فاقو كامل و كل واحد راح لشغلو و لبنات تلهاو مع بعضهم فالعشية وبين ما هوما قاعدين حتى جاوهم ضيوف
الحاج: قولي للبنات يدخلو لدار
حليمة: علاش يالحاج هادو ضيافنا
الحاج: لالا جيتهم ما طمنتنيش روحي دخليهم دوك انا نروح نفتح البورطاي
حليمة: كيما تحب
راح فتح البورطاي و عدل ابتسامتو
الحاج: مرحبا بيك يالسي جمال
جمال: ترحب بيك الجنة يالسي الحاج
الحاج: اتفضلو ادخلو نقعدو فالحوش
دخلو و الحاج استغرب منو جايب ورد و رجال معاه و حتى الايمام
الحاج : امين روح قوللهم يديرو قهوة
امين: دوك نروح جدي
دخل امين و صاهم على قهوة و الحاج و جمال قصرو شوي
جاب امين القهوة ضيفهم و كملو فالقصرة كمل قهوتو و هدر بجدية
جمال : يالسي الحاج انا جيتك اليوم على حاجة مهمة راح تفيدنا في زوج
الحاج: انعم اتفضل قول
جمال : جئتكم بالحسب و النسب طالب يد بنت محمد الكبيرة لوليدي رافيق
هنا الحاج ما عجبوش الحال و و النسا غير سمعو هكا حكمتهم الخلعة بحكم عارفين انو عائلة جمال و وليدو نتاع مشاكل صح عندهم الدراهم و لباس بيهم بصح الثروة نتاعهم كامل مشبوهة و ماهيش نضيفة
بعيدا على كل هدا احلام كانت في حالة صدمة
احلام: انا انا مستحيل نقبل مستحيل نتزوج دوكا مزالو عندي احلام و طموحات عندي الباك لالالا
حليمة : ما تخافيش يا بنتي جدك مستحيل يوافق
نرجعو لعند الرجال امين بقا مخلوع يشوف فيهم نضرة تقتل
الحاج:يالسي جمال انا ما نقدرش نمدلك الطفلة باباها ماهوش هنا ما تنساش
جمال: وشنو باباها يالحاج نتا الكبير هنا و سيد العرش و نت لي تعطي الكلمة و انا طلبتك في طفلة ما نرجعش الرجال
الحاج: وانا قتلك ما نقدرش نعطيك الطفلة
ناض مبلاصتو و هو معصب و رفد صبعو في وجه الحاج
جمال: كيييفاش تردني علابالك بلي حنا عائلة لباس بيها ووليدي خدام هكااااا تردني
الحاج: ما عنديش بنات لزواج أيا دوك اتفضلو بارا
جمال:والله لا تندم يالحاج
امين : ما سمعاتوش قالك بارا
خرجو و دخل الحاج لدار لقا احلام صفرة وجها ما يتفسرش
الحاج: ما صرا والو وشبيكم اياااا كل واحد لشغلو
أنت تقرأ
بنت الشاوية
General Fictionرواية جزائرية بزاااااف شابة ( و حكاية مبتكرة ) #شاوية #جزائرية #حبـــــــ و تضحيــــــــــــة
