أمان

البارت السابع

وكعنا بيها خلاص ساعة السودة يوم ماوافقت على افكارج يا علياء وينج وينج لخاطر الانبياااء
ايدي بعد ماتلزم شغل
المشكلة جنت خايفة عليها مو خايفة على شي
اخاف ياذيها لو يسويلها شي ...
شلت المكناسة ولميت شوية من الوصخ ونزلت سويت روحي حتى عود داذبه بس اني اريد اشوف الوضع جوا
ماشوف الا بوجهي ضرغام توه طالع من الحمام وبيده المنشفة يمسح
ابتسملي:- ها ابوية شمصعدج انتي تنظفين؟
كمت اتلعثم كلبي رجف:- ها شنو لا عادي
مابيها شي ..
عكد حواجبه:- شمالج
هزيت براسي:- مابيه شي
عفته وطلعت عالسريع لبرا المطبخ على اساس اذب الوصخ بالحاوية
اتسحبت شوي شوي وفتحت باب البرا
اباوع يمين يسار بس اريد اللمحها
شفت وحده جايه تمشي بس بطيييييء
ركزت زين اي والله هاي علياء
اشرتلها بيدي تعالي عالسريع
اجت:- هاي وينج ضرغام اجا
جانت داتلهث:- كولي والله
امان:- والله بس بعد محد حس بشي استعجلي
نزعت العباية والشال وهي ترجف من الركض
خلتهم بهدومها وسوت روحها مبهذله من التنظيف
طبينا لمحت ضرغام جان ديصلي بالصالة وكفت مثل الحاجز علما عبرت هي للسطح والبنات كل وحده بمكان محد انتبه على شي الف الحمدلله
..ركض صعدت وراها
لكيتها كاعدة عالجرباية وتصفن بالكاع
كعدت يمها ارتاح من الركضة والخوفة
يمة حيلي انهد ..
سحبت الصندوك نفسه مالقبل شوية وسحبت الصورة
امان:- علياء هاي منو
ماجاوبتني ..باوعت عليها صافنة بعدها على نفس الحطة وطافية
..تقربت منها
امان:- شبيج علياء ..شصار صار شي يضوجج؟
باوعتلي عيونها مدمعة:- مظفر اهله يريدون يزوجوه
امان:- اي شكو بيها ..خلي يكللهم عليج ويجون مادام يريدون يزوجوه
علياء:- لا اهله ولا اهلي راح يقبلون ..هو مو نفس طائفتي مو كتلج
امان:- لو يحبج يصر عليج
باوعتلي:- امان ماريد ياخذ غيري
ضربت على رجلها احاول اشاقيها:- ديشاقيج يشوفج شتسوين ..لو هو صدك جان هسه المنطقة كلها عرفت واولهم انتو
علياء:- شلون راح نعرف
لا يمة تختلط ويه الجيران ولا ضرغام صديق واحد المنهم
اباوعلها تحجي وعيونها مدمعه
امان:- زين لاتقهرين روحج هسه ..الكاتبة ربج راح يصير
خلت ايديها على وجها وبجت
علياء:- ماتحمل والله ماتحمل ..كطعة من رويحتي صار
امان:- ان شاء الله ربي يجمعكم سوا
مسحت دموعها وهديتها شوي
بقيت حايصة رجعت قربت الصورة وكتلها:- ماكتيلي منو هاي
باوعت للصورة وكالت:- ايمان
امان:- ومنو هاي
علياء:- اختي
امان:- ووينها ولا مرة سمعتكم جبتو بطاريها
علياء:- توفت بحادثة مانجيب بطاريها حتى لا يمة تنقهر
امان:- اووووي الله يرحمها ..زين شوكت صار هالشي يعني توفت
صفنت شوية بعدين تذكرت كالت:- يمكن اتوقع كبل مايجيبج ضرغام عدنا بشهر هيجي شي
بقيت اباوع عليها ..على غفلا كالت:- تشبهج جثير
امان:- صدك؟
علياء:- اي والله حتى ضرغام اجانه فرحان يكول لكيت شبيهة ايمان حيل من اجيتينا
مثل الصاعقة واجت فوك راسي بعد هاي جملتها
طلع معتبرني اخته يعني ومبقيني يمهم علمود شبيهة اخته بس!!!!
يعني نظراته ..حركاته وياي
تصرفاته مساعدته
كلها لان اشبه اخته؟ ....
..احس شي بداخلي انقهر
ضجت ..
يعني شجنتي متصورة مثلا !!!
معتبرني اخته لعد ..اي شكو بيها
يعني معتبرني ايمان ..مو امان!!
عادي ....
اجت الدمعك بطرف عيني
مادري ليش انقهرت لهالدرجة
باوعت على علياء:- علياء راسي كام يوجعني خلي ننزل
علياء:- اي بس نكللهم نظفناه
هزيت براسي لميت الغراض عالسريع وياها
اختنكت كلش وهم جانت حاره
كملنا ونزلت وهم صار بوجهي ضرغام
راسا نزلت راسي ماريد اباوعله
ضرغام:- شو تنزلين من فوك شكولج مخربط ..شمالج بوية جاي تجاهدين فوك
امان:- مابيه شي
عبرت بسرعة وطبيت للحمامات اغسل
اختنكت احس نفسي وريت ..
على شنو ضجتي خاتون؟
هو اصلا وجودي هنا سنة واروح ...عادي خلي يعتبرني اخته
اني هم ماعندي اخ جبير وضرغام صار مثل اخو....
ياربيييي استغفر الله ماداكدر انطقها شبيه
غسلت وطلعت بوجهي للغرفة تمددت بفراشي ومادري شون اخذتني النومة ...
للعصر فزيت على اصواتهم جايه من الصالة يسولفون
الحلو بيهم جانوا يتجمعون هواي سوا ..هالشي جان غريب علية
لان ولا مرة ببيتنا تجمعنا كلنا كعدنا نسولف عدا الغدة
تعدلت ولميت شعري وطلعت واول ماطبيت يمهم وكعت عيني بعين ضرغام جان منتجي بصفحة
ام ضرغام:- تعاي يمة ايمان جنبي
كلنا باوعنا عليها ..ضربت بايدها على كصتها وكالت:- يوووه نسيت ..العفو اقصد امان
رحت يمها وبستها من راسها وهمستلها:- ماكو فرق ليش انتي ماتعتبريني بنتج الخامسة؟
مسحت على شعري:- الله يحفظج يا يمة ويطول بعمرج
سكتت شوية ورجعت كالت:- ششفت منها واني بيدي زفيتها للكبور
حجتها وخلت شيلتها على عيونها
ضرغام:- لا اله الا الله ..هسه وكتها تفتحون هالسالفة
ام ضرغام:- من دخلت امان لهالبيت واني كليبي برد من غياب اخيتك
نبا:- اسم الله الرحمن يمة لتفاولين عالبت
كلهم حسيتهم انقهروا وعيونهم دمعت عدا ضرغام راسا نزل راسه
...بقينا كاعدين ونسولف
سوالفهم دافية وحلوة
بس اباوع على علياء بغيييير عالم
صافنة وساكته اذا ابتسمت كوه زين ...
صار الليل وكاموا يسوون العشا
طلبت مني نبا اجيبلها المنشفة مالمطبخ ناشريها بالحديقة
طلعت واول مرة ادخل حديقتهم
جانت مرتبه نوعًا ما و جبيرة وبنصها مرجوحة بس قديمة كلش بحيث حديدها مزنجر
اباوع عالاشجار ..الجو بيها يرد الروح
وريحة النبات
سحبت نفس اريد يدخل الهوى لنص ريتي كد ماعاجبني ...
فزيت على احد خلفي راسا نداريت
لكيته ضرغام ردت اعبر راسا وكف بوجهي
باوعتله ..
ضرغام:- صاير شي؟
امان:- شي مثل شنو؟
ضرغام:- ماعرف جي اني داسالج
نزلت راسي وهزيته بمعنى لا
ردت هم اعبر وكف بوجهي:- عيونج تتهرب
امان:- وليش حتى تتهرب؟
ضرغام:- اني اريد اعرف هالشي
باوعتله:- لا ..ماكو شي وهاي عيوني
صفنا واحد بالثاني
عيونه بعيون بعض لدرجة اول مرة تصير
او يمكن صايرة هواي بس هاي اول مرة هيج تركيزنا يكون ويه بعض وبعيون بعض اكثر من كل مرة ...
للحظات او يمكن طالت المدة
عيونه ابتسمت حسيتها ...راسا وخرتها
وعبرت من يما بسرعة
سمعته ضحك وكال:- كاعدلج ..باجر ماطلع بكل مكان اذا ماعرف شمالج
ابتسمت بيني وبين روحي وطبيت بسرعة
مر باقي اليوم بشكل عادي ..بس الكل حس على علياء بيها شي
خفت تفضح نفسها بنفسها
جانت كلش مو طبيعية ..وبداخلي شكد حاسه بيها!
..ثاني يوم
بعد ماخلصنا الغدة وكملنا دنظيف كالوا نطلع نكعد بالحديقة جانت مو الشمس عليها بسبب الاشجار ف بيها فيّ هواي
والصراحة جانت فكرتي هاي جانت عاجبتني الحديقة بشكل وكعداتها
ضرغام جان موجود صدك ماطلع باي مكان كال عطلة
بس بقيت على موقفي وياه ..
حسيتني اريد انسحب شوية كافي ذابة روحي وياه
بس هو يحاول يضحكني لو يشاقيني لو يضوجني حتى يشوف اي ردة فعل مني
جان جايب سلم من بيت الجيران وديحاول يسوي ظلية بالشجرة مالعنب باوراقها ديحاول يعلكهم بطريقة تخليها تصير فوكانا مثل الظل
ف اجيت دافرش فراش نكعد علية وهو توه نزل من السلم
صار يمي ..حسيته ديباوعلي
كال:- ها شرايج شلون صارت
باوعت عليها وحجيت من طارف خشمي بدون ما اباوعله:- زينة
ضرغام:- زين ماكو عاشت ايدك ..شي شياتين
ماباوعتله
صاحت سهير من جوا:- ضرغام يمة دكول اذا خلصت السلم روح رجعه للجيران لاتبقيه يمنا
ضرغام:- حاضر
سهير:- هالحزه
ضرغام:- ابويه اي اي
رجع باوعلي ولم السلم شاله
اجا تقرب يمي:- رايح ارجعه
هزيتله براسي ب اي بدون ماباوعتله
ضرغام:- شايله على ضهري ورايح ..راح ضهري ينكسر
امان:- مايصيرلك شي
ضرغام:- مو خاف اني وبالطريق مانتبه اندعم ..ماناوية دكليلي شمالج قبل لا اموت
امان:- هم مايصيرلك شي
ضرغام:- حادث ويصير بعد تدخلين بقدر ربج
باوعتله:- شتريد
ابتسم:- فد اسم الله عليك شي ..بيه ولا بيك
امان:- يمةةة واني شعلية
ضرغام:- وحمةةة هي جملة قابل من صدك
ضربت على جتفه خفيف:- مايصيرلك شي
حجيتها وعبرت ردت اطب
صاح:- ذنبي بركبتج ..عود اذا متت كولي مات وماكتله شمالني متسودنه عليه ومنزلة الچينكو بوجهي
ضحكت وطبيت ركض ..دخيل الله هالانسان شكد غريب !
...طلعنا كلنا كعدنا وهاي اللي حضرت الحلويات وهاي الجايات وحب شمس وجبوسه
وجبنا كرسي للحجية لان ماتكدر هواي تكعد بالكاع
جان الترتيب علية وصار كلش حلو
..تونا اجينا نكعد بعد بسم الله
مانشوف الا يندفس الباب البرا بقوة
بحيث فزينا فزة انشلنا من مكانة ونركعنا
طب ضرغام محتقن ..وجهه بنفسجي من العصبية
باوعلنا ورجع ركض طب متوجه لغرفة البنات وعاط
ضرغام:- وج حيوانة علياااااااء
كمنا ركض كلنا وراه بحيث بس نريد نلحكه
وكفنا بوجهه
نبا:- شمالك ضرغام شني الصاير
ضرغام:- ذيج القندرة تحتاج تربية من اول وجديد
يريد يهجم عالغرفة واحنا واكفين بوجهه
ام ضرغام:- بس فهمنا شصاااير وشمسوية هالمصكوعة
ضرغام:- اني اعلمج يا اتبسزز يا حيوانة ولج انييييي تجيني وحده بكد القندرة تنزل راسي بين العالم
ام ضرغام:- شصاااير ولك شمسوية
باوعلها:- بنيتج الحيوانة طالعة ويه مظفر الجلب
كلهم خنسوا ..خليت ايدي على كلبي
شون عرف؟؟؟؟...كمت ارجف اريد بس افتهم منا
نبا:- منهو الكالك ياضرغام معقولة علياء تسوي هيجي
ضرغام:- اخوه اجاني يكلي لخاطر الله وليدنا عاقد على بت عمه ويريد يشوف حياته ودربه ..ولكم فشلنييييي يكلي اختك طالعة ويه اخوي
ولج ليييش ليش تنزلين راسي بين الوادم ليييش شمسويييلج
شمسويلج بت القندرة
زلمة يتزوج شتريدين منا بعد يا بلا كرامة
هجم يريد بس يوصللها ويطب للغرفة كلنا واكفين بوجهه وندفع بي
بقيت خانسه من الخوف ماعرف شحجي وشسوي
وجهه جان يخوف بحيث لو يفوت يمها يمكن يخلص عليها خلاص
ضرغام:- طلعي يولي خل اربيج مثل ماجاي تنزلين راسي ..طلعيلييييي
نبا:- ضرغام بسك يا ابوية بس اكعد وخل نتفاهم مو هيجي
ضرغام:- وخري من جدامي نبا
شمقصر وياج اني هيجي تجازيني هااا شمقصر
دفع سهير جانت كدامه ووصل الباب يريد يفتحه روحي انخبصت
بسرعة صرت اني كباله ..
باوعلي عيونه دم:- وخري من وجهي
امان:- ماوخر والله راح تخلص عالبنية شبيييك
عاط باعلى صوته:- داكول وخري من كدااااااامي
هزيت براسي:- ماوخر وشتسوي سوي
عيونه من العصبية ماتنشاف ودمارات كصته وركبته طالعة بحيث احسهم راح ينفجرون بوجهي
ما اشوف الا دفعني دفعة بقوة على صفحة
جان اكو طبلة انركعت بيها على خاصرتي بقوة
بحيث من الوجع بقيت واكعة اريد اكوم بعد ماكدر واللوب بمكاني من الوجع
جتي سهير:- امان صارلج شي كومي شني ياذيج
ماسمع غير صوت صراخات علياء وصوته هو جاي يغلط ويسب بانواع الفشار وصوت نبا وياهم تهدي بي وولا يفيد
اباوع الحجية كاعدة بصفحة وتون
عرفت مالها كلمة عليه ..او يمكن يعرفوه من يتعصب يفقد!
اني واكعة بالكاع وايدي على خاصرتي موتتني وسهير يمي تبجي وتقرض باضافيرها
البيت انكلب صراخات يمكن وصل صوتهم لسابع جار
كامت تون الحجية بس اسمع دكول:- ابوية عليك الله هد البت ..يول ضرغاااام لاتموت اخيتك بيدك ابويه انت
كاموا سهير ونبا عليه بالكوه سحبوها من بين ايديه ودخلوها لغرفة الحجية
طلع هو من البيت بعد ما نهد من التعب
زحفت للغرفة اريد اشوف شمسوي بيها
مامبقي شي على حاله ..حتى باب الكنتور مكسور الظاهر كافخها بي او الله يدري شمسوي
اسمعها تبجي وتون وونتها تبجي الصخر
كمت يمها بالكوة ..ماعرف شحجي حتى المواساة بهيج وضع ماتفيد
صايرة زركة والشعر منتف ...
اجت الحجية من الباب وكفت
ام ضرغام:- ارتاحيتي هالحزه؟ ..ماينلام بيج ضرغام والله
ابو زايد بيج ...لو بيج حظ ماتركضيلي خلف ابن فوزية العورة وهاه قشمرج يالغبرة
قشمرج وباجر زفته وانتي اليوم اندكيتي دكه تسوى عمرج
حجتها وطلعت وهاي كامت تزيد بشهكاتها وكامت تملخ على وجهه ونحنا كوه نهدي بيها
ترجف رجف مو طبيعي بين ايدينا
جان الوضع ماعرف شوصفة بس ياذي من كل الجهات ويكسر الكلب
بقينا يمها هواي اني ونبا لحد ماهدأت ونامت
طلعنا كلنا بالمطبخ
اني طول الوقت لازمه خاصرتي تاذيني
نبا:- ضرغام وينه
سهير:- مادري طلع ومارجع
نبا:- يمة نامت
هزت براسها باي
امان:- حجي عمة جان كلش قاسي عليها
نبا:- تستاهل وابد مو خطية ..لان هايه مو اول مرة تسوي هالسواية
سهير:- هسه هم لو واحد يسوى ..ادري ششافت منا
امان:- مافتهمت زين على ضرغام ..كال باجر عرسه
نبا:- اي زفته واهي ولا تدري طايحة الحظ
باوعت عالساعة نبا ورجعت كالت:- يارب وينه ضرغام بس لا يصيرله قدر من ورا عصبيته
من كالت هيج كلبي وجعني
تذكرت من تعصب علية بالسيارة وردنا نسوي حادث والله خلصنا
انتبهت علية:- امان متاذية؟
امان:- لا مو هواي
سهير:- وين اجتج
امان:- بخاصرتي
نبا:- سودة علية ..انتي صوجك ليش اجيتي وكفتي بوجهه
امان:- خفت على علياء والله
كامت سهير جابتلي قطعة ثلج وانطتني اخليها عليها
سهير:- ضرغام من يتعصب مابعد يشوف شي جدامه ..من هيجي شفتينا انسحبنا لان هو هيجي هيجي جان راح يدخللها
نبا:- نوبة من النوبات اختي الله يرحمها ..عاندته وهو جان متعصب طكها ببوكس ورم وجها شهرين
امان:- يمة الرحمن شدعوة هيج
سهير:- طبيعته من يتعصب يفقد حيل
نبا:- بس والله حنون ..ماكو بطيبة كلبه بالدنيا كلها
احنا ودنحجي اجا طب من برا
ماباوع على اي وحده بينا ولا حجا كلمة ..
طلعنا لمينا الغراض اللي برا
ولا تهنينا بيهم ...
اتذكر قبل ساعات هنا جان يشاقيني وجانت روحه ونفسيته شكد حلوة ..
وكفو يحضرون العشا
البيت هدوووء بس اني والبنات بالمطبخ
نبا:- سهير روحي لضرغام ساليه ياكل شي
سهير:- يمعوده والله اخاف يطكني ماروح
نبا:- دروحي لاتصيرين سخيفة ..خطية من الظهر كلشي ما اكل
باوعتلي وكالت
سهير:- امان فدوة روحي انتي
نبا:- يولي تخافين على روحج وماتختفين لايطك امان انوبه
سهير:- لا ادري ماراح يطكها
باوعتلهم:- اروح اني
نبا:- اذا ماتخافين روحي
امان:- شكله ؟
نبا:- كوليله ماتتعشى
امان:- شوكت
سهير:- ولج هسه شمااالح روحي
من الخوف نثولت
بلعت ريكي وتشجعت رحت
فتحت باب الصالة على كييييفي ..شفته منتجي وضارب عكس عالمخدة ويدخن
كفت بالباب
امان:- ضرغام ..ضرغام
ماكو رد ...تقربت لنص الصالة
امان:- ضرغام ادري بيك كاعد
...ماكو رد
تقربت يما اكثر وكعدت كباله
هزيته خفيف من جتفه ..فز
الظاهر جان نايم
امان:- ضرغام
ضرغام:- ها ابويه ها
امان:- شبيك شو اصيحك ماتجاوب
طفة الجكارة:- شني شرايدة
امان:- كوم سوينا العشة ..كوم اكل ويانه
ضرغام:- ماريد ماشتهي
اباوعله حالته جانت تقهر
حاولت اكعد عدل وايدي على خاصرتي
باوعلي:- اذيتج؟
امان:- اذيت اختك
ضرغام:- عوفج منها ..داسالج انتي
تاذيتي حيل من دفعتج؟
هزيت راسي ب لا
جانت الغرفة ضلمة بس الضو خفيف فايت من الباب اللي خليته شوي مفتوح
ضرغام:- جذابة ..جعل تنكسر ايدي بعد اذا اذيتج
حجاها بهمس تقرب ..وحط ايده بهدووء على خصري
..نبضي احسه وكف
وجسمي تشنج..
..مكرفصة كاعدة بالكاع
همست:- ماتاذيت
تنهد:- الله ياخذني
حجاها وسحب ايده راسا تعدلت
امان:- كوم تعشى
سحب باكيت الجاكير:- ماشتهي والله
امان:- بداعة الله كوم ماعوفك تره
هز براسه بمعنى اي ..ابتسمتله وبقيت بمكاني
انتبه علية عباله رحت
ضرغام:- شني ابويه اكو شي بعد
امان:- لا بس رجلي على رجلك
ضحك ضحكة مخنوكة ..كام وطلعنا ثنينا
طبيت للمطبخ استغربوا
امان:- شكو
نبا:- والله كفو اني كلت راح يرزلج
امان:- منو
سهير:- ضرغام
امان:- اي شبي ..يرزلني؟
سمعته اجا صاح:- لا اله الا الله..كعدي ابويه كعدي
التمينا وكعدنا ناكل بصمت
محد فتح حلكة بكلمة ...
حتى هو ما اكل شي بس شرب كلاص جاي وكام بسرعة طب
نحنا هم كما عزلنا ونظفنا وكلمن دخل بفراشه
علياء نامت بغرفتهم
واني وسهير ونبا فرشنا بغرفة الحجية ونمنا كلنا نتركها بروحها هاليوم 
...اليوم جان نهايته تعب بحيث كلنا بقينا نصافن بالسقف
شصار وشنو عشنا!! ..
...ثاني يوم الصبح مر عادي
روتين طبيعي
ضرغام ماجان بالبيت من اول ماكعدنا
وعلياء بقت بغرفتها ولا طلعت كل شوية اريد ادخللها ويمنعوني نبا وسهير
..للمغرب هيج او قبل المغرب بشوي
جنا كاعدين بالصالة
سمعنا صوت هورنات وهوسه وضرب طلقات
سهير راسا كامت من الشباك تباوع
حجت نبا:- اجا المعرس
سهير:- من لا تهنيت كون
نبا:- ماعلينا ..لاتدعين على احد
ماتحملت ..حسيت اني من يمي غصيت
كمت وطبيت على علياء عرفتها سمعت الصوت
مكرفصه بفراشها ودموعها تنزل بصمت
منظرها جان يكسر كسر ! ...
رحت كعدت يمها ومسحت دموعها
امان:- كافي تاذين روحج
رفعت راسها عيونها صايرين دم من كد ما وارمين
علياء:- كل ضرب واذية ضرغام وحجاية يمة بجفة ..والزفة الجاي تدخل سجاجين بكليبي هالحزه بجفة ثانية
نزلت دموعي وياها
تجر الكلمة جر من كد ما غصتها عمتها
معرف شنو اجاوبها! ..حاسه بكل كلمة كالتها
داحس بالنار اللي بداخلها
شعور مهما كلت عنه قاسي بس ماراح يكون قساوته نقطة ببحر اللي تحسه بوقتها
شنو شخص يتملك داخلك ..بنيت كل لحظة وياه من مستقبلك
فجأة ينهدم كلشي وتشوف هاللحظات اللي بنيتها يعيشها ويه غيرك ! ..
علياء:- الله عليج امان ..بداعة اغلى شخص عندج
بس طلعي للباب ودحكي عالبت الاخذها
بشنو احسن مني؟ ..دحكيلي على نظراتها اله تحبه؟
لو لا ..ريحي كليبي ودحكي نظراته هو فرحان؟
يهواها لو من صدك انجبر عليها ..الله عليج امان الله عليج
حجتها وكامت تشهك
كطعت كلبي ..مسحت دموعها وهزيتلها براسي وكمت طلعت
ماحبيت ينتبهون علية طلعت بدون مايشوفوني
..مديت راسي من الباب
المنطقة متروسة زلم وسيارات وخبصة من خبصة وهذا اللي يركص بنص الشارع وهذا اللي يرمي جكليت وهاي اللي تهلهل مدري تعيط ..
اباوع على الوجوه كلها شون راح اعرف ياهو هو؟
ركزت على واحد مرتب كلش وديركصوه بنص المنطقة
اي اكيد هذا هو ...
نمرد كلبي اكثر على علياء
شنو طب اكللها؟ ..حبيبج فرحان وطاير!
حبيبج نهد حيله بالركص ..حبيبج الفرحة والدنيا ماسايعته!
..الضحكة شاكه حلكه من الصفحة للصفحة!
شنو اكللها وشنو هالموقف اللي وكعت بي !
بقيت بكلبي اردد حسبي الله ونعم الوكيل
حسبي الله بكل واحد يضحك على بنية ..بكل واحد مثل امثاله يعرف تاليه يتزوج حسب ماتختارله امه
ويعوف حبيبته تون الليل عليه ..كل هذا ويسببلها مشاكل ويه اهلها!
بقيت اباوع وادردم ويه نفسي ...
وامد راسي كل شوية اكثر اريد اشوف ست الحسن العروسه
ما اشوف الا بوجهي يجي ضرغام ...
فزيت جني شفت بعبع
ضرغام:- شتسوين هينا
امان:- ها ..منو
ضرغام:- شمطلعج عالبوب
امان:- هيج ماكو شي
جان مخنزر بوجهي وشكله ضايج
ضرغام:- دخلي لجوا عجل
ندار باوع عليهم ورجع دفعني طببني لجوا
سد الباب ...
جان اكو دجة بالطارمة يم الباب
كعد عليها وكام يجر حسرات
وضعه جان ابد مو طبيعي ..لاول مرة اشوفه لهالدرجة مهموم
رحت يما:- شبيك ضرغام
باوعلي وعيونه مليانين قهر ....
...
..
..
للحكاية بقيـــة..

-منة الله الأيوبي.