البَرْق يَبْرُقْ وَالتْرَفّ هَمْاَلِيٍ

▪︎30▪︎

صلى الله على نبينا محمد

- لا تلهيكم الرواية عن ذِكر الله وعبادته🌺

لاتنسوا التفاعل على الفصل ولو بنجمة وتعليق
{يهمّني ويحفزني تعليقكم}

______________________

▪︎في نجد :

وبعد ماوصل الكاسر لنجد ، وقّف السياره بجنب بيت جده ولف يشوفها صاده عنه ، تنهد بثقل وهو يشوف علاقتهم في كل مره تتدهور ، الفتره الوحيده اللي ازدهرت فيها هالعلاقه كانت في حايل ومن رجعوا وهي ماهي بنفسها .

سكتت تنزل من السياره ودخلت بيت جدها وتنهد ينزل معها وهو يسكّر باب السياره بعد ماطفّاها ونزل يمشي للداخل ، ناظر للبيت والحوش والمجالس وهو بيزهّب كل شي لجده وعمامه اول مايوصلون الحين ، لف يشوف البيت وهو كبريائه يمنعه يطلب منها تسوي شي له .

تنهد يصد ويلعن كبريائه الف مره وهو اللي ودّاه في ستين الف داهيه ، مشى يدخل للمجلس ويشغّل المكيفات ويفرش الزّل ويرتّب المساند عدل ، لف على الباب وارتفع راسه من شاف السيارات توّها توصل وابتسم بخفه يوقف ويرحّب ويهلّي بهم ، نزل الجد متعب وتقدم له الكاسر يمسكه ولف على امه اللي نزلت من سيارة عمه مطلق وكانت جايه مع عمته نوره.

مشى يدخل مع جدّه اللي ابتسم بخفه يشوف ترتيب المجلس وريحه البخور والمكيفات وكل شي عدل سواه ، الجد متعب : بارك الله فيك ياوليدي ! ، ابتسم له الكاسر بصمت ولف على عمه محمد من دخل وتقدم يسلم عليه : حياك ياعمي البيت بيتك ! ، تقدم محمد يجلس وهو يلف بعيونه على المكان : وين القهوه والشاهي ياولد؟ ورا مازهّبتها؟ ، لف الكاسر عليه : الحين تزهبّ هي ! .

مشى الكاسر يطلع من المجلس بخطوات سريعه وسلًم على عمه مطلق وركض لمجلس الحريم يدقّ الباب ووقف ينتظر بتوتر ، انفتح الباب وطلعت العنود مستغربه : انت مانفتكّ منّك؟، لف عليها الكاسر بسرعه : جهزي القهوه والشاهي بسرعه ، تنهدت العنود بتعب : ووين مرتك المصونه؟ ليه تجهزها هي؟ ، تنهد الكاسر بتعب : اخلصي علي يابنت الحلال ماني بفاضي لتس ! .

مشى يتركها ورجع للعمامه يجلس معهم، نطق محمد وهو جالس : ماقلتوا لي وش فيه برق ماجا للحين؟ ، هز راسه مطلق : قد قلت من قبل برق ارسل لي انه مايقدر يجي للغدا بيجي للعشا اليوم ، الجد متعب : زين اننا ماعزمنا احد كان تفشّلنا قدامهم ، محمد : صادق ! ، مطلق : اجل بذبح الذبيحه من الان ، محمد : يالله والعيال يعاونون ، نطق الكاسر : على طاري ياعمامي وراه ماجاء رائد؟ .

مطلق : قد هو بالطريق ، الجد متعب : توّه محاكيني وقال انه دخل لنجد ! ، محمد : زين اجل يالله يالكاسر وانا عمّك تعرف شغلك ؟ ، هز راسه الكاسر يوقف ونطق قبل لايطلع : هنا ولا بالمزرعه؟، ك محمد : هنا هنا يالكاسر .