سحبت الجنطة وطلعت المبايل
لكيت جاييني فيديو
فتحته واني ايدي ترجف ..
ششوف؟!!
لكيت ضرغام لازم لؤي وواكع بي دك وضرب وبصفحة انتبهت زين واكع بالكاع وصاير وصلة من الكتل
ويما شباب كومة متلثمين
يوكع من ايده ويرجع يسحبه ويكمل صاير كتكوت بين ايديه
ضرغام ..كل ضربه يضربها احسها تنزل قطعة ثلج على كلبي
الفيديو مدته ١٧ دقيقة ..يعني ١٧ دقيقة هو دك ضرب بلؤي مع انو بدأ الفيديو هما مكتولين فوكاها
...اباوع ودموعي تنزل واضحك على حركات ضرغام شديسوي بيهم
لابس جفوف سود بيديه وهدومة اللي كلها سود صايرة تراب من الكاع
شعره المخربط من التعب وهو يدك بي بنص الجولة والحر ...
اخر شي بنهاية الفيديو
يتقرب ضرغام من الكاميرة ويبتسم وكال:- اعتذر عالتأخير
وانقطع
خليت المبايل على كلبي ورفعت راسي ابجي
احمدك واشكرك ربي احمدك واشكرك
دموعي تنزل بس هلمرة دموع راحة مو دموع قهر ....
حتى نفسيتي احسها ارتاحت
كمت طلعت من الغرفة تلكتني الحجية
ام ضرغام:- هاا بهالوجه ..هلا بهالبسمة
رحت بست راسها وكعدت يمها
جتي نبا وكرصتني من خصري
نبا:- ها اموون ..شون صرتي خيه
امان:- الحمدلله ..الحمدلله هوااي
اليوم كله اني طايرة ورجعتلي روحي ونفسيتي
وكعدات البنات وسوالفهم كاموا يغيرولي من نفسيتي
صرت احسني جزء منهم ..
...لليل اجا ضرغام
بالمطبخ جنت ولمحته واكف بالطارمة ويخابر بالتلفون
عدلت نفسي وطلعت يما ..
انتبه علية ...ابتسم
بقيت واكفه واللعب برجلي انتظره يخلص
حسيته كام يختصر الكلام بس يريد يختمها للمكالمة
..خلص وقفله وحط التلفون بجيبه
وبقينا واحد واكف كبال الثاني
اريد انطق ..اريد احاجيه بعد ماتطلع مني
باوعتله:- حبيت اشكرك ..ولو هالكلمة ابد ماتكفي
ضرغام:- على شني يابة
امان:- على كلشي من اول يوم لحد هاللحظة هاي
ضرغام:- ماسويت شي ..هو جان يستحق هالدك
امان:- انت شون وصلتلهم وجبتهم يمك
وصح سؤال شفت زين هم هو شنو اله دخل؟
طلع باكيت جكايرة ..باوعلي واشرلي:- اشرب لو تضوجين
هزيت بجتفي:- عادي خذ راحتك
شغلها واخذ نفس ورجع باوعلي
ضرغام:- ما سألتي روحج ليش تأخرت حزتها عليج
امان:- بلي اكيد ..بس توقعت هيج يعني بسبب شغلك او شي
رفع بحواجبه بمعنى لا:- هالدثوا ويه زين متفقين يأخروني ويعطلوني عليج بالجية
صفنت بي:- شون؟
ضرغام:- بالطريق اني وجايلج طلعولي فجأة بطريقة خلوني اضرب سيارتهم نزل منهم واحد كام يتعارك وياي بحجة انو دعمته وهيج مع العلم هو المتقصدها وواضح هالشي
بالبداية توقعته من ذوله الجهال اللي يطلعون عالطريق يتحارش بس ..بعدين انتبهت على هالمطي زين ابو الحياتي
كاعد بهالسيارة عرفت السالفة بيها أنه
ثولهم خدمني وخلاني اعرف سالفتهم ..دكيتهم ضرب ثنينهم وخابرت جماعتي سحلوهم واجيتج
صفنت وعيوني تدمع:- معقولة ..مامبين عليه
ضرغام:- كتلج من اول ماشفته مارتاحيتله
تنهدت على فطارتي وغشامتي لثاني مرة انخدع من اللي يمي وماعرف
ضرغام:- ابوية بسج ..انسيها راحت
مسحت وجهي وباوعتله:- من صدك بلياك شنو جنت راح اسوي
رفعلي حاجبه وكال:- بعدها ساعة السودة
ضحكت من كل كلبي:- والله حياتي الكبل ماشوفكم هي السودة
يباوعلي ومبتسم
عندة نظرة حلوة ..من يتبسملي تضيق عيونه وتستقر علية
احسه يكون مركز على كلشي بيه بهالنظرة هاي
عبرت ردت اطب ..رجعت باوعتله
لكيته بعده مندار علية وابتجاهي وبعده على نفس الابتسامة والنظرة
بلت ريكي:- احم ..وهسه شنو
هز براسه وهو ياخذ نفس من الجكارة:- شني؟
امان:- اريد شسمه ..اشتغل يعني مو طبيعي ابقى كاعدة بالبيت
ذب جكارته بالكاع بكل هدوء وداسها برجله يطفيها
ومد ايده على الحزام مالبنطرون يريد يفتحه
ضرغام:- تروحين لو تندكين مثل دكة لؤي هسه؟
امان:- يمة بسم الله
نزعت نعالي عالسريع بحيث كل تكه راحت بصفحة ودخلت ركض مخروعة منا
والله هذا مخبل ويسويها
رجع على طباكاته ....
شافتني الحجية:- شمالج تتراكضين شفتي بعبع
رحت يمها:- عمة
ام ضرغام:- خيرج
امان:- قنعي ضرغام يدورلي على شغل ثاني
باوعتلي:- انتي مايفيد بيج ..وين تولين جي ماشفتي اللي صار بيج لو تريدين تسويلج مصيبة الخ
امان:- مو هيج بس والله يعني اريد اعتمد على روحي
باوعتلي:- سمعي ..انتي دخلتي هينا صرتي مننا وبينا ..هسه سبرج بسبر البنيات الله شاهد شتحتاجين شتريدين اني قبل ضرغام نكلج امين ومانقصر عليج بنتفه مثل البنيات ..شفتي وحده منهن طالعة تشتغل؟
هزيت براسي بمعنى لا
ام ضرغام:- عجل تركدين وبلا سوالفج هايه
حجتها ودخلت
عرفت ثنينهم قفلوا عالموضوع بعد هاهيه ...
..ثاني يوم الصبح
جنا كاعدين بالمطبخ نتريك
اندك الباب طلعت علياء تفتحه ..ورجعت اجت
علياء:- امان صديقتج عالباب دخلتها للصالة
باوعتلها مستغربة ..الكل باوعلي
ياصديقة هاي؟؟؟
حتى اللي جانوا وياي بالشغل ماجان بينا ذاك الكلام ولا يعرفون اصلا وين ساكنه
باوعتلهم صافنين بيه
ام ضرغام:- دكومي يمة شبيج صفنتي
كلبي وجعني ..خفت بس لا احد من اهلي عرف مكاني واجاني
كمت طبيت للصالة ..
فتحت الباب بهدووووء واني اترقب الصدمة
اشوف بوجهي هاي الحرمة الشفتها بالبيت اللي وداني بي ضرغام
بس شافتني جتي علية وتبوس بيه
حوراء:- شلونج عيوني شخبارج
امان:- اهلا
حوراء:- ماعرفتيني مو ..اني حوراء
قاطعتها:- اي تذكرتج
راحت كعدت:- اجيت حبيت اسال واشوف شون صرتي
بقى بالي يمج يا امي وما شفت ضرغام هالايام حتى اساله عليج
تصنعت الابتسامه:- الحمدلله زينة ماتقصرين
كامت تباوعلي من فوووك لجوا
جانت شكلها مريب صراحةً ..جايه بعباية سودة
ولافه حجاب اسود كله بي لمعه
ومكياجها صارخ شوية
رحت كعدت يمها ..تباوعلي هي ورموشها التركيب اللي لو بيدي انزعها هما من كد مازعجوني
حوراء:- من وين لكاج ابو زمن ..شون تعارفتو
امان:- نعم؟
حوراء:- اقصد شون اللتقيتو وتعرفتو ببعض منين عرفتيه
اباوعلها مستغربة تحجي عبالك بينا ميانة ونعرف بعض من سنين
اخاف اجاوبها
حتى الجذبه نسيتها
امان:- بينا معرف وهيج
هزت براسها ..ندارت فتحت جنطتها وطلعت ورقة جبيرة فتحتها
خلتها بحضني
حوراء:- هاي رقمي وعنواني ..خاف فد يوم ردتي تزوريني تنوريني والله ..ماعندي احد ولكيتج خوش بنية
ما اشوف الا طب علينا ضرغام ومخنزر على حوراء
راسا ضميت الورقة بردن القميص من الخوفة
مع العلم ماجان بالبيت
اجا يمها:- شجابج هينا
حوراء:- ياااا شبيك ابو زمن ..اجيت اطمئن عالبنية
ضرغام:- من وين تعرفيها حتى تنزل عليج هالمحبة
حوراء:- ردت نصير اصدقاء شكو بيها ..مو هيج
حجتها وباوعتلي مبتسمه واني صافنة بيهم
عاط عليها ضرغام:- حوراااااء هالبنية مالج شغل بيها
حوراء:- وشدعوة ..قابل منو هي
ضرغام:- مااالج شغلة داكلج ابتعدي عنها احسن
ندارت عليه وتباوع بنص عيونه وهو يباوعلها
همستله:- وليش
عصر على ايدها:- هالبنية خط احمر حوراء
واكفه بيناتهم وصافنه بعركتهم ماجاي اتفهم شديصير وليش هيج خايف تعرفني وتتعرف علية
ومنو هاي اصلا!!!
سحبها من ايدها وطلعها برا من الباب الثاني
ركضت وراهم ...طلعها
وكفت بالباب شفته وكفلها تكسي صعدها وراحت وسمعته عاط عليها
ضرغام:- تنكسر رجلينج لو شفتج هينا بعد
ندار راد يدخل صرت بوجهه
امان:- منو هاي وليش هيج تعاملها وتحجي وياها
ضرغام:- مالج شغل
راد يطب وكفت كدامه:- لا اليه شغل ..منو هاااي داكول
ضرغام:- يولو لاتخليني اصيح عليج كتلج مالج شغل
امان:- لاا اريد تفهمني البيت اللي وديتني بي مالمن
وليش مجبتني لهنا ..وهالبنية منو وليش انزعجت من شفتها و
سكتت اخذ نفس
بعادتي من احجي سريع سريع بحيث احس كلبي راح يتوقف بالاخص اذا جنت متحمسه
امان:- و ليش دكللها لاتعرفني واني خط احمر مادري شنو
غمض عيونه بنفاذ صبر:- لا اله الا الله
امان:- يلا هسه اريدك تجاوبني
ضرغام:- برنو خومو برنو ..كل هالسوالف ماتخصج
امان:- اااااني اريد اعرفها
باوعلي:- مو بكيفج تعرفيها او لا
كمت:- جااااوبني ضرغام
ضرغام:- لااااا انتي كمتي تتعدين حدودج واني ساكتلج
امان:- ااااريد اعررررف جاوبني
ضرغام:- مااايخصج ول ابوية مايخصج حتى تعرفين
اصواتنا تعالت كلش واني اصيح وهو يصيح ويريد يعبر واوكف كدامه اوكفه
ضرغام:- اماااااان وخري من وجهي
امان:- ضرغااااام
صرغام:- لاتحشرين خشمة بشي مايخصج ولاتركفين بوجهي احسن ماتسمعين كلام مايرضيج
طلعت الحجية من باب المطبخ على اصواتنا
ام ضرغام:- يولو شمالكم تصارخون ..يمة استهدو بالرحمن
ماتسوى كل هالطلابة الجيران سمعوا حسكم مايكولون ذوله شبيهم منصرعين
بقيت اباوعله مخنزره كلش غثني بكلامه الاخير
هزيت راسي بعصبية:- احترامًا الج عمة
عفته وطبيت والعصبية تفور مني
من حقي اعرف منو هاي الجاية وتريد تصادقني
وشنو هذا البيت اللي وداني عليه وليش اخذني عليه بالذات
طبيت للغرفة وادردم ويه روحي
مكرووووه ..منرفززززني كلش
عصبي وباهت ...
سمعت باب الغرفة يندك
طب ضرغام ..شكد ماجنت كارهته حتى ماباوعت لوجهه
جنت بعدني مستقرة بغرفة امه
راح كعد على جربايتها
جانت الغرفة اكبر من غرفة البنات وبيها جربايتين وحده كبال الخ
واني جنت كاعدة على الخ وداسوي نفسي ملتهيه بالمبايل
كام يكح ..
كحته وصوته بيهم بحه وضخمة
اعتقد من الجكاير لان يشرب هواي بالخمس دقايق يمكن ثنين
تنهد وحجا:- الدار اللي جنتي بي هو ننجمع بيه مع وجماعتي
وديتج اله حزتها لان ماجنت رايد احد يشوفج وانتي بهذيج الحالة
حوراء اللي شفتيها
حرمة جيران ذاك البيت ارملة جانت زوجة واحد من ربعي من توفه ماكطعنا بيها ومهما سوت ومهما كان بقينا نعتبرها مرت خوينا ونداريها
بس ..هي ..استغفر الله ماكدر احجي عنها
رفعت راسي عليه:- شبيها
كام يمسح بوجهه:- سوالفها مكسره ..من هيج ماردت تتقرب الج او يكون بينكم اي معرفة
نزلت راسي:- مايهمني كل اللي حجيته ..ومايخصني
جر نفس وزفره بعصبيه:- عجل عليش هالطلابة السويتيها كبل شوية الا تريدين تعرفين؟
باوعتله وكمت احجي مثله:- وعجل عليش جيت حجيتلي وكبل شوية سويت طلابه ماتريد دكلي
ضرغام:- جنت معصب ..وماكدرت اضم عليج لهالحزة
امان:- لا جان ضميتها ..لان عجل مايخصني
باوعلي مبتسم:- ها بت العاصمة ..شو تقلدين
امان:- ماقلدت
ضرغام:- جي منو عجل جاي يحجي مثلنا ..اني
امان:- لا عجل اني
ضحك ضحكه حسيتها من كل كلبه
نزلت راسي جنت داحجي بضوجة
باوعتله ديباوعلي ومبتسم
من يسوي هيج راسا ادير وجهي ..مادري شيصير بيه اتلخبط كلني من فوك لجوا ...
دخلت امه وتباوعلنا بقرف
هزت بيدها:- لا والمرحوم انتو مو طبيعيين
ضحك واجت كعدت يما باس راسها
ضرغام:- على سيرة المرحوم ..مامشتاقتله
ضربت على رجله:- شقصدك ولك
سحب ايدها وباسها:- قابل ددزج اله غير داسال بس
ابتسمت واني اشوفهم ...
أنت تقرأ
أمان
Storie d'amoreصُدفه شفناك ونسينا شلون چنه كثر ما بيها أمان النظرة مِنك چنه نتمنى مثل عَينك وطنّا .. بعمره ماجان بلاء كل موقف يحطنا بي الله يا اما يكون درس أو بداية جديدة لقصتنا .. اتركم تخوضون بهالرواية بقلمي -منة الله الأيوبي ..
