روايــــة كـانــوا وحـوشـاً بــل ذئـــــــاب

الـحلقـــــة الـاولـى

روايــــة كـانــوا وحـوشـاً بــل ذئـــــــاب

بـقـلـم الــكــاتبـــه سُـــــــلاف حـــمــد

المقدمــــــــــة:

انا إيلاف عمري 16 و بعد اسبوعين حيكون عيد ميلادي يلي يصادف اول يوم مدرسة ويلي هو اول يوم لثانيه ثانوي كنت متحمسه عشان حنبدا شيء جديد لانه قسم (علمي) ف بالنسبه ليا شعور حلو و في نفس الوقت كنت متضايقة لانه لاول مرة حنبدا سنة جديدة بدون صديقتي يلي زي اختي "تيسير" قرينا مع بعضنا من اولى ابتدائي، في بداية طبعا كنا صغار يوم مصاحبين و عشرة لا بس مع الوقت علاقتنا صارت اقوى اكثر و اكثر و لانه قرينا مع بعضنا 10سنين يعني لعند اولى ثانوي بالنسبة ليا بديت نحس وجودنا مع بعضنا دعم للدراسة....

اكيد بتعرفو وين تيسير وليش مش حنقرو مع بعضنا تيسير حولت إلى مدرسة اخرى غير المدرسة يلي مفروض ان نقرو فيها زي ما تقولو هلي يبو المدرسة يلي انا حندرس فيها و اهلها يبو وحدة ثانية لذلك كل وحدة حتدرس في مكان، طبعا الفترة هذي كنا متأثرين بكل و مكنش نتخيلو كيف بتمشي السنة و على امل أن نردو نقرو مع بعضنا...

كنت نجهز في نفسي و ناخذ في حاجات يلي ناقصات للمدرسة و الحمدلله انا كنت بنت مستواية عالي و درجاتي ممتازة
و مع الوقت حنعرفكم على باقي الشخصيات الأساسية و حنحكو على كل وحده .

الـحلقـــــة الـاولـى (بدايــة جديـدة)

بعد اسبوعين .. ساعة 6 الصبح يوم 2024/9/1:

ماما ك العادة تخش تفتح الستارة ع الاخير

امي: هيا نوضي تاخذي في وقت عشان تلبسي و تكملي انتِ!!

طبعا دائما في حماس لليوم الاول و خصوصا كلمة طالبات ثانية علمي تخليني نتحمس اكثر ... المهم لبست و كملت و ما بين بابا و خويا و من يلي يبي ينوض و يوصلني 🥲

...
عائلة اينور زميلتي في المدرسة ••

منى كانت تجهز في الفطور لـ صالح لانه عنده عمل و في نفس الوقت يبي يوصل اينور

اينور دخلت للمطبخ:

اينور: انا لبست تمام .. نساعدك في حاجة؟
منى: لا خلاص نستنى في القهوة تجهز بس
اينور: تمام وين فطوري؟
منى: فطورك؟!
اينور: ماشية للمدرسة انا اليوم
منى: به عارفة .. شنو صغيرة انتِ؟ جهزي فطورك بنفسك
اينور: مش قصة صغيرة بس لكي ساعة في المطبخ وقلتي نجهز الفطور و انتِ البسي بسرعة!!
منى: 🙄 .. هذي القهوة جاهزة، نبي نمشي انوض باتك لو تبي فطور جهزي لروحك ... و طلعت
اينور: لا إله إلا الله .. منعرفش شنو مشكلتها معايا، به كنتِ احكي من البداية مش تخلي الوقت يضيع!!

منى زوجة والد اينور .. ام اينور توفت وهي في عمر الـ 4 سنوات و لما كان عمر اينور 5 او 6 سنوات تزوج صالح منى، يعني تعتبر هي يلي ربتها لذلك اينور تحترم فيها و تحاول اتها تسايرها لانه معاملتها تغيرت من بعد ما منى ولدت ايمور (اخت اينور الصغيرة) عمرها 5 سنوات ... ولادتها بعد سنين طويلة غيرّتها مع اينور يلي تعتبر ربتها هي.