ليلة كاملة دوزاتها سرية فالجحيم
عارفاه كايطيرها و هي فالسما و خايفة لا يعرفها شكوناهي!
حمدات الله و شكراتو حين دايرة النقاب، لدرجة جات فكرة لعقلها و تمنات لو كانت بدلات تا سميتها و تهنات
الصباح بكريي ناضت من جنب عزير اللي باتت معنقاه بلا ماتغمض عينيها، مشات للكوزينة و دارت ماكينة القهوة، عصرات لنفسها قهيوة و جلسات كاتشربها فالطيراسة و هي كاتفكر ف محمد!
تفكرات شكله البارح و غمضات عينيها بقوة!
رجع انسان جديد و وسامته تزادت، جاذبيته بلا والو كتسحر عاد مللي يشوف فالواحد و يركز عليه
تفكرات مرتو و تفكرات ولدو و تفكرات هود و فنة
تفكرات و فكرات فبزاف دالحوايج غايزيدو يبعدوها عليه و ناضت و هي كدوي مع نفسها مخلوعة
*سرية*
مايمكنش!
مايمكنليش نبقى هنا ساكنة جنبو، انا خديت قراري، هاد الحياة اللي بناهالي باباه و مزال كايراقبني فيها تا لدابا انا مستحيل نحاول انني نفرط فيها
هو انسان خطيير انا مغانقدرش عليه
و اصلا تا محمد بانلي محكوم من عندو، حيت كون كان باغيني بصح، مكانش غادي يتخلى عليا من خمس سنين هادي و يوقع على طلاقنا و يغبر!
ولادي دابا عندي، مابقاتش غير افنان، ولادي مانقدرش نعرضهم للخطر ديالو فخطرة
نضت بعد نص ساعة من التفكير ، جبدت شي تصبين كان عندي درتو فالماكينة و بقيت كندور فالدار بروتيني العادي، صاوبت الفطور و وجدت حوايج الدراري دالمدرسة و وجدت لهود تا هو و رجعت للتصبين، درت نقابي و خرجت ننشر فالجردة عندي خويطات دالنشير فالباحة الخلفية غير خرجت بغيت نرجع نقلب الدورة و لكن عرفتني غانديرها معيقة
كان محمد شريف عريان من لفوق معلق فواحد الآلة دالرياضة، لابس غير شورط قصير و واخا السم دالبرد هو محاسش بيه
شفت فيه بنص عين و قلبي تزير عليا
تفكرت ماضينا مع بعضنا، الدموع عمرو عيني كانفكر فالقدر كي دار تا لعب بينا هاد اللعبة، مللي كنا سر صغير خاص بين بعضنا كنا أحباء، و اول ماعرفو بينا و تكشف سرنا الصغير رجعنا غرباء
وانا اللي كانت امنيتي يعرفوني مرتو ماكنتش عارفة لا تحققات الامنية غانخسرو هو
نشرت حوايجي وانا كولي كنترعد ، خفت لا يشوفني و يعرفني و ولكن واخا يعرفني هو مخاصوش يتصرف بهاد الاساس حيت تافق مع باه تا هو
كملت شغلي و هزيت السطل و دخلت لداخل
تنهدت بعمق و حرقة وانا ساهية فالفراغ تا لاحضت هود كايشوف فيا مستغرب من وقوفي المتجمد!
أنت تقرأ
سره الصغير
Romanceحصريا 💄 بقد ما هي قصة بسيطة بقد ما طياتها عامرين أحداث و عامرة تشويق "الأسرار ديما خاصهم يبقاو مخبيين" بين صفحات حياته المضلمة المتوحشة ، خبا سر نابض بالحياة ، كانت هي الفصل اللي ماتجرأش يقراه بصوت عالي، هي النغمة الخفية في ألحان يومه، كان مخبيها ف...
