سكت لدقايق وفضلت باصص عليه مش مصدق اللي قاله!
لقيته استعد عشان يمشي من غير كلمة تانية..
وقفته بسرعة وانا بمسك دراعه كأني بتعلق بقشاية، وأخيرًا حد فِهم اللي بيحصل لي ومش معقول بعد ما القيه يمشي كدا من غير ما افهم:
- أنت رايح فين وسايبني يا عم الشيخ، انا ما صدقت لقيت حد فاهم اللي أنا فيه عشان يشرح لي.
وقف والتفت لي وهو بيبتسم:
- ساعات بيبقى الجهل في الحاجات اللي زي دي مطلوب يا ابني، مش مهم تفهم كل اللي بيدور في الكون، اللي يخصك بس انها ما ترجعش تاني وأنا بطمنك هي خلاص مش هترجع تاني..
اضايقت جدًا من اسلوبه وطريقته اللي حسستني أني عيل صغير ومش المفروض العب بحاجه هتضرني!
ملامحي اتغيرت للغضب الشديد من كلامه وأنا بقوله:
- انا مطلبتكش عشان تصرف عني العفريته اللي طلعتلي وتقولي معدتش هترجعلك، ما انا عارفه على فكرة انها مش هترجع، انا طلبتك عشان تفهمني مين هالة وكانت عاوزه مني إيه؟!
ابتسمته ما اتغيرتش وسألني بكل ثقة:
- هو مين قالك إن هالة عفريته!
نفخت بضيق شديد وجاوبته:
- أنت اللي قولت ملعونة بنت ملاعين.
نظرته وهو بيبص لي يتأكد مني هل أنا فعلًا مش فاهم ولا بستهبل عليه خلتني استغرب، ودا خلاني اطلب منه:
- من فضلك يا شيخ تتفضل وتفهمني كل حاجة، انا فعلًا محتاج افهم.
هز راسه كدا بزهق وهو بيقول لي:
- أنتوا كدا تفضلوا ورا المجهول لحد ما تعرفوه وبعد كدا تبوظوا ناوميس الكون وتعملوا خلل في نظام ربنا وبعدين ترجعوا تعيطوا.
ما فهمتش منه هو بيتكلم عن إيه بالظبط، بس اللي لفت نظري كلمة من وسط كلامه، ودا خلاني اكتفي بسؤال واحد:
- احنا مين؟!
التفت ومشي ناحية باب الشقة وهو بيقول لي:
- الفضوليين.
فتح الباب وخرج وأنا لسه واقف مش عارف أقنعه ازاي اني محتاج اعرف اللي حصل واني مش هسكت غير لما اعرف كل حاجة عن هالة لأنها مش أثارت فضولي بس لاء دا أسرت قلبي ومشاعر كتير كنت فاكر انها مش عندي، فضلت باصص عليه وكل دا بيدور في دماغي..
وقبل ما يقفل الباب وراه قال لي:
- نصيحة مني اتمنى أنك تعملها ولو أني أشك، بس ابعد عن العالم دا خالص وحاول تنسى أو تعتبر اللي حصلك ما حصلش، كانت مجرد غلطة وهالة صلحتها قبل فوات الآوان رغم الاخطاء الكتير اللي عملتها، بس نحمد ربنا أنهم سيطروا عليها..
أنت تقرأ
هي هالة
Fantasíaهي امرأة تتحدى العوالم كي تحصُل على حبها الوحيد أو هكذا أقنعت الجميع؛ فلا يوجد أحدٌ يعلم ما تكنهُ في صَدرها سوى هي فقط.. هي امرأة لا تقبل الخسارة بل هي على استعداد لقلب العالم رأسًا على عَقبْ لتُحقق ما تريده حتى لو كانت السبب في أن تفقد الحياة حياته...
