جزء من الكلام منقول ✨✨✨✨
من فترة شوفت بوست لبنوتة بتقول "يا رب يا جميل، اجعل الأكل جميل"
ربنا ألهمني أردده كتير اليوم وأنا بحضر الغدا كنت مرتاحة وحاسه إن كل شيء في عيني جميل والأكل طلع جميل أوي فعلا!
حد تاني كان منزل إنه لما بيدخل على patient بيقول دعاء
"اللهم إن يدك سابقة ولاحقة ومحيطة بأيدينا فاجعل الشفاء يجري عليها
اللهم لا تؤاخذه بذنبي ولا تؤاخذني بذنبه
اللهم أصلح ما بين أيدينا"
بدأت أعمل كده فعلاً وحسيت بفرق رهيب وراحة وتحسن مش طبيعي!
قريب كنت مع ماما فى مشوار واحنا راجعين وقفنا كتير ومش لاقيين مواصلات ماما قالتلي هنعمل إيه قولتلها هندعي يا ماما ولسه بقول يا رب لقينا مواصلة وروحنا
واحنا مبسوطين أوي
الدعاء نعمة كبيرة يا شباب :))
نعمة زي نعمة الصحة وزي كل نِعم الله علينا
رزق ربنا بيسوقه على ألسنتنا زي الأكل والشرب والدوا كدا بالظبط ..
تخيّل أنت في موقف وتلاقي لسانك نطق بالدعاء المظبوط المناسب للموقف دا، كان ممكن على فكرة تفضل تفكر وتزداد همّ وحزن وبؤس وتسرح في عالم تاني خالص، لكن فكرة أن لسانك ينطق ويقول يا رب ومش بس كده، لا ربنا بيدلك بالكلمات الصح والدعوة الصح .
فلله الحمد كله على نعمة الدعاء وتيسيره على ألسنتنا في الوقت المظبوط ومش تاركنا لاهيين ومسحولين .
حد من الصحابة مش متذكرة اسمه كان يقول كنا لا نحمل همّ الإجابة، لأنهم واثقين أن مادام ربنا جعل لسانهم يسترسل في الدعاء لأنه رزق من الله يبقى أكيد مُجاب بفضل الله وكرمه علينا والمسألة مسألة وقت متقاس من رب العالمين في الوقت المظبوط بالثانية
جميل إن الواحد يدرب نفسه على رؤية ألطاف ربنا ليه ولا يألف النعم فيُصاب في نفسه، والدعاء نعمة حتى لو لم ترى إجابة بعد فيكفي إنك مسموع متعبد لله بدعوة..
الله ودود جميل ورحيم ♥️
عطرو افواهكم بالدعاء وذكر الله سبحانه
