أجاذبك الهوى وأطرب وأغنّي وأبادلك الغرام بكل فنّي

{ ٧ }

فتحت عيونها تشوف الدنيا مظلمه مسكت جوالها تفتحه تشوف الساعه ٣ الفجر قامت تتوجه للحمام خلصت وتوجهت للمطبخ وقالت : والله يااني جوعانه تقدمت تفتح الثلاجه شمقت من مالقت فيها شي جلست على الكرسي تفكر وتذكرت أنها أخذت أندومي معها لما راحت للبقاله مشت تطلع الغرفه فتحت الباب ودخلت أخذت الاندومي حقها وطلعت للمطبخ تسويه خلصت وفتحت الفريزر ابتسمت من شافت عصير البرتقال أخذته وطلعت للحوش تجلس على المرجيحه حقت الجلسه
حطت الصحن بحظنها وجلست تأكل فتحت جوالها تحط السماعه وتشغل قصص رعب كانت مندمجه مع القصه وتاكل نواف الي كان توه صاحي من النوم وشم ريحه الاندومي طلع يشوفها جالسه تأكل
ابتسم ويمشي بهدوء لين قرب منها ووقف ورها عند ريناد الي حست بأحد واقف وراها وكانت خايفه مد نواف يده وبسرعه أخذت الملعقه تضربها ف جبهته شهق نواف من حركتها وحراره الملعقه شافته ريناد وحطت يدها على قلبها وضحكت تنطق : ههههههه تستأهل طيرت عقلي أحسبك جني
نواف : يخرب بليسك يا شيخه جبهتي جاني ارتجاج ف المخ
رفع رأسه يناظر فيها وفطست ضحك تشوف اثر الملعقه باقي مطبوع فجبهته وقالت بضحك : ههههههه تكفى يانواف صبر ورفعت جوالها تصوره
نواف : اخلصي علي الحين أبي آكل
ريناد وهي ترفع حاجب وتنزل الثاني : سلامات قالو لك فاتحه بوفيه هنا رح رح الله يصلحك
نواف : رنودي تكفين ياعمري أنا ويبوس خدها يااحلا أخت على كوكب الأرض أبي إندومي
ريناد : طيب بس بشرط
نواف : عيوني لك دندني على قولت جدي
ريناد : أبي قهوة بارده وكوكيز
نواف : بس ماطلبتي شي
ريناد : يلا بروح اسوي لك
طلعت تاخد صحنها وجوالها تتجه للمطبخ تذكرت ان مافيه إندومي رجعت تقول
ريناد : نواف مافيه إندومي اسوي لك بيض
نواف : أي شي بسرعه بس بموت وسوي شاهي بعد
رجعت تسوي بيض واخدت علبه الشاهي وتنطق : ويتشرط بعد قال إيش قال سوي شاهي بعد شمقت تحط الكاس وتحط فيه شاهي وسكر وتحط المويه الحاره بعدها أخذت البيض والخبز والشاهي تحطها فصحن كبير وطلعت تقول : امسك خلص وغسلها تسمع بروح انام
نواف : نوم العافيه رنودي
ريناد : أي مدري من وين طلعت المحبه إلا عشان بطنك
دخلت الغرفه تشوف البنات نايمين حطت رأسها على الكرسي تغمض عيونها وتستسلم لنوم
___________
( بيت مقرن )
كان جالس يطقطق بالجوال وقاطعه صوت حنين الي نطقت : امير عطني ملابسك اغسلها
امير : يلا طلع ملابسه من ضمنها فروته رفعها وطاحت منها سواره فضيه منحوت عليه حرف (R) مسكها بستنكار وتذكر انه لقاها مرميه ف الارض لما راحو للبر مسكها لوهله تذكرها كيف كانت خايفه واستنجدت فيه وكيف لما لقاها ف البقاله وانبرت صوتها الي كانت واثقه وكيف كانت تركض تقطع الخط قطع تفكيره صوت حنين الي نادته تنطق : امير عجل
امير وهو يحط السواره بثوبه : يلا يلا
طلع يعطيها الملابس و الفروه وشاف أمه وابوه جالسين يشربون شاهي ويسولفون وقالت سحر : امير يمه تعال اجلس معنا
جلس امير بجمب امه وحنين الي تقدمت تجلس بجمب أبوها تقول : بقول لكم من الحين صديقتي مها عازمتني أنا وامي ورزان وعمتي اماني  على ملكت اختها وبنروح
سحر : أي والله يا عبدالعزيز لازم نروح وخصوصا ان امها تعنت بنفسها ودقت تقولي
عبدالعزيز : تمام ماعندي مانع بس أنا مشغول  امير توديهم ؟
امير : متى ؟
حنين : الخميس
امير : ذا ؟
حنين : ايوه
امير : تمام ماعندي شي
قطع جلستهم صوت شاكر الي ينادي امير وطلع له
امير : سم وش بغيت
شاكر: سم الله عدوك جدي يبغاك
امير : يلا طالع له
طلع يتوجه لمجلس جده وتقدم يسلم جلس ينطق : امرني
مقرن : أبيك تطلع معي  أنت ونايف وشاكر عشان .....
قاطعه نايف : وين ؟
مقرن : نايف بكره الابل عليك
نايف : لا لا والله اسف
امير بهمس له : تستاهل
نايف بنفس الهمس : تعرف تسكت
مقرن وهو يضرب بعصاته : اسمعو بنروح للسوق نساوم على الأبل
نايف : وليه الي موجود كفايه
مقرن وهو يرميه بعصاته وهرب نايف : بيجيب اجلي ذا الولد
امير : ماعليك منه
مقرن : تجهزو  بصحيكم على ٨ الصباح
شاكر: تمام
__________
( قصر حمدان )
صحت على صوت غزل الي تقول : ريناد يلا قومي
ريناد : يلا قايمه كم الساعه ؟
غزل : ٢ الظهر
قامت ريناد تتجه للحمام تأخذ دش وتفرش أسنانها وطلعت ترطب وجهها ونزلت تشوف أمها وعمتها والبنات جالسين على السفره ينتظرونها نزلت تجلس معهم وتاكل وخلصت تتجه لمطبخ تغسل يدينها
طلعت للحوش واستغربت تسمع احد يدق الباب
طلعت تقرب من باب الشارع وتنطق : من
حمدان : افتحي يابنت
ريناد وهي تفتح الباب : طيرت عقلي ياجد وش تسوي وبرا
حمدان وهو ف قمت سعادته : هههه اسف يارنودي
ريناد : ماشاءالله وش سر الابتسامات
حمدان وهو يتصدر المجلس بين عياله وأحفاده : اليوم قابلت صديقي
من أيام الثانوي
سعود : أف أيام الثانوي قول غيرها يا جد تكفى
ريناد : حركات وأنا أقول وش فيه شوي ويطير طلع صديقه
كشوخي جدي موب مثلكم
حمدان : اسمعو ذا صديقي مقرن من أيام الثانوي درسنا سوا وتخرجنا ودخلنا العسكريه سوا
نواف : العببب عز الخوي
حمدان وهو يروي قصتهم المأساويه : كنا نروح سوا وحتى ف المهمات الي كنا نطلع لها كنا سوا بس مره كنت تعبان وطلعت بدري وهو قال انه بياخد مكاني طلعت وجا القائد وعطاه تعليمات لمهمه كان المفروض نطلع لها سوا بس ماحب يشغلني خصوصا أني كنت تعبان وكانت الجوهره الله يرحمها حامل ب عبدالله ( الجوهره زوجه حمدان )
وطلع للمهمه لوحده وطلع العدو محاصره من كل الجهات وقدر الله انه ينصاب فرجله اليمنى بسبب محاولته انه يطلع بأقل خسائر ممكنه وفعلا طلع بأقل الخساير بس انه ماقدر يكمل وتقاعد من العسكريه ولما سالت عنه قالو انه طلع حاولت بكل الطرق أني أوصل له بس ماقدرت
بعدين عرفت انه تزوج ومعه عيال والحمدلله الي قدر إني أقابله اليوم ولا أوصف لكم فرحتي وفرحته يوم تقابلنا شفته وشفت احفاده المهم إني عازمه بكره عندنا وبلغتكم وذا ضيف خاص وغالي عندي عشان كذا يا فهد خذ اخوانك وروحو لسوق الغنم نبي نذبح له
فهد : ابشر قومو أنت وياه ونادو كايد معكم
ريناد : والله ياجد ان قصته تحزن عز الخوي وربي لا تفرط فيه
حمدان : ماني بمفرط وقومي علمي الحريم
ريناد وهي تضرب له تحيه : ابشر على ذا الخشم
ضحكو وتقدم عبدالله يقبل راس أبوه وينطق : يلا أنا استأذنكم
عبدالرحمن: وين ؟
عبدالله : بروح مع العيال لسوق لا يسودون وجيهنا عند الرجال
ضحك علي ينطق : وأنا معك
حمدان : الله معكم
عند ريناد الي دخلت تبلغ هم ان جدها عازم خويه بكره
وبدت تحكي لهم قصته وقالت أنغام : والله يا انه يحزن صدق رحمته
غزل : صدق الله يرحمه
طارت عيونهم  سهام : وش الله يرحمه ما مات الرجال
ريناد وهي ميته ضحك : تكفيننن إلاستيعاب عند غزل
غزل : ههههه احسبه مات
ريناد : أص اص  لا يسمعك جدي
سهام : بنات ملكت مرام بكره
ريناد : يوههه صدق كنت بنسى
أنغام : قومو نجهز
عشان بكره مايكون علينا شي
ريناد : بس بكره جدي عازم صديقه كيف بنروح
أنغام : صح صدق كيف
نوره : نسوي لهم عشاهم ونطلع
سهام : لا بتثبت فينا ريحت اللحم
غزل : أي صدق
مناهل تمام نسوي بدري وانتو ساعدونا بعدين البسو
ريناد : الشكوى لله امشو
____________
( بيت مقرن )
دخل بيته فرحان والابتسامه شاقه وجهه شافته مزنه تنطق : ماشاءالله وش بلاك تتبسم
مقرن : تذكرين صديقي حمدان الي كلمتك عنه
مزنه : وش بلاه
مقرن : قابلته اليوم وعازمني عنده
مزنه وهي تبتسم : الله يديمكم
مقرن : بلغي الجميع نبي نروح لهم بكره
مزنه : والله ودي يا مقرن بس صديقه حنين ورزان دقو وعازمينا على ملكت بنتهم
مقرن : افا
مزنه : معليه خذ عيالك وعيالهم وروحو
مقرن : وهي شكلها كذا
ابتسمت مزنه تقول : جيعان تبي أكل
مقرن : تسلمين
قام يتجه للمجلس وشاف نايف الي كان جالس عند الأبل ينطق : نايف
نايف : سم ياجد
مقرن : سم الله عدوك اسمع رح ناد أبوك وعمانك وامير وشاكر
نايف : أف كلهم وش المناسبه
مقرن بحده : نايف
فز نايف يتجه لبيتهم ينادي أبوه
نايف : يبه جدي يبيك
وطلع ينادي امير وشاكر وباقي عمانه
دخلو المجلس وجلسو حوالي ابوهم
ونطق مقرن : بكره بأذن الله بنروح عند صديقي حمدان عازمنا
نايف : العب وصديق بعد عاش جدي عاش
عبدالعزيز : ذا صديقك الي قلت لي عنه ذاك اليوم
مقرن : أي هو
صقر : نعم الصديق والله الله يديمكم
عند امير الي كان الاسم مالوف له وتذكر لما قلت له بنت عبدالله حمدان
هز رأسه بالنفي ويناظر ف نايف وشاكر الي كان الفضول قاتلهم يبون يعرفون من هو
نايف : جد قول لنا من هو صديقك ذا
مقرن : صديقي من أيام الثانوي
طارت عيون نايف وشاكر ينطقون ف وقت واحد : الثانوي
نايف : قبل لا انولد حتى
شاكر : ما مات
طارت عيون مقرن من كلام شاكر يرميه بالعصى : فال الله ولا فالك قم قم انقلع
ضحك نايف وقال : يلا أنا اسأذنكم بروح أريح
تبعه امير وبعده بدو كلهم ينسحبون وكل واحد راح لبيته
_________
( قصر حمدان )
كانت جالسه ف الحوش فاتحه لابتوبها تدق على صديقتها فيس تايم
ردت وهي جالسه على الكرسي وبيدها املابس ولفت للايباد حقها تنطق : رنود شوفي ذا ولا ذا
ريناد : سوز وش وش تسوين
سوزان : ريناد شوفي اول يوم البس ذا ولا ذا
ريناد : انقبلتي صح
سوزان : صح
ريناد : متأخره بس مبروك
سوزان : يبارك فيك ومبروك لك مره ثانيه بعد
ريناد : أي صح أنا زعلانه ماكلفتي نفسك تدقين علي تباركين لي
سوزان : هاااا شف شف من يتكلم على الأقل أرسلت لك وباركت أنا الي الفروض ازعل رحتي الرياض نسيتي علمي ماكنك الي كل يوم كنتي تدقين علي عشان أجيك ولا تجيني ولا نطلع برا
ريناد : اسفه انشغلت وايييي صح معي لك جدوللللل سوالف كثير
عدلت سوزان جلستها تنطق : اسلمي وش عاد أنتي يوم واحد ما شفتك يصير اكشن
ريناد : ماتصلح هنا إذا رجعنا انشاءالله نتقابل واقولك
سوزان : مع ان الفضول قاتلني بس تمام
ريناد : وأي كيفك وش اخبارك كيف خالتي فاطمه واختك شهد وتوته
سوزان : كلنا تمام الحمدالله
ريناد : الحمدلله تخيلي بكره بنروح ملكه أخت صديقه سهام
سوزان : الله وناسه ودي فزواج والله
ريناد : من ماسك تزوجي عشان ارقص لك وأنا باقي قويه
سوزان : لا تزوجي أنتي وبعدين عشان ارقص لك أنا
ضحكو وقالت سوزان : رنود بقفل أبوي جا
ريناد : يلا حبي باي
سوزان : باي
قفلت ترفع الابتوب حقها تتجه للغرفه دخلت تشوف البنات جالسين يتابعون فلم وقالت :ماشاءالله وش تتابعون
سهام : تعالي توه نزل جديد يقولون يجنن
ريناد : يلا جايه فسحو لي
____________
( بيت مقرن )
حط رأسه على المخده يوجه أنظاره لسقف حط يده ف جيبه يطلع منها الاسواره رفعها يناظر فيها ويتذكرها ماكان يعرف ليه بس السواره كانت تذكره فيها أو بالأحرى هي ماكانت تغيب عن باله وخصوصا لما قال الجد أسم حمدان كان يحس بشعور غريب كل ما تذكرها ماعمره فكر او حس بذا الشعور تجاه أي بنت ثانيه كيف أنه ما كان قادر يشيلها من رأسه وكان طيفها يجيه كل ما حاول يتناساها بعد تفكير مطول فيها غمض عيونه يستسلم لنوم
_________
( قصر حمدان )
يوم جديد شرقت فيه الشمس تتسلل لغرفتهم تفتحت عيونها تشوف البنات نايمين قامت تشوف الساعه وتتجه للحمام خلصت تطلع فتحت الشباك وقالت وهي تصفق : يلا يلا خلاص نوم قومو بسرعه
زفرت من مالقت رد تتجه للمكيف وتطفيه قفلت الشباك وطلعت تنزل لتحت دخلت المطبخ تشوف أمها وعمتها يسون الغداء وابتسمت تساعدهم بعد فتره نزلو البنات وقالت سهام : من الي طفى المكيف واخذ الريموت
ريناد : أنا عيتو تقومون
سهام : آخ آخ يا ريناد موب كذا كنت بموت حر
ريناد : مو ذنبي انتو ما قمتو
مناهل : بس تعالو ساعونا اقل شي نزلت تساعدنا مو زيكم
أنغام : أنا بساعدك وش اسوي
نوره : قطعي سلطه
تقدمت أنغام تقطع ومشو غزل وسهام يساعدونهم بالباقي
بعد ما خلصو قالت ريناد : غزل حبي بالله حطي السفره ذي ف مجلس الرجال
هزت غزل رأسها بالإيجاب وتقدمت تاخذ السفره وتتجه للمجلس
حطت السفره وطلعت ترجع للمطبخ وبدو البنات يحطون الغدا وبعدها جلسو يتغدون خلصت ريناد وطلعت تغسل يدها وقالت أنغام : ريناد بالله جيبي المواعين من عند الرجال
هزت راسها وراحت للمجلس شافت نواف وكايد ورجعت من ورا تنطق من ورا الباب : أبي المواعين عجلو
سعود : يلا إنت وياه خلصو
خلصو نواف وكايد وقامو أخذ سعود يرفع السفره والمواعين ويعطي ريناد الي أخذتهم تتوجه فيهم للمطبخ وقالت : الله يعينها الي عليها المواعين
سهام : صدق الله يعينها
ريناد : من الي عليها
أنغام بضحكه : أنتي الله يعينك
ريناد : تستهبلون صح ليه أنا
سهام : لان حنا رفعنا سفرتنا ونظفنا المطبخ
ريناد بتأفف : طيب
دخلت تغسل المواعين وتغني وتمايل خصرها مع الغنيه الي تغنيها
خلصت تتجه لفوق عشان تبدا تتجهز مع البنات
عند الرجال بعد ما ذبحو توجه سعود وقال : يمه
نوره : هلا
سعود : امسكو خلصنا
تقدمت نوره ومناهل يأخذون اللحم والسكاكين يحطونها ويبدون يسوون العشاء عشان يطلعون بعد صلاه العشاء ويروحون لملكه مرام
عند ريناد الي صلت المغرب وقالت : بنات الحين جدي عازم صديقه بجون معه عياله ولا لا ؟ً
سهام : مدري
أنغام : تخيلو يجي معه حريم وحنا طالعين فشله بعدين جدي الله يهداه توقيته غلط
ريناد : يارب مايجون معه حريم يارب
عند الرجال دق الباب نفتح نواف الباب أنصدم يشوهم ونطق : ارحبو حياكم
تقدم حمدان من سمع نواف وقال : حي الله الغالي وعياله تفضلو
مقرن : السلام عليكم
ردو كلهم بعلو اصواتهم يردون السلام وتقدم حمدان يحضن صديقه وتقدمو الرجال يحبون خشيم بعض ويسلمون قرب نواف من كايد ينطق : منهم كثير توقعت صديق جدي بس
كايد : أي والله حتى أنا
دخل سعود يسلم والتفت امير على صوته توسعت عيون سعود ينطق : امير
امير : ارحب
تقدمو يسلمون على بعض ونطق حمدان : تعرفون بعض ؟
سعود : أي ياجد يبه ذا امير الي كلمتك عنه الي ساعدني ذاك اليوم
عبدالله : ونعم مشكور يولدي ماقصرت
امير : افا يعم سعود صديقي ومثل اخوي
جلسو نطق مقرن : عرفنا
حمدان : ابشر ذا ولدي الكبير عبدالله واشر على فهد ونواف وسعود وقال ذولا عياله معه بنت بعد
وذا ولدي الثاني علي ......
عند امير الي من سمع أسم عبدالله بدت نبضات قلبه تتسارع وخصوصا لما قال ومعه بنت بعد تذكرها وتذكر لما قالت له " بنت عبدالله حمدان "
يقول فنفسه : معقوله معقوله هي وساقني القدر لين عند أهلها لا مستحيل كيف فز من مسك سعود كتفه وقال : وش فيك مسرح
امير : فجعتني الله يفجعك
ضحك سعود وقال : وين وصلت بسرحانك
هز امير رأسه بالنفي وقال نايف : عرفنا عنه
امير : نايف ذا سعود وسعود ذا نايف
نايف : بس كذا
مد سعود يده ل نايف ينطق : ولد عمك مايعرف يعرف
نايف : مالت عندك خوي فله ذي ذا ولا علمتني
امير الي كان سرحان مايدري وين الله حاطه
عند البنات كانت جالسه تحط لمساتها الاخيره على المكياج وقفت تشوف شكلها وقالت : بنات شرايكم
غزل : تهبلينننننن بسم الله عليك
سهام : أي وربي ماشاءالله تف تف تف
أنغام : تحفههه الحين يلا سوي لي ميكب
ريناد : يلا اجلسي خفيف صح ؟
أنغام : أي
بدت تسوي لها وخلص أخذت جوالها تنزل تحت تشوف أمها وعمتها الي قاعدين يأخذون صحون العشاء من عند الرجال بعد ماتعشو
وقالت : أساعدكم
مناهل : لا حبيبتي خلصنا أصلا
طلعت للحوش تصور كشختها ف المرايه بحكم ان المرايه طويله ومع النخيل الي خلفها يكون التصوير حلو التفتت للمسجل الي كان على الطاوله واخذته تشبك عليه بلوتوث وتشغل أغنيتها المفضله ( أجاذبك الهوى ) ل طلال مداح
مسكت جوالها تصور وشغلت الاغنيه وبدت تغني معها وتمايل خصرها
جاهله للي كان يناظرها من خلف النخل
عند امير الي خلص وقال : أكرمكم الله أبي اغسل
سعود هو يأكل : المغسله برا ف الحوش اطلع ولف يمين امش شوي قدام تشوفها
نواف هو يأكل : أهنيك على الشرح ياخي مافهم منك شي
ضحك امير وطلع يتوجه حسب تعليمات سعود وصل وبدا يغسل يدينه وسمع صوت الاغنيه اتجه نحو الصوت وانصدم من شاف صاحبه الأزرق الي كان كاشف ظهرها تتدلى منه خيوط الفستان الي كان راسم خصرها وهي تغني وتتمايل مع الاغنيه وشعرها الويفي الي كان يلعب فيه الهوا وقف وماقدر يشيل نضراته عنها كان يشوف انعكاس وجهها ف المرايه وهي تتدلع و تمايل خصرها عرفها وسرح فيها يشوف دلعها وحركاتها قطع سرحانه صوت العيال وهم جايين خاف احد يشوفها غيره ونطق يقول : ياولد
سمعته ريناد الي كانت منسجمه مع الاغنيه وشهقت تأخذ المسجل تركض لداخل ابتسم يشوفها تدخل ورجع يشوف نايف وسعود وشاكر يتقدمون للمغسله عشان يغسلون
دخل المجلس جلس يفكر ويتذكر صوتها وحركاتها وكيف أنها أخذته بطريقتها شافه عبدالعزيز الي كان يسولف مع عبدالله وقال : امير تعال
قرب منه بدأ عبدالعزيز يسولف مع عبدالله وامير يستمع لهم ناظر امير فعبدالله وقال بداخله : الحين ذا أبوها صح يشبها حتى سعود كيف ما ركزت
عند ريناد الي دخلت وشافت سهام جلست بجمبها وقالت : سهام شوفي صورت شرايك أخذت الجوال توريها صورها وكانت سهام تمدحها وصلت عند الفيديو وهي تغني وترقص كانت سهام تشوف الفيد ومركزه على ريناد أما ريناد فلمحت الي كان يراقبها من ورا النخل بالفيديو وسحبت الجوال بسرعه من يد سهام قبل تنتبه وقال : نسيت شي برح أجيبه
هزت سهام رأسها مستنكره حركتها وطلعت ريناد لفوق ودخلت الغرفه تسكر الباب وتحط يدها على قلبها تنطق : يمهههه
مسكت جوالها تشوف الفيديو مره ثانيه وقربت الصوره تشوف وجهه
وشهقت من عرفته تنطق : أي والله هو السايكو المزيون حق البر
حسبي الله لا يكون علم أبوي ولا جدي أني زرفت سيارته رمت الجوال على السرير ونزلت تطلع للحوش ابتسمت تشوف أبوها وقالت : بابا عندك احد عادي أجيك
عبدالله : تعالي ي بابا
قرب منه تحضنه وبادلها رفعت عيونها له تشوفه يناظر فيها وقال : سمي ي بابا وش بغيتي ؟
ريناد بعد ما تاكدت انه مايدري وقالت وهي تدور : وش رايك بكشختي
عبدالله : تهبلين يروحي أنتي
ابتسمت تقول : طيب حصني نفس ماكنت صغيره كنت تحصني ( ملاحظة للي ما يعرف تحصني = تقرا علي الأذكار)
عبدالله وهو يحط يده على رأسها ويقرا خلص وقال : يلا ي روندي خلصت
ريناد : طيب عادي تنادي جدي أبيه يشوفني ويحصني بعد
عبدالله : بس
ريناد: بليززز الله يخليك بابا من دون بس
عبدالله : ياروح بابا إنتي انتظري هنا
دخل عبدالله المجلس وقال لابوه وتقدم يجلس مع الرجال
طلع حمدان يشوفها وابتسمت تحضنه وتنطق : جدو حبيبي شرايك
وتدور
حمدان : بسم الله عليك تهبلين وأنا جدك
ريناد وهي تبتسم بعد ماتطمنت ان باقي مايعرف تنطق : صدق احبككك
حصني جدو
وتقدم ينطق : وانا احبك يادكتورنا حط يده علي رأسها يحصنها وخلص يقبل رأسها وقال : ادخلي من البرد
ريناد : حاضر
دخلت تبتسم وطلت للغرفه توجعت للمجلس الثاني الي ينامون فيه العيال تقدمت وابتسمت تشوف شنطة سعود السوداء فتحتها تطلع منها مسدس
أخذته تخبيه ورا ظهرها وتطلع تلبس عبايتها وتتوجه للحوش الخلفي
عند امير الي جاه اتصال وطلع يرد عليه كان ملتهي يكلم
امير : أي أي خلاص عندي
تقدمت بخفه وتقربت منه وبحكم انه كان اطول منها رفعت نفسها عشان توصل له وزلق الكعب حقها وكانت بتطيح ومسكت فيه والتفت لها يمسكها قبل تطيح على وجهها ومسكها ورفعها مستغرب يقفل المكالمه ونطقت ريناد : ياربي وش هالحاله أنا جايه اهدد ولا اسوي مسلسل هندي هنا
رفعت يدها تصوب السلاح لرأسه ونطقت : ارفع ايدينك
عند امير الي رفع يدينه وهو يحاول يكتم ضحكته ونطق : وش تسوين أنتي
ويناد : اسمعني زين ي السايكو المزيو.... وقالت : يربي صدق ان إني مهدده فاشله
امير : صدق حتى كاتم مو حاطه فيه
ريناد : أص اسكت واسمعني زين ي السايكو المز.... أف اسمع الحين لو علمت جدي ولا أبوي ولا أي احد اني زفت سيارتك ذاك اليوم ذبحتك هنا تسمع
امير : طيب
ريناد : يمين ولي نزل سبع ورفع سبع أذبحك تسمع ي السايكو
أمير : طيب اسمي امير مو الساكو مدري وش هو الي تدعيني فيه
ريناد : اما ماتعرف وش معنى سايكو
امير : ما اعرف والله
ريناد : طيب اسمع ي السايكو
امير : اسمي امير
ريناد : وش اسمك بعير
امير : لا حول ولا قوه إلا بالله اميرررر
ريناد : اها اسمع يا بعير اااا قصدي امير
حس بنبضات قلبه تزداد من سمع اسمه يطلع من ثغرها وقال : لبيه
ريناد : لا تعلم احد وخلها بينا تمام وآسفه على سيارتك
امير : ماصار إلا كل خير يبنت عبدالله
شهقت من سمعت أسم أبوها وقالت : كيف عرفت
امير : أنتي قلتي
ريناد : كذاب متى
امير : ف البقاله
توسعت عيونها : يعني أنت الي دفع عني ذاك اليوم
امير : أي
سمعت صوت سعود وهو ينادي امير وقال امير : ادخلي
ريناد : بس
امير : ادخلي ولا حابه يشوفونك ماسكه السلاح تهددين فيه ضيفكم
ريناد : بدخل بس وعدني ماتعلم احد
امير : وعد يلا ادخلي
ريناد : وش الي يضمن لي انك ما تخلف وعدك
التفت لها امير ونطق : أنا امير بن عبدالعزيز بن مقرن ال ساير وان قلت كلمه ما اخلفها
ريناد : مع أني ماطلبت اسمك الكامل بس نشوف
دخلت تركض وطلع امير يبتسم شافه سعود وقال : وينك
امير : كنت اكلم بالجوال
دخل وقال : أنا استأذنكم بروح
عبدالعزيز : وين ؟
امير : أوصل الأهل
عز عبدالعزيز رأسه وطلع يشوف سعود يشغل السياره
امير : وين
سعود : ابد بروح أوصل أمي والأهل معهم ملكه
امير بستغراب : جد
سعود : اجل اكذب
امير : يلا ودعناكم الله
مشى يتوجه لسيارته لأجل يتجه لبيتهم يأخذهم ويوصلهم لمحها تطلع مع البنات عرفها من بينهم كلهم ابتسم يشغل السياره وتوجه لبيتهم
وطول الطريق وهو يفكر فيها كلامها وتهديدها ولما طاحت عليه وكيف نطقت بعفويه تبيه يوعدها يتذكر فستانها وتمايل خصرها وتذكر الاغنيه
مد يده لجواله يشبكه على السياره ويتذكر كلمات الاغنيه ويكتبها وفعلا طلعت له شغلها بدأ يسمعها وصدا الاغنيه يطرب سيارته وينعش ذاكرته فيها