أجاذبك الهوى وأطرب وأغنّي وأبادلك الغرام بكل فنّي

{ ٢ }

( ابها الساعه ٦ صباحا )
فتحت عيونها بصدمه تسمع الدق القوي على الباب تنطق بعصبيه : وجع وجع من ؟
نواف : قومي سنه عشان تقومين بسرعه أبوي يقول ولا بنتاخر عجلي علينا
ريناد بتعب : كم الساعه ؟
نواف : سته الصباح يا فالحه قومي احد ينام لين الحين ووراه سفر حركي
شهقت بصدمه تنطق : ماصليت الفجر وجع محد صحاني المنبه ذا زينه
وقفت بسرعه تتجه للحمام لأجل تأخذ دش سريع وتصلي
تحت
نوره : نواف يمه قومت ريناد ؟
نواف : أي صحيتها
سعود : أمي باقي شي ولا خلاص ؟
نوره : لا خلاص شوف ريناد إذا خلصت
سعود : ابشري
عند ريناد الي توها خلصت مكياجها بعد ماصلت واخذت جوالها وشاحنها تحطها ف الشنطه سمعت دق الباب ترد : نواف وجع وش تبي ؟
سعود : يوجعه قولي آمين وش مسوي لك
ريناد : سعوديي ادخل أحسبك نواف ازعجني
سعود : معليك منه خلصتي ؟ باقي شي أحطه ف السياره
هزت رأسها بالنفي تنطق : لا معد فيه شي بس شنطتي الي فيها جوالي وشاحني
ابتسم: يلا اجل انزلي
_____________
( الرياض صباحا )
نتقدم بموتره يصفه جمب الباب والتفت للي بجمبه  ينطق بحده : قم وصلنا
فتح عيونه بخفه يناظر حوله المكان الي عهده من طفولته بيت جده ارتجل من السياره يتمطط من النوم طول الطريق ينطق : والله خوش نومه ما نمتها من زمان
ابتسم ينطق : نوم العافيه تعال خذ عفشك خلنا ندخل نسلم ونريح عجل ي نايف
هز رأسه ينطق : ابشر
نزلو من السياره متوجهين للبيت وستقبلتهم أصوات الترحيب من مزنه وعيالها تقدم يسلم على راس جدته وابتسم من سمع صوت أمه ترحب فيه من وتنطق : حي الله أميري
تبسم يقبل رأسها وينطق : الله يحيك ياغاليه
تقدم بعدها يقبل راس أبوه وجده ويسلم على أعمامه
وخلفه نايف الي سلم بدوره ودخل يجلس بينهم
_______________
( أبها )
جالسه جمب نافذه السياره ف الخلف مركبه سماعتها وفاكه غطوتها بحكم أنهم بسفر تتمايل مع الاغنيه وتردد وراها قطع انسجامها رنين جوالها ابتسمت تقرا الاسم  بالإنجليزي (❤️My life )
فتحت الخط وثواني حتى وصلها صوتها تنطق : رنودييي وينك من امس ليه ماتردين ؟
ريناد : هههه سوزاني والله راحت علي نومه ماصحيت إلا سته الصباح لا وعلى دق نواف البقره ولا كنت ف سابع نومه
سوزان : إني دريت عادي نوم العافيه حبيبتي مشيتو ؟
ريناد : أيوه
سوزان : بشتاق لك وسلمي لي على الكل هناك
ريناد : ابشري أي أوامر ثانيه انسه سوزان
سوزان : سلامتك حبي إلا وجيبي لي هديه معك ونتي جايه
ضحكت تنطق : ماطلبتي شي مع انك قطعتي روقاني
سوزان : اسفين يلا اقفل أمي تناديني وأنتي كملي روقان
ريناد : يلا باي
سوزان : باي
تسكر الخط والتفتت ريناد لصوت أبوها الي نطق : وش تبين فطور يا رنوده
ريناد: امممم ساندويش
سعود : لا كبده
ريناد : لا استغفرالله ما احبها
سعود : اها نسينا انك الكيوت يلا سندويش سندويش ليش لا
نواف : والله سندويش ولا كبده ولا أي شي بسرعه بموت يبه انا ثلاثه لي لوحدي لو سمحت
ريناد : الشكوى لله المشكله انك تأكل الأخضر ويابس ولا يبان فيك كننا مجوعينك امتن شوي
سعود : والله إنها صادقه ثلاثه ولا تبان ماكنه أكل شي
نوره : قولو ماشاءالله لا تصيبون الولد بعين
سعود : ذا العين بتهج منه
ريناد : ههههههه وهو صادق
عبدالله : أص خلاص سعود انزل اطلب وريناد ونواف انزلو البقاله شوفو أمكم وش تبي وعجلو
سعود : بالله يا ريناد خذي لي معك مفرحات
ريناد :ابشر
_____________
( الرياض )
جو يركضون بسرعه ونطقو ف وقت واحد : عمي عبدالله جاييييي
أنغام : صدق تمزحون من قالكم ؟
ناصر: سمعت جدي وابوي يكلمونهم وقال جدي عبدالله جاي
سهام : وناسههههههه اخيرا تصدقون اشتقت لريناد وعمتي نوره مرهههه
دخل علي يبتسم وينطق : يا مناهل عبدالله اخوي وعياله ف الطريق جهزي القهوه الشاهي بيصيفون هنا وعلمي الباقي
ابتسمت مناهل تطلع من المطبخ : ابشر الله يحيهم ، بنتي أنغام نطي عند عمتك شجون وقولي لها
أنغام : لا ارجوك إلا عجوز القريع وبناتها خلي سهام
سهام : دزي روحي أنتي مالي خلق لهم ولا أقولك قولي لنادر وناصر والله يوصلون لهم الخبر عضب ويفقعون قلوبهم
أنغام : فكره ندوري ونصوري حبايبي تعالو أبيكم اسمعو روحو عند عجوز قريع وقولو لها ان عمي عبدالله جاي مع عمتي نوره وعيالهم
نادر : ووش لنا ؟
أنغام : افا هذا وأنا اختكم
ناصر : والله أختنا ولا غيرها وش لنا ؟
أنغام : خلاص بعطيكم شوكلاته
نادر: حلوه تسكتينا بشوكلاته محنا بزران
أنغام : وش تبغون طيب
ناصر : أنا عشره وهو عشره موافقه
أنغام : فلوس
نادر : اجل الشوكلاته حقتك خليها لك
أنغام : طيب بس بشرط
نادر : وش
أنغام : تفقعون قلبهم
ناصر : ماطلبتي شي
أنغام : كفو اخواني
راح ناصر من ورا البيت بحكم ان القصر كبير وكلهم يعيشون ف نفس المكان بس كل واحد له باب خاص دق نادر الباب وابتسم من فتح له كايد
كايد : وش تبي يالفصعون
نادر : وين أمك
كايد : أمي عمتك ورا ما تقول عمتي
نادر وهو يناظر اخوه الي نط من الشباك خلف كايد ينطق : مدري
كايد : هاه ؟
انتبه من نطق واستوعب انه بيخرب خطتهم ورجع يرقعها وينطق أمي تقول عندكم ملح
كايد : أي ادخل ، صبر
التفت ينطق : وش
كايد : وين اخوك
ارتبك ينطق : ف فالبيت
كايد : غريبه أعرفكم ماتفترقون إلا إذ فيه شي
نادر : لا أبوي بيغاه
كايد هو يناظر فيه بستغراب : طيب تعال ، يمه ذا نادر يقول يبي ملح
شجون : وش جابك يا قمله وين اخوك ؟
نادر بداخله : أف وش بالاهم يسألون بيكشفونا
شجون : اعجم تكلم
نادر : مع أبوي
شجون : وش تبي ؟
نادر : ااا ع عمي عبدلله جاي وو أمي تبي ملح
شجون : ليه ماعندكم ملح ؟
نادر : لا
ف الجهه الثانيه
ناصر الي دخل وأخذ علبه الطحين ويثبتها فوق الباب نزل يتجه للمطبخ وشهق بخفه من شاف شجون تمشي للباب وهي بتخرب خطتهم إذا فتحته وقف قدامها واختلعت منه تنطق بعصبيه : جني أنت قبل شوي أنت عند كايد وش جابك هنا
فز ناصر بيتسم إنها ماعرفته بحكم بلابسهم الي نفس بعض وتشابهم الكبير ينطق : خلعتك
شجون : ابعد لا افعص رأسك
ناصر: لا اصبري ، آخذ الفلفل الي اخذه سابقا من المطبخ يرميه عليها ويركض لصاله
وينادي نادر يأشر له بلهروب وفي الجهه الثانيه شجون الي تصيح بسبب الفلفل الي دخل عيونها وفزو بناتها يركضون لها ومسكت أسيل ناصر عشان تضربه وطاحت من رجع نادر ودفها يساعد اخوه يهربون وقبل مايخرجون لمح نادر مروج علي الكنب وسماعه ف أذنها رجع يسحب شعرها بكل ما اوتي من قوه وهرب وفزت تصرخ وتلحقهم يخرجون من الباب  الخلفي وقبل يخرجون سحب نادر الحبل يطيح الطحين فوق راسها وتطيح تصرخ وتشتمهم
ورد عليها ناصر : احسن عشان تصيرين بيضاء
ذا كله وكايد واقف عند الباب مصدوم كيف تحركو الاثنين ولعبو ف البيت لعب ابتسم ينطق بداخله : تستاهلون
__________
( الرياض قصر مقرن )
فتح عيونه بتعب على صوت اخته تنطق : امير يلا قم بيأذن المغرب
امير : يلا يلا
وقف يتجه لدوره المياه يأخذ دش سريع قبل الأذان خرج بعد ربع ساعه
يلبس ثوبه ويتجه للخارج لأجل يصلي جماعه مع الرجال
سحر : امير يمه بعد ما تصلون ادخل عشان تأكل
امير : ابشري
طلع والتفت على نايف الي يناديه يقول : صباح الخير
امير : مساء الخير قصدك قدنا ف الليل ينايف
نايف : امزح وش فيك شادها اسمع
امير : سم
نايف : تخاويني ؟
امير : على وين ؟
نايف : نفر الرياض اشتقت لها ومنها في أغراض تبيها رزان من البقاله وبجيبها
امير : يصير خير نصلي وابشر
نايف : اجل يلا
استوقفهم شاكر الي نطق : على وين ؟
امير : بنروح الرياض تبي معنا ؟
شاكر : ماأقول لا أصلا ماصدقت على الله شفتكم طفش والله
نايف : هههههههه يلا اجل تخاوينا
شاكر : تضحك بعد بلاك ماشفت الي شفته انشبولي روح ود وروح جيب والله يأن الصديق حق البقاله رحمني من كثر ماشافني اركض للبقاله رايح جاي
نايف : هههههههه يلا جاك الفرج
رفعو روسهم على الأذان وتقدمو يمشون للمجلس لأجل يصلون مع الرجال
___________
(الرياض قصر حمدان )
وصلت سيارتهم ونزل عبدالله وخلفه نوره يسمعون ترحيب الجميع بهم
وقبل يسلم على أبوه جته تركض زي الصاروخ ترتمي بحضن جدها تنطق : جدووووو اشتقت لك
نطق حمدان يبتسم : ياعيون جدو أنتي دندني يا رنودتنا وطلباتك أوامر وأنا جدك
التفت عبدالله على سعود ونواف المصدومين ونطق : ذي مو كانت نايمه
رد سعود هو باقي مصدوم : والله كانت نايمه بس من سمعت صوت جدي نطت كنها صاروخ
نطق حمدان : قل ماشاءالله ياولد
سعود : ماشاءالله ماشاءلله
دخلو يسلمون على الباقي وركضت ريناد تسلم على البنات و دخلت تسلم على عمتها مناهل وتسالها : وين البنات ؟
مناهل : فوق روحي لهم
طارت لفوق وهي طالعه تضرب ف غزل الي توها نازله وهي بدورها صرخت من شافتها تنطق : ريناددددد
ابتسمت : غزلي وينك اشتقت لك
غزل : والله وأنا اكثر
حضنو بعض يعبرون عن اشتياقهم
ريناد : وين أنغام وسهام ؟
غزل : بالغرفه يسوون شعورهم
دخلت الغرفه بدون مايحسون ووقفت ورا سهام الي تسوي شعرها حست بأحد ورها ونطقت : غزل عطني البنس
أخذت ريناد البنس تمدها لها وتساعدها تسوي شعرها
ف الجهه الثانيه
أنغام الي طلعت من الحمام وشافت ريناد شهقت بصدمه
والتفتت لها سهام تنطق : وش فيك ؟
مدت يدها تأشر على الواقفه تمسك شعر سهام ولفت سهام تناظر وصارخت من شافت ريناد
ضحكت ريناد تقول : حرام عليكم شايفين جني
حضنتها أنغام تنطق : لا والله بس صدمتينا اشتقت لك مره
سهام وأنا بعد وخري شوي بحضنها لاتصيرين أنانيه
حضنتها وابعدت تنطق : يلا دامك بديتي كملي جميلك وساعدني أخلص شعري
ابتسمت تنطق : على خشمي لفي
خلصو ونزلو تحت وبدو البنات يسلمون على عمتهم ونطو نادر وناصر على ريناد يحضنونها ونطقت ببتسامه تكاد تشق وجهها : أشقت لكم
ونطقو بعدها بصوت واحد : اكثر
تقدمت مناهل تضحك وتقول : ابعدو عن البنت خنقتوها
ضحكت وصارخت سهام فيهم وهربو يطلعون برا
جلسو كلهم يسولفون ويضحكون ونقطع ضحكهم من دخلت شجون وقامت نوره ومناهل يسلمون عليها هزت سهام كتف ريناد المندمجه مع سوالف أنغام تنطق : جت عجوز قريع وبناتها وانفجرت ريناد تضحك
وسكتت من شافت نظرات أمها تهمس : ابلش نكبتيني ياسهام
سهام بصوت خفيف: وش دخلني إنتي ضحكتي
ونطقت نوره : ريناد تعالي سلمي على عمتك وبناتها
فتحت عيونها بصدمه تهمس : لا تكفين
قامت تسلم عليها ومدت يدها تسلم على أسيل ومروج الي تجاهلوها وراحو وعصبت غزل من حركتهم تمد رجلها ف طريقهم وطاحت أسيل تنطق : وجع عميا
غزل : اسفه ماشفتك
ضحكت ريناد من حركتها ورجعت تجلس جمبهم وتقول : احبك ي غزل بردتي خاطري
نطقت أنغام : وخاطرنا كلنا
سهام : جوهم خايس شرايكم نطلع برا نلعب جاكارو
ريناد : ناويه الخساره
سهام : لا ياحبي مو كل مره اخسر
أنغام : وتنهزم وتشخصنها ساعتين وترجع ترضى
سهام : لا مابخسر ذي المره
غزل : يلا اروح أجيبها
طلعو للحوش يجلسون ف الجلسه الخارجيه خلف النخيل يسولفون على ماتجي غزل والتفتت أنغام على الظل الواقف ورا الشجره وشهقت تتغطى ف ريناد من لمحت اخوها  لفت ريناد لها تنطق : وش فيك ؟
أنغام : اخوك روا الشجر
لفت ريناد تنطق : من ؟
نواف : أنا
قامت وأنغام باقي تتغطى فيها ونطقت : أنغام أنتي نص لله ونص لعباد الله مغطيه وجهك وجسمك برا على أساس ماشافك الحين
أنغام :انقلعي ذا الي لحقت أغطيه معدين اخوك اللي طلع من العدم قليل أدب
ريناد : أتفق انه قليل أدب ههههه
قربت له تنطق : نعم وش تبي ؟
نواف : جوعان أبي آكل أزرفي لي معجنات ولا حلا أي شي
شهقت ريناد تنطق : يويلي والي أكلته ف السياره وش مسرع جعت الثلاثه السندوتشات الي الصباح والبطاطس والحلويات و الجلكسي حقتي والتوكس حق سعود كل ماشفت شي أكلته ولك وجه تقول جايع
نواف : تكفين والله جوعان
ريناد : اففففف طيب اصبر
مشت تدخل وشافت غزل تمشي بالعبه تنطق : غزلي قولي للبنات أني معد بلعب معهم بروح ادور أكل للمشفوح حقنا
ضحكت تهز رأسها من فهمت أنها تقصد اخوها وتحركت للبنات تقولهم إنها معد بتلعب معهم
دخلت للمطبخ وابتسمت من شافت صحن ورق العنب تنطق : عمه مناهل ممكن أخذ ذا للمشفوح نواف يقول جيعان
مناهل : بروحي عنه خذي ذا برضو عطيه
ريناد : والله مايستاهل
وتوجعت للخارج تناديه وتقول : نواف خذ ولا أسمعك تقول جوعان نحرتك
اشر على خشمه ينطق : ابشري ياحلوه
ريناد : أي عشان بطنك وليته يبان
رجعت تجلس معهم تراقب البنات وهم يلعبون

"نهايه البارت أتمنى يعجبكم ملاحضه:أنا كاتبه مبتدئه وذي اول روايه لي طبعا كتبتها مساعده بنت خالتي وذا شفتو هبد ف معليكم لان اول مره اكتب ادعموني عشان أتحفز وانزل لكم باقي البارتات وشكرا ❤️🙈