Don't Hide From Me (ဘာသာပြန်)

အပိုင်း(၆) ကောင်းကင်ပေါ်ကပိုင်မုန့်

အသံက အရမ်းကိုနူးညံ့လွန်းနေ၏။ သူ့ခါးတစ်ဝိုက်ကိုပွေ့ထားတဲ့ လုရွှမ်ရဲ့လက်များကိုသာ သတိမထားမိပါလျှင် သူ့ကိုယ်သူထင်ယောင်ထင်မှားဖြစ်နေတယ်လို့ မြင်မိတော့မည်။

ယဲ့ယောင် ရှော့ခ်ရလုနီးပါးဖြစ်သွားကာ ခေါင်းကိုနောက်လှည့်ကြည့်လိုက်တော့ သူ့နောက်မှာရှိတဲ့လုရွှမ်၏စူးနစ်နစ်အကြည့်များကြောင့် သူ့အမူအရာမှာ သင်္ကာမကင်းသောအမူအရာအဖြစ် လုံးဝကိုပြောင်းလဲသွားလျက်။

လုရွှမ်ရဲ့အမူအရာက ပြောမပြတတ်လောက်အောင် လုံးဝကိုထူးဆန်းနေပေ၏။ စောနကတုန်းက ပြုံးလိုက်တာကြောင့် နှုတ်ခမ်းထောင့်စွန်းလေးများ ကော့တက်နေသည့်ဟန်ဖြစ်နေသေး၏။ သို့ပါသော်လည်း ယဲ့ယောင်၏မယုံကြည်နိုင်သောအကြည့်တစ်ချက်ကိုတွေ့လိုက်ရသည့်အခါ ထိုအမူအရာမှာ လုံးဝပျောက်ကွယ်သွား၍ ပုံမှန်အတိုင်း ပြန်ဖြစ်သွားပေ၏။

"မင်း ဘာပြောလိုက်တာ?"

ယဲ့ယောင် မသေချာ၍ ပြန်မေးလိုက်သည်။

"သေချာမကြားလိုက်ဘူးလား အဲ့တာဆို ကျယ်ကျယ်လေးပြောပေးမယ်"

လုရွှမ်၏ပင့်တင်ထားသောမျက်ခုံးများနှင့် ချောမောကာ ဘာကိုမှဂရုမစိုက်သော မျက်နှာတွင် လေးနက်မှုတစ်စွန်းတစ်စကိုမှ ရှာလို့မတွေ့ချေ။

လုရွှမ် ယဲ့ယောင်၏အောက်ပိုင်းကို ဖျတ်ခနဲကြည့်ကာ

"မင်းညီလေးက အရမ်းသောင်းကျန်းနေတာမလား? ငါဒီကလေးကိုကူဆုံးမပြီး မင်းတို့ညီအစ်ကိုကြားပြဿနာကိုဖြေရှင်းပေးမယ်လေ မင်းကိုနောက်ထပ် ဘယ်တော့မှ မဆန့်ကျင်ရဲအောင်ကို ဆုံး‌မပေးဦးမယ် ဘာကိစ္စဒီကောင်က မင်းကိုဆန့်ကျင်ရဲရတာလဲ ?"

ယဲ့ယောင် : "....."

ယဲ့ယောင်တကယ် တုန်လှုပ်နေရပြီ။

သူတွေးထားတာက ဒီပြဿနာရဲ့အကောင်းဆုံးဖြေရှင်းနည်းမှာ လုရွှမ်က သူ့ကိုသွားခွင့်ပေးပြီး ဘာမှမမြင်လိုက်သလိုဟန်ဆောင်မယ်။ နောက်ကျရင်လည်း ဒီကိစ္စကို ဘယ်သူမှပြန်မပြောကြဘဲနေကြမယ်။ ဒါဆိုရင် သူတို့နှစ်ယောက်လည်း ဒီကိစ္စကိုကျော်သွားလိုက်လို့ရပြီပေါ့။