أمان

البارت الثامن عشر

لا مستحيل اكدر
ماراح اكدر استمر بهالمهزلة هاي
حطيت وجهي عالمخدة وبجيت ..بجيت واني اتخيل كلشي بدا ينهدم ويضيع بحياتي
كل هالاشهر اللي بنيته من حياة وحب واستقرار وامان ونفسية زينة
بدا يتلاشى كدامي ..داشوفه ديضيع واني متجتفة ماعرف شسوي!
...بقيت ساعات اني بالغرفة على نفس الوضع
لحد ماحسيت راسي بدا يصدع
كمت خليت اذني عالباب سمعت ماكو صوت كلت معناها نامو
طلعت برا ..البيت ضلمة الكل نايم
رحت للمطبخ شربتلي بندول
دورت على شي اكله ..بس ماجنت اشتهي اكل اكل مالعشة وهالسوالف
جنت اريد شي خفيف لا اروح اتقيئ
مالكيت طفيت الضو وطلعت
..امشي واحس روحي تسحل وراي من وجع راسي
جيت اطب لغرفتي سمعت صوت من غرفة اخواني
تقربت وطبيت راسا سوو روحهم نايمين وتلفوناتهم مشتغلة
امان:- اذا جنتو داتحاولون تبينون نفسكم نايمين كدام بابا ف حركتكم فاشلة
عدل راسه عبدلله:- شتريدين
امان:- ماعدتكم نستله جبس ..جوعانة
عدل راسه بسرعة ماجد:- اني عندي
تقربت رحت كعدت يما ..كام وفتح كنتورة
باوعت عليهم ..ولا مرة كعدت هيج كعدة وياهم لو اخذت وانطيت بالكلام
امان:- ليش مانايمين لحد هسه
عبدلله:- ماعدنا شي 
ماجد:- ماجايينا نوم ولو بابا عرف بينا ماراح يقبل
امان:- هو ابوك كلشي حسب مزاجه
اجا ماجد حط كدامي نساتل وجم جبس ..صفن بيه
ماجد:- اكلج شي بس ماتزعلين
هزيت براسي واني اشوف بالنساتل ياهي اكل
ماجد:- لؤي ابن القاضي كلش ايع
ضحكت:- شنو يعني
ماجد:- يعني انسان مقزز ..صقيع
تعدل عبدلله:- وفوك هذا يطلع صوت من ياكل
فتحت النستله وكمت اكل:- ماسمعته
عبدلله:- اني كعدت يما عالغدة ..جان من يعصى شي بين سنونه يطلع صوت مقزز
امان:- صدك؟
سحب وجهي عليه ماجد ويحجي
الحركة المعهودة مالاطفال حتى تنتبهيلهم:- اي واجيت يما ماسويت شي يكلي كوم كوم ماكعد يم عجاية اني
عبدلله:- على عكس عمو اللي اجانه ذاك اليوم وتعاركتي ويه بابا بسببه
باوعتله:- ياعمو؟
عبدلله:- هذا اللي عنده جرح بوجهه ..كعدنا يما وكام يشاقينا
صفنت بي ..يقصد ضرغام
كلبي كام يوجعني ...غصيت باللكمة بحيث بعد ماتنبلع مني
حتى الاطفال اللي مافاهمين بعد شي
شافوا الفرق الشاسع بينهم ..ومن اول مرة!!
يالله شكد تمنيت تكون عندي عائلة تفهمه من صدك وتشوفه بنفس النظرة اللي شفته بيها ...
باوعت تلفون ماجد بصفحة ومشتغل يوتيوب جانت لعبة مايني گرافت
سحبته داتفرج بعد توني
اجاه اشعار من الفيس ..باوعتله:- عندك فيس؟
هز راسه باي:- ماما سوتلي
صفنت للحظات ..باوعتله
امان:- عادي بس اسوي شغلة ثواني؟
كعد يمي ويفتح بالحلويات:- اي
طبيت للفيس بسرعة رحت للبحث وبحثت عن اسمه
جنت اعرف حسابه ..طلعلي
ايديه كامت ترجف ...يالله شكد مشتاقتله!
حتى صوته حرموني منا
دخلت وكمت اقلب بالحساب ..جذبني اخر منشور ناشره
جانت بي اغنية مشتاكلك موت مالباسم العلي
المقطع اللي يكول بي
.. مشتاكلك انا احس نار بصدري
ولشوفتك والله لانطي عمري ...
غووركت عيوني بسرعة
باوعت من الامس ناشرها
احس الزمن كله توقف بيه بهاللحظة هاي ..
اني اللي احس نار بصدري والله
بقيت اسمعها يمكن عشرين مرة واني صافنة
فززني ماجد وهو يعدل وجهي عليه:- امان
امان:- ها ماجد
ماجد:- لاتزوجين لؤي بعدين يجي يمنا ويبقى كاعد وياكل ويطلع صوت بالاكل
عبدلله:- لا مو سمعت بابا يكول راح يسافرون سوا
ماجد:- مو خطية امان
مسحت عيوني وهزيت براسي:- لا ..مستحيل يصير هالشي
انطيته التلفون بسته من خده
تقربت على عبدلله وبسته هم
وكفت يم الباب
امان:- يلا شوية وناموا ..تصبحون على خير
حجيتها وطلعت وسديت الباب ..بوجهي طبيت لغرفتي
بقيت اصفن ..اروح واجي والف فكرة مرت براسي
باوعت للساعة جانت وحده وشوية
خطوة تتقدم وخطوة ترجع ..اذا ماحاولت هسه
راح اندم بعدها على كل لحظة ضيعتها بهالوقت
..سحبت الجنطة اللي حطولي هي البنات
طلعت جم قطعة ملابستها من الهدوم واكسسوارات وهالسوالف للبنات مو اليه
طلعتلي هدوم عالسريع طبيت سبحت بدون محد يحس علية
وطلعت كملت كل غراضي
جانت هلمرة من صدك بدون اي تفكير ثاني ..
طلعت ورقة وكتبت بيها وحطيتها بجيبي
باوعت للوقت بعده ساعة ٢ ونص
ماراح اكدر اطلع بهيج وقت انتظر للفجر احسن شي قبل مايكعد بابا
كعدت واهز برجلي من التوتر ..لا ماراح افكر هسه اللي راح اسويه صح لو غلط
لان وصلت حدها بعد ..الوقت يمشي بطييييئ بشكل
اروح واجي بالغرفة واخاف لا اطلع صوت واحد يحس علية كاعدة لحد هسه ومبدله فوكاها ..
لبست بنطرون كابوي وجاكيت سبورت سوده فوكاه وسديتها
الدنيا بارده ..بحيث بعدني بالبيت واحس ديبردلي مادري اذا من التوتر لو من شنو
...صارت بالثلاثه ونص
رفعت الجنطة وفتحت الباب بهدووووء ..
طلعت امشي على روس اصابيعي ماريد اطلع اي صوت
طلعت الورقة اللي كعدت اكتب بيها وعلكتها على ثلاجة المطبخ..
فتحت باب البرا لبست حذائي عدلت روحي عالسريع وسديته شوي شوي
نزلت ركض حتى مانتظرت المصعد نزلت بالدرج بس اريد اطلع
ماهاممني اي شي ولا ببالي اي شي غير ان انهي هالمهزلة قبل لاتصير
طلعت اتمشى بالمجمع ماركضت خفت احد يشوفني يشك بامري بالاخص الامن اللي عالباب
جانت مسافة بس اريد اخلصها كبل ما يشوفني بابا لو يكعد
وصلت البوابة الامن جانو يعرفونا
سويت نفسي طبيعية وعاادي حطيت ايديه بجيوبي ومشيت عود ماعندي شي
توني عبرت صاح واحد من الامن
- العفو ست
الدم جمد بعروكي
كلت هذوا هذا راح يكعد يسال ويرجعني للبيت ولو مارجعني راح يكعد ابوية ويجيني بالحالتين مليوصة ..بلعت ريك ونداريتله
حاولت اكون عادية:- نعم
- بس العفو يعني عالتدخل ..الدنيا ديكولون راح تمطر هسه شفتها بالطقس
ف اذا تريدين ترجعين تجيبيلج شسمية شي
مي بارد ونزل على كلبي ..بحيث ردت احضنه
ابتسمت:- لا عادي احب المطر ..شكرًا
حجيتها ونداريت اكمل طريقي
طلعت من المجمع ..بس اختفوا من انظاري الامن
لزمتها ركضه من ركضه اريد بس اوصل لاي وجهه اكدر اخذ منها تكسي
ماردت اخذ من كدام البوابة وتلزمني الكاميرات او شي
اركض اركض واحس بروحي حره ..اي حره
بدون تقييد ..بدون افكار معقدة
بدون جبر بدون اي شي تسلط علية وقالب لازم تبقى بي
..ضحكت
اجت ببالي الورقة اللي كتبتها لابوي
"مرحبا بابا ..اسفه بس جان لازم افهمك موقفي
اني ماراح اكدر اكون مع انسان ما احمله اي مشاعر ولا مستعدة اعيش هيج عيشة في سبيل العالم دكول شوفوا زوجها ابن قاضي وهنيالها
لا مو ساعية لهيج حياة كلشي بيها مجرد مظاهر
وماريد اعيش اطفالي اللي عشته ، لو جان يدور ببالك شنو عشت اني اللي خلاني هيج اكول ف اني جنت مفتقدة الامان واني بنص بيتك
جنت محتاجة الدفو والحب بالوقت اللي جنت تشتريلي بي ارقى هدوم وجاكيتات بس مو هذا المعنى اللي جنت اقصده
اني اسفه بابا بس هالحياة ماتناسبني ولا لكيت روحي بيها ولا تهمني هالشكليات كلها
مو دائمًا يكونون الاهل شايفيلنا الاحسن مرات يكونون ماشايفين اللي نحنا جاين نشوفه ولو جان هالشي غلط ف عوفني اغلط واتعلم واعيش تجربة
اتمنى ماتزعل وماتسال وين رحت ،بس ماكدر ابقى وانت جابرني على عيشه ماطيقها يتيمة لاتكون انت والدنيا علية
عوفني اعيش بالطريقة اللي اريدها وتمنيتها ،مع السلامة"
..
...لو جنت امان القبل جم شهر ماجنت سويتها
جنت هشه ..اضعف من انو اخطي هيج خطوة في سبيل روحي ..
واني متاكدة بابا ماراح يدور علية ولا يسال وين رحت حتى مادامني كتبتله وفهمته انو اني راح اكون بخير هاهيه!
..اركض واضحك ويه روحي والهوى والنسمات الباردة تضرب بوجهي والجنطة خايفة عليها لاتوكع ..
تعبت بس حتى هالتعب عاجبني
وكفت بصفحة عالشارع ..اريد تكسي بعد ماكو
ساعة ثلاثه الفجر ونص منين راح تلكيلج تكسي!
واكفة واراقب الطريق بحيث مادري شكد طولت ومليت
حسيت اكو قطرة نزلت على وجهي ...باوعت للسما
مديت ايدي
اي والله هاي صدك داتمطر ..اللعب
الجاكيت ماجان بيها كبع بس جيوب ..خليت ايديه وكمت ارجف من البرد بحيث عظامي وجعتني
يالله ..تكسي من عندك يالله
ماكو مكان اكعد بي هم تعبت وعيوني قفلت اريد انام
مانايمة الليل كله ...
ماعندي تلفون اتصل على اي احد
بعد يمكن ساعة كاملة بقيت واكفة
الضو بدا يفتح والشمس طلعت لنصها بس الغيوم مغطيتها ..
جان نهار ممطر بشكل ..صرت مي من فوك لجوا
تمشيت بعد كلت الا مالكي سيارة
وصدك شفت تكسي واكف بعيد ..رحتله ركض
باوعتله رجال جبييير كاعد بالسيارة وينفخ بيديه مبين عليه بردان
دكيت عالجام فز ..باوعلي وفتحه
امان:- السلام عليكم عمو
- هلا بنتي وعليكم السلام
امان:- فاضي يعني اكدر اصعد؟
هز بيده:- اصعدي اصعدي
فتحت الباب وصعدت ..جانت السيارة قديمة وباردة ثلج
باردة اكثر من برا السيارة ..
- نفرات لو لوحدج
باوعتله:- شنو يفرق
- اذا نفرات ننتظر لحد ماتقبط السيارة ..اذا لوحدج هسه احرك
هزيت راسي:- لا مستعجلة ..لوحدي
- وين تروحين بنتي
صفنت بي ..ماجنت اعرف العنوان بالضبط
امان:- عمو اذا اوصفلكياه راح تفهمني
ندار علية:- وين رايحة
امان:- بيت اهلي
سكت وباوعلي انو بمعنى ديسمعني
تعدلت وكعدت اشرحله ..جنت اعرف مناطقها بس اسمها بالضبط ضبط ماعرفه
ف اشرحله اكله هيج وهيج وهو مايعرف ولا ديفتهم علية
اخر شي اتصل على واحد ثاني هم تكسي
وحط التلفون كدامي وكعدت اشرحله نفس الشرح
بس ذاك من اول مره راسا فهمني وكله على اسم المكان
شغل السيارة ومشى ..حطيت ايديه بين رجلية من البرد
باوعلي من المراية:- سبحان الله يابنتي ..تدرين طلعت ام الجهال كلتلي ابو عمر وين تروح وتطلع بهالجو وهالهوسه ماتحصل نفرات
بس سبحان الله رزق البني ادم بعد
ابتسمت:- واني صارلي ساعة واكفة بالشارع جنت محتاجة اي سيارة تمر اصعدها وماكو ولا سيارة عبرت ..فعلا والله رزقك بعد
نداريت للجامة واباوع ..جانت قطرات مطر خفييييفة تنزل عليه
احسها جاي تنزل على روحي ...
حضنت الجنطة وتحمست
مشتاقتله ..مشتاقه لكل ركن بذاك البيت ولكلهم
لحضن الحجية لحجي البنات وسوالفهم وشاقهم ..
حتى روحي عدهم ..مستحيل اكدر اهدم كل هالشي
بسبب شي اني اصلا مارايدته ولا اختاريته ...
بسبب سيارته القديمة حسيت طولنا هواي يلا وصلنا
..وصلت المنطقة
كلبي كام يرجف وروحي ترفرف من الفرحة
جنت خايفة من شغلة ..خايفة من صدته اليه خايفة لا مايستقبلني مو بس هو كلهم ...
دليته عالفرع ..وصلني لباب البيت
اباوعله ..ماصارلي هواي من تركته بس اشتاقيتله
فتحت الجنطة طلعت الفلوس جنت ماخذه من قاصتي التاركتها
انطيته بدون ما اساله شكد لان على هالبرد والتعب
باوعتله:- ارجع عمو لام الجهال والجهال ..وكمل هالباقي من اليوم بلمتهم
باس الفلوس وحطها على راسه وكام يدعيلي
نزلت واني روحي تركض قبل رجلية بس تريد تدك الباب ...
جنت شايفة من السيارة انو ساعة سته الا ربع هيج
داتثاوب انمط حلكي من كد ماتثاوبت اريد بس انام ..
فركت عيوني ودكيت الباب
ادك ادك ماكو احد معبرني ..دكيت بقوة
دكيت الجرس ...هي هاي هم عملة تطلعين الفجر كلهم نايمين
سمعت صوت باب المطبخ
خطوات جاي تتقرب ...كلبي كام يرجف
اجاني صوت علياء:- منهو
ابتسمت:- فتحي لج
اجت ركض فتحت الباب وصافنة بوجهي:- امان؟؟؟
هزيت راسي باي واني الابتسامة مرسومة بوجهي
بسرعة سحبتني حضنتني ومامصدكة
امان:- اششش يمعوده لحد يكعد
اخذت مني الجنطة ..نزعت الحذاء وطبيت جوا
كفختني نفس الريحة ونفس الدفو
البيت هدوووء ...
مريت من يم الصالة كلبي جان يرجف توقعت اللمحة متمدد بنفس مكانة
..بس ماجان موجود ! ..
باوعتلها:- بس انتي كاعدة؟
دفعتني لغرفة البنات:- كلنا كعدنا جي خرعتينا ادخلي
مشيت بهدوء وطبيت جانوا بفراشاتهم ..شافوني بسرعة اجو علية مامصدكين
نبا وسهير كل وحده حضنتني من صفحة
كعدوني وكعدو حولية
نبا:- ولج يامصخمة شلون اجيتي
هزيت بجتفي:- عادي بتكسي وصلني لهنا
علياء:- لوحدج؟
امان:- اي
سهير:- عجل عليش ما رجعتي ويه ضرغام ..هو كللنا جم يوم وترجع
باوعتلها:- هو صدك وينه ضرغام
هزت بيدها نبا:- هو نحنا جاي نشوفه ..بالشغل اغلب وكته يمكن كبل ماتجين بربع ساعة هيجي طلع
امان:- ليش بي شي
كرصتني علياء:- يعني على اساس ماتدرين ..يولي غير انتي لعبتي بحاله لعب
تقربت مني سهير:- شني الصار عليج الله
امان:- شنو ..ماصار شي
نبا:- من رحتي من هينا كللنا مرجعج لهلج ويرجع يطلبج منهم وكليتنا جنا متحضرين لهالشي شو بيوم اجانا يكللنا انسوا الموضوع وانسوا اكو وحده اسمها امان دخلت لهالدار
باوعتلها مصدومة:- ضرغام؟ ..هو كال هيج؟
نبا:- اي والله حتى ردنا نفهم منا السالفة بس ماحصلنا شي ..ماتعرفيه لضرغام من يقفل ياستار
صفنت ويه روحي ..وافكر
فكرت بصوت عالي:- يعني معناها على هالحالة مايريد يشوف وجهي
نبا:- لا يولي كولي يالله
علياء:- والله خيه مادري شكلج
باوعتلها:- شنو كولي
علياء:- ضرغام جان ضايج ومتعصب فد مرة ..ولحد هااحزه لو تشوفيه متعصب ومايتحجى جلمة
امان:- يعني شنو
علياء:- يعني اتقبلي اي شي يكوله لو يسويه من يشوفج
نزلت راسي ..كلبي وجعني واني داتخيل ممكن حتى مايحب يباوع بوجهي
فززنا صوت باب الغرفة انفتح ..مدرت راسها الحجية:- يولو هاي انتو كاعدات
باوعتلي استغربت:- امان؟
كمت يمها وسحبت ايدها بستها ..راسا حضنتني
ام ضرغام:- شلونج يمة شجابج بهالصبح ومنو جابج ..ضرغام لو شلون
علياء:- لا يمة
داحجي سحبتني:- تعاي تعاي
اخذتني للمطبخ
مريت من يم الصالة وباوعت لمكانه اللي يكعد بيها دائمًا
شكد البيت بارد بلياه ..حتى روحي!
...سحبت كرسي وكعدت وكعدت كدامها
ام ضرغام:- احجيلي يمة شصاير ..مافتهمت شي من ضرغام من حزتها
بلعت ريك:- بابا ماوافق على ضرغام ..وبنفس الوقت اجاني عريس ثاني صديق بابا ووافق عليه وضرغام عرف ويحسبني انو اني هم موافقة ولمن كلتله يكلي اي حتى لو راح يخيرج ابوج وراح تختاريه مو تختاريني
ام ضرغام:- ماحجيتيله ماكلتيله انتي ماعليج
امان:- حجيت ووكفت بوجه بابا بس مافاد ..وسد التلفون بوجهي ضرغام ومايريد يسمعني
نزلت راسي وعيوني دمعت:- كرهني ضرغام
قاطعتني:- لا لادكولين هيجي بنيتي ..ضرغام مستحيل يكرهج وهو يعرف انتي مالج علاقة بالسالفة
باوعتلها:- بابا ضوجه هواي
ام ضرغام:- حسيت ..وعرفت ومن رجع لحد هالحزه هو مو طبيعي وضايج محد بينا حجي شي معاه بس اني ام واعرف بوليدي
واعرفه ماكرهج ..يولي بعدج بعيونه بعده يدخل للبيت وعيونه تدور عليج
نزلت دموعي:- اني هم ماكدرت اتقبل غيره ولا اتقبل بعده عني
ام ضرغام:- شلون عجل اجيتي
امان:- لوحدي
ام ضرغام:- شردتي من البيت؟
باوعتلها وهزيت راسي باي
ام ضرغام:- لااا ابوية هايه مامرجية منج
امان:- عمه ماراح اكدر ابقى وهو جابرني انخطب من واحد ما طايقته ..حتى ماسال عن رايي ولا كال شنو موافقة لا هذوا حدد الموعد
ام ضرغام:- بس اكيد راح يدور عليج
ضحكت:- لا صدكيني بعد مايقرا رسالتي الكتبتها اله راح يذبها بالزباله وينساني ..هو من عرفني ماجنت ببيت خوالي ماهتم
تنهدت وهي تباوعلي:- تسودنتو ثنينكم والله
امان:- اهم شي عندي هسه ضرغام
تقربت عليها ولزمت ايديها:- الله يخليج كوني وياي
رفعت ايدها ومسحت على وجهي:- ابوية انتي اني معاكم شعندي غير هالوليد واريد سعادته ..وكلتلج هي انتي صرتي منا وبينا
امان:- يعني تتوقعين ضرغام راح يتقبل وجودي ويسامحني لو ينسى اللي صار وسمعه من بابا
سكتت وهي تباوعلي ..سحبت نفس:- الله كريم بنيتي الله كريم
دكومي ارتاحي نامي دحكي عيونج منعسين
بست راسها وكمت ..طبيت للغرفة جانو البنات بعدهم كاعدات
احس اتوترو مثلي ومنتظرين جية ضرغام على نار مثل ما اني منتظرتها ...
باوعت لمكان فراشي مرتبيه بس ماشايليه
بهدومي تمددت وماريد افكر باي شي
انام ..انام براحة وبس
ومثل الراحة اللي لكيتها بس بهالبيت ...ترجع تسكني من جديد بعد ذيج الليالي المتعبة ..
...
علياء:- يولي امااان مفجوعة صارلج سنة مانايمة دكعدي شمالج
فتحت عيوني على علياء تهز براسي
باوعتلها:- شكو
علياء:- كومي كعدي صارلج من النهار نايمة
امان:- ساعة شكد
علياء:- ساعة عشره
مطيت بجسمي وهي بعدها تباوعلي
امان:- شنو
علياء:- ضرغام اجا
فزيت من مكاني لزمتني:- بس دقيقة يولي
ماكلناله اجيتي ولا يعرف بشي ..وماشافج
امان:- يعني هسه مايعرف انو اني هنا؟
هزت براسها بمعنى لا
صفنت ويه نفسي فززتني بسرعة وهي تضرب على ايدي:- ولج كووومي مو وكت صفناتج الرجال راح يرووح
كمت عالسريع عدلت هدومي
باوعت للمراية مسحت وجهي بيديه عالسريع وعدلت شعري
باوعتلها:- زينة هيج
علياء:- جنج طالعة من العمليات بس يلا
ضحكت فتحت الباب طلعت
توني عتبت باب الغرفة سمعت صوته من الصالة يصيح
ضرغام:- روحي كوليلها خلي تحضر روحها جي حتى ارجعها لابوها
...باوعت لعلياء مصدومة وهي تباوعلي نفس النظرة
ضرغام:- يمةةةة ماااسمع جلمة منها ولا اريد اشوف وجهه
....
...
..
..
للحكاية بقيـــة.

مفروض هالرواية اسمها المهزومة من كد مانهزمت بيها امان
المهم لاتنسون التصويت
واترقبوا النهاية

-منة الله الأيوبي.