جروة خاتون

الجزء السابع

『✦﷽✦』

اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ

روايـــة:
جروة خاتون

بقلمي:
نــعــنــاعة🌿

✿『 فتاة تشبه الوردة
لكنها لا تعلم
صنعت بود من رحيق الورد 』✿

『••✎••』

فتحلي الباب ابن عمتي الصغير ياسين ..
طلعت الجلبة وياه ..
هي شافتني وركضت علي اني من حلات روحي
عفت ايد اختي مرام وشردت بروحي العزيزة ..

بس ما كدرت اخلص منها جلبت بثوبي من ورى ..
بنية جسمي ضعيفة سحلتني ترجعني للخلف ..
قوتها ضعف قوتي .. روحي ماعت من الخوف ..
وكعت على ظهري .. وضامة وجهي بيدي ..
خاف تعضني منه واصرخ على عمتي ايمان بلكي تجي ساعدني ..

ولد عمي بعيدين يخافون يتقربون ..
يدرون بيها تعضهم بس ابن عمتي الجبير ارام ..
متعلمة عليه .. شافني من بعيد ..
ذب البايسكل وتقرب علينا شد حبل الجلبة على ايده ومشى بيها ويضحك عليه لأن خايفة منها ..

صارو بعيدين عني ما خليت ما حجيت عليهم
وعلى الجلبة .. وكف گلبي من الخوف ..

منار ومرام رجعهن ياسين الينام ويه الجلبة من هو وصغير وما يخاف منها ..

غسلت ايدي ورجلي على البوري .. ركضت على جديتي اشكيلها شسوت بيه جلبة بيت عمتي..

واتوسل بيها تكللهم يموتها ونخلص منها خالستنه خلس حتى النهر نخاف نصله تأكلنا ..

ضحكت على أفكاري .. عفتها ورحت أسبح وابدل ثوبي صار كله تراب ..

ورى ما تعشينا سيرو بيت عمتي علينا ..
جوي يتعذرون لأن جلبتهم هيج سوت بيه ..
امي خطية تتعب من شغل البيت والهايشة و الخضرة كلتلي صبي الجاي ..

فار الجاي مثل خوش معدلة خليت الشكر بالستكانات .. شلت الصينية اتمندل بس شو تهتز بديه شجعت روحي علمود ما أخاف واكب الجاي ..

ماحسيت غير انجبحت وكعت على وجهي والصينية بيدي راحت بعيد .. مدنكه رأسي اداري الفشلة كلها صيح الله الله ..
و يصيحون على ارام خمى نجويت ..
بيني وبين نفسي كيفت من وكع الجاي عليه ..
حيل يستاهل حيل غاثني بتصرفاته ..
عفتهم وشردت للغرفة بعد ما باوعت ..
من الفشلة كبل نمت بفراشي وغمضت ما حسيت للصبح على أمي تكعد بيه اروح للمدرسة دوامي صباحي وفترة امتحانات اخر السنة ..