أمان

البارت الثالث عشر

سحبت الجنطة وطلعت وكوة اخلص نفسي منها
وصلت للباب واني صايرة دم من البجي والقهره
فتحت الباب اريد اعبر وبوجهي تجي علياء
سحبت مني الجنطة:- لا انتي من صدك تسودنتي
امان:- وخري من وجهي علياء
علياء:- ضرغام مايقبل هسه اجيتلج اركدج
سحبت الجنطة وشمرتها داخل البيت
صحت بيها:- عليااااء
علياء:- يولي نحنا اللي راح نوكع بيها استچني
سهير:- علياء صوت تلفون يمج
سكتنا ..قربت اذنها من الجنطة مالتها
علياء:- اي صدك تلفون نبا معاي
فتحتها وفتحت الاتصال:- ها اخوي ..يابه ميبسة صماخها الا تريد ترجع وماجاي ترضى حتى حضرت هدومها
سكتت شوية وراها باوعتلي وانطتني التلفون
ماردت اخذه كرصتني
امان:- ها
ضرغام:- التالي ويه صماخج القوي ..بحال هيجي شي اني
امان:- ضرغام الله يخليك عوفني
صاح بيه يمكن المستشفى كلها سمعت صوته هسه:- الله لايخليني ..امان وروح ابوية وابني وروح اختي ايمان اذا خطيتي عتبة الباب احرك شيب الخلفوج واحركج حرك فهمتيني؟
عقلي قندرة واسويها
حجاها بنبرة يمكن لو يذبحوني بساعتها نقطة دم مايلكون بجسمي من الخوف
بلعت ريك وماحجيت اي شي ..انطيت التلفون لعلياء ودرت وجهي طبيت جوا
خفت منا لان مخبل وكلشي يسوي
طبيت كعدت بصفحة
اجوي علية ساكتين وبس يصفنون بيه
سهير:- والله كفو اخوي
علياء:- يولي شكلج حتى هيجي ركدتي
سهير:- اششش امشي عوفيها لاتروح تهجم علينا انوب
عافوني لوحدي وطلعوا
كرفصت بالكاع وكمت ابجي
محد حاجاني بعدها عرفوني بحاله مو طبيعية
جان الوقت بطيييء ...ماكلت كلشي ولا حجيت كلمة
جنت تايهه بشكل ..ماعرف شنو مصيري
كارهه وجودي بهالبيت
على كد ماجنت مرتاحة هسه صرت مامرتاحة ..وضرغام مو يمي
صرت احس فعلا تايهه وبدون احد
الليل كله افكر وين اروح؟
ولو رحت او رجعت عند اهلي شنو اكللهم وين جنت؟
ماراح يشوفوني هيج بهالحاله حتى ستايلي وشكلي متغير مايكولون شبيه؟
وضرغام؟ ...اعوفه هيج هذوا يخلص دورة من حياتي يعني!
مستحيل ماراح اكدر اعيش من دونه ...
..ثاني يوم المغرب
خبرهم ضرغام وكللهم جايين
ف الكل استعد ونظفوا البيت ورتبوا غرفة الحجية
اني بقيت بالمخزن وبس اصفن
افكار الدنيا تجمعت براسي
..بالثمانية بالليل تقريبًا سمعنا صوت الباب انفتح
طلعت راسي من الباب شفتهم اجوي
ضرغام ووياه ولد هم شاب ولازمين الحجية ويمشوها
وراهم عمة شيماء مستندة على نبا
خفت اتقرب ..طببوها لجوا
طلعت مشيت بهدووء اشوفهم من بعيد
البنات انخبصو بيها ..طببوها لغرفتها واللتمو حوليها
تقربت شوية واباوعلهم ..وكفت يم الباب
امان:- الحمدلله عالسلامة
الكل فز وباوعلي ..سكتوا
باوعتلي الحجية وهزت بس براسها ودارت وجهه من علية
نداريت ردت اروح حسيت انسحبت من ايدي
سحبني ضرغام رطببنل لغرفة البنات جانت بصف غرفة الحجية
راد يحضني وخرته
امان:- وخر ضرغام
ماسمع مني سحبني وحط راسي على صدرة
كمت ابجي:- اتركني اروح واللي يسلمك ضرغام
ضرغام:- اشششش يشهد علية الله ماتركج
امان:- هاهيه خلصت بعد
ضرغام:- ماسمع هالكلام ..كلشي ماخلص
امان:- الحجية ماداتباوع بوجهي
ضرغام:- ولا وجهي ..جي انطيلها وكت يا ابوية انتي وكلشي يرجع احسن من كبل
باسني من راسي بهدوووء
سمعنا صوت نبا تصيحة ..وخر سحب خدي عالسريع وباس اصابيعه اللي لزمهم منا:- راجعلج
حجاها وطلع ..طلعت وراه لكيته ديعدل بكعدة الحجية
اباوع على سوالفهم وضحكهم سوا ...جانت لمتهم حلوة
البنات حوليها ويداروها ..ضرغام يمها ويبوس بيديها
عمة شيماء مادري شتسولف بس صوتها عالي واللي عرفته هذا الشاب الجاي حسون ابنها
اباوعلهم من بعيد ..مثل المسلسلات الدافية كل واحد بيهم مشهد بحاله
حسيتني مو هنا مكاني ..
حسيت انو اجيت خربتها ولو بقيت راح اخربها بالاكثر
..احبهم ..ولان احبهم مو كادرة ااذيهم بشعره بعد
يمكن لو صاير للحجية شي عمري كله ماجنت راح اسامح نفسي ..
طبيت للغرفة جنطة هدومي جانت بعدها من البارحة
عالسريع لبست عباية جانت منطيتني هي نبا ولفيت الحجاب عالسريع وشلت الجنطة
مريت بدون ماينتبهون ...ردت اطلع وكعت عيني عالمرسم
طبيت طلعت الرسمة مالضرغام اللي رسمتها
سحبت قلم وكتبت خلفها "احبك ،انا اسفة"
وطبيت بهدووء هما بعدهم على نفس وضعيتهم ومحد انتبهلي
فتحت باب غرفته لاول مرة ادخلها
جانت متروسه بريحته الاحبها ...وعتمة كلشي بيها معتم حتى فراشه لونه طوخ جان نيلي
خليت الرسمة على جربايته وطلعت بدون ماسوي صوت
لبست حذائي
تركت تلفوني بالمطبخ اكيد راح يتصل بيه
قبل لا اقفله طلعت رقم ضرغام كتبته عالسريع بورقه وخليتها بجيب البنطرون
كلت حتى من اوصل اخابره ماريد يبقى باله ...
اني قررت ارجع بعد هاهيه ..وماريد اتراجع عن قراري
بدون صوت جانت حركتي كلها بس صوت ضحكهم يوصلني
طلعت برا ..فتحت الباب ...نداريت عليهم
هاي اخر مرة اشوفكم بيها ..يارب تكونون بخير دائمًا
وشكرًا على كلشي قدمتولياه ..ولا بعمري راح انساكم
احبك ضرغام ...
حجيتها بكلبي وطلعت
مادري وين اروح او شنو جان ببالي ..بس اطلع واعوفهم
اعوفهم بدون ما ااذيهم بعد ولا اخرب عيشتهم بعد
جانت اكبر غلطة ..حتى لو جنت مرتاحة وسعيدة
بس ماراح ابني سعادتي على زعل غيري ابد ...
الدنيا ضلمة امشي وامشي مادري وين موديتني رجلية ولا اعرف شي بالمنطقة
وعيوني حركتني تريد تبجي وكوة مسكتتها ...
..وصلت للشارع العام
رجلية احسها تكسرت من المشي
شفت مجموعة بنات شابات هيج لابسين عبايات ولافين حجاب على روسهن
كلت اكيد منتظرين تكسي شي ..رحت يمهم
وجوهم متروسة مكياج
امان:- مرحبا
باوعولي ..اخذولي سونار من فوك لجوا
تقربت وحده من بينهم:- اهلا تفضلي
جانت تباوعلي بنظرات مزعجة:- بس ردت تكسي او مكان يروح للمحافظة
هزت براسي:- اي حبيبتي هسه جاي رف ياخذنا للمحافظة
امان:- يعني متفقين وياه يعرفكم لو شون
تقربت وحده ثانية وراسا حجت:- اي اي هو دائمًا يجي ويودي اللي يريد يروح للمحافظة ..ابقي هسه خمس دقايق ويوصل
هزيت براسي ووكفت شوية بعيد عنهم
ماعجبني اوكف يمهم ...جسمي يرجف بس لا يجي ضرغام ويلمحني
اله قدرة انو يشوفني لو جنت بين الف وحده
كلبي يوجعني بطريقة غريبة واريد ابجي بس لا المكان ولا الوقت مناسب ..
بقوا يباوعولي ومدري شتهمس وحده للخ
والله لو ما مضطره جان مابقيت ويه شكولاتكم ..
شوية واجا رف ابيض وكف كدامنا
باوعتلي اللي حجت وياي اول مرة:- تعالي
طبو كلهم بقيت اخر وحده اني طبيت
باوعت للسايق جان شباااب ..اسمراني من ذوله اللي شعرهم نازل على عيونهم
لابس كلادتين فضيات زناجيل ويعلج
باوعلي من المراية وهز براسه بمعنى منو انتي
راسا حجت اللي حجت وياي اول وحده:- ويانه ويانه معليك امشي بطريقك
غمزلها:- مااااشي
نظراته واسلوبه لعبت نفسي مادري شون يحجي ويحرك ركبته بطريقة مزعجة
رحت كعدت بينهم ...بحضني جنطتي واصفن عليهم
جانو يحجون على المكياجات وهاي اللي تحجي عالملابس وهاي اللي تحجي على جيرانها
جانت سوالفهم اغلبها مو مفهومة
او يمكن انا جان فكري بغير مكان مو يمهم ..اصفن بالكاع وعيوني تغوورك بالدموع
شسويت اني؟ ..راح يبقى باله
ويمكن يبقى يدور علية ..راح يتخبل اذا مالكاني
شون راح يتحمل بعدي عنه؟ ..او اني شون راح اتحمل؟
بس هذا احسن حل
وجان لازم يصير من زمان مو هسه
ماجان لازم اجي اصلا ...
ماحس الا وكفنا كبال عمارة
باوعتلهم:- وين نحنا
باوعتلي وحده:- ننزل هنا شوية بين مايريح الرف ونرجع نكمل الرحلة تدرين الطريق مو هنا ولا قريب
كلهم نزلوا ..كلبي وجعني
نزلت وياهم وامشي وراهم مجبورة قابل ابقى لوحدي ..طبينا العمارة وجان بالطابق الثاني
هذا نفسه اللي ديسوق نزل انطاها مفتاح لنفسها اللي حجت وياي اول مرة ورحنا وراها
فتحت الباب ودخلتنا ...بوجهي صار رجال جبير كاعد عالقنفات
باوعلنا وضحك:- ياهلا ياهلا ياهلا
ضحكته ..نظراته هدومة كلشي بي جان مامريح
للحظة حسيت نفسي لازم ارجع
نداريت صارت بوجهي وكفت وتباوعلي:- وين نحنا؟
دفعتني:- وشبيج مخروعة قابل خاطفينج عيني
جسمي كام يرجف ..ردت اعبرها واطلع راسا سحبتني من ايدي
باوعتلها:- وخرررري عنج لج
-لج بعينج سمعيني عدل اجيتي برجلج وبراحتج محد غصبج مو تصيرين شريفة براسنا هسه
فتحت عيوني على وسعهن مصدومة:- وييييين جايبيني
- اهوووووو بده الاستشراف مالتجن
تقرب ذاك الرجال:- عوفيها خليها تهدا شوية
اباوعلهم وصحت:- منو انتووووو وخرو عني اني ردت ارجع للمحافظة
باوعلي هذا الرجال ومبتسم:- اي ونحنا مرجعيج للمحافظة ..هدي بابا هدي
امان:- ماااريد عوفوني اني ارجع لوحدي
ردت اطلع شفته اشرلها براسه
كول هيج وسحبتني من ايديه ثنينهم ..جانت ضخمة واقوى مني
فتحت باب غرفة من الغرف وشمرتني بيها:- بس لو ما تصيرون اوادم بروسنا
حجتها وطلعت قفلتها
رحت للباب واضرب بي:- افتحيييييي الباااااب لج الله لايوفقج كتيلي نرجعة للمحافظة وين ماخذينيييييي ...ساعدونييييي الله يشيلكم الله لايوفقكم افتحوووووو الباااااب
وكعت من طولي وبس ارجف
خليت اذن عالباب اسمعهم يحجون
- هدها من دنعل ابو شكولها
ضحك:- لاااا ..خوش طيرة يجي منها خوش شغل
- كل ذولي البنات ماعايزين جرادة مثلها
- ميخالف زيادة الخير خيرين ..ماتدرين البيض والناعمين شكد يمشي سوكهن اكثر
اسمع كلامهم وعيوني نشلت احسها وكلشي بيه توقف
شنو راح يصير؟ ..ووين اني
اباوع الغرفة جانت فارغة بس بيها بردات معلكين
رحت عالسريع افتحهم افتح الشباك شي
فتحتها لكيت الشباك حاطيله عازل بحيث لو صحت منا لبعد سنة محد يشوفني ولا يسمعني
رجعت اضرب عالباب:- افتحولي الباااااب خلوني اروح الله يخليكم وين ماخذينييييي
تهسرت بعد ماعرف شسوي
كرفصت بزاوية الغرفة ولميت رجلية لحضني وبس ارجف
اللهي دخيلك شنو راح يصير بحالي ..ياريتني ماطلعت
ياريت ماعتبت باب بيت ضرغام ...
صوتي راح واني بس اصرخ عيوني غووشت من الصدمة
احسني بكابوس لا صدك كابوس هذا مو حقيقة ...
شوية وطب هذا الوجال وياه ثنين وهاي الحرمة
كمت ردت اهجم عليهم
اشرلها اجتي لزمتني من ايديه ..كمت ارافس بيها مايفيد
امان:- عوفيني عوفيني ياجلبةةةة
كفختني بقوة على راسي:- منو الجلبة لج تادبي لحد هسه نحنا محترمينج
اجا تقرب مني ذاك الرجال:- اني مو كتلج هدي
امان:- عوفوني الله يخليكم عوفوني ارجع
ضحك:- لج بابا نحنا راح نرجعج
حجت من يمها:- اهووو معن دكافي تبرر وتحجي طبها طوب غير اجتي برجليها
باوعلها:- تؤ تؤ صبرج عليها
- راح تبقى تصرعنا الطريق كله تره من هسه كتلك
من جيب قميصه مد ايده وطلع علبة صغيرة
فتحها وطلع حبة بيضة صغييييرة منها وحطها بين اصابيعه وكدام عيوني:- تشربيها مثل الاوادم لو نجرب غير طرق ..شرايج؟
اباوعله يباوعلي منتظرني اجاوب
كول هيج وتفلت بنص وجهه ..ضحك
مسح وجهه بهدووووء ..باوعلها ومادري شنو اشرلها
لزمتني قوي ورجعت ايديه خلف ضهري وكعدت على رجلية
كمت ارافس بس غول ماكدرتلها
انطا الحبه لواحد من الولد واجاني ..كمت اصرخ بكل قوتي:- عوفونييييييي الله لايخليكم عوفونيييييييي
لزم وجهي وكوه يريد يخليها بحلكي ..يحطها وارجع اذبها واتفل عليها وعليه
تعصبت وضاجت باوعتله وسحبتها من ايده:- اشو جيبها جاهله بكد قندرتي ماكادر عليها
كعدت علية بحيث احس عظامي تكسرت ..لزمت وجهي قوي وفتحت حلكي بكل قوتها جنها داتفتح جيس
حطت الحبه بحلكي ولزمت شفايفي سدتهم
حطت ايدها على ركبتي وخنكتني:- بلعيها لاتشوفين غير تصرف
اهزلها راسي بمعنى لا وعيوني احسها راح تطلع من مكانها
ضربتني على فخدي بكل قوتها:- بلعييييييها دااااكول
ذابت بحلكي اصلا بدون ما ابلعها ..بلعت ريكي غصب عني
ضحكت وكامت من علية
لزمت جسمي عظامي تون من الوجع ..لميت روحي وجسمي يطك من الرجف
يالله دخيلك انقذي ..ربي انقذني
اضرب على وجهي اريد بس اصحى من هالكابوس
وهالحياة اللي تغيرت بثواني
عافوني وطلعوا ..كمت املخ بوجهي
ربي دخييييلك ربي ..ربيييييييي
اريد اصرخ صوتي بعد مايطلع ..ماحس الا شوية شوية
بدت الرؤوية تغووش يمي ..لحد ماوكعت بالكاع وسلمتها .....
...
فتحت عيوني ..
راسي مسطوووور مثل الواحد لازمه وكاصه بالنص من الوجع
باوعت صوت خبصة
لكيت البنات كلهم بالغرفة هاي اللي نازعة وكاعدة وهاي اللي متمددة وهاي اللي تسولف ويه اللي يمها
جانو يطلعون تقريبا سبع بنات كل وحده ملتهيه بشي ومتونسات وطك الحجل والعلج بفلس
لعبت روحي ..ماتحملت ردت اطلع اوصل للباب
دكييييت هجمته هجم:- الله يخليج اريد اروح للحمام
ماكو رد ..حجت وحده من البنات:- ماراح يفتحولج سويها على روحج
حجتها والكل كام يضحك
باوعتلهم يباوعولي بنظرات قرف
مع العلم هما جانو اساس القرف ...
ماتحملت درت وجهي بالزاوية وتقيئت حسيت روحي ومعدتي كلها تريد تطلع
راسي مسطور ..ايديه ترجف
شنو شربوني؟؟ ...حسبي الله ونعم الوكيل
رجعت زحفت كعدت بمكاني وبس اصفن ..
ماعرف شنو راح يصير بحالي بعد ولا شنو راح اعيش
باوعت للسقف وابجي واحجي بكلبي
وينك ضرغاااام ..يالله عيني يالله لاتعوفني هيج يالله تسمعنييي ..
اجت وحده تقربت يمي
راسا نفرت منها وصحت:- وخرييي عني
غمتني وكالت:- ووجع شبيج مجلوبة مو صوجج
حجتها وراحت بعيد ..صوت ضحكهم وقشمرتهم وسوالفهم جانت تقشعر بدني
احس روحي سكرانه ..راسي ياذيني
وماداكدر اركز باي شي كدامي
عكسهم ..جانو متعايشين ويه الوضع وكانو ببيتهم
..ورا ساعات انفتح الباب
طبت هاي الحرمة نفسها باوعتلها وتاشر بيدها:- يلا لمو سلاباتكم عالسريع وغراضكم طالعين
انخبصوا ذوله هاي اللي تبدل وهاي اللي تلم بغراضها وجنطتها
رحت زحفت عليها:- وين ماخذينا
تقربت علية:- صيري عاقلة تعرفين
حجيت بهدوء:- رجعوني من وين ماخذتوني الله يخليج
ضحكت:- شكد بطرانة
حجتها وطلعت ..واني بعدني مامستوعبة اصلا شديصير
وراها اجت فتحت الباب ..اجت تقربت علينا وحده وحده
مادري شنو جانت تخلي بيدهم
اجت يمي باوعتلي:- فتحي ايدج
هزيت راسي بمعنى لا ..باوعتلي:- فتحيها لا افتحلج هي مثل قبل شوي
مديت ايدي ترجف
خلت بيها حبة بس غير ذيج مو مثلها اشرتلي بحواجبها:- شربيها
هزيت راسي بلا ..ضربتني راشدي وصاحت:- داكول شربيهااااا
حجتها وداست على رجلي بكل قوتها
من الخوفة راسا خليتها بحلكي وبلعتها
راحت يم الباب:- شربوا الحبة كلكم ..طالعين مشوار بعيد تخفف من وجع الطريق
سكتت ورجعت كالت:- راح تنزلون اكو رف ثاني منتظركم جوا ..اللي تسوي اقل حركة ماتدرون شنو يصير بحالها
حجتها وباوعتلي اجت يمي:- تعاي انتي
لزمتني من ايدي ومشتني وراهم جانت لازمتني بقو
نزلنا رف منتظرنا ..طبوا كلهم بقيت متشنجة ماريد اطب
لزمت راسي من خلف بقوة نزلته وطببتني بالرف دفعتني:- ناقصتج اني
كعدت بي جان هدووووء ..شوية شوية الكل بدا يسلمها
اباوع جنطتي ماكو ..بطرك العباية بقيت
سندت راسي عالشباك ..عيوني غوووشت بعد ماكدر افتحهم عبالك دخل بيهم ملح
غمضتهم ماكدرت اقاوم بعد ..استسلمت
مادري اذا للنومة ..
لو للأمر الواقع! ....
مادري شكد بقينا ولا ادري وين نحنا
بس اللي اعرفه فتحت عيوني لكيتني بغير مكان وغيرغرفة
جانت اكبر وبيها اضوية كومة وفراشات ممدوده من الراس للراس
فتحت عيوني شجابني لهنا وشون وصلت هنا
تعدلت البنات كلهم نايمين ...دخيلك ربي وين جابونا
كمت ادك بالباب اريد بس احد يطلعلي
امان:- تسمعونييييي تعالوا فتحو البااااب
وينكممممم
كمت اضرب واصيح بعلو صوتي وكل قوتي
ماحس الا انفتح وطبت نفسها ذيج دفعتني بقوة وصاحت:- هيييييي كافي تخبصينا شبيج
امان:- رجعوووني الله خليكم
باوعتلي:- وين نرجعج ..مو ردتي للمحافظة
هاي جبناج اربيل
من الصدمة ضحكت ..
..اربيل!!!!!!! .....
...
..
..
للحكاية بقيـــة..

بارت صغيروني حتى يصير تشويق
المهم لاتنسون التصويت

-منة الله الأيوبي.