ផ្គាប់ដួងចិត្ត

ភាគ៩

សូវម៉ីង សែនស្អប់ខ្ពើមមនុស្សស្រីចរិតដូចនាងបំផុតហើយ គេមើលសន្ដាននាងធ្លុះតាំងពីដំបូងម្ល៉េះ ធ្វើពុតជាមិនចាប់អារម្មណ៍ពីប្រុសសង្ហាដូចគេ ធ្វើពុតជាមិនចង់បានលុយហែកសែកចោល ការពិតសម្ដែងទាមទារការចាប់អារម្មណ៍ ល្បិចអន់ៗ គ្រាន់តែជាលេសចង់ចូលមករកគេទៀត មនុស្សស្រីតូចទាបដូចនាង មានពីអង្កាល់ដែលមិនចង់ចាប់ប្រុសសង្ហា ហើយមានដូចគេធ្វើប្ដី តែក្ដីស្រមៃនាងខ្ពស់ពេកហើយ ទាបកន្តឿឈរបានត្រឹមចុងដង្ហើមគេ ដៃខ្លីចង់ស្រវាឱបភ្នំ មិនប្រមាណខ្លួន។
សង្ស័យអាលីអូ Hello kitty ស្អីនោះ មិនមែននាងភ្លេចស្លៀក តែនាងមានចេតនាមិនស្លៀក ចង់ទុកលីអូចោលនៅក្នុងបន្ទប់គេ ដើម្បីទាក់ទាញគេ ប្រើយុទ្ធសាស្ត្រនេះចង់ឲ្យគេឃើញលីអូ ហើយនឹកដល់នាង ល្បិចនាងគេតាមទាន់ទាំងអស់ ប្រើជាមួយគេមិនបានផលទេ។
នាងនៅក្នុងភ្នែកគេ គ្រាន់តែជាធូលីដីគ្មានតម្លៃ ហើរមកតោងជាប់សម្លៀកបំពាក់គេ យកដៃបោសបន្តិចកម្ទេចធូលីរលាយបាត់អស់ហើយ ក្នុងជីវិតរបស់គេ មនុស្សស្រីប្រភេទណាក៏ធ្លាប់ជួប ដូចនាងជួបមកច្រើនហើយ គេមិនចាប់អារម្មណ៍ទេ មុននឹងនាំរូបរាងដ៏សង្ហាឥតខ្ចោះចូលទៅអង្គុយនៅក្នុងឡានទំនើបពណ៌ខ្មៅ បើកចាកចេញពីបរិវេណរីសតយ៉ាងលឿន។
ហ្វូយីង ឈរគាំងដូចរូបចម្លាក់ថ្ម ខឹងផង ហួសចិត្តផង ឈឺចិត្តផង ញ័រដើមទ្រូង ញ័របបូរមាត់ ពេលនេះនិយាយអ្វីក៏មិនចេញ បានត្រឹមក្ដាប់ប្រអប់ដៃតូចទាំងសងខាងណែន ទឹកភ្នែកស្រក់ចុះដោយមិនអាចទប់ជាប់ ចង់តវ៉ា តែមិនដឹងតវ៉ាដោយរបៀបណា?
ចង់ប្ដឹង តែខ្លាចមិនឈ្នះអំណាចទឹកលុយគេ ចង់បានលុយ គេឲ្យហើយ ដល់10000$ តែនាងហែកចោលខ្លួនឯងទេ ទាមទារចង់បានលុយថ្លៃព្រហ្មចារីវិញ គេមិនឲ្យ ក៏មិនដឹងធ្វើអីគេកើត ពេលនេះនាងបាក់ទឹកចិត្ត អស់សង្ឃឹមណាស់ បើចង់ឲ្យនាងធ្វើមុខក្រាស់ តាមទារលុយថ្លៃដេកជាមួយគេ បំភ្លេចចោលទៅ នាងលំបាកតោកយ៉ាកយ៉ាងណា ក៏មិនបន្ទាបកិត្តិយសខ្លួនឯងដល់ថ្នាក់នេះដែរ ប្រហែលជាត្រូវធ្វើចិត្តហើយ ឲ្យមនុស្សថោកគម្រិះខ្សែលើនោះស៊ីទទេៗ។
ហ្វូយីង លើកដៃគ្រវាសជូតទឹកភ្នែកចេញពីលើថ្ពាល់ មុននឹងដើរចូលទៅក្នុងរីសត ទៅរកមេការដើម្បីលាឈប់ មិនដឹងជាឆ្កួតស្អីទេ ចូលធ្វើការបានមួយថ្ងៃត្រូវគេចាប់ស៊ីពងក្រហម ជីវិតរន្ទះបាញ់ស្អីក៏អយុត្តិធម៌ម្ល៉េះ?

២ម៉ោងកន្លងទៅ...
សូវម៉ីង មកដល់ខនដូតារាស្រីល្បី សៀកណាន មួយសន្ទុះធំហើយ ពេលគេមកដល់ ឃើញនាងតែងខ្លួនចាំគេយ៉ាងស្រស់ស្អាត ស្លៀករ៉ូបពណ៌ក្រហមសិចស៊ី ដៃតូច បញ្ចេញចង្អូរទ្រូង សម្រុងខ្លីប៉ផិតប៉ផើយក្រលៀន សាច់ក្រណាត់រ៉ូបស្តើងរហៀមើលឃើញខាងក្នុងទាំងអស់ ស្លៀកដូចមិនស្លៀក គេឆ្ងល់ដែរ មិនស្រាតតែម្ដងទៅ ស្លៀកនាំបង្ហិនក្រណាត់ធ្វើស្អី ឃើញហើយចង់ក្ដៅខ្លួន ចុះគេជាប្រុសពិត មិនមែនខ្ទើយឯណា ស្រីបង្ហាញសាច់សខ្ចីទ្រលុកទ្រលន់នៅចំពោះមុខ មិនឲ្យមានអារម្មណ៍ទើបចម្លែក។
សៀកណាន ថែមទាំងរៀបចំអាហារនៅលើតុចាំគេជាស្រេច បិទភ្លើង ហើយអុជទៀនបំភ្លឺ ដើម្បីឲ្យបរិយាកាសកាន់តែរ៉ូមែនទិក។
គេនិងនាងអង្គុយនៅតុអាហារទល់មុខគ្នា ញ៊ាំអាហារ ផឹកស្រា ជជែកពីរឿងការងារ ជជែកត្រូវគ្នាហើយ នាងព្រមទៅដើរបង្ហាញម៉ូដនៅក្នុងកម្មវិធីស្អែកនេះ តែឃើញគេផ្អៀងកដៃមើលនាឡិកាញឹកញាប់ ប្រហែលជាចង់ត្រលប់ទៅវិញ ទើបនាងព្យាយាមពន្យារពេល ដើម្បីឲ្យថ្នាំសម្រើបដែលនាងលួចដាក់ក្នុងកែវស្រាគេ ជ្រាបចូលបញ្ចេញនូវប្រសិទ្ធភាព
«ស្រាក្នុងកែវលោកអស់ហើយ ចាំខ្ញុំចាក់ឲ្យទៀត» សៀកណាន ក្រោកពីលើកៅអីបន្តិច បបូរមាត់លាបក្រេមក្រហមឆេះញញឹមផ្អែមដាក់ប្រុសកំលោះ មុននឹងលូកដៃកាន់ដបស្រា ឱនចាក់ចូលទៅក្នុងកែវ ចេតនាចង់បង្អួតដើមទ្រូងទ្រលុកទ្រលន់ គេរេភ្នែកចេញមិនសម្លឹងមើល ចាប់ផ្តើមមានអារម្មណ៍ក្ដៅមុខភាយៗ ក្ដៅស្រៀវស្រាញពេញក្នុងខ្លួន អាការនេះ មិនមែនអាការស្រវឹងទេ តែជាអាការដែលទើបតែជួបហើយ វាធ្វើឲ្យគេដឹងភ្លាមថា ក្នុងកែវស្រាដែលផឹកចូលទៅមុននេះ មានអ្វីដែលមិនប្រក្រតី បែកញើសស្រាក់ៗ ច្បាស់ហើយដើរចូលស៊ងផ្លូវចាស់។
តារាស្រីម្នាក់នេះ ចង់ប្រើវិធីនេះដើម្បីចាប់កំលោះហាយសូដូចគេ តែកុំសង្ឃឹមគេឲ្យនាងចាប់ជាប់
«ខ្ញុំមានការសំខាន់ច្រើនទៀតត្រូវធ្វើ សុំលា...»
«អុយ៎ សុំទោស» សៀកណាន ធ្វើជាជ្រុលដៃចាក់ស្រាហៀរកែវ ហើយគ្រវាសកែវស្រាឲ្យជះស្រាកំពប់ទៅលើរូតខោគេ និងរហ័សយកដៃទៅបោសជូត តែគេដឹងទាន់ល្បិចនាង ទើបគ្រវាសដៃនាងចេញ ហើយស្ទុះរត់ចេញពីក្នុងបន្ទប់ខនដូនាងយ៉ាងលឿន ធ្វើឲ្យនាងតាមស្រែកឃាត់
«សូវម៉ីង ឈប់សិន លោកកុំទាន់ទៅ»
គេទៅហើយ មិនឈប់ទេ រត់មិនងាកក្រោយ មនុស្សស្រីគួរឲ្យខ្លាចពេកហើយ ទុកចិត្តមិនបានទេ។ 
«ជីវិតអញងាប់នឹងត្រូវស្រីដាក់ថ្នាំហើយ» កើតជាប្រុសស្អាតនឿយអីម្ល៉េះ មានតែស្រីដាក់ថ្នាំចង់ឡើងគ្រែជាមួយគ្រប់ទិសទី ទើបតែត្រូវថ្នាំប្អូនហើយ មកត្រូវថ្នាំស្រីបង្ហាញម៉ូដទៀត?
«Hello kitty» នាងនៅរីសតទេ?