جروة خاتون

الجزء الثالث

『✦﷽✦』

اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ

روايـــة:
جروة خاتون

بقلمي:
نــعــنــاعة🌿

『••✎••』

جروة

بعد جم يوم .. ما عرفتهن شگثر..
الوجع ماچل رأسي ..
عيوني مابيه اشوف بيهن ..
جسمي يوجعني مابيه لا ارفع ايد لا رجل ..
وين انا مادري ..؟!
طلعت صوت بونه ..

ورى شواي خش شلتاغ يمسح على أيدي
حركت روحي .. مابيه احجي ..
جيت علي ملهوف ويصيح يريدني احجي ..
مااگدرت حلكي ما يتحرك ..
هرج المچان من صياحة ..
ماگدرت أنامن بعد من الوجع للصبح اني اون
وعيوني ما شوف بيهن..
شوي شوي ردت عافيتي بعد ما ضليت بالمستشفى هواي ..

چان سؤال واحد يعيد بي شلتاغ منو سوه بيج هيج احجي ..
اتحجج بحلكي مااكدر احجي ..
امي اول ما گمت اشوف بعيوني ..
حذرتني  احجي منو سوه بيه هيج ..
چانت خايفة عليه .. وجها ازرگ من الكتل ..
حجتيي انضربت على رأسي ما شفت شيء ..

ردينا للديرة.. يوم عزه جان على بيت عمي ..
غضب شلتاغ ما برد ..
صوت صياحة يأخذ الروح من حرگت روحه ..

شلتاغ :- محد غريب يخش بيوتنا ..
احجو منو سوه بجروة هيج ؟!
ما ارحمه إذا عرفت بعدين ..

يصيح ويصيح لما يتعب ويسكت محد يگف بوجه ويرده ..
من شاف ما منهم رد ..
وگف بنص الحوش ..

شلتاغ :- أن ما عرفت منو سوه بجروة هيج ؟
أنه باجر عايفكم وهاج وماتلگوني  .

الكل خايف خايف من نار شلتاغ لا تحركه مايگدرون يحجون ..
عبن صدك محد يدري منو السوه هيج ؟

السكته اولى عبن لو احد بص بچلمة يموت بتفگه شلتاغ الحاطها على ظهره ويفتر ..
يدرون بي الموت عنده مثل شربه مي ..

ويه طر الفجر جعدني من النوم ..
لم هديماتي عدل هدومي ..
لف الجرغد زين على رأسي ..
شالني بين اديه ويمشي ..
أمي جرته من ايده تريده يحجي وياها وين رايحين ؟
يگلها ما تستاهلين ارد عليج..
لو بيج زود ما صار بنتج هيج ..
صيحت رادت ما رد عليه ..
حتى ابوي ما جاوبه ..