ဖွင့်ဟလိုသောဆန္ဒ (တားမြစ်မှုကိုတမ်းတလိုသောဆရာတယောက်ရဲ့ပုံပြင်များ)

အပိုင်း (၁)

ရန်ကုန်မှာမွေး၊ ရန်ကုန်မှာကြီးပြီး ရန်ကုန်မှာနေလာတဲ့သူတယောက်အဖို့နယ်မြို့လေးတမြို့ကပျင်းစရာကောင်းလှတယ်။ လူနေထူထပ်တာတွေ၊ မွန်းကြပ်မှုတွေ၊ ဟန်ဆောင်တတ်တဲ့လူတွေ စသဖြင့်အရာတွေနဲ့ဝေးရာနယ်မြို့လေးကို ထွန်းနိုင်ကအထက်တန်းပြရာထူးဖြင့်ပြောင်းလာခဲ့ရတယ်။ ပြောင်းလာတုန်းကချစ်ရတဲ့ရန်ကုန်မြို့ကြီးနဲ့ လွမ်းရမယ့်သူတွေကျန်ခဲ့တော့ဝမ်းနည်းရပေမယ့် အေးချမ်းဆိတ်ငြိမ်တဲ့မြို့လေးကိုရောက်တော့ ဝမ်းနည်းမှုတွေကဆိတ်ငြိမ်သွားတယ်။

တာဝန်ကျရာကျောင်းကိုရောက်သွားတော့ဆရာ၊ဆရာမတွေနေဖို့ကျောင်းဝင်းထဲဆောက်ထားတဲ့အိမ်ကိုကျောင်းအုပ်ဆရာကြီးကလိုက်ပို့ပေးတယ်။ ပျဉ်ထောင်သွပ်မိုးလေးနဲ့သပ်ရပ်နေတဲ့အိမ်လေးကိုကြည့်ရင်း 'ဒီမှာနေပါ...ဒီကျောင်းမှာကနယ်ခံဆရာတွေများတော့ဒီအိမ်ကလွတ်နေတာ..ဆရာပဲနေလိုက်ပါ.' 'ဟုတ်ကဲ့...ဆရာကြီး' ခဏကြာတော့ဘေးနားကကျောင်းစောင့်ဆိုသူရောက်လာတော့ဆရာကြီးကသန့်ရှင်းရေးလုပ်ပေးရန်နဲ့ထွန်းနိုင်လိုအပ်တာတွေကိုကူညီပေးဖို့မှာပြီးပြန်သွားတယ်။ ဒီနေ့ကစနေဆိုတော့ကျောင်းပိတ်ထားပြီးမနက်ဖန်လည်းတရက်အားသေးတာမို့နေထိုင်စားသောက်ဖို့စီစဉ်ရန်အချိိန်ရသေးတယ်။

သန့်ရှင်းရေးလုပ်ပြီးသွားတဲ့အိမ်လေးကိုကြည့်ကာကြည်နူးမိတယ်။ ခြေတံရှည်ပုံစံလေးဆောက်ထားတဲ့သစ်သားအိမ်လေးကိုတက်ရန်လှေကားငါးထစ်ခြောက်ထစ်လောက်ရှိပြီးအိမ်ဦးခန်းလေးကိုရောက်တယ်။ ဘုရားစင်လေးနဲ့စာအုပ်စင်တခုရယ်၊ စားပွဲတလုံးရယ်ရှိပြီး သင်းဖြူးဖျာလေးကိုရိုးရှင်းစွာခင်းထားတယ်။ ဆက်သွားလိုက်ရင်အိပ်ခန်း၂ခန်းကဘက်ဘယ်နဲ့ညာတဖက်စီမှာရှိပြီးလူတယောက်နေဖို့အတွက်သင့်တော်တဲ့အကျယ်အဝန်းရှိတယ်။ အိပ်ခန်းကဆက်သွားလိုက်ရင်လှေကားသုံးထစ်လောက်ဆင်းရတဲ့မီးဖိုချောင်လေးတခုရှိတယ်။ အဲကနေမှတဆင့်ဆက်ဆင်းသွားရင်ရေချိုးဖို့နေရာနဲ့ အပင်အောက်ကအိမ်သာကိုတန်းရောက်တယ်။ ထွန်းနိုင်ကပါလာတဲ့ကိုယ်ပိုင်ပစ္စည်းလေးတွေကိုနေရာချနေတော့ ကျောင်းစောင့်ဆိုသူကပါလိုက်ကူညီပေးတယ်။ အကုန်ပြီးသွားတော့မှ 'ဆရာလိုအပ်တာရှိရင်ပြောပါ..ကျတော်ကဘေးနားမှာပဲနေတာ..အော်ခေါ်လိုက်ပါဆရာ...ဒါနဲ့ကျတော့်နာမည်က ဝင်းသိန်းပါ' 'ဟုတ်ကဲ့ကိုဝင်းသိန်း..ကျတော့်နာမည်ကထွန်းထွန်းနိုင်ပါ...နောက်လည်းကူညီပေးဦးဗျာ' 'ဟုတ်ကဲ့ဆရာ..အချိန်မရွေးပါပဲ'။ ကိုဝင်းသိန်းပြန်သွားတော့မှာ ထွန်းနိုင်လည်းအိမ်ကိုဖုန်းဆက်အကြောင်းကြားလိုက်ပြီး ချစ်သူဆီကိုလည်းသတင်းလှမ်းပေးလိုက်ရတယ်။ ရောက်တဲ့တရက်ကအခန်းသန့်ရှင်းရေးလုပ်တာနဲ့အချိန်ကုန်သွားတော့ တနင်္ဂနွေနေ့မှာလိုအပ်တဲ့အရာလေးတွေကို ကိုဝင်းသိန်းနဲ့သွားဝယ်ကြတယ်။ သွားရေးလာရေးအတွက်ဆိုင်ကယ်တစီးတော့ဝယ်ထားဦးမှလို့တွေးလိုက်မိတယ်။