العزبه
كانو جالسين يتقهوون بعد ما خلصو شغل و دخل فهد بعد ما تفقد خيام العرب : والله ياذبحني البرد
الجد محمد بسخريه : لو انك رجال ماتشتكي من البرد الله يا الدنيا قبل كنا نموت من البرد ولا نقول شي
فهد بذهول : طيب ! ترا عادي يعني الرجال ما يبردون ؟!
ابو فهد : روح البس فروتك
فهد : ما جبت شي قلت لدانه تجيب لي اربها ما تنسى
دخل فلاح ببدلة التمريض وهو توه طالع من الجامعه : السلام عليكم
رد الكل السلام
فهد ابتسم : ها يادكتور فلاح كيف الدراسه
فلاح ابتسم : يحبها قلبك
الجد محمد بسخريه: لو انه داخل العسكريه نفس عيال عمه ابرك من ذا
دخل سهم على كلمة جده : هذاني دخلت عسكريه و انفصلت بسببك
الجد محمد وهو يتقهوى : هاذا جزات على احد يرفع صوته علي عشان حرمه
سهم بحده وهو ما كان يهمه اذا احد عرف بحبه لقوس : الحرمه ذي تسوى كل الحريم
الجد محمد: مراح تاخذها وراسي يشم الهواء
سهم ابتسم بسخريه: باخذها وعينك تشوف
ابو فهد : سهم خلاص يابوي
ابو نواف وقف : قومو البسو الرجال على وصول
قامو و دخلو قسم الحريم يلبسون
طلع سهم بسرواله و فنيلته و كان شكله يجذب وكان اكثر شي يجذب عضلاته البارزه وصرخ : نوتتتتتتتتت
طلعت نوت : لبيه بالسهم
سهم ابتسم : ابي ثوبي الأسود وينه ؟
اسيل طلعت و ضحكت : اوه اسود بعد الله يعين قلبنا
سهم ضحك : عندكن احد بالخيمة بجي اسولف عندكن ؟
نوت : تعال تعال البنات بالخيمة الكبيره
( خيمة الضيوف )
سهم طلع و يضحك وهو يشوف اسيل تصوره
الجده الجوهره تكلمت وهي بالخيمة و تشوف سهم يمشي قدامها :جعلني مافقد ذا الزول يا سهم
سهم التفت لجدته : ولا نعدم زولس يام سعود
الجده الجوهره: هاه البس و تعال تراني مشتاقه لك
سهم ضحك : قولي انس غيرانه لأني بروح اسولف مع نوت و اسيل
ضحكت العمه ام هادي : لا تفهمها صح ياسهم
ضحك سهم بصوت عالي و دخل عند خواته
كانت تتأمله تتأمل ضحكته تتأمل مشيته كانت تحبههه و تعشقههه لاكنها تكابر تكابر واجد كانت تغار عليه وهي تشوف البنات كلهم يشوفون صدت اسمع سوالف جدتها
في الخيمه
نوت : طيب وش صار ؟
سهم وهو يمشط شعره : ابد بروح بعد كم يوم و اشوف اذا بيرجعوني لشغلي ولا لا
اسيل : الله يوفقك يارب
سهم : امين ، بروح بكرا لمربط ابوي تتذكرونه ؟
نوت عقدت حواجبها : وش تبي بمربط ابوي الله يرحمه ؟ مهجور من رحت السجن
سهم هز راسه : شفته وانا داخل من الديره بروح بكرا انا و كم واحد من العيال ننظفه و نرجعه مثل ماكان واحلى و بروح اشتري ورود و نخل نزرعها و اشتري اكل للخيول و الصقور بعدين بجيبهم
اسيل بذهول : بتسوي كل ذا بكرا ! تعب عليك
سهم : لاتعب ولاشي ربعن تعاونو ما ذلو كل واحد بيسوي شي وبنخلص انشاءالله
نوت : انشاءالله
سهم تعصّب بغترته و طلع وتكلم بصوت عالي : عندس احد يام سعود ؟
الجده الجوهره: تعال مابه احد
دخل و جلس جنب جدته سهم غمز لها : ايه ما ودتس تقهويني ؟
الجده الجوهره ابتسمت وهي تعرف قصده : ابشر والله باحلى قهوه ، قوس
التفت قوس وهي كانت ساهيه بعدين استوعبت : لبيه
الجده الجوهره: قومي قهوي سهم
قوس بذهول : انا اقهوي سهم ! خواته موجودات
الجده الجوهره: ترا للحين ما خرفت ادري انهم موجودات بس ابيتس انتي تقهوين سهم فيها شي ؟
قوس ناظرته يتأملها بدون اهتمام للجالسين شمقت له وصدت تصب له
ناظرها سهم وناظر جدته : الله يستر كان خليتي احد ثاني يصب لي
قوس مدت له الفنجال : اقول اشرب وانت ساكت
سهم ابتسم وجلس يناظرها ناظرته و صدت بأحراج من نظرات البنات و الأمهات
دخلو العيال : السلام عليكم
رد الكل السلام و جلسو
سعود : شخبارس ياجده
الجده الجوهره: بخير الحمدالله وينك فيه ما جيت معهم الصبح ؟
سعود : رحت اشتري محاصيل
الجده الجوهره: ويش هو ؟
سطام : بُن ياجدي
الجده الجوهره: انا فهمت الأولى عشان افهم الثانيه ؟
سهم : جده هاذا قهوه محمصه سوداء مو عربيه
الجده الجوهره: ايه ايه اقول قم اشرب قهوه عربيه احسن لك من ذا الأسيود
ضحكو كلهم
سهم لف لدانه : دانه انتي احسن وحده تسوين شاي شرايس تسوين لنا شاي ونجتمع ب اليل هنا
دانه ابتسمت : خلاص ابشر انا بسوي لكم الشاي
هادي : وانا بجهز الجلسه
سهم : وانا بشب الضو
اسيل : حلو اتفقنا
سهم لف لجدته : ما ودتس تسهرين معنا
الجده الجوهره: لا وين بنام بدري عشان اقوم بدري
سهم غمز لها : قولي مقدر انام الا مع الحب
الجده الجوهره ضحكت : قم قم انقلع
سمعو صوت حريم
ام سهم : اطلعو اطلعو من وراء الخيمه الحريم جاو
وقفو العيال بسرعه و طلعو من وراء الخيمه طلع سهم وكانت قوس جنب الباب حط بيدها ورقه بدون احد ينتبه و طلع بسرعه ناظرت الورقه و ناظرته و فتحتها وشافت رقمه الجديد ابتسمت ووقفت تستقبل الحريم
أنت تقرأ
أنا سهمها وهي قوسي 🏹....
Боевикثاني روايه لي اتمنى تعجبكم ( انا سهمها وهي قوسي ) اذا كان في اخطاء فاعذروني كله من الكيبورد الكاتبه : عُذوب بنت عبدالله 🤍.
