الدلاهث " أحضان مميته"

" 9 "

كيف أحوالكم كُنزلاتي الجميلات ، أتمنى تكونوا بخير يلا نبلش باحداث بارت اليوم..

_مشاهدة ممتعه..
.
.
.
.
.
.
.
.
.
.
.
.
.
.
.
.
لتخليني وحدي
منين اعرف الناس
لا اگدر اعاشر
لا خلگ عندي
احب شلون غيرك
من اريد شلون ؟
وانا وياك كلش
خلصت ودي
بگد حبك لنفسك
چنت اناني وياك
ومنو مثلي يحبك
محد بگدي
. . . . . . . . . . . . . . . . . . . . . . . . . . . . . . . . . .

سعيد : أنه أحبج و أريدج ، و اذا تقبلين أخطبج و نتزوج ؟!
سلوى : عود اذا قبل فرزدق . و نهت كلامها بضحكات تخلي يضيع بحبها أكثر و يحتار و يتسائل و يكول
_ ليش ؟ و فرزدق شله شغل ؟ سلوى أوكفي احاجيج . و سرع خطواته حتى يلحك عليها و هي تروح ..
_ سلوى اوكفي مو احجي وياج
_ عندي شغل عود بعدين نحجي
_  يعني شوكت ؟
_ بالوقت الي يعجبني عود نسولف
_ ليش تحجين وياي هيج ؟ انه بدر مني شي ؟
ما ردت عَلي سلوى و كانت هاذي اول مرة تتجاهل سعيد ..

علي : احتاج خريطة للمكان حتى نحدد الخطة
_ فاضل راح اكلفك بهاي المهمة ، اريد تجيبلي خريطة المكان بأسرع وقت
_حاضر سيدي
_ كل ما أستعجلنه كل ما ارتفع معدل النجاح ، و نظمن الفوز بأذن الله
_ ان شاء الله

شنو جاي يخططون يا ترى و عن أي مكان يحجون ؟ راح نعرف بالايام الجاية ...

سلوى : بديت أتعب و احس روحي تضيع مني بكل نفس جاي أستنشقة من هاي الدنيا ، الدوخة خذت حيلي و أنشغال علي عني خلاني احس بالوحدة و ماعندي أحد..
نزلت وانه أسند روحي على محجر الدرج و رحت أشوف خاف البيت ناقصة شي ..
جان البيت كلة نضيف لان نضفته الصبح على الرغم هو ما يتوصخ لان ماعدنة طفل يلعب حتى أكون مجبرة انضف كل شوي..
أحس حياتي فارغة مابيها ونيس و اخر فترة علي أنشغل عني و يرجع تعبان و ينام و حتى لمن يصحى من نومة يكعد بالغرفة و يفرش اوراقة و أغراضه و يشتغل و جان دائما يفضل خروجي من الغرفة ...
جان أحد أحلامي يكون عندي طفل و من حبيب الروح لكن بعد مرور سنه من زواجنا الا أن الله ما كتبلي...

بيوم من أيام ديسمبر الباردة  رجع سعيد للبيت وهو يفور من العصبية و تسائلنه هذا شبي ؟؟ شنو الصاير وياه ؟
عزيزة : يا يمة صلي على النبي شجاك شصاير
سعيد : يمة فوتي حالي ترا روحي جزعانه ومالي خلك
_هسه غير أعرف شبيك ؟ جاي مغندب و تركع بالبيبان شنهو الجرالك؟؟
_ مو كلتلكم فوتووو حالي مالكم شغللل

حجة اخر كلماته بصياح و راح فات لغرفتة وهو يسد الباب بقوة ..

_ ياع هاذ شمالة الوليد تسودن؟؟ اشو من طلع مثل الورد كلشي مابي
_عوفي يمة يجوز صايراله شي بالشغل و ضاج ، هسه هو شويه و يرجع مثل الاول ..
_ لا والله اليوم اريدن اشوفنه و الا يحجيلي شصاير وياه ..
و راحت وراه وهي تدخل لغرفته و تكعد بصفة و تكول ..
_ شمالك يمة لويش مغندب ؟ متكاون وي ابو الشغل ؟
_ لا
_ أحد مسمعك حجوة؟
_هم لا
_ جا شنهو الصار ؟؟ مو طكت مرارتي
_ اريدن اتزوج
_و انتَ على هاي عافس وجهك ؟؟ صير خوش وليد و عدل روحك و بطل سوالفك وانه من وجه الصبح البس عباتي و اروح اخطبلك احسن وحدة ، ها شكلت؟
_ لا يمة لاا مو هيج
_ جا شنهو مو ردت أخطبلك بعد عليمن لا
_ يمة ءء أنه أحبن وحدة ورايدها
_ ياهي هاي ؟ منهو اهلها ؟ تعرفهم ؟
_ لا
_جا شلون تريد تتزوجها وانتَ ما تعرف أهلها و فصلها ؟؟
_ هسه اني أريدها و بعد مالكم شغل
_ لا يسعيد هاي السالفة ما تصرفلي يرجع أخوك وهو يتصرف وياك لان الظاهر عقلك مو براسك
وانتهى حديثهم بجدال و جر و عر من سعيد وهو مصر ان يتزوج وحدة مجهولة الهوية بالنسبة لأهلة
...............................................................

سعيد : شني علاقة سلوى بفرزدق ؟ و ليش تغيرت عَلي ؟ أنه ما حجيت شي ولا سويت شي موخوش وياها ولا أذيتها بحرف شني الي تريدة ؟ معقولة تحب فرزدق ؟ زين ليش خلتني أحبها و ليش انطتني مجال احجي وياها ؟

أنه باجر اشوف شني القصة و افتهمها عدل ..
حاول ينام و يتخلص من كل الأفكار لكن ماكدر وهو يتخيل سلوى بأحضان شخص ثاني و انتهت ليلة مقمرة مُزينة بالأرق..
_ فرزدق
_ خيرررر
_أريدن أسألك سؤال و ياريت تجاوبني بكل صراحة
_ أي عيني ليش لا ، غرد
_ شنو علاقتك بسلوى ؟؟
_ سلوى ع.......يتبع

و ينتهي بارت اليوم إلى هنا لا تنسون التصويت كُنزلاتي الجميلين ..