INSTAGRAM: MALAK_ATHMANI1
تعطلت ولكن مطولة ليكم البارت🤌🏻🔥
____________________________________
ناضت من بلاصتها كاتعرج بداك الشورط لي كانت لابساه فالغوز شي لي خلا الد/م يزيد يبان على لحمها لي كان لونو كي يشقشق بالبيوضة ، شعرها البني الحريري طايح على ظهرها بطولتو وفكل مرة كاتردر للور فاش كي يزعجها وهو كي ييطيح ليها على وجهها.
تمشاو فديك الظلمة مخلية يديها سابقينها كاتحسس فين كاتمشي وداك الضو الخافت لي كان مليوح غير على بلاصتها فقط شي لي خلا البلايص لخرين يكونو كلهم ظلام.. الحاجة الزوينة انها ماكانش عندها مشكل انها تمشي فالظلام بل مولفة وهادشي راجع للبالي لي شحال مرة كانت الخشبة كاتكون ظلااام كبجعة بيضاء وسط السواد .
قربات لواحد القنت لي كان كلو ظلام ، كلسات قفازي لايحة رجليها شوية و مدات يديها حيدات داك التيشورت لي لابسة حتا بقات غير بالسوتيان لي كانو توب ، قطعات منو بسنانها حتا ولا شراوط و شداتو فيديها مضوراه على البلاصة د الجرح باش يحبس دام النزيف حيت حسات براسها بدات كاتفقد الد/م و هادشي يقدر يوصلها لحوايج خيب .
بدات كاتلوي فداك القطعة من التيشورت على فخضها و حزماتها بشوية و رجعات راسها للور باش تزير ومع ديك التزييرة لي زيرات حتا غوتات ربي لي خلقهاا وعلى وجهها ملامح الهلع والخوف مخلطين بالالم ديال داك الجرح واللوية لي دارت عليه.
غمضات عينيها وبدات كاتشهق بلا ماتحس بصوت عالي و عينيها تنفخوو بكثرة البكا لي من الصباح كاتبكيه على زهرها لي وصلها هنا..
البنت لي كانت عايشة حياتها نورمال حتا بين ليلة وضحاها كانت بين يدين واحد لي عرفاتو بدون رحمة غير فاش غرس ليها داك الموس ففخضها وهي اصلا مادارت ليه والو، مافهماتش شنو النوع ديالو وماعرفاتش اصلا حتا فين هي ، محبوسة فغرفة كلها سواد ماعارفاش حتا الغرفة شنو فيها الداخل من غير داك الكوافوز والناموسية لي كانت ناعسة فوقها وكلها مجلخة بالد/م ديالها..
غمضات عينيها مسرحة رجل و رجل مخلياها مجموعة لعندها ، ردات راسها للور كتنهج بصوت مسموع حاسة برجليها عاطينها الحريق و وجهها كلو عرقان..
داز الوقـت وكانت بدات كاتسمع الصوت د الخطاوي قراب من الباب ، تكمشات فداك القنت لي كان قريب من الكوافوز فين كان حاط الموس شي لي خلاها تزيد تخبا كثر ...
تسمع الصوت ديال الحلان ديال الباب ، بلعات ريقها و هي كاترجف ، جمعات رجليها لعندها بحركة خفيفة وحذرة فنفس الوقت ..
الصـوت ديال الخطاوي غادين وكي يقربو ، كمشات راسها فبلاصتها مكمشة عينيها وماقادراش حتا تحركهم فالبيت بكثرة ما مخلوعة.. كانت كايبان ليها ظل خفيفة فالبلاصة ديال الضو حتا شوية بدات كاتسمع فصوتو وهو لي كانت عينو غير على داك السرير وبسمة خفية على شفاهو..
