.هاخد التلفزيونات إمتى؟
ابليس: حالا بس الأول هتمضى لى على دول!
عبدالله: إيه دول؟
إبليس: دول عشرة شيكات كل شيك ب
عبدالله: بألف جنيه
إبليس: ب٣٠٠٠جنيه يعنى هتمضى شيكات ب٣٠ألف جنيه
عبدالله: كتير يا معلم
إبليس: كتير إنت شايفهم كتير ده أنا بقطع من قوتى وقوت بنتى عشان أديك فلوسك وتفك أزمتك يعنى بشيلها من بوء بنتى وباديهالك وتقولى كتير واضمن منين إنك هترجعلى حقى مش هتبيع وتكسب وأدى وش الضيف لازم أربطك بشيكات ومادمت هترجع لى فلوسى في معادك فأنت حبيبي وهتاخد شيكاتك وفوقهم بوسه لكن هتلاوع فانت عارف مش هسيب ولاشلن واحد من فلوسى قلت إيه.؟
عبدالله: خلاص يا معلم موافق وهمضى على الشيكات وربنا يعنى وأسددك.
ابليس: وماله طيب إيدك على عشرين جنيه.
عبدالله: ليه يا معلم؟
إبليس: اجرة الربع نقل إللى هتنقل لك التليفزيونات على بيتك ماأنا مش هدفعهملك من جيبى.
وبعد شويه دخل راجل ومراته المحل.إبنه وكل واحد شايل كرتونه كبيرة
الست: خد يا معلم كراتينك ويا دار ما دخلك شر.
الراجل: استنى بس يا سعديه على ما أتفاهم معاه
الست: مفيش تفاهم ياخد تلفزيوناته ويجيب لنا الشيكات بتاعتنا.
إبليس: حيلك حيلك إنت وهيا إنتوا هتغنوا وتردوا على بعض عايزين إيه منك ليها.
الراجل: شوف يا معلم احنا جايبين التلات تليفزيونات دى نرجعهم لك وعايزين الشيكات بتاعتنا
إبليس: جايب إيه يا حبيبي وأنا مالى أنا ليا فلوسى خد كراتينك واتكل على الله وقدامك لسه شهرين تكون جهزت ليا فلوسى
سعديه بردح وصوت عالي: فلوس إيه يا أبو فلوس بقى يا نصاب تدينا خمس تليفزيونات الواحد بألف جنيه وأتاريهم فرز تانى الواحد بيتباع ب٤٠٠بسبب عيوب الصناعه.لأ وإتنين منهم مفيش فيهم الرجا.
إبليس بهدوء: وأنا مالى شوفى يا ست إنتى أنا إديتكم بضاعة زى الفل ماليش دعوه بكلامك ده فإمشى من وشى.
سعديه: طيب أنا هطلع من هنا على القسم أكتب فيك بلاغ.
إبليس: وماله اهو القسم عندك أهو اكتبى إللى عايزاه ولما تزهقى من الكتابه إبقى اقرأى إللى كتبتيه يالا مع السلامه.
سعديه : ماشى واحنا بقى مش هنجيب لك فلوسك
إبليس: براحتكم خالص اتوا قدامكم شهرين لو ما أخدتش قلوسى بعد شهرين ويوم هرفع على جوزك خمس قواضى بالخمس شيكات إللى ماضيهم .
الراجل بخوف: بس يا سعديه يا معلم خد دول تمن التلفزيونين إللى بعتهم ألف وستميت (( ستمائة)) جنيه والكراتين أهم خدهم وهات الشيكات بتاعتهم يا معلم
إبليس: أخد إيه يا حيلتها إنت أخدت خمس تليفزيونات بخمس ألاف جنيه والمفروض ترجعهم ليا سبع ألاف جنيه جايب ليا ألف ونص أعمل بيهم ايه ؟ انا عايز فلوسى.
الراجل بإنكسار: إنت عارف إن.
إبليس: أنا معرفش غير تجيب ليا فلوسى
الراجل: ده حرام دى سرقه.
ابليس: وأنا حرا* مى.
سعديه بإنكسار: ترضاها على نفسك تأكل بنتك من الحر*ام
إبليس: أرضاها ملكيش دعوه يالا خدوا كراتينكم وإطلعوا بره.
الراجل: منك لله يا شيخ حسبى الله ونعم الوكيل
إبليس: اتحسبن من هنا لبكره
خرجت سعديه وهيا بتعيط وجوزها وهو مكسور وسعديه بتقول:وتوجه كلامها للناس منك لله يا شيخ منك لله يا حرا*مى ده حرا*مى ده نصا*ب.ده ياكل مال النبى منك لله صدق من قال عليك إبليس
وأكيد كل الناس بتتفرج عليها بس ماهتمتش أصل دى مش أول مره تقريبا اتعودوا
إبليس: واد ياجلال.
جلال ؛: أيوه يا معلم
ابليس: خد بالك من المحل أنا هروح أتغدى وأريح شويه والعصر أبقى ألف على بقية المحلات وزى ما فهمتك أى حد يجيب فلوس أيدها واكتب اسمه فى الأجندة ماشى
جلال: ماشى يا معلم
&&&&&&&&&&&&&&&&&&&_
فى نفس الحاره بس بعيد شويه كان فيه خناقه والناس ملمومه والكل بيتفرج في البلكونات والشبابيك.
يوسف وهو بيضرب البوكس: بقى بتعاكس البنت يابن الكل*ب وأقولك إبعد عنها دى بنت حتتى.
الشاب: أديك قولتها بنت حتتك يعنى مش من باقية عيلتك.
يوسف: مادامت من حتتى تبقى من باقية عيلتى وإللى هيقرب منها أنسفه من على الأرض سامع.شايف ياكلب الحاره دى من أولها لأخرها لو بصيت لأي بنت فيها بصه كده ولا كده أخذق لك عنيك دى وده أول وأخر انذار لك يالا اخفى من هنا وزقه بقوه فوقع الشاب على الارض.والكل بيقول:(( يحميك لشبابك يا يوسف))((ربنا يكتر من امثالك)) (( تسلم الإيد إللى ربتك))(( ربنا يخليلك ابنك يا استاذ عبد الكريم))
عبد الكريم بفخر: شكرا ربنا يبارك لكم في أولادكم وتفرحوا بيهم وتشوفوهم زى يوسف إبنى.
كانت زينب بتتابع الخناقه من البلكونه وهى بتبتسم وتقول في سرها،: ربنا يحميك يا يوسف يا أجدع شاب في الحاره كلها.
فى نفس الوقت رفع يوسف عينيه فشافها في البلكونه فإبتسمت له لكنه بص لها بقرف وكشر وبعدها بص للناحيه التانيه.
زينب بنت جميله اوي عندها ١٧سنه في الثانوية العامة أخدت كل ملامح أمها وشها أبيض منور زى القمر ليله تمامه شعرها اسود طويل ناعم زى الحرير لحد خصرها ابتسامتها كلها جاذبيه وبراءه أما عينيها فدى الحاجه الوحيده إللى أخدتها من ابوها عيون سود واسعه ونظرتها حاده كلها مكر وخداع .
إبليس: بتتفرجى على إيه يا زينب.
زينب: ده الباشمهندس يوسف كان بيتخانق
إبليس: سبع البرمبه كان بيتخانق تلاقيها نمره وهو عاملها عشان يرسم على البت.
زينب بزعل: لا يا بابا الباشمهندس يوسف مايعملش كده ده كله شهامه ده عنده اخلاق
ابليس بسخرية: عنده شهامه عنده أخلاق بلا قرف أمال فين إخلاص إنت يا إخلاص
بلعت زينب ريقها بتوتر وقالت: خالتى إخلاص روحت.
إبليس:بزعيق: إيه روحت ليه أوعى تكونى إنتى إللى خلتيها تروح.
زينب بخوف وتوتر: أصل يعنى...
صرخ فيها: أصل إيه ؟ ماتردى
زينب: أصل حرام يا بابا تشغلها خدامة عندنا.
إبليس بزعيق: حرمت عليكى عيشتك ليه مش هيا اللى مدفعتش إللى عليها.قال جايبه ليا شيخ الجامع.
زينب: الست عليها ألف ونص وشيخ الجامع لم لها ٩٠٠جنيه وجه استسمحك في الباقي
إبليس: وأنا سامحتها وإتنازلت عن القضية
زينب: اتنازلت مقابل تشغلها خدامه عندنا ست شهور.بدل ماتسامحها لوجه الله
إبليس: نعم أسامح مين ليه فاتحها سبيل لازم أشغلها ولا كل واحد مايعرفش يدفع يجيبلى شيخ الجامع ويعيطلى شويه حاجه تغم يالا قومى فرغى لى الأكل عشان أطفح وأتخمد شويه.
زينب: حاضر
على السفره كان بياكل باستمتاع: إنتى يا بت يا زينب عليكى نفس في الطبيخ إنما إيه.بس برضوا من بكره تخلى إخلاص هيا إللى تطبخ وتنضف البيت أنا عايزك تركزى في مذاكرتك عايزك تبقى شاطره عايزك تطلعى زى أبوكى ناصحه ومافيش حد يقدر يضحك عليكى
قولى ليا في حد مضايقك في المدرسة ؟
بصت زينب في الأرض بإنكسار فصرخ فيها
ارفعي راسك وانت بتتكلمى معايا قولى مين؟
زينب: مفيش حد بس البنات بتعايرنى وبتقول يا....
إبليس: يا إيه يا بنت إبليس وإيه يعنى ده أنا ميفرقش معايا بالعكس عاجبنى الاسم بيخلى الناس بترتعش منى من قبل مايشوفونى مش زيك هبله زى أمك الله يرحمها كل ما حد يقول لها حاجه كانت تعيط زيك.
تمسح زينب دموعها وتقول: طيب أنا عايزه اروح عند خالتى
ابليس: لأ تروحى عند خالتك لأ هيا لو عايزه تشوفك تيجى هيا لكن إنتى تروحى عندها لأ.
زينب: إنت عارف جوزها مانعها تيجى عندنا.
إبليس: أحسن عيله فقر مبيجيش من وراها إلا الهم قولت لك بطلى عياط أنا مش عايزك ضعيفه كل شويه تعيطى أنا عايزك زىى قلبك مي*ت وتنسفى كل إللى يدوس لك على طرف ومايصعبش عليكى حد إللى يصعب عليكى يفقرك فاهمانى يا زينب.
هزت زينب رأسها.كالعاده.
ابليس: اقعدى هزى راسك كده زى الحمار عمرك ما هتتعلمى طول ما انت هبله وبينضحك عليكى كده.
&&&&&&&&&&&&&&٥٥
تانى يوم في المدرسة كانت كل البنات بتضحك وتهزر ماعدا زينب قاعدة في أخر تخته لوحدها لأن الكل مقاطعها ومفيش أى حد بيكلمها حتى صاحبتها الوحيدة أمانى بتكلمها في السر وخايفه أى حد يشوفها ويقول لأهلها إنها بتكلم بنت إبليس.
دخل عليهم مدرس جديد
الأستاذ: أنا اسمى أحمد مدرس الإنجليزي الجديد وقبل ما أبدأ في الشرح أحب أتعرف عليكوا فياريت كل واحده تقوم وتعرفنى بنفسها.
فبدأت كل بنت تقوم وتقول اسمها وقبل ما تتكلم زينب قامت بنت وقالت: يا استاذ يا استاذ عايزه أسألك سؤال هو إبليس لو عنده بنت يبقى اسمها إيه.
الأستاذ بعدم فهم: هو إبليس متجوز
البت: افرض إنه متجوز وكمان مخلف بنت تتوقع يكون اسمها إيه؟
فيبتسم الأستاذ ويقول مش عارف يمكن تكون جنيه ولا عفريته بنت إبليس.
فتقول البنت: منوره يا زينب
فتضحك كل البنات أما زينب فتنزل راسها وعيونها كلها دموع.
&&&&&&&&&&&&&&&&&&&&&
انتظروا أحداث مشوقه وقويه جدا في الأجزاء الجديده.وطبعا قصتى دى مش رعب ومش رومانسيه ومش اجتماعية ومش انسانيه ومش كوميديه
بس برضو مستنيه الليك الحلو والتعليق المشجع ورأيكوا في البارت ده مع خالص حبى وتقديري حياة محمد