البَرْق يَبْرُقْ وَالتْرَفّ هَمْاَلِيٍ

▪︎32▪︎

صلى الله على نبينا محمد

- لا تلهيكم الرواية عن ذِكر الله وعبادته🌺

لاتنسوا التفاعل على الفصل ولو بنجمة وتعليق
{يهمّني ويحفزني تعليقكم}

______________________

▪︎في بيت ابو المزن :

الجود : يمه ماني بموافقه!! ، ياسمين : مهب على كيفتس اصلا!!  بتقبلين فيه مثل قبول المزن بحمد وانتي تشوفين ، لانت ملامحها بصدمه ونطقت : يمه فقدتي الانسانيه !!! ، لفت ياسمين وشمّقت بعيونها للجود  : حاصل لتس واحد مثل غامد رجال والرجال قليل ، وطلعت تصفق الباب بعدها وسكتت الجود بقهر وغضب ولفت تسحب جوالها تتصل على أول شخص جا ببالها من صارت هالمصيبه ! .

رجفت كفوفها وهي تدق رقم ابوها وحطته على اذنها تنتظره يرد وعيونها غرقت بدموعها ، رد محمد ونطق : هلا بنتي ، رفعت راسها بفرح كونه رد ونطقت برجفه : يبا!! ، فز محمد من مكانه بخوف عليها من قالتها بصوت راجف : عسى ماشر وش صايرٍ لتس؟ ، طاحت دموع الجود مقهوره ونطقت بهمس وهي تحترق : يبا مابي اتزوج! يبا امي تغصبني على شي مابيه! ، لانت ملامح محمد بذهول :وشهو زواجه وش قاعده تقولين؟ .

جود : يبا ام غامد موجوده تحت وطلبتني لولدها يبا مابي ! ، إحتدت ملامح بحده و هز راسه محمد بغضب يوقف ونطق : اصبري علي يابنتي شوي وجايتس واتفاهم مع امتس هاللي ماتستحي، شهقت بخوف وهي تحس انها مظلومه وسكّر الخط.

حضنت جوالها بكفوفها وهي تشوف الارقام المكتوبه وطاحت عينها على رقم جدها ، هي تدري انها لو جربت وقالت لجدها يمكن يقوم الارض ولا يقعدها على امها ، ميّلت راسها وطاحت دموعها وهي خايفه ،الشوفه الشرعيه مع انها حلال الا انها ماهي بسلومهم او عاداتهم وتقاليدهم ، عندهم الشوفه بعد العقد غير كذا مافيه اماانه شافها هذا لحد ذاته مخيف بالنسبه لها.

رفعت جوالها تتصل على اختها ودقت رقمها على امل تنقذها وتنقذ ضعفها ، الادوار مختلفه نوعا ما، المزن انجبرت تاخذ شخص هي ماتبيه وكانت حب شخص ثاني اما الجود اللي ماكانت تحب احد ، كان يمكن توافق لو جاها كأي رجال عادي طالب بالقرب بس فكرة ان غامد دخل عليها وشافها من دون علمها بحد ذاتها تنفّرها منه ومن الزواج فيه .

رنّ الجوال بإستمرار وهي مع كله رنّه يزداد الامل فيها على ان اختها ترد لكن ماجاها أي رد من اختها ، نزّلت راسها وتحاوطه بذراعينها تدفنه بينهم وهي تبكي منقهره بكل مافيها ، ماتدري وش صايب امها بس تعرف ان امها ماهي بعاديه هالفتره.

فجأه ، انسحب الجوال من يدها ونطقت ياسمين بغضب ؛ وتشكيني عند ابوتس؟؟ صدق اني ماعرفت اربيتس ، مشت وهي ماخذه جوال جود اللي ركضت ورا امها وصفقت ياسمين الباب بوجه الجود اللي انهارت عند الباب ، هي رسميا انقطعت عن العالم الخارجي  .