أمان

البارت الخامس عشر

يمكن نص ساعة نحنا بهالوضع هذا
كلنا عرفنا مصيرنا الموت هنا ..
...سمعت صوت باب الغرفة ديحاول احد يفتحه
كلنا نباوع ومخروعين ..صاحت وحده من البنات:- مقفووووول
يفتح بي ماينفتح ...
كامو جم بنية تحاول تفتحه من يمنا هم
صاح واحد من برا:- وخرو من الباااب ..اذا اكو احد جدام الباب وخرو منا
راسا وخرو رجعنا للحايط
..مانشوف الا يندفس بكل قوته
بحيث الباب صار وصلتين من النص انكسر
دخلوا ثلاث شباب ملثمين وبيدهم سلاح
..وراهم وكعت عيني عليه ...
..يمشي ضرغام وعيونه تدور بيناتنا
بيده السلاح واللثام مالته نازعه
عيونه تدور
اني شفته نهديت ..مابيه حتى حيل احجي
رفعتله ايدي
باوعلي عيونه حمر دمممم ..شافني
اجاني ركض ...رفعني من الكاع حضني ويشم بيه
جان صوته رايح مثلي ..يحضن بكل قوته ويعصر بايديه
ماحجيت اي شي مابيه حيل اصلا
بس لزمته من جتافه وابجي بحضنه بجي سنين
ابجي واشهك بكل قوتي وهو يعصر بيه وكانوا ديعاتبني على فعلتي
وخر وجهه باوعلي
نطق كوة:- انتي زينة؟
هزيت راسي بـ لا واني عيوني تجري
رجع راسي اله ورفعني شالني
تشبثت باجتافه ودفنت وجهي بجتفه ...ماريد اشوف اي شي
ولا اللمح اي شي من اللي حولية
لا البيت لا الغرفة لا الممرات المشوني بيها ...
دفنت وجهي وكانوا داريد امحي او انسى كل اللي صار
رفعني وكام يمشي
ضرغام:- طلعوا البنات اللي هينا وصعدوهم بالسيارات
- حاضر ابو زمن
ضرغام:- واسمع تسلمهم كلهم للشرطة واني افهمك بعدين
..ماشفت اي شي بس سمعتهم دخلوا للبنات ويطلعون بيهم
ردت اعدل وجهي راسا حط ايده على راسي رجعه
وكال:- لاترفعين راسج ابوية ..خليج مغمضة لاتدحكين على شي
عرفت انه حس بيه ..كمت اعصر بي بكل قوتي بدون وعاتي
مامصدكة بي رجع ..لحد هسه بعدني مصدومة من كلشي
فتح باب السيارة وصعدني ..لميت روحي عالكشن
اجا صعد ..لحظات باوع للمراية مالسيارة ورجع شغل السيارة ومشى
بقيت اصفن بالطريق
كلشي ماحجيت ولا هو حجا ...ورا شوية باوعلي:- امان احجي ..انطقي اي شي
ماباوعتله بعدني اصفن بالطريق وبس دموعي تنزل بهدوووء
ضرغام:- ماكلة شي جوعانة
هزيت راسي بـ لا
رجعت باوعتله ونطقت كوة:- شربوني حبه
باوعلي بسرعة وفتح عيونه:- حبة مالشني
امان:- مادري
حجيتها وبجيت ..بسرعة سحب راسي وباسه ورجع سحب ايدي وباسها:- بسج ابوية بسج كافي انسي هذوا راحت ..اني هينا
ضرغام يمج بعد لاتفكرين بشي
بقيت منزله راسي وابجي ...
سحب وجهي عليه ويباوعلي عين عالسياقة وعين علية
ضرغام:- امان دحكييي زين
اني يمج هذواا ..اللي راح انتهى
انتي هينا معاي واني معاج ..داتستوعبين
وخرت ورجعت لميت بروحي وخليت وجهي عالجامة وابجي
مادري شكد بقينا بالطريق
بس مو هواي اللي اتذكره انو ماجان هواي ...
وصلنا للبيت ..وكف السيارة واجا علية
فتح الباب راد ينزلني حجيت:- ضرغام
ضرغام:- اششششش جلمة منج ما اسمع
حجاها وسحب ايدي نزلني واني كوة اسدسد بالعباية مالابسه بس بنطرون جواها
فتح الباب ...مامصدكة رجعت
..طببني
تذكرت كلشي ..تذكرت ذيج الليلة اللي طلعت بيها
لزمني من ايدي ويمشي بيه ...طلعوا البنات من المطبخ مخروعين
اجوني ركض
هاي اللي تحضن بيه وهاي اللي تمسح بوجهي
نبا:- امان انتي زينة ..خية احجي شمالج
علياء:- عليج الله ردي علينا
جنت طاااافية ماكدر حتى احجي ..اباوعلهم
حتى الرؤية بعيني مغووشة
اجا يمهم وخرهم:- عوفوها خل ترتاح
لزمتني نبا وعلياء سندوني يمشوني
صاح:- ودوها لغرفتي
نبا:- حاضر اخوي
يمشوني وطببوني للداخل ..كفختني نفس الريحة اللي جنت احبها يمهم
نزلت دمعة مني حركتني حرك
فتحتو باب الغرفة وطببوني ..جانوا يحجون وياي
بس كلشي ماداستوعب ولا اسمع زين
شالت الفراش علياء ومددتني عليه
اجت نبا تفتح العباية تنزعني راسا لزمتها بقوة وكمت اصرخ:- لاااا
نبا:- يمة اسم الله الرحمن شمالج حبيبة
بس انزعج
باوعتلها وابجي ولازمة بكل قوتي العباية ..مسحت على راسي:- هذوا هذوا عيفيها ابقي بيها هذوا
حجتها وغطتني بالفراش ..لزمته وغطيت نفسي كلني بي
وارجف جواه رجلية وحده تطك بالثانية من الرجف ...
المشاهد تنعاد براسي
صوت النسوان ..ضحكهم
نظرات ذاك
صوت الحجل اللي برجل ذيج الحرمة الحقيرة ...
وهي تنزعني البنطرون ..
بسرعة فزيت مخروعة ..فتحت عيوني لكيت نبا يمي
بسرعة جتي علية:- اسم الله شمالج خيه
كمت ارجف بمكاني ..لزمت راسي
جنت معركة ودابووخ من الحر
سحبت الفراش:- كومي كومي غسلي
كلشي ماحجيت ..اجت يمي سندتني وصاحت علياء
اجو ثنينهم وياي كوموني
من طلعوني سمعت صوت ضرغام:- ها ابوية
نبا:- خل نغسللها كعدت مخروعة
ضرغام:- اي بس بالكم عليها ابوية انتي
ديرو بالكم لاتاذونها بشي
نبا:- اي اي لاتخاف شمالك
سوالنا طريق وطببوني للحمام
جنت كلشي ماداستوعب شديصير
حتى عيوني مغووشه مو مركزة شنو ديصير حولية
وجسمي ماذيني واحس حتى دمي داخل جسمي دياذيني
فد شي هيج ماعرف اوصفه ...
اجت تنزعني راسا فريت منها ورجعت بسرعة انلزكت بالحايط
علياء:- شمالج امان انطيني بس مجال اغسلج
اهز براسي بلا
باوعتلي نبا واجت تقربت مني بهدوء
مسحت على وجهي بهدووووء وتهمسلي بصوتها الحنون:- حبيبة مانسويلج شي والله وروح امج ماناذيج نحنا ..نحنا هينا حدج
انطينا بس مجال نساعدج
هدتني شوية شوية ..وخرت ايديه فتحت العباية ونزعوني
غمضت عيوني بسرعة كامو يغسلولي
كل ذبة مي يذبوها علية احسها نااااار ..بحيث هما يغسلولي اني بس ابجي واشهك
خلت نبا راسي على صدرها وتغسلي وتحجي وياي:- بسج بعد روحي بسج اني وعلياء هينا حدج
ضرغام برا موجود همين حدج لاتخافين
كلنا معاج ..بسج اروحلج فدوة
تحجي وتغسلي هي وعلياء واني حتى مابيه حيل افتح عيوني
جابت المنشفة علياء ومسحتلي ولبسوني عالسريع دشداشة
جانو يتعاملون وياي عبالك طفلة صغيرة خايفين عليها من صدك
لفو المنشفة على شعري وطلعوني
..جنت مقفلة بس اريد اللزم الفراش راسي مصدع بطريقة مو طبيعية
رجعوني لغرفة ضرغام مددوني
بس خليت راسي عالمخدة رجعتلي الرجفة ..كمت ارجف بشكل هستيري بحيث حتى علياء طلعت ركض صاحت ضرغام
اجا طب مخروع فوك راسي
حط ايده على كصتي جانت حرارتي مرتفعة
ضرغام:- شون مي سبحتوها
نبا:- والله دافي
علياء:- شمالها ضرغام دحك رجفتها مو طبيعية
نزل على مستواية ويباوع بوجهي:- بشني حاسه ابوية انتي
بس احجي اي شي ..كليلي شني يوجعج
وبشني جاي تحسين
بلعت ريك وكوه حجيت:- جسمي يوجعني
سكت ..سحب نفس وطلع:- شوي وراجع لاتعوفوها
حجاها وطلع ..اجو كعدو يمي وهاي اللي تلزم ايدي وتطبطب عليها وهاي اللي تحاول تشاقيني
بس جنت بغير عالم فاصلة من الدنيا كلها ...لحد ماحسيت غفيت
هي دقايق وحسيت بنغزه بيدي
فتحت عيوني كوة لكيت ضرغام كاعد يمي ولازم ايدي
رفعت راسي شوية انتبهت بيده كانولة وديحطها بيدي
ردت انفر بسرعة صاح:- نباااا لزميها
اجت ركض نبا لزمتني من صفحة الخ ولزمت رجلية
مابيه حيل اصرخ ..حط الكانولة وركبها بيدي وراها طلع ابرا ودوا
باوعتله نبا:- شني هاي ضرغام
ضرغام:- علاج ..يسحب السم من جسمها حتى لو شوية جان
نبا:- عليش ..شربوها شي؟
ضرغام:- مادري دكول حبه ..واكيد هذوله حثالة كلشي ينطون حتى يخلون الواحد بحاجتهم ومايكدر يعوفهم
نبا:- يعني شيسوي هذا العلاج
ضرغام:- علاج ابوية ..دوا مقوي ومسكنات جبتلها من دكتور معين حجيتله السالفة وانطاني هما
سحب العلاج بالابرا وضربني بالكانولة
شوية وحسيت الدوا كام يمشي بجسمي ..بالبداية لزمتني رجفة
كامت عيوني تدمع وابجي بصمت
اجا يمي مسح على راسي:- هسه ابوية هسه ..انتظري دقايق ويخف الوجع
بقت لازمتني نبا لحد ماهديت ورحت بالنومة
...مرت ايام مادري شكد اني على هالحالة
احس بس على ضرغام يجي ينطيني العلاج وابقى ربع ساعة اني ارجف وجسمي ينزل منا مي مو بس عرك لحد ما اغفى على وضعيتي ..
البنات ماعافوني
لحظة بلحظة وياي ..يا نبا يا علياء
مستحيل فتحت عيوني بمرة ومالكيت وحده منهم كاعدة يمي
حتى بمرة من المرات ..فتحت عيوني على صوت نااااصي يمي
لكيت الحجية كاعدة بصفحة جايبه كرسي وكاعدة فاتحة القران وتقرا
جان صوتها هااادئ تقرا وتتلي بشكل يمسح عالقلب ..
جان اوقات على كد ماقاسية ..بس حنيتهم خففتها علية
بحيث كلما شفتهم يمي ..اطمئن
كلبي يرتاح رغم كل الوجع اللي جنت احس بي ...
...داسمع صوت طقطقة يمي
فتحت عيوني بهدووء ..لكيت ضرغام
مبدل وجاي يطلع
باوعلي اجا بسرعة يمي:- كعدتج؟
هزيت راسي بمعنى لا ...تعدلت
حط ايده على راسي:- ها ابوية حاسه بشي شو انبصتي شمالج
بلعت ريكي:- تعبت من الكعدة
كعد يمي:- كومي نطلع للمخزن ..الجو بارد وصاير طيبة الكعدة بي
هزيت راسي بمعنى لا وفركت بعيوني
رجعت باوعتله:- انت طالع؟
ضرغام:- اي عندي شغل
نزلت راسي احسه مسطور ياذيني بعده:- ماعندي علاج اليوم
ضرغام:- ابويه انتي صارلج اسبوع من تركتي العلاج
باوعتله:- ليش
هز بجتافه:- هذوا بعد ماتحتاجين شي هو جم يوم ..الباقي كله علينا
باوعتله:- ضجت من الغرفة
سكت شوية ..كام فتح كنتورة طلع جاكيت وباعلي:- كومي
امان:- وين
ضرغام:- للحديقة كومي بساع
امان:- مو طالع للشغل
ضرغام:- انعل ابو الشغل اذا جانت مكابلت وجهج
لزمني من ايدي ..وشوية شوية كومني لان لا ادوخ
استندت على عكسه ومشينا ...طلعنا برا الغرفة لكيت البيت ضلمة
حكيت شعري:- وينهم
ضرغام:- ساعة وحده ابوية انتي غير نايمين
ضحكت:- تيهت كلشي
مشاني وطلعنا لبرا ..حط النعال كدامي ولبسنياه
الحلو بي جان يعاملني بادق التفاصيل ومايتحسس من شي وياي
طبينا للحديقة ..جان فعلا الجو بارد
كعد بالمرجوحة واشرلي يما اكعد
تمددت وخليت راسي على رجله ..غطاني بالجاكيت
يهزها برجلة المرجوحة بشكل هادئ ويلعب بشعري
جنت صافنة كدامي ..روحي باردة
وداحاول ما استذكر اي شي من اللي عشته ذيج الايام
رفعت شوي راسي باوعتله ديباوعلي ومبتسم
ضرغام:- لاتلوعين كلبي عليج ..يول انتي حيله لضرغام
تدرين يعني شني حيله؟
امان:- ماراح تعوفني
ضرغام:- ليش حتى اعوفج
امان:- يعني مثلا ..بمرة من المرات كتلك ماريد بعد اعرفك
شنو تسوي
عدل بلحيته:- ماسوي شي ابقى يمج واتمسك بيج
امان:- حتى لو كتلك ابعد؟
هز براسه:- ماريد افتح الموضوع
بس اني حتى ام المرحوم تمسكت بيها لان مهما جان بينا عشرة واحترام وكلت ميخالف لاتخرب بيتك بس لمن عرفتها مصرة عفتها ..
جي الانثى كائن هرموني
عايش عالهرمونات وهالهرمونات تسيطر عليهن وتسودنهن
لهذا من البت دكول ماريد اعرفك ..احيانًا تكون مجرد هرمون معين مالزعل سيطر عليها بذاك الوكت ولهذا ما ينأخذ بكل كلامها بعين الاعتبار
امان:- يعني
كرصني من خدي:- يعني ماعوفج
لو مو مرة الف كلتيها ..اعرف بطكاتج
نزلت راسي وبعدني على رجلة متمددة
سكتت ثواني ورجعت كتله:- شون لكيتني
ضرغام:- سدي الموضوع ابوية
امان:- لا اريد اعرف
شون وصلتلي
سحب نفس قوي:- مادام سألتي معناها تكدرين تسمعين
من انطيتيني اسم المحل اللي جنتي واكفة عنده
رحتله وحجيت معاه طلع عنده كاميرة جدام المحل ..والله بالتهديدات سحبت الكاميرة منا وطلعت التسجيل ماليوم اللي طلعتي بي من هينا
شفتج ويه مجموعة بنات واجاكم الرف ياخذكم
اخذت رقم الرف ووصلتله من ثاني يوم بمعرفتي ..بس الرف جان واكف جدام عمارة اقتحمتها ماجان بيها احد حتى صاحبها ماموجود واسال احجي محد ينطيني عنوان ولا جواب عن اصحابها
وراها من التلفون اللي حاجيتيني منا من السيم
وديته لشخص يفهم بهالسوالف جان ينقطع ويرجع الخط عالشبكة يمكن فوك العشر مرات وانقطع مدة طويلة يوم كامل ورجع ثاني يوم راسا حددلي الموقع بالضبط اجيت بالبداية اختبرت المكان
دزيت واحد من الشباب يدخل يعرف شكو شماكو سوا روحه متهيه وسالهن عن مكان
طلعت حرمة الله يستر عليها ..راسا عرفنا اي هو هذا خليت جماعة تراقبه خاف يطلعون ونتيهم ليلة كاملة
ثاني يوم تحضرنا كلنا ولميت جماعتي وجيتلج
باوعتله:- اجيت لأربيل؟
ضرغام:- ماجنتو باربيل ..ماطلعتوا من المحافظة اصلا
شلون تكدرون تطلعون وتعبرون سيطرة من كل عقلج
امان:- اني مادري نيمونا بالطريق وراها كعدنا لكينا روحنا بهالبيت وكالوا باربيل
ضرغام:- حتى يتيهوكم واذا وحده تريد تشرد ماتكدر دكول صعبة بعد وكعت امام الامر الواقع
تعدلت بسرعة ..خليت ايدية على وجهي واذني اريد اسكت افكاري
بسرعة تقرب مني وحط راسي على صدره:- هشششش انسي انسي كلشي
كلشي صار راح هذوا واني هينا يمج ومحد يكدر يمس شعره منج
بس انتي استچني ابوية انتي
شجنتي تفكرين من شردتي بروح امج
وين جان عقلج من شردتي خليتيني اتسودن وراج طلعت اركض بالشارع ماعرف وين هجيتي
باوعتله:- جنت مقهورة ..عرفت انو اذا بقيت بعد اخرب حياتكم
ضرغام:- شتخربين يولو شتخربين
غير بوجودج هينا طيبتي كل جروح كلبنا اولهم اني
امان:- مادري حسيت جان لازم اروح
ضرغام:- علواه بعد ماتحسين ..اذا عالحجية يشهد الله الليل كله هي تبجي على مصلايتها ودكلي ها يمة مالكيتها واني صاير نار اكللها لا والله تسودنت
وصلت بيه حضرت جنت رايح لبيتكم كلت على الاقل اطمئن بخير انتي بس بنفس الوكت خابرتيني ..
سبحان الله بس طلعت من الغرفة من يم الحجية عرفت بيج طالعة بحيث راسا دورت عليج طبيت عالمخزن صعدت فوك مابقيت مكان واجوي البنيات مخروعات يكلولي هجت
سكتت وبقيت بحضنه
فجأة صاحني:- اماني
نداريت عليه مستغربه:- امانك؟
انرسمت ابتسامة على شفايفه وخرت شواربه الفوك عن شفته وگال
ضرغام:- اللي مايجيني بعده امان
لاتسويها بعد ..لاتسودنين روحي عليج
يول والله شايفه هذا طولي وضخامتي حيلي راح كله من ادور عليج ومالكيتج
حسيت فقدت بعد هذوا الله عليج وروح امج لاتاذيني بغيابج
دفنت راسي بصدرة وحجيت بهمس:- اني اسفة
مسح على راسي بهدوء
فززنا صوت باب المطبخ انفتح ..راسا وخرت وعدلت بكعدتي
وعيونا تترقب منو الجاي ..
شو مانشوف الا الحجية اجت علينا وصايرة نار
ام ضرغام:- من نعلا علا روح ابليسكم يولو وكعتو كليبي
ضرغام:- اسم الله على كليبج ام ضرغام شمالج
ام ضرغام:- يول دخلت للغرفة مالكيتها بيها
والمرحوم كليبي صفى برجليني
ضحك وكام لي يمها ..باس راسها وايدها وسحبها جابها يمنا
اجت كعدت وتستغفر ومبين عليها الخوف
بالبداية ترددت ..تقربت منها وبست ايدها ...
همستلها:- الله لايحرمنا من وجودج
باوعتلي ..ابتسمت وهزت براسها
..كعدت بيني وبين ضرغام وكامت تسولف على ايام كبل
حجت انو ضرغام جان يصعد فوك عامود هالمرجوحة ويدفع بكل قوته بنبا وعلياء وايمان وجانوا هما يخافون لايوكعون
هي تحجي واني اضحك اتخيل المنظر ..اتخيله من جان صغير
ولو ما شايفه صورته هو وصغير ماجنت راح كدر اتخيل شون جان شكله
بقت تسولفلنا لحد ما سمعنا اذان الفجر
..غمضت عيوني جنت مرتاحة
وصوت الاذان سكن كلشي بيه ..ضربتنا وكامت كالت
ام ضرغام:- يلا كدامي توضوا وخل نصلي
كمنا ثنينا وصدك انطتني هدوم مالصلاة وصليت وياها وضرغام بالصالة لان مايصير نصلي سوا رزلتنا
...ثاني يوم شافوني البنات طلعت من الغرفة انخبصوا بيه
بحيث حتى طبخولي اكلتي المفضلة
دولمة ...والحجية بنفسها كعدت تساعدهم
كعدت وياهم ورجعت استمتع بسوالفهم
اشوفهم واشوف محبتهم من كل كلبهم طالعة
..بعد الغدة كاعدة ويه البنات وكفت الحجية بباب المطبخ وصاحت:- امان
نداريت عليها اشرتلي بيدها بمعنى تعالي
كمت ومشيت وراها وطبينا لغرفتها ..كعدتني على جربايتها
مادري شنو راحت طلعت من كنتورها واجت تمشي ببطئ وكعدت يمي
جانت بعد مو كلش احسها صالحتني بشكل كامل
كعدت يمي وقربتلي صورة
باوعت صورة ضرغام ووياه حرمه واكفين سوا
ام ضرغام:- هايه صورة عرس ضرغام على البومة احلام
ماعرف اذا حاجيلج الموضوع لو لا
هزيت براسي بمعنى اي
ام ضرغام:- حركو كلشي يخصها البنيات بس هاي الصورة بقت معاي
قربت اصبعها واشرت عليها:- دحكي هاي اللي داتشوفيها
اذت وليدي وحرمته باغلى ما اجاه اغلى هدية انطاه هي ربي
حركت كليبه ووجعت روحه على ابنه وبالاخير هدته وراحت
حتى لو حجالج ضرغام ..بس ماحجالج هو بقى سنة كاملة متأذي وكوة حاولنا ننسيه الموضوع
مو علمودها ..لا يشهد الله جان متوجع على وليده اللي راح
رغم صغره بس تعلق بي
اباوعلها تحجي وتاشر بيديها ..عيونها جانت تدمع
ام ضرغام:- اني السبب ..اني اللي اخذتها بدون ما اسال عنها وورطته
ولليوم كليبي ياذيني عليه وحاسه بالذنب واني اشوفنه كبر وواصل لهالعمر وهو ماعنده وليد يحمل اسمه ويسنده بكبرته
واني ادري انو بعد حتى فكرة الزواج شالها من باله
حطت شيلتها على عيونها وكامت تمسح بوجهه ودموعها
رجعت وخرتها وباوعتلي:- بس اني جنت مؤمنة ربي ماراح يخيب ضني وكل ليلة جنت ادعيله بهالتغيير
امان:- شنو ..شصار
امان:- اللي صار وليدي صاير مرتاح وفرحان وعيونه متروسه امان
باوعتلها مصدومة ومستغربه
كلبي كام يرجف بطريقة مدري شونها
امان:- عمة ..ماجاي افتهم عليج
ابتسمت:- افتهمتي علية
نزلت راسي
ام ضرغام:- عبالج ما لاحظت نظرات وليدي عليج
وانتي همين ..وبعد اسمه ربي دلني الطريق الصح صليتله استخارة
وفتحت القران وماشوف الا وجهج يجي جدامي
صفنت بيها ..ماعرف شسوي
احس خجلت واستحيت وكل المشاعر تخربطت علية
ام ضرغام:- اريد افرح وليدي الوحيد وارتاح من هالتأنيب الضمير
رغم كلشي صار وسويتوه ..بس ماكدرت اقسي لا عليج ولا عليه
شكد فكرت بس كلما اشوفكم وادحك عليكم سوية
احس انسى كلشي واريد ابقى اشوفكم هيجي
ضربت على ايدي وصاحت:- يولي لاتصفنين مثل الثولة اني رايدتج لضرغام
ضحكت ..نزلت راسي خجلانة هواي
حطت ايدها على ايدي:- يشهد الله من اول ما اجيتي هينا
واني حاطتج بكليبي سبرج بسبر البنيات
ماعلية ومادخلني من اللي فات ..دامه ضرغام الجابج معناها هذوا اني اعرف وليدي
سكتت ماعرفت شحجي بقيت بس اصفن
فززنه الباب انفتح ومدت راسها علياء:- شني صارلكم ساعة تسولفن شعدكم
ام ضرغام:- معليج طلعي وسدي الباب وراجا
عوجت بحلكها ضايجة طلعت وسدت الباب
رجعت ندارت علية توها جاية تكمل حجيها انفتح الباب مرة الخ
بس هلمرة طب ضرغام مد راسه بس وباوعلنا
ام ضرغام:- ها يمة شمالك
ضرغام:- لا هيج جنت ادور عليج
ام ضرغام:- وشتريد مني يمة
ضرغام:- ها لا هيج
حجاها وطلع رجعت ندارتلي مبتسمه
ام ضرغام:- هاا دحكي على عيونه ..يولي اني مو جاهل حتى تعبرن علية هالسوالف
نزلت راسي وكمت اللعب باصابيعي خجلانة كلش
ام ضرغام:- يولي جبتج تصافنين هينا ..دحجي شي
باوعتلها:- ماعرف شكلج والله
ام ضرغام:- تحبيه؟
هزيت راسي بمعنى اي
ام ضرغام:- وراح تتحمليه بعصبيته وطبعه الصعب؟
هزيت راسي ب اي
ابتسمت وسحبتني الها باستني من راسي ..
..طلعت من عدها واني مسطورة
فرحانة على متوترة وخايفة
اختلطت مشاعري ..ماعرف بشنو داحس
بس احساس كلش حلو
راسا طبيت للغرفة ماكدرت اشوف احد
جان اكو مراية طويلة على باب الكنتور
وكفت كبالها وباوع على روحي
خدودي حمرررر ...خليت ايدي على كلبي
يدك سرييييع سرعته ماتنوصف
يارب ..
كملها ..احساس صعب ينوصف
خوف على تمني بانو تكمل
...
..
..
للحكاية بقيـــة..

-منة الله الأيوبي.