أمان

البارت العاشر

سكت شوية ورجع كال:- انتي ديري بالج من احلام ..ام زمن
باوعتله بسرعة مستغربه:- احلام منو؟
علي:- طليقة ابو زمن ..وام ابنه
باوعتله مصدمة ..
طليقته؟؟ ..وام ابنه!!
..باوعلي وضحك:- شني ماجنتي تدرين
باوعتله:- لا شووون بس جنت ناسيه اسمها
ماحبيت اسوي نفسي ماعرف ..حتى لو عنده غاية لا احققلهياه
علي:- اي ف ديري بالج منها
امان:- وليش يعني
باوع اتجاه سيارة ضرغام رجع كال:- يعني اكو مشروع تريد ترجع وهيجي ..وضرغام همين يعني يريد
تدرين مهما جان هي الاولى والحب الاول ماينسي
كلبي وجعني ..واحس نفسي صخنت
بس مابينتها ...هزيت براسي بس
فتحلي الباب طبيت وعفته ...انتجيت ضهري عالباب مصدومة
معقولة يعني!
فززتني نبا جتي من المطبخ تركض لابسها حجاب الصلاة
نبا:- روحي عالمخزن بساااع
امان:- شبيج شكو
نبا:- يمة كعدت تصلي الفجر ودخلت للغرفة لكيتج مابيها سالتني كلتلها يمكن بالمخزن
امان:- ها
نبا:- روحي بساااع وسوي روحج نايمة جي عود اخذتج النومة
حجتها ودفعتني باتجاه المخزن ..رحت ركض
جان عتمة بس عالسريع نزعت العباية والحجاب وخليتهم بصفحة
خربطت شعري ونفسي وسمعت صوت الحجية برا
طلعت سويت نفسي داتثاوب
شافتني:- يمة شتسوين هينا
امان:- ها مادري جنت دارسم واشو اخذتني النومة
ام ضرغام:- هم عتمة وهم حر تعاي بوية ضرغام يشوفج شيكول علينا خليتو الفرخة بالمحزن جي حتى تختنك
باوعت لنبا وضحكت ..وجهه جان ينتظرني احجي
انتظرناها تطب لغرفتها وراسا رحنا للصالة
نبا:- احجيلي شفتي ضرغام وينه وشديسوي ليش ماراجع
امان:- احجيلج بس كون ماتحجين لاحد ولا تبينين لضرغام تعرفين شي
هزت براسها وتقربت يمي
امان:- ضرغام متوصب بجتفه بس حسب مايكول جايته شطحة بسبب عملية ماحجالي شنو
ضربت على صدرها:- يمة اسم الله الرحمن اخوية شماله
امان:- بس هو بخير واصلا جان جاي وياي يوصلني بس مو هو ديسوق علي جان
نبا:- كله من خلف هالحيز علي المصايب تلحكه
حجيتلها السالفة كلها بس ماحجيتلها على البيت والوضع اللي شفته هناك حسيت ماله داعي
باوعتلها ..اريد افتح وياها موضوع طليقة ضرغام
بس ترددت خفت لا مايحبون يحجولي او موضوع صارله زمان ومايريدون يرجعون يفتحوه
بقيت اصفن ..زين هو ليش ضام علية!
ولا احد جايب سيره حتى عن ابنه ووينه لعد؟
اتذكر بمرة حوراء صاحته كلتله ابو فلان ..بس ماداتذكر ابو شنو
ياربي اني شون راح اتحمل اصبر وما اسالهم
باوعت لنبا ردت احجي كامت وكالت:- يلا اكوم اصلي وادعيله والله كليبي رايح من وراه لو يمة تدري جان من زمان تاذت
تنهدت وعفتها دخلت انام
...صفنت بالسقف
يعني هسه هو ويه حوراء! ...
زين شنو يحجون؟ ..شيسولفون وهم يضحك ويشاقه وياها
هم يكللها ابوية انتي!
حسيت باحساس مزعج لازمني طول اليوم ...
..مر يومين عاديين بشكل روتيني
ضرغام مخبر الحجية وكايللها انو عنده شغل خارج المحافظة هالايام وتلفونه خربان ف ماكدر يتصل بيها
بس انطانا موعد بعد جم يوم ويجي
...المغرب
جنا كاعدين كلنا بالصالة
هذا الوقت الممل اللي الواحد مايعرف شيسوي بي
بس جان يمهم مو ممل ابد ..نلتم كلنا بفد مكان ونسولف واسمع شقاهم وضحكهم واضحك عليه
مانشوف الا طب ضرغام علينا
نزل عالحجية ويبوس بيها
وكلهم كاموا يسلمون عليه وهاي اللي تحضنه وتبوسه باعتبار صارلهم فترة هواي ماشايفيه
كاعدة بصفحة واباوعلهم ..هو وواكف وياهم عيونه تصد علية كل شوية
كعد يم الحجية جان كدامي ويباوع ويحجي
ام ضرغام:- توه نور الدار بجيتك يابعد نظري وصحتي كلها
ضرغام وعلياء لحد هسه علاقتهم شوي متضررة مو هواي يحجون سوا او يتعاملون ويه بعض من بعد ذيج السالفة
باوعلها ...كام واجا يمها باسها من راسها وحط ايده على جتفها
صدك من كالوا عصبي بس حنون
ضرغام:- شلونك يول علاوي
نزلت راسها:- زينة بشوفت وجهك
حضنته ومادري شون طخت ايدها من مكان اصابته
هو جان لابس جاكيت
غمض عيونه وصاح:- اااخ
كلهم فزوا باوعوله
ام ضرغام:- شمالك ابوية شيوجعك
سكت بس بقى شوي مغمض عيونه حسيت بي توجع كلش
علياء:- شمالك ضرغام اذيتك بشي؟
هز بيده بمعنى ماكو شي
ام ضرغام:- عجل شبيك يولو
راسا كمت وحاولت اغير الموضوع حتى لا يلحون بي
امان:- راح اسوي جاي منو يشرب
افتهمتني نبا:- لكلنا جيبي
باوعتلي وابتسم عرف انو غيرت الموضوع علموده
امان:- بعيني
حجيتها ورحت
جان الشي الوحيد اللي تعلمت اسويه بشكل طيب هو الجاي
لهذا صرت اني اسويلهم ...
اني وواكفة احضر بالاستكانات
ما احس الا يكفخني عطره نداريت اشوفه
ماشوف الا سحبني عليه وحضني
كلبي كام يرجف ...كل اعضائي تخربطت ويه نبضات قلبه ورجعت استقرت من جديد
امان:- ضرغام لحد يشوفنا وخر
ضرغام:- والله لو حضنج هسه بي موتي همين ماوخر
امان:- البنات ...
قاطعني:- اشششش
سكتت وبس صوت دكات كلبي السريعة جاي تنسمع
اكون مرتاحة بشكل مو طبيعي لمن اكون وياه! ...
وخرت ونزلت وجهي احس جاي تطلع منا الحرارة
رفعه بيده وهمسلي:- شلونج ابوية
ابتسمت:- الحمدلله
باوعتله:- انت شون صرت ..شون صار جرحك
يباوعلي بنص عيوني لدرجة يخليني اتلبك وكل وضعي يتخربط
ضرغام:- الحمدلله احسن ..كلشي بيه هسه بخير
هي لحظات واجا براسي راسا حجي علي تذكرته
تحولت معالم وجهي ..دفعته بهدوء من صدره بعدته وكلت:- ضرغام
ضرغام:- حيله كله لضرغام
امان:- اريد احجي بموضوع
ضرغام:- اي واني موافق
امان:- على شنو
ضرغام:- تطلبيني للزواج غير
ضربته خفيف:- لا صدك داحجي
باوعلي طلع جكارة وشغلها وراح كعد عالكرسي
ضرغام:- احجي اسمعج
تلعثمت بالبداية ..ماعرفت شون افتح الموضوع
باوعلي:- دنطقيها عاد ابوية انتي ..شني شمالج صفنتي
امان:- انت جنت متزوج؟
سكت شوية وهو يباوعلي
تقربت عليه:- تره جنت اكدر اسال وحده من البنات واخليهم يحجولي
بس اني ردت اسمع منك انت واعرف الموضوع منك
ابتسم واشرلي عالكرسي اللي كدامه
ضرغام:- دامج ردتي تسمعين مني فـ اكعدي واني احجيلج
سحبت الكرسي وكعدت كدامه
ضرغام:- كبل خمس لو اربع سنين بقت الوالدة الله يحفظها تلح علية اتزوج سنة كامله تركض وراي وتزن براسي
لحد ما كتلها دوريلي وحده وتوكلي ورا يومين هيجي جابتلي احلام مادري منين ويا عرف ..الحرمة ماجان بيها شي وبنت ناس
صار النصيب اول شهر جانت ادمية ويشهد الله جانت معدلة بالبداية ..حملت وتغيرت صارت مادري شلونها عذرتها وكلت بسبب الحمل والتغيير الهرمونات خومو جاهل اني
انرزقت بزمن عالسبع اشهر والكل يعرف هالولادة وهالنوع يحتاجلهم عناية خاصه ماكو منها
هي مارضت يبقى بالخدج مدري شسمه جانت تبجي ودكول اريده جيبوه بحضني بس اني جنت اصبر بيها اكللها يامرة هالجاهل مريض بعده مو متكامل اسمعي هما جم اسبوع ونطلعه ونطلع
ماسمعت الحجاية وبيوم رجعت للبيت شفتها جايه وجايبته معاها اهلها مطلعيهم وكاسرين جلمتي
سكتت وعبرتها ..الله يشهد ماطول عشرين يوم مادري اقل وراح عند ربج
اني جان عندي عقل وطار لان كسروا جلمتي من الاول وابني راح من وراهم ..ومن هينا بدت المشاكل صارت حركاتها غريبة وبارده لحد ماجتني بيوم تطلب الطلاق مادري منو لاعب بعقلها وكايللها سوي هيجي جي حتى رجلج يتمسك بيج ويتوسل بيج ومادري شني
عرفت مشاكلها اللي داتسويها حتى عود شني اتعلق بيها مادري منو ضاحك عليها ..يشهد الله تمسكت بيها بالاول جي مهما جان مريتي بينا احترام بس اصرت على رأيها
ماجذبت خبر هي طلبتها من هينا واني لبيت طلبها من هينا دامها جاهله ماتفيدني هيجي وحده جي ارجع من الدوام مسموط شيب الخلفوني وهي تجيني بهاي تصرفاتها
ورا ماطلكتها بشهرين سمعنا تزوجت من واحد صايع وسرسري
ولحد يومنا هذا مرات الحجية تعتذرلي دكلي اني اذيتك بيها واني والله ماباقي بخاطري غير وليدي الراح مني
يحجي وعيونه منزلهم من عني ..مثبتهم بفد مكان
يحجي ويسحب نفس من الجكارة ..عرفت الموضوع قاهره
تقربت عليه:- الله يرحمه راح طير بالجنة
تنهد وسحب نفس من الجكارة ..باوعتله:- يعني تزوجت احلام؟
هز براسه باي
امان:- يعني ماعندك تواصل وياها او هي تحجي وياك
باوعلي:- لااا استغفر الله ماعايزني الا احاجي وحده على ذمة غيري اصلا من وكتها واني كاطع كلشي ماعرف عنها ولا هي تعرف شي عني
صفنت ..لعد ليش علي يكول خوفج منها
وليش مال ابنه متوفي؟
باوعتله تغيرت شوية معالم وجهه ماردت ازيدها عليه
امان:- هذوا انسى الموضوع الله يعوضك باحسن منا واسفة لان فتحت هالسالفة بس ليش ماحاجي عنها يعني ابد ابد
باوعلي:- شحجي غير شغلة من الماضي بعد صارت وراحت
امان:- اي واذا ..انت مايهمك شنو صار بماضيي
ضرغام:- يهمني شلون مايهمني ..بس ماغصبج تحجيلي
امان:- ليش اني هسه غصبتك تحجيلي؟
ابتسم:- عيونج اليهدن غصبوني
وخرت من يما:- يعني مايهمك ماضيي
ضرغام:- اهووو ول يابة والله يهمني بس ما اجبرج تحجيلي لازم لازم
اني اللي يهمني هالانسانة اللي جدامي هسه ماليه داعي بماضيها
امان:- شعجب ..شخص مثلك يعني تكون عقليته مو هيج ولا يفكر بهالطريقة
ضرغام:- لان اني عاشرت ناس بعدد خصلات شعرج
وكل واحد بيهم جان ماضيه ابيض من الكطن وحاضره ماحجيلج شمسوي بي
والله مو مهم ماضي الشخص لان عادي نحنا بشر نغلط ونتعلم مامعصومين من الغلطة
باوعتله:- يعني لو حجيتلك راح تبقى على هذا رأيك
رفع حاجبه:- ليش شمسويه
نزلت راسي:- حبيت ونخذلت وتقشمر علية من اقرب ناسي
سكت شوية ..رفعت راسي عليه شفته يباوعلي بنظرة مو راضيني بيها
ضرغام:- ها ..حبيتي
ومنو بله هذا
ضحكت:- بغض النظر عن كلشي حجيته انت هسه
بس انتو الزلم هيج ..تريدون تكونون دائمًا الحب الاول بقلب البنية
شغل جكارة ثانية وكال:- عجل انتو شنو تريدون بله
امان:- نحنا نريد دائمًا نكون الحب الاخير ..الختامية اللي مايجي ورانا حب ولا شخص ثاني
ضرغام:- امممم انتي جايه تنطيني مقدمات على مصايبج يولو
ضحكت:- لا وروح امي مامسوية شي ينزل الراس
هز براسه:- احجي احجي هسه وخلصينا ..منو هذا ابو راس
امان:- مايحتاج انت مو هسه كلت مايهمني ماضي الشخص
رفع حاجبه ..تقرب علية وعض على شفته بضوجه
راد يسوي حركة فزيت واني اسمع صوت الجاي يفور وسهير بنفس الوقت تطب علينا
سهير:- هاي ريحة الجاي
راسا سويت نفسي ملتهيه بي:- اي اي هسه صار
ستحيت هواااااي تمنيت الكاع تنشك وتبلعني على هالفشلة
كام اجا يمي سوا روحه ديغسل
همستله:- بعد لا اشوفك ولا تشوفني
ضرغام:- ليش يابة
امان:- تفشلتتت ماشفت شون سهير باوعتلنا
سد المي ..حط ايده على خصري
فزيت ووخرت بسرعة من يما واني اباوعله عيوني تريد تطلع من مكانها من العصبية
ضحك وطلع ...
..ثاني يوم جنا كاعدين اني والبنات بالمطبخ بعد ماخلصنا تنظيف وغسل المواعين
طب ضرغام باوعلنا:- اني طالع يولو ماتحتاجون شي
حجاها وباوعلي
نبا:- وين اخوي عسا ماشر مو بعد وكت لشغلك
ضرغام:- لا مو للشغل علي عنده مراجعة دكتور ورايح معاه
حجاها وراد يطلع كلت:- عنده العافية
باوعلي ورفع حاجبه:- منو؟
امان:- علي
هز براسه وابتسم ابتسامة ضايجة:- الله يعافيج ابوية
طلع ورا لحظات دخل راسا من باب المطبخ وكال:- بس باكيت جكايري نسيته
رادو يكومون البنات اني راسا كمت وكلت:- هسه اني اجيبه
طبيت ركض للصالة جان موجود بمكانه اللي يكعد بيها دائمًا
اخذته وطلعت جان طالع يم باب البرا
ندار علية انطيته اله
ضرغام:- رايح اشوف الجرح
هزيت براسي:- اي توقعت
ابتسم ..تقرب مني:- يوم اللي طلعتي لعلي من اجا هينا
ماهمني انو كسرتي جلمتي بكد ما ضوجتني حجايتج مال خفت عليه
ضحكت:- هاااا ولهذا سويت كل هالهوسه بوكتها
ضرغام:- هي همين لان طلعتي وشافج ..ماجنت اريده يعرف انتي هينا يمي
هزيت براسي واني اباوعله
ضرغام:- اعرف بشني جاي تفكرين ..اي اني اناني وحيل اناني همين
ضحكت:- شحجيت اني
ضرغام:- يعني خاف تفكرين ..اناني واقلب جاهل وكت اللي يتقرب احد من الشي مالتي
ردت احجي فززنا صوت هورن سيارة برا
باوع للباب:- خرب يومك هي هسه وكتك
رجع باوعلي:- يلا طالع اني ساعة واجي اذا احتاجيتي شي دكي علية
حجاها وسحب خدي بحركة خفيفة
طلع وطلعت وراه مديت بس راسي من الباب اشوفه
صعد يم علي وبقى لحظات يحجي وياه ورا شوية قبل لايمشي ندار وكعت عيني بعينه
غمزلي وابتسم ...
..صدفة وكعت عيني على علي مندار وهو هم جاي يباوع بس بنظرة مو مفهومة
اشرلي ضرغام براسه اطب لجوا ..طبيت وسديت الباب
.............
علي:- ماكلت اخذتها يمك
باوعتله:- عليمن
علي:- هاي البنية شني جان اسمها؟ ...اي امان
ضرغام:- شمالها
علي:- اقصد ماكلت انو اخذتها عندك للبيت ..الجماعة لو يعرفون ماراح يرضون بهالشي يا ابو زمن
طلعت جكارة وشغلتها:- مايهمني ..البنية جم يوم وارجعها لهلها والخير البيهم يفتح حلكة معاي ..زين مني بقيتها يمي حتى لاتروح تحجي لاحد عنهم
عرفت ابوها وايده واصله وهسه واسطاته تجيبكم لي يم رجلينه تنعلسون انت والجماعة
علي:- مادري شكلك بس
حجاها ونصى بصوته:- ابوها لو يدري وين جانت اصلا
ضرغام:- لا علي شقصدك ..البنية جبتها لبيتي وويه اهلي ماخذيتها لمكان مشبوه جي لاسمح الله لو شي شداتحجي انت
علي:- لالا اني ماقصد عليك ابو زمن شبيك ..اني اقصد من خطفناها اول ما شفتها
باوعتله:- شتقصد يعني ..وين جانت غير ضايعة
ضحك ضحكة خفيفة:- شضايعة يمعود ..غير جانت طالعة ويه ولد و
ذبيت الجكارة من الجام بعصبية وقاطعته:- لاتلوص بالحجي شجاي تحجي انت
علي:- شبيك غير هاي الحقيقة الشفناها بيها ..خاتله ويه ولد وجايه بمنطقة مقطوعة وبعيدة عن البشر يعني مثلا شداتسوي
اصلا اجيناهم عالاخير نحنا
باوعت كدامي النار صعدت لراسي ..بحيث اللي يكلي كلمة هسه احركه كدامي
..........................
اللتهيت باقي اليوم ويه البنات
جانت العصريات اطيب وقت نطلع نكعد بالحديقة ونبقى نسولف
صار الليل وضرغام مارجع
عبرت من يم الصالة اجيب تلفوني سمعت الحجية داتحجي بالتلفون
ام ضرغام:- اي ابويه براحتك الله وياك
باوعتلها وسويت روحي طبيعية:- هذا ضرغام
ام ضرغام:- اي كال طالع مع علي لاتنتظروني عالعشة
هزيت براسي وطبيت سحبت تلفوني
دكيت عليه اطمئن ..مرة مرتين
فوك الخمس مرات اتصل مايرد اخر مرة فصله بوجهي
شبي هذا!!! ...
عفته احتمال مايريد يجاوبني كدام علي او جماعته ..
يلا على راحته الا مايرجع يتصل
...تعيشنا وخلصنا ومر الوكت
الحجية طبت نامت واني والبنات سهرتنا نطلع بالطارمة نشطفه وننضفه ونفرش نكعد بي
بدا الجو يصير شوي بارد وطيب
نص ساعة هيج طب ضرغام من برا:- السلام عليكم
حجاها وطب بسرعة بدون مايباوع لاي وحده بينا
حتى ماباوعلي ..عرفت بي شي مو طبيعي
حاولت اكون طبيعية بس ماتحملت مرت خمس دقايق كمت وكلتلهم:- اروح للحمام
عليا:- بدربج من تجين اريد مي
هزيت براسي وطبيت ركض
لكيته واكف بالصالة يعدل بروحه شكله هم طالع ماباقي
طبيت تقربت منا
ضرغام:- ضرغام بيك شي؟
باوعت على جتفه مبين شايل اللفاف
قربت ايدي ردت ارفع شوي من ردان التيشرت اشوف الجرح
ماحس الا نتر ايدي نتره قوية وبعصبية وخرها
انصدمت من حركته ..فتحت عيوني على وسعهن:- ممكن تفهمني شكو شبيك
ضرغام:- ماكو شي
حجاها ودفعني بهدوء من كدامه وطلع
ركضت وراه قبل لايطلع لبرا:- الله عليك فهمني شكو
ماهتملي اصلا سحب مفتاح السيارة وطلع ماكدرت اللحكة لبرا لان البنات كاعدات
سحبت كرسي وكعدت اصنف ويه روحي ..
شو جان مابي شي طلع كالب خلقته علية!
اني ادري بروحي مامسويه شي بس خاف مسويه بدون قصد مثلا!
كلبي كام يوجعني لاول مرة هيج يتعامل وياي وهيج يتصرف حتى اول ماشافني جان تعامله غير
...اللي متعود على ها عيوني تأذية كلمة نعم ..
ثاني يوم الصبح كعدت متاخرة
توقعته راجع بس مالكيته ..وحسب ماعرفت جاي متريك بس الصبح ويه اهله وطالع
دكيت عليه من جديد هم مايجاوبني
لا هذا شغلته مو فارغة ..
بقيت الوقت كله افكر شنو مسوية
خاف انزعج مني؟ ...تقربي اله زعجة وممكن حس على نفسه! ..
فكر بيها ان فارق العمر واشياء هواي بينا ماترهم نكون سوا؟
بس اني عمري مافكرت ولا اجا على بالي هالشي
وشمعنى هسه يلا حس بهالشي؟ ...كضيت اليوم كله صفنات وفكرة تاخذني وتجيبني
اخر شي كلت يطبه الف طوب قابل اركض وراه مثلا؟
بس كلبي وجعني! ...
...بدايات المغرب سمعنا صوت الباب
عرفته اجا
طب بوجهه لغرفته بس سلم عالسريع
بقيت كاعدة على نار انتظره يطلع ..
طلع بس مد راسه
شافته الحجية:- يول ضرغام شمالك هيجي مثل اللي مسوي عملة ..جي دكعد دكول شلونكم اهلي
ضرغام:- مستعجل يمة عندي شغل ..محتاجين شي؟
ام ضرغام:- سلامتك وليدي بس غير ماجاي نشوفك هاي جم يوم ..والله بطيت كلبي
ضرغام:- اعذريني يمة ..لاتنتظروني عالعشة ماجي ويمكن باجر همين مارجع للبيت رايح لبيت علي ابقى هيناك عندي شغل
حجاها وتقصدني اسمعها ..تقصد يسمعني رايح لذاك البيت
كمت افووور بمكاني ..هيج لعد مو
حجاها وطلع راسا
...لليل الكل نايم واني لوحدي كاعدة واصفن
اتكلب هيج وهيج عبرت الساعة ١٢ واني بنفس الوضع
مادري شون توها عيني جاي تغفى عيني
وسمعت صوت حركة برا ..تعدلت باوعت البنات كلهم بمكاناتهم
ردت ارجع تذكرت اكيد هو معناها
راسا فزيت وكمت
توني طلعت سمعت صوت باب المطبخ نسد ..هي ركضه لميت شعري عالسريع وطلعت ركض
طلعت لبرا شفت من جوا باب البرا ضو سيارة
فتحت الباب لكيته ديصعد بالسيارة
صحت:- ضرغاااام
باوعلي لحظات ورجع صعد بالسيارة ماهتم
شغلها راد يمشي رحت ركض كبال السيارة
الا شوية جان راح يطخني بسرعة سحب سطاب وكفها
نزل وكف بالباب ويباوعلي
امتن:- ليش وكفت
اشر براسه:- وخري من وجهي مستعجل
امان:- ماوخر واذا تريد امشي
ضرغام:- لاتخليني اصيييح هسه بالشارع
امان:- لا عليك الله تصيح ..امانه تصيح
سكت وكام ينافخ بعصبية واني العصبية صاعدة لراسي من الاساس
امان:- ممكن افهم شبيك انكلبت فجاة
ضرغام:- كصري حسج لا ادفنج بكاعج هينا
رحت يما وركعت باب السيارة بكل قوتي
وكفت كباله واني حمرة من العصبية:- تره هاي مو حاله ..شبيك جاي تتهرب وماتباوع حتى بوجهي ..هاهيه خلصت لعبك؟
باوعلي بسرعة:- لاتلوصين بالحجي وازني كلامج
امان:- لعد فهمني ليش تتهرب مني
ضرغام:- مامتهرب من احد مو جاهل اني اسوي هالتصرفات
كمت اصيح:- لعد شبييييك ..شبيك فهمني
ندار علية:- انتي هينا علمود لاتبلغين على جماعتي وبس
لاتنسين هالشي
باوعتله مصدمة:- شنو صار
سكت لحظات ورجع حجا:- واذا بعدج تريدين ترجعين لعالمج القذر اني موجود اوصلج ....
...
..
..
للحكاية بقيـــة..

-منة الله الأيوبي.