ابتعد عنها وهو ينسدح فوق الارض يناظر وجهها فوق: ابعدي
ضحك من قربت شفايفها لوجهه: يع يا وسخه
ابتعد عنها يمسح وجهه وهو يضحك واختفت ضحكه يشوف اللي واقف بطرف الغرفه بالاخير ويناظره بصدمه:من متى وانت هنا؟
بلع ريقه جابر ما يجاوب ولا يرد عليه يتنفس بسرعه ينعاد باذنه كل كلمه قالها ابوه كيف يكلم الفرس كانها تفهمه وكيف يشكي همه لها ويدرك خوفه(خوف جابر منه) تقدم لابوه يوقف امامه يناظر ملامحه الهاديه حجاجه المرتاح لاول مره ما يشوفه حجاجه منعقد وملامحه غاضبه وعروقه بارزه : ابوي
طايل: لبيه
جابر: ليه تسوي بنفسك كذا؟
طايل صد بهدوء يناظر فرسه: مجبور ولا عمري سويت شيء وانا مخير في كل مره كنت مسير الا في شيء واحد
جابر بفضول وهو يمسك يد ابوه: وشهو؟
طايل لف يناظر جابر: زواجي وخلفتي (عياله)
جابر: انك تكون في الاستخبارات شيء صعب ابوي؟ انك تحمي بلدك شيء صعب!
بلع ريقه طايل يحط يده على كتف جابر: المجرمين ما يعرفون بلد ولا دين ولا خوف كونك توقف بطريقه يمحيك ويعاديك و ياذيك باكثر شيء تحبه كنت بعيد منكم لاني احميكم ما كنت قريب ادلعكم واسولف معكم اعطيكم حنيه كنت دايم ورا ورا الكل احميه اركض خلف ذا واعدل غلط ذا واساعد ذا من وراه كلكم انت واخوانك واخواني وعيالهم كلكم كنت وراكم جابر .. صمت يناظر ملامح جابر تتحول لحزن
جابر: ابوي تكفى لا تلوم نفسك على شيء والله اني ما اقوى اشوفك زعلان ولا مكسور خلك وحش خلك ذيب زي ما يقول عنك جدي كنت دايم ولا زلت سرحان مثل ما قال جدي(سرحان هو الذيب) تكفى ابوي لا تلوم نفسك على كونك بعيد مننا والله انك بقلوبنا كلنا مهما سويت
احتضنه طايل يبوس راسه: لا تبكي يا ورع وتبكيني
ضحك جابر بين دموعه: لا دام قلت ورع الوضع بخير
ضحك طايل يكرر بوسته لراس ولده: زين اللي سمعتني كنت شايل هم كيف اكلمك
جابر ابتعد عن حضن ابوه: كيف تقدر تتكلم مع فرس كذا؟ تحسها تفهمك! شلون يعني ترتاح وانت تتكلم مع كائن ما ينطق بلغتك!
طايل: شفتها يوم حضنتني صح؟
جابر هز راسه: ايه شفتها
طايل: الخيل يفهم وش فيه صاحبه يعرف وقت ضيقه ووقت حزنه ووقت راحته وسعادته يفهم ويواسي وكذلك الابل يا جابر تفهم
جابر: يعني ناقة عمي خالد يوم كانت تحن لين ماتت لانه كان اخر مره جاها زعلان وبعدها جفاها لين ماتت!
هز راسه طايل وهو يشد كتف جابر: صح
جابر: امي تصوت علينا هيا نروح لها
دخله طايل تحت ذراعه وهو يمشي معاه لضحى
ضحى: وينكم فيه تعبت انادي وادوركم ووين غازي مب معكم؟
طايل: كنا عند الوهجاء حنا ما شفناه!
ضحى:كيف ما شفتوه لا تستهبلون وينه مو هنا
طايل: خلينا نشوف خليتس هنا انتي
ضحى: لا وربي استوحشت (خفت) بجي معكم
جابر مد يده لها: زين هيا يا امي
مسكت يده تمشي معهم ينادون غازي
في مكان بعيد عن الاسطبل بمترات/
منسدح فوق الرمل يناظر النجوم تملأ السماء واكتمال البدر يشع نوره يضيء المكان رغم عتمة الليل يتنفس الهواء البارد يحمل معاه ريحة تراب ومطر غمض عيونه بقوه ياخذ نفس عميق : يارب يجي مطر
فتح عيونه من الشيء اللي لمس وجهه: حي ما متت
ضحك من ركله بارق (الخيل) : شكراً لك
حنى نفسه بارق من جديد لوجه غازي يتحسسه لمس غازي وجه الخيل بكفه: والله اني بخير
ابتعد بارق يوقف قريب من غازي كانه واقف لحمايته صهل بقوه وفز غازي يسحب سلاحه من خصره: وش بك!
سكنت ملامحه يشوف ابوه ضرب ظهر بارق: ابوي اهجد
ثبت بارق وهو يناظر طايل اللي جاي يمشي بثبات: غازي ولد
غازي: لبيه
طايل: علامك قاعد هنا موتتنا عليك امك شوي وينخرط قلبها وش بك ما علمت لها ليه تخوفنا كذا! بعدين وش تسوي هنا لوحدك بذا الوقت؟
عقد حجاجه غازي بابتسامه: على وش اجاوب اول؟
تنهد طايل: ظريف ربي يحفظك امش قدامي للاسطبل امش
غازي سحب لجام بارق بيده يمشي بجانب ابوه: ابوي انت دايم تجي الاسطبل بدوننا صح!
طايل لف له: وش يعنيك!
غازي: يعنيني كثير ابوي انت مستحيل تبعد عن الوهجاء وحرمانك لنا من الاسطبل بسبب كسر وجدان ما كان سبب كان خلفه مليون سبب
لف طايل يصغر عيونه: غازي خلصني وش تبي تقول!
غازي: ابي اقول ان كان فيه احد يراقب الاسطبل ويبي ياذينا وانت يوم عرفتك ان وجدان تاذت وانكسرت بسبب الخيل حلفت لا عاد احد ينزل للاسطبل ولا يجيه او يوصلك علم ان احد جا له والحقيقه انك كنت تبحث ورا التهديد اللي يوصلك وكنت تبعدنا عن مكان الخطر صح؟
وقف طايل مكانه: القراءه والكتب تخليك تفهم كل شيء من حولك كذا!
هز راسه غازي: حتى وانا اقرا اعرف وش يصير معكم ابوي شفت صفاتك كيف وكيف تركيزك وفطانتك ادبلها اضعاف تلقاها بي
طايل ابتسم بهدوء: لا تصير مثلي
غازي: وليه!
طايل: بعدين تتعب يوم تكوّن عايله صدقني خلك غبي تجاهل كل شيء انا مستعد احميك ما حييت بس لا تسوي زيي لا تصير نسختي غازي
تقدم غازي لابوه: صرت وانتهينا وبكون معك ودايم جنبك وبمحي خوفك بيديني الثنتين وبحميك انا وبوقف انا خلفك كفايه عليك تعب كفايه عليك خوف وحذر ابوي انت ما قصرت بشيء فنيت حياتك لاجلنا صدقني مستحيل اتجاهل اي شيء افهمه وبكون معك دايم زي ما كنت معك من قبل بس الحين مو بالخفاء بكون معك جهر
بردت ملامح طايل وانرسم على وجهه ملامح الرعب: انت البارق!
ابتسم غازي ببرود: كنت ادري انك تشك اني انا وكنت ادري انك تبحث وراي يا غازي لاجل تتاكد من كوني البارق وتبحث خلف البارق لاجل تتاكد انه غازي وهذا انا الحين اقولك ايه انا هو انا اللي كنت معك دايم كنت ابحث عن كل تهديد واجيبه لك جاهز واقرب لك كل عدو واطيحه
صفقه طايل كف بكل قوته ويده ترتجف: ليه ليه تسوي كذا لييييهه!!
غمض عيونه غازي ببرود: لانك ابوي
طايل مسكه من صدره بيدين راجفه وهو يهزه: غازي لا تستهبل لا تجنني كنت بفقدك في يوم كنت بتروح من بين ايدي وتتركني وش كنت تتوقع ردة فعلي اذا فقدتك وانا احسبك مجرد البارق وتطلع ولدي كنت بحزن على البارق ايه وبموت واحيا لاجله ايه بس وش كنت تحسبني بسوي لو فكيت لثامك وشفت غازي هااههه!
مسك غازي يدين ابوه بهدوء: كنت تنتظرني اخلي الرصاصه تصاوب قلبك وانا واقف مبتسم يعني! اكيد بوقف قدامك ولا تبيني افقدك بدون لا احرك ساكن! ابوي ادري انك تخاف علينا بس حن بعد نخاف عليك
دفه طايل بخوف وبصوت راجف: لا تعورني يا غازي لا تعورني
رجع غازي حول ابوه وهو يحضنه ويبوس راسه: لن يصيبنا الا ما كتب الله لنا يا ابوي قدر ربي ويوم وداعنا مكتوب لا تقول كذا
تنهد طايل بقوه وهو يمشي مع غازي: امش تاخرنا على امك
