( في الليل قصر حمدان )
الجد حمدان: تجهزو بكره بنروح البر وفيه مفاجأة
ريناد : جدو تكفى قولي لي وشهي المفاجأة ولمين
الجد : سر بعدين تشوفين
ريناد : طيب لمح كذا شوي بس
الجد : لا مافيه بعدين غريبه ما سويتي قهوتك اليوم ذيك سقتين مدري شسمها
ريناد وهي ميته ضحك تنطق: لا جدو مو كذا اسمها V60
نواف : اقول مامعك إلا سقتين بعدين حاصل لك جدي بنفسه يسألك عن قهوتك اذلفي بس
ريناد : جدي شوفه قاعد يعاندني
الجد : إقول إلا رنودتي بعدين قم قم يالجوعان انت ما منك فايده
ريناد بهمس لنواف: انننن موت حره وسوت له كذا 😝 ههههههههه
نواف : جدي والله شكلك ما تدري ذي تس تس تسوي المصيبه وتطلع نفسها مثل الشعرة بين العجينه
الجد : أقول قومو نامو بكره بصحيكم من الصباح
( الصباح )
الجد حمدان : يلا ياولد قم انت وهو
سعود : جدي تو الناس الساعه ٢ الظهر مين يصحى ذا الوقت
الجد : اقول قم لا امحطك بالعقال انت والسلق الي جنبك
نواف اول ما سمع كلمه عقال فز على حيله بسرعه وسحب كايد معه
الجد : كفو والله رح شف الغداء جاهز
نواف : سم ياجدي انت بس قل وانا حاضر
دخل نواف المطبخ وشاف أخته وأنغام وسهام وغزل وعمته مناهل وامه يجهزون الغداء تنحنح وقال تغطو بشرف على الاكل
همست انعام لريناد : شعنده اخوك مسوي شيف
ضحكت ريناد وكانت تقطع السلطه جا ومد يده بياخذ منها ورفعت ريناد السكين عليه بالتهديد وقالت :والله ان ما ذلفت عن وجهي ان لا ادخله ببطنك
نواف: ان كان فيك خير سويها يابنت عبدالله واخذ خياره وانحاش
ريناد تركض وبيدها السكين : ياورع تعال أنا كم مره قلت لك لا تسوي ذي الحركات معي هين يالجوعان خل احد يعطيك اكل بعدين
نواف حس انه بينكب بعدين وشاف جنبه ورده يابسه اخذها ورجع عند ريناد
أنا اسف يااختي الحنونه الحلوه آخر مره اسويها ومد لها الورده
طالعو فيه البنات وعمته وأمه وفطسو ضحك
مناهل : ريناد لا تصدقينه مصلحه يبي يضبط العلاقه معك عشان تعطينه بعدين
نواف : عمه لا تخربين علينا بعدين أنا اعرف اختي حنونه شوفي كيف بس تجنن بسم الله عليها وحبس ضحكته
ريناد : إذا جبت لي قهوة أنا والبنات برضى غيره ما فيه
نواف : تددلي بس كم عندي ريناد ؟
سمع الجد يهاوش برا وركض وضحكو عليه البنات
سهام : اخوك ذا مهبول مدري على مين طالع
نوره : والله محد مؤنسنا غيره الله يسعده
حطو الاكل وتغدو وبدو يجهزون عشان يروحون البر
__________________
( البر )
عند نايف وامير والمجهول
وصلو البر وقال امير بخبث : إلا اقول نايف ما ودك نذ/بحه الحين هنا بسرعه ونرجع والله مالي خلق وحر وشمس
فهم عليه نايف : اي والله حتى أنا احس اساسا هو كذا كذا مب راضي يعترف خلنا نذ/بحه ونخلي الكلاب يأكلونه ياخذون اجر على الاقل
حس المجهول انه طاح بيدين اشخاص مارح يرحمونه وقال : اء ابي مو يا
امير : انطق واخلص آخر مره اقولك بتقولنا مين ارسلك ولا نخلص عليك؟
نايف : واضح مافيه فايده خلنا نحطه اليله هنا وبكره نسوي الي اتفقنا عليه ويا احنا يا هو
______________
( في قصر الجد حمدان )
عند البنات
سهام : رنود تكفين تعالي سوي لي ميكب ميكبك حلو
ريناد : ابشري بس خلني اوريكم الحين فستاني شرايكم احمر ولا ازرق ؟
سهام : ازرق عشان يموتون العذال
أنغام : لا احمرعشان تطلعين موتن حمر
ريناد : وانتي غزول وش رأيك ؟
غزل : الأحمر لانه لونك المفضل
ريناد : دقايق بس البس واجي احط لسهام ميكب
أنغام : بنات عجوز قريع وبناتها بيجون معنا ؟يارب لا
سهام : للأسف بتجي
غزل : الي اعرفه يكونون العمات طيبين وحلوين بس الظاهر مافيه إلا عمتنا كذا
طلعت ريناد وكلهم لفو يطالعونها ويسمون عليها
أنغام : يمه بسم الله عليك تهبلين ما أقول إلا ياحظ الي بيأخذك
ريناد : ما بآخذ إلا واحد مزيون
سهام : تعالي حطي لي ميكب بس
ريناد : يلا
خلصت تطلع صندوق صغير مكتوب عليه Dior
نطقت سهام : أف ديور مره وحده
ريناد تفتحه وتوريهم : شوفو أسورتي المفضله منحوت عليها حرفي بعد (R)
أنغام : عشتو
خلصو وحطو أغراضهم وحركو على البر ووصلو العصر
بدو يجهزون ويرتبون وكل واحد مشغول بشي
ريناد رفعت صوتها وقالت :عندكم احد بجي
رد فهد :لا تعالي كايد مب فيه راح يضبط الخيمه
جت وكلهم يطالعونها قالت ريناد : بسم الله لايكون شايفين جني
قرب منها فهد وقال: معقوله ذي الملاك اختي ياحظنا والله
نواف : ما انكر انها جميلة وتهبل بس عشان البرتوكول ما يخرب وضحك ينطق : وقال ايش قال ملاك فهد شكل عقلك هناك غسلوه بمرق
ريناد : حاصل لك اقول خلك زي فهودي وسعودي كيف يمدحون مب انت بعدين شفت نفسك تقل كانك بريعصي
ضحك سعود وقال : اف يالتشبيه والله جابتها بنت عبدالله
دخل عليهم الجد حمدان وقال بصوت جهوري تعالو واقربو بقولكم شي تجمعو كلهم وقال اليوم طبعا رح يكون مميز لان بنتي ودلوعتي وحفيدتي رنوده انقبلت بتخصص أحلامها ثانيا الحمدلله الي قر عيونا بشوفتة ولدنا فهد
شجون تهمس ل اسيل : شفتي كيف جحدك يادلخه قلت لك اسمعي كلام امك وخليك قريبه منه بس ماش لا حياة لمن تنادي
بدت الحفله وكان حاطين كيكه بمناسبة قبول ريناد بـ الطب والثانيه بمناسبه رجوع فهد كانو يرقصون وحطو الهدايا بعد ما خلصو وقعدو وبدلو ملابسهم كلهم إلا ريناد بحكم انها كانت تحلل كشختها وتتصور جا عبدالرحمن عند البنات
عبدالرحمن: طفش ما عندكم فعاليات
أنغام : إلا تبي هوت شوكلت ؟
عبدالرحمن : لا تسلمين لي بعدين ذا مو فعاليه عندي لكم خطه بس محد بينفذها إلا ريناد قربو كلهم جنبه ونطقو اي وشهي
عبدالرحمن: مو صح احنا شوي وراجعين خلونا نحلل الكشته وناخذ دبابات وأحصنه بس المشكله ابوي بيعيي
ريناد حطت يدها على صدرها وقالت ازهلوني وراحت لحقوها البنات وعبدالرحمن وتخبو ورا السيارات بحيث يسمعون وش يقول الجد لريناد
دخلت ريناد ومثلت الطفش عليها وقالت : جدو يصير اطلبك طلب
الجد: انتي امري وتدليي
نبي ناخذ دبابات وأحصنه تكفى قل تم
الجد : تم بس خدو واحد من العيال معكم
شجون : يبه وش ذي حركات الاطفال بعدين احنا الحين بنمشي وسوت بوجهه كذا لريناد 🤨
طنشتها ريناد وراحت عند البنات تخصرت وقالت بسرعه كل واحده يدها على جيبها اشوف ابي فلوس لاني قلت له وقال تم بس ما نطول لان بنمشي
استانسو البنات وراحو والعيال معهم كانو حاطين بس الطرحه والعبايه بحكم ان مافيه احد غريب إلا كايد والعامل حق الاحصنه والدباب
فهد : رنود تبين معي دباب ؟
ريناد : لا ابي حصان
نواف كان يناقر العمل ويقول :صديق مره غالي مافيه ديسكاونت
العامل : لا مافي تبقى ولا روه عند واحد تاني
بدو يلعبون و نواف حب يغبر على ريناد بالدباب وهي فوق الحصان تقوله :يازفت ترا والله لو طحت ان ما يصير لك خير وفجاءة الحصان فك وصار يسرع وريناد متمسكه وتنادي عليهم وهم يحسبون انها تعرف له وقاعدين يصورونها ويحطون اغنيه فرس فرس من حسنها وبعد مده حست انها مارح يسمعونها وطيحت نفسها على التراب وكانت تصيح وتتألم وتنادي وبدون ماتنتبه أو تحس انقطعت اسوارتها
سعود شافها من بعيد وطيح الدباب وراح لها يركض : بسم الله عليك شفيك صار لك شي
شاف يدها يطلع منها الدم تنطق : يدييي تعورني
مسكها عشان ماتشوف الدم بحكم أنها تدوخ وتخاف اذا شافته
سعود : شوفي رنوده مافيك شي تعالي تعالي
ريناد وهي تناظر يدها : لا لا فيه دم فيههه
وبدت تدوخ سحبها سعود يمشي فيها وجاه فهد يركض ينطق بخوف : وش فيها
سعود : طاحت ويدها تنزف وشافت الدم داخت
فهد : رنوده حبيبتي لاتخافين الحين يروح مافيك شي أنتي قويه
بدت ريناد تبكي وأخذها فهد يحضنها ويهديها دخلو خيمه الرجال وشافها حمدان وقام يصرخ : وش فيها
سعود : طاحت
عبدالله : كيف طاحت وينكم عنها
سعود : نواف غبر عليها والحصان فك وطاحت
عبدالله : نوافففففف
حط نواف رجله يركض ويقول : والله ما اقصد
لحقه فهد ومسكه ينطق : تعال على وين ؟
رجعه للخيمه ونطقت ريناد بتعب : خلاص خله يبه وجدو مايقصد
نواف : أي تكفون
حمدان : بكره غسيل موتراتنا عليك قم الله لا يهينك من الصباح ودها للمغسله وغسلها كلها
فتح نواف عيونه ينطق : لا لا يجد تكفى إلا المواتر تكفى
فهد : هيا خذ لك تستاهل
خذا الجد ريناد يجلسها بحضنه يمسح على رأسها ويسمي عليها ونادى على فهد يقوله يدخلونها خيمه الحريم
اخذها فهد ونطق من ورا الخيام : بدخل تغطو دخل وحط ريناد وقال لامه إنها طاحت
نوره : بسم الله عليك يمه لا تخافين
وتجمعو عليها البنات تسمون عليها ويمسحون دموعها ولفو على شجون من نطقت : وش ذا الدلع كله جرح وصغير حسستيني انه شي كبير
نطقت غزل بغضب : حتى لو صغير لونه فيك ماقلتي كذا
شجون : شف من يتكلم أقول احترمي نفسك
كانت على وشك ترد عليها لولا مسكت مناهل لها وبعد فتره هدت بطلتنا تناظر فحالها عبايتها تقطعت والطرحه نصها مشقوق وقامو عشان يمشون
انتبهت ريناد ان اسوارتها مب موجوده : بنات شفتو سوراتي
غزل الي كانت على الجوال : لا والله بس امشي الحين بنرجع
ريناد : كيف ارجع اسوارتي ذي غاليه شريتها بدم قلبي ٥٠٠٠ وتبين اخليها بروح اشوف السيارة
غزل : طيب
وما انتبهت لكلامها زين تحسب أنها تقول بتروح تنام ف السياره
راحت ريناد لسياره تدورها ولاكن مالقت شي تقول : اففففف وين ألاقيها الحين صبر صححح لما طحت يمكن انفكت بروح أدور
طلعت تأخذ جوالها تفتح الكشاف وتدور على سوراتها
( خيمة الرجال )
حمدان : يلا يا سعود علمهم أننا بنمشي
طلع سعود ينادي بصوت عالي : أمي يلا يقول جدي خذو عفشكم بنمشي
نوره : يلا يلا
طلعو وجو الرجال يفتحون الخيام ويركبونها السياره ونطق فهد من ماشاف اخته تركب مع البنات يقول : ريناد وينها ؟
ردت غزل الي شافت البطانيات ورا تحسب ريناد نايمه تقول : ريناد نايمه ورا
فهد : تمام
مشو يتوجهون للبيت مشغلين أغاني ويغنون فالينها
( عند ريناد )
الي التهت بالبحث على سوارتها والتفتت وراها وانصدمت من ماشافت احد خافت تنطق : لألا شكلي ضعت
فتحت جوالها تتصل على سعود وزفرت تتذكر أنها فبر ومافيه تغطيه رفعت جوالها الي كان شحنه خمسه لفوق تحاول تلقط شبكه واخيراً بعد ربع ساعه وفوق تله لقت شبكه ونطت لفوق فرحانه تنطق : اخيرا لقيت تغطيه اخيرااااا ولكن يا فرحه ماتمت اول ما ضغطت على رقم سعود طفى الجوال فتحت عيونها بصدمه تشهق : لا لا تكفى أملي الوحيدددد
بلعت ريقها بخوف من سمعت صوت كلاب وذئاب تنطق : ابلش يمههههه واخذت تفك رجلها تركض ماتدري لوين هي تتجه
نهاية البارت اسفه ماقدرت أكمل يدي تعبت بس بحاول اخلص البارت الجاي اليوم وانزله نوقف هنا عشان تتحمسون للجاي ووش رح يصير لبطلتنا اخيرا ادعموني بنجمه وكومنت عشان انزل لكم باقي البارتات وشكرا 🤍🙈
