بنت إبليس

الجزء ٨

بعد ٣سنوات
الدكتور: وبكده نبقى أنهينا الفصل التالت من مبادئ علم الإقتصاد وان شاء الله هنبدا في الفصل الرابع المحاضرة الجايه.فيه حد عنده أى سؤال؟ أو الاستفسار ؟.
خلاص كده انتهت المحاضرة أشوفكم المحاضرة الجايه.وخرج الدكتور.
أمانى: ياااااا اخيرا خلصت المحاضره ده أنا دماغى ورمت
زينب: لأ والدكتور عنده طاقه لت جباره مش عارفه ساب إيه للحريم.
أمانى: غريبه أول مره تنتقدى المحاضره للدكتور.
زينب: أعمل إيه ما أنا دماغى ورمت وأصلى مانمتش كويس بعد سهرة امبارح.
أمانى بحماس: وعملتى إيه امبارح احكيلى.
زينب: يابنتي تعالى معانا بدل ما كل مرة تسألينى.
أمانى: عايزانى أجى معاكى ديسكو انتى عايزة أبويا يعلقنى من ودانى في السقف بدل المروحة.
ضحكت زينب بصوت عالى وقالت: متخيله شكلك وانتى فى السقف
أمانى: بايخه
زينب: طيب يا إللى مش بايخه هتيجي أوصلك.
أمانى: ماشى بس..
باسم: هاي زيزي هاى أمانى تيجوا معانا الشله كلها هتروح كافيه.
زينب: لا يا عم أنا دماغى أد كده ولسه عندى شغل العصر.فيادوب ألحق أنام ساعتين.بس لو حصل أكشن إبقى احكيلي ماشى سلام
باسم: سلام يا مزه.
أمانى: طب مادمتى مصدعه خلينى أنا إللى أسوق المره دى.
زينب: يا حبيبتي أنا مصدعه وعايزه أنام ساعتين وأقوم العصر مش أقوم يوم القيامة.
أمانى: والله العظيم إنتى رخمه تعالى وصلينى وعقابا لك هتعزمينى على فطيره بالكاسترد ماشى
زينب: ماشى بس يالا بسرعه عشان خلاص أنا هنام منك.
&&&&&&&&&&&&&&&&&&
يوسف: طب وأنا هعمل ايه ؟ماهو كل حاجه على يدك مفيش اعلان نزل ولا مسابقه إلا وقدمت فيها أعمل إيه ؟
رباب: مقولتش حاجه بس احنا بقالنا سنتين مخطوبين ومتحركناش ولا خطوه واحده
يوسف: غصب عني أنا نفسي اجيب لك حته من القمر بس إللى جاى على قد إللى رايح
إدعي لى انتى بس.
رباب: يارب يوفقك يا يوسف وأشوفك اكبر مهندس في مصر كلها
&&&&&&&&&&&&&&&&٥٥٥&&
ركنت زينب العربية عند مدخل البيت وطلعت بسرعه دخلت الشقه لقت أبوها قاعد وماسك اوراق بيقرأ فيها بتركيز.
فقربت منه وباست خده: إزيك يا سيكا.
سيد: أهلا يا زوبه تعالى أقعدى.
زينب: مبلاش زوبه دى بلدى أوى المهم أنا هغير هدومى وبعدها نتغدى يلا يا أم عبده حضرى السفره
أم عبده: حاضر يا أنسه زينب
دخلت زينب الأوضه أخدت دش سريع ولبست بيچامه بيتى وخرجت لقت أم عبده جهزت السفره وبرضوا سيد ماسك الأوراق بيقرأ فيها.
زينب: اخيرا هاكل ده أنا هموت من الجوع
سيد: وليه تموتى من الجوع انتى ما أكلتيش في الجامعة
زينب: : أكلت طبعا بس أكل الجامعه حاجه وأكل البيت حاجه تانيه.المهم إيه الأوراق إللى انت عمال تقرا فيها بقالك اسبوع
سيد: ده يا ستى ورق الشركه الجديدة إللى حكيت لك عنها.
زينب: أخدت زينب ورك الفرخه وقالت أه بتاعت راجل الأعمال الكبير ده إللى اسمه إيه.
سيد: سالم عمران
زينب: أيوه هو ده.طيب وإنتوا خلاص اتفقتوا على كل حاجه ؟
سيد وهو بياكل السلطه : أنا لسه بدرس الأوراق كويس
زينب: أهم حاجة متمضيش على أى ورقه إلا في حضور المحامى وخد بالك ليضحك عليك ويبيع لك الترماى.
خبطها على راسها بخفه: قالولك أهبل وبينضحك عليا.
زينب:أى بتوجع وبعدين يا باشا بيقولوا غلطة الشاطر بألف وانت جديد في المجال ده وسهل إنهم يخدعوك ويلعبوا بيك.
سيد: لا متخافيش أبوكى ناصح
قامت زينب وقالت: ماشى ياناصح أنا هدخل أنام ساعتين عشان خلاص أنا فصلت ماشى هنام ولما أصحى إن شاء الله ألقيك لسه بتقرأ في الأوراق ماشى.هاهاها
سيد بضحك: خشى يا بنت ال
زينب: سمعاااااك
&&&&&&&&&&&&&&&
عبد الكريم: البيه شرف حمد لله على السلامه
يوسف: يافتاح يا عليم.أيوه يا بابا شرفت
عبد الكريم: ومجتش ليه وانت لابس اليونيفورم.
رجاء: ارحم الواد مش كل يوم تسم في بدنه
عبد الكريم: ما هو أنا مش بعلم وأربى وأكبر عشان يبقى مهندس مش فرد أمن في شركه.
يوسف: ماهو على يدك بعد ما خلصت الجيش مفيش مسابقه ولا اعلان إلا وقدمت أوراقى بس انت شايف مفيش شغل .
عبد الكريم: تروح تشتغل أمن.
يوسف: أمال عايزنى أبقى كبير كده وأمد إيدى أخد منك مصروفى.
عبد الكريم: آه لو كنت لسه في شغلى كان زمانى شغلتك في ثانيه واحده .
رجاء: ويفرق إيه دلوقتي من أيام ما كنت في الشغل.
عبد الكريم: لأ تفرق كتير زمان كنت أقدر أتصل بأى حد وعارف إنه زى ما هيخدمنى هاخدمه لكن دلوقتي لا صعبه هاحس انى بشحت منه الخدمه إللى هيعملها لى..منها لله بنت إبليس
رجاء: وهيا مالها مانت إللى سويت معاشك
عبد الكريم: كله إلا كرامتى.
يوسف: وبدل ماترد اعتبارك وتبين لهم إنك ماتهزتش لأ تسوى معاشك .
عبد الكريم: طبعا سيبت لهم الجمل بما حمل.عشان يعرفوا قيمتى وأهم مش عارفين يديروا المدرسة زى ما كنت بديرها.
يوسف بصوت واطي: على أساس اداره المدرسه حاجه صعبه.
عبد الكريم: بتقول حاجه يا يوسف
يوسف: لأ يا بابا أنا هدخل أرتاح شويه
رجاء ،: استنى اتغدى الأول
يوسف: لما أقوم من النوم هبقى أكل
&&&&&&&&&&&&&&&&&
دخلت زينب المحل وقعدت على المكتب.:
يا يا محمد فيه حد اتصل النهارده.فيه أى طلبيات
محمد: أيوه السوبر ماركت طلب نص طن أرز متعبى كيلوات ونص طن متعبى خمسة كيلو
زينب: ماشى حاجة كمان
محمد: أيوه عايزين خمسين كيلو لوبيا وبيسألوا عن درة الفيشار.
زينب: غريبه أول مره يطلبوا درة الفيشار وعايزين أد إيه.
محمد: بيقولوا لو نوفر لهم تلاتين كيلو
زينب: ساهله. أنا هروح مضرب الرز بتاعنا واخلص طلبهم بس استعجل لى بالقهوه.
محمد : حالا بس نسيت أقولك المخبز الالي عنده مشكله مصنع الزبدة مبعتش الكميه المطلوبه.
زينب: هتصل بالمصنع وأحل المشكله.
محمد: وكمان بيقول..
زينب: لا عشان خاطري أجل كل حاجه لبعد القهوه ماشى.
محمد: ماشى وهروح اجيبها بنفسى
سميحه: إزيك يا زينب وحشتيني مش تقولى عندى خاله أروح أزورها وأسأل عليها
قامت زينب وسلمت عليها وحضنتها : إزيك يا خالتوا وانت كمان بس غصب عني مشغوله أوى في الجامعة وبابا ساب لى شغل المحلات واكتفى هو بالمعرض.
سميحه:آه الله يكون في عونك بس برضو مش تسألى عنى.
زينب: في بالى والله يا خالتوا بس مش عايزه اعمل لك مشاكل مع عمى رجب.
سميحه: مفيش مشاكل ولا حاجه ده دايما بيسألنى عنك حتى هو إللى بعتنى لك النهارده
زينب بابتسامة ساخره: لا كتر خيره المهم ولادك عاملين ايه.
سميحه: والله الواد صلاح خارب بيتى مانت عارفة إنه في ثانويه عامه وكل شهر عايز كوم فلوس عشان الدروس والملخصات.
فتحت زينب الدرج وأخدت ٥٠٠ جنيه وحطتهم في ايد خالتها إللى اخدتهم وهى محرجه.
زينب: جيبى له كل اللى محتاجه
سميحه: حاضر...... أبقى زورينى يا زينب ابقى تعالى نقعد مع بعض زى زمان.
زينب ،: حاضر يا خالتوا هبقى أزورك.
بعد ما مشيت سميحه
محمد: ادتيها برضو فلوس.انتى عارفه انها بتيجى عشان تديها فلوس
زينب: عارفة بس اعمل ايه خالتى ومقدرش أشوفها محتاجه بحس إن أمى هيا إللى محتاجه.

&&&&&&&&&&_&&&&&&&&
سيد: أهلا أهلا يا سالم بيه
سالم: قولت إيه يا سيد
سيد: أنا قرات المشروع ودرسته كويس أوى ويشرفنى إننا نبقى شركا مع بعض.
سالم: انت عارف إن البلد حاليا ماشيه في سكه العمران والمشاريع المعمار هو السائد في البلد ده مشروع لا يمكن يخسر ومكاسبه بتوصل ل١٠٠٪.
سيد: أنا عارف وقرأت دراسة الجدوى للمشروع بس أنا عايز اعرف هنبدأ امتى
سالم: أول حاجه لازم نشوف مبنى شيك ويكون في حتة راقيه عشان نعمله المقر الرئيسي للشركة ولما نجهزها ونشهر ها هنبدأ على طول.
سيد: معاك يا سالم بيه بس مبدأيا محتاجين أد إيه عشان نشتري المقر ونبدأ الشغل.
سالم: محتاجين على الأقل ٢مليون انت عليك النص وأنا عليا النص وحوالى مبدأيا خمسه مليون تمن المعدات والعربيات ومواد البناء إللى هنحتاجها.
سيد: يعنى هتحتاج منى حوالى تلاته ونص مليون جنيه.أنا موافق تحب امتى نمضى العقود واكتب لك شيك بالمبلغ
سالم: كل ما كان أسرع كان افضل
سيد: وأنا جاهز.....
&&&&&&&&&&&&&&&&
التوقعات التوقعات التوقعات.
يا ترى إيه رأيكم في البارت الجديد وايه توقعاتكم على العموم ادعمونى بليكات كتير وعشر بوسترات وتعليقات حلوه عشان أنزل البارت الجاي بسرعه.واشكر كل من بيدعمنى واشكر كل من بيكتب تعليق واحب أقول إنى بقرأ كل التعليقات وبعتزر لو ماردتش عليها بس والله بقرأها وبحبها جدا و بشكركم جميعا مع خالص تحياتي واحترامي للجميع حياة محمد.